yaum-e-barq

tirī raushan-dimāġhī par haiñ nāzāñ āsmāñ vaale

tirī nāzuk-ḳhayālī par haiñ hairāñ gulsitāñ vaale

tirī azmat ke qaa.il dil se haiñ sāre-jahāñ vaale

suḳhan-dānoñ kī mahfil meñ tū sham-e-husn-e-mahfil hai

sitāroñ meñ ziyā-afroz misl-e-māh-e-kāmil hai

samajhte haiñ tujhe sālār apnā kārvāñ vaale

kahīñ alfāz meñ husn-e-haqīqī kī haiñ tasvīreñ

kahīñ ash.ār meñ ramz-e-mohabbat kī haiñ tafsīreñ

tire dīvāñ ko jām-e-jam samajhte haiñ jahāñ vaale

kahīñ aañsū kahīñ naġhme kahīñ jalve javānī ke

tire ash.ār ā.īne haiñ hāl-e-zindagānī ke

ki jin meñ apnī sūrat dekh lete haiñ jahāñ vaale

kahīñ hubb-e-vatan kī aag lafzoñ meñ bharī dekhī

kahīñ manzar-nigārī kī hasīñ jādūgarī dekhī

vo tashbīheñ haiñ jin par naaz karte haiñ zabāñ vaale

jahāñ tū ne zarā barq-e-jamāl-e-sher chamkā.ī

vahīñ ik zindagī kī lahr sī dauḌī nazar aa.ī

tirī sho.ala-navā.ī par haiñ chup shabnam-sitāñ vaale

tire ash.ār ne rañg-e-qubūl-e-ām paayā hai

jahāñ meñ tū ne apnī sheriyat se naam paayā hai

hamesha yaad rakkheñge tujhe hindostāñ vaale

teri raushan-dimaghi par hain nazan aasman wale

teri nazuk-KHayali par hain hairan gulsitan wale

teri azmat ke qail dil se hain sare-jahan wale

suKHan-danon ki mahfil mein tu sham-e-husn-e-mahfil hai

sitaron mein ziya-afroz misl-e-mah-e-kaamil hai

samajhte hain tujhe salar apna karwan wale

kahin alfaz mein husn-e-haqiqi ki hain taswiren

kahin ashaar mein ramz-e-mohabbat ki hain tafsiren

tere diwan ko jam-e-jam samajhte hain jahan wale

kahin aansu kahin naghme kahin jalwe jawani ke

tere ashaar aaine hain haal-e-zindagani ke

ki jin mein apni surat dekh lete hain jahan wale

kahin hubb-e-watan ki aag lafzon mein bhari dekhi

kahin manzar-nigari ki hasin jadugari dekhi

wo tashbihen hain jin par naz karte hain zaban wale

jahan tu ne zara barq-e-jamal-e-sher chamkai

wahin ek zindagi ki lahr si dauDi nazar aai

teri shoala-nawai par hain chup shabnam-sitan wale

tere ashaar ne rang-e-qubul-e-am paya hai

jahan mein tu ne apni sheriyat se nam paya hai

hamesha yaad rakkhenge tujhe hindostan wale