yaum-e-jamhur

yaum-e-jamhūr tere aane par

naach uThe haiñ masarratoñ ke payām

in ujāloñ meñ zulmateñ to nahīñ

sochte haiñ mire vatan ke avaam

jagmagātā hai vaqt kā chehra

be-basoñ par jahān hañstā hai

apne ruḳh par nahīñ hai mauja-e-nūr

jhoñpaḌī kis tarah ho rashk-e-mahal

jām-e-jamhūriyat to piite haiñ

hasrateñ dam jo toḌ deñ ghuT kar

lekin is meñ nahīñ hai kaif-o-surūr

zindagī kyuuñ na ho shikār-e-ajal

apne hasrat-bhare muqaddar kā

is tarah ham mazāq uḌāte haiñ

ḳhud hī rote haiñ vaqt kā ronā

aur phir ḳhud hī muskurāte haiñ

yaum-e-jamhur tere aane par

nach uThe hain masarraton ke payam

in ujalon mein zulmaten to nahin

sochte hain mere watan ke awam

jagmagata hai waqt ka chehra

be-bason par jahan hansta hai

apne ruKH par nahin hai mauja-e-nur

jhonpaDi kis tarah ho rashk-e-mahal

jam-e-jamhuriyat to pite hain

hasraten dam jo toD den ghuT kar

lekin is mein nahin hai kaif-o-surur

zindagi kyun na ho shikar-e-ajal

apne hasrat-bhare muqaddar ka

is tarah hum mazaq uDate hain

KHud hi rote hain waqt ka rona

aur phir KHud hi muskuraate hain