ye basti meri basti hai

jahāñ maiñ huuñ

yahāñ jab raat hotī hai

to us sāhil pe sūraj nuur barsātā hai

jis kī ek ik mauj-e-ravāñ ke saath

merā dil dhaḌaktā thā dhaḌaktā hai

ye merā shahr ye merī galī merā mohalla hai

jo merā bas chale

maiñ is galī kī dhuul palkoñ se uThā luuñ

chuum luuñ is meñ nahā luuñ

oḌh luuñ is ko bichhā luuñ

aur is meñ dafn ho jā.ūñ

ye ujlī dhuul jis meñ merī yādoñ ke

hazāroñ rang raqsāñ haiñ

jahāñ ab bhī mirā bachpan

sunahrī ta.aziyoñ ke panniyoñ se

aur ravāsan ke daraḳhtoñ se

mujhe āvāz detā hai

vo kahtā hai yahāñ aao idhar dekho

abhī tak ye mohalla pahle jaisā hai

yahāñ rangīn tyauhāroñ ke pairāhan meñ

insānī ta.alluq ke sabhī jazbe

tavāzun se abhī tak ek se mausam meñ Thahre haiñ

yahāñ par gyārahvīñ ke chāñd kī ab bhī vahī raunaq hai

rangīñ shāmiyānoñ aur chiTTī chāñdnī par duur tak

qavvāliyoñ kī rūh-afzā lahr kī vo itr-sāmānī abhī bhī hai

vahī Dhaltī huī shab aur vahī bād-e-sabā ke dosh par

ḳhvāja ke dīvānoñ kī āvāzoñ kī sarmastī

vahī ḳhvāja mire ḳhvāja muīnuddīn kī gardān

usī gardān meñ allāh jaane kaisā jaadū thā

ki ab tak hāfize se us kī shīrīnī nahīñ jaatī

yahāñ māh-e-muharram kī numūdārī pe yaksāñ josh se

fārūq-o-haidar ā.isha-o-fātima mil kar

sabīleñ ab bhī nanhe-munne hāthoñ se lagāte haiñ

vo miTTī ke ghaḌoñ par surḳh gābis mal ke

un ko rahguzar par ek sī tartīb se ab bhī sajāte haiñ

sabīleñ surḳh kapḌoñ se muzayyan jagmagātī haiñ

har ik pyāse ko rasta rok kar paanī pilātī haiñ

yahāñ usmān baabā vaalā ūñchā ta.aziya ab bhī khaḌā hotā hai

jis kī jhilmilāhaT mere andar aise raqsāñ hai

ki us kī ḳhīrgī se ruuh tak merī munavvar hai

mire andar jo hai ik dard kī nannhī sī lau raushan

usī āvāz kī bālīdgī kā ek partav hai

mire usmān baabā kī vo ashkoñ se dhulī āvāz

nau kī raat ko jo vo shahādat-nāma paḌhtā thā

ġham-e-shabbīr kā ye soz us par ḳhatm thā goyā

ajab kirdār thā usmān baabā kā

har ik bachcha thā us kā sar-chaḌhā vo chāhe jis kā ho

sakīna mārvī se le ke

vo galiyoñ meñ jhāḌū dene vaale

apne joseph daas kā laḌkā talak us kā chahītā thā

ajab fihrist thī us kī ki us fihrist meñ koī

na gorā thā na kaalā thā na ūñchā thā na nīchā thā

hamāre us mohalle meñ

ḳhudā ke fazl se har samt Dheroñ Dher bachche the

kabhī aisā bhī hotā thā ki sab usmān baabā par

achānak saath hī yalġhār karte the

magar phir bhī barābar se

na jaane kis tarah ham sab meñ vo jangal jalebī baañT detā thā

hamāre us mohalle meñ ka.ī kirdār the jin meñ

vo gahrī gahrī kaalī āñkhoñ aur shīshe kī jhilmil oḌhnī vaalī

sakīna mārvī merī sahelī thī

vo maañ ke saath paTrī paar se piine kā paanī lene aatī thī

hamāre ghar ke aur māler ke us khet ke mābain

ye ik rail kī paTrī ḳhat-e-tansīḳh thī goyā

sakīna mārvī bhī kyā ajab laḌkī thī

jo merī zabāñ se aur maiñ jis kī zabāñ se nā-balad thī

phir bhī jaane kis tarah shīr-o-shakar the ham

hamārī chhoTī chhoTī ḳhvāhisheñ har taur ham-āhañg thiiñ itnī

ba-zāhir to hamāre darmiyāñ

māhaul ne ik be-zarūrat hadd-e-fāsil khīñch rakkhī thī

magar phir bhī na jaane kyā kashish thī

khiḌkiyoñ ke us taraf se jhilmilātī

mārvī kī kaalī āñkhoñ meñ

na jaane kaun sā jaadū thā un zālim dopahroñ meñ

jo kachchī niiñd sotā chhoḌ kar maañ ko dabe qadmoñ

meñ aa chhuptī thī peḌoñ meñ

ajab be-ḳhauf mausam the

ham aksar baaġh se ik saath hī

amrūd kī chorī meñ pakḌe jā chuke the par

samajh meñ ye nahīñ aatā

ki maalī kī har ik gaalī har ik patthar

akelī mārvī hī ke liye maḳhsūs thā kyūñkar

hamāre is mohalle ke sire par āḳhirī ghar maa.e kā thā

yuuñ to kahlātī thī maa.e bohaḌ vaalī

lekin us ke ghar ke āñgan meñ faqat ik niim hotā thā

koī jab pūchhtā maa.e se vajh-e-tasmiya is naam kī

to vo bahut dhīre se hañstī aur kahtī thī

ajī vo baḌ kā ūñchā peḌ to maiñ huuñ

kabhī hañstī huī āñkhoñ meñ us kī jhāñk kar dekho

to lagtā thā chhalak uTTheñgī par itnā hī kahtī thī

kabhī lahore dekhā hai

miyāñ vaalī se guzre ho

nahīñ dekhe agar ye shahr to kyā ḳhaak dekhā tum ne duniyā meñ

kabhī lahore se guzro to thoḌī der ko ruk kar

mohalla bohaḌ vaalā chauk meñ merā kisī se naam le denā

miyāñ vaalī ko jaanā ho

to vaañ dīvār par baiThe hue kaagā se

merī maañ kā aur pyo kā zarā ahvāl le lenā

vo phir se hañsne lagtī thī

jagat maañ thī vo

so chhoTā baḌā har koī us ko maa.e hī kah kar bulātā thā

savere hī savere maa.e ke hāthoñ ke

un muulī bhare ḳhasta parāThoñ ke binā

kab sardiyoñ kā lutf aatā thā

gulābī jaaḌe aate hī

chhatoñ par muḳhtalif dāloñ kī baḌiyāñ sūkhne lagtīñ

zarā ḳhunkī baḌhī aur til ke laDDū le ke maa.e aa pahuñchtī thī

haqīqat meñ vo baḌ kā peḌ thī jis kī ghanī chhāyā

thī sab ke vāste yaksāñ

mirā bachpan bulātā hai to mujh ko yaad aatā hai

us ābādī meñ aur us rail kī paTrī meñ jo bhī fāsla thā

us ko ḳhud-rau jhāḌiyoñ ne Dhāñp rakkhā thā

magar aksar yahāñ par saal pīchhe aisā hotā thā

ki ham schōl jaane ko savere ghar se nikle to

ThiThuk jaate the pal bhar ko

ham āñkheñ mal ke phir se dekhte jangal meñ mangal hai

vo ḳhud-rav jhāḌiyāñ ham jin meñ titlī bhī pakaḌne ko agar jaate

to zaḳhmī ho ke aate the

vo rātoñ raat chhat ke taur aur dīvār kī sūrat

khaḌī dikhlā.ī detī thiiñ

ye sab banjāroñ ke hī khurdure hāthoñ kī barakat thī

ki ḳhār-o-ḳhas ko bhī chhū leñ to vo us ko chaman kar deñ

jahāñ gardūñ ke chhoTe chhoTe ye Tole

hazāroñ saal se gardish meñ haiñ

aur kitnī tahzīboñ ke jangal se ye guzre haiñ

magar apnī alag tārīḳh aur tahzīb rakhte haiñ

ye apne nain apne naqsh aur āvāz kā jaadū

na jaane kaun sā qānūn hai jis ke tahat

nasloñ kī aur tahzīb kī yalġhār se yaksar bachā.e haiñ

jo un meñ jhāñk kar dekho to tah-dar-tah

hazāroñ rang the chhoTī sī duniyā meñ

mirā ma.amūl thā schōl se aate hue aksar

Thahar kar dekhtī thī us na.ī duniyā ke hangāme

sunahrī jhāḌiyoñ ke biich piile phuul hañste the

vo chhoTe chhoTe se

bakrī ke bachchoñ ke gale meñ ghanTiyoñ kā shor

aur vo murġhiyoñ kā aur batoñ kā

paroñ ko phaḌphaḌānā aisā lagtā thā

farishte baat karte haiñ

hasīñ āñkhoñ sunahrī choTiyoñ vaalī

yahāñ chhoTī sī jugnī khelne kī umr meñ

miTTī ke hāthī aur ghoḌe meñ

jo mehnat ke anokhe rang bhartī thī

mirī āñkhoñ ne phir vaise khilaune hī nahīñ dekhe

vo gaatī thī to lagtā thā koī dil khīñche letā hai

vo maañ ke saath ham-āvāz hotī thī

bulā lo yā-rasūlullāh

hameñ bhī apne roze par bulā lo yā-rasūlullāh

vo sar-tā-pā faqat āvāz thī yā bāñsurī koī

ye chhoTā sā mohalla kyā thā ik rangīn duniyā thī

jahāñ par mausamoñ kī saḳhtiyoñ meñ bhī anokhā husn hotā thā

hamesha sardiyoñ kī raat meñ

soñdhī sunahrī mūñg-phaliyoñ aur chilġhozoñ ke Thele tak

ḳhirad gul-ḳhair kī āvāz ham ko bistaraoñ se khīñch laatī thī

gulāboñ meñ basī vo reveḌiyāñ

aur bhobhal meñ dabī mīThī shakar-qandī

shakar-qandī to az ḳhud hai shakar-qandī

magar vo shai ki jis ko zā.iqa kahte haiñ

vo dar-asl thī tāsīr miTTī kī

vo sā.īñ allāh Diino ke hare amrūd

laala shyām kī qulfī malā.ī

aur Dere vāliyoñ ke miTTiyoñ ke hāthī ghoḌe

DugDugī pañkhe khilaune aur ġhubbāre

sabhī meñ rang the kitne

yahāñ miTTī ke chhoTe se khilaune meñ bhī

nanhā sā humaktā dil dhaḌaktā thā

yahāñ kāThī ke ghoḌe kī uḌāneñ āsmāñ tak thiiñ

mujhe jab yaad aatī hai

to dīvāna sā kar detī hai vo ḳhushbū ravāsan kī

vahī māler ke khetoñ kī albelī havā

amrūd aur shahtūt ke peḌoñ kī vo shāḳheñ

ki jin par mere bachpan kā baserā thā

vo kāñToñ kī sunahrī jhāḌiyāñ

maiñ jin meñ aksar apnī āñkheñ bhuul aatī thī

vo masjid jis kī chhoTī chhoTī dīvāroñ pe

bachche dauḌe phirte the

jis ke farsh par taḌke ke jaisā nuur thā

ThanDak thī aur āsūdgī har-sū

jahāñ dar par khaḌe chhitnār gūlar par

rupahlī champa.ī aur kāsnī pariyāñ utartī thiiñ

kabhī qur.ān paḌhte paḌhte ham gūlar kī pariyoñ ke tasavvur meñ

zarā sā rehl par bas ek jhapkī le ke

pariyoñ se gale mil ke

palaT aate the vāpas maulvī sāhab kī qamchī se

musalsal tā'ziyoñ kī panniyoñ se aur masjid kī muñDeroñ se

musalsal haidar-o-fārūq kī rangīñ sabīloñ se

sakīna mārvī kī oḌhnī meñ jhilmilāte nanhe shīshoñ se

vo jugnī vaale chhoTe laal miTTī ke khilaunoñ se

ravāsan ke daraḳhtoñ se

mirā bachpan mujhe āvāz detā hai

vo kahtā hai abhī tak ye mohalla pahle jaisā hai

ye mumkin hai maiñ us kī maan bhī letī

magar maiñ ne abhī jo hosh kī āñkhoñ se dekhā hai

vo manzar aur hī kuchh kah rahā hai mājrā kyā hai

vahī kirdār haiñ saare vahī merā mohalla hai

vahī haiñ mere ham-jolī har ik mānūs chehra hai

magar jo hai vo sahmā hai

ye peḌoñ ke bajā.e ḳhauf ke saa.e meñ baiThe haiñ

ye bachche kaise bachche haiñ

musalsal guftugū kā in ke mehvar sirf golī hai

magar golī ke pīchhe aḳhtar-o-anvar bhī laḌte the

mujhe bhī achchhe lagte the bahut ye ḳhushnumā kanche

ki jab rakh kar hathelī par use ik aañkh se dekho

to khiñch aate the kitne rang is nanhe se kanche meñ

kabhī mahsūs hotā thā

ki ham ne ik hathelī par uThā rakkhī hai ye duniyā

ye saare barr-e-āzam bahr-e-āzam ab hamārī dastaras meñ haiñ

ajab qudrat ajab taskīn kā ehsās hotā thā

magar ye mere ham-jolī

ye jis golī kī bāteñ kar rahe haiñ

is meñ chiñgārī hai aur bārūd kī bū hai

abhī bilkul abhī maiñ ne khulī āñkhoñ se dekhā hai

ki manzar kaise badlā hai

vahī masjid kā darvāza vahī hai peḌ gūlar kā

aur us gūlar ke nīche

ik hasīñ āñkhoñ sunahrī choTiyoñ vaalī

vo laḌkī merī jugnī thī

abhī bilkul abhī maiñ ne khulī āñkhoñ se dekhā hai

ki us kā jism TukḌe TukḌe ho kar kaise bikhrā hai

magar phaile hue hāthoñ meñ ik roTī kā TukḌā hai

vo masjid kā muqaddas farsh us ke ḳhuuñ se bhīgā hai

vo gūlar jis pe mere ḳhvāb kī pariyoñ kā Derā thā

faqat aaseb lagtā hai

dikhā.ī kuchh nahīñ detā

lahū meñ shor barpā hai

sunā.ī kuchh nahīñ detā

jo dil par haath rakkho to

faqat itnā hī kahtā hai

vo iisā chauk ho yā daas manzil kā koī mandir

lohārī gate ho yā goTh qāsim kī koī bastī

vo bāb-ul-ilm ho yā masjid-e-siddīq-e-akbar ho

husain-ābād ho yā vo mirī fārūq nagrī ho

jahāñ bhī goliyāñ chaltī haiñ mere dil pe lagtī haiñ

har ik vo ghar jahāñ mātam bapā hai merā apnā hai

ye jitnā ḳhuun bhī ab tak bahā hai merā apnā hai

muqaddas ḳhaak par bikhre hue udhḌe hue a.azā

junūñ kī aag meñ jhulsā huā har laash kā chehra

agar pahchān mushkil ho to merā naam likh denā

ye a.azā mere a.azā haiñ

ye chehra merā chehra hai

jahan main hun

yahan jab raat hoti hai

to us sahil pe suraj nur barsata hai

jis ki ek ek mauj-e-rawan ke sath

mera dil dhaDakta tha dhaDakta hai

ye mera shahr ye meri gali mera mohalla hai

jo mera bas chale

main is gali ki dhul palkon se uTha lun

chum lun is mein naha lun

oDh lun is ko bichha lun

aur is mein dafn ho jaun

ye ujli dhul jis mein meri yaadon ke

hazaron rang raqsan hain

jahan ab bhi mera bachpan

sunahri taziyon ke panniyon se

aur rawasan ke daraKHton se

mujhe aawaz deta hai

wo kahta hai yahan aao idhar dekho

abhi tak ye mohalla pahle jaisa hai

yahan rangin tyauhaaron ke pairahan mein

insani talluq ke sabhi jazbe

tawazun se abhi tak ek se mausam mein Thahre hain

yahan par gyarahwin ke chand ki ab bhi wahi raunaq hai

rangin shamiyanon aur chiTTi chandni par dur tak

qawwaliyon ki ruh-afza lahr ki wo itr-samani abhi bhi hai

wahi Dhalti hui shab aur wahi baad-e-saba ke dosh par

KHwaja ke diwanon ki aawazon ki sarmasti

wahi KHwaja mere KHwaja muinuddin ki gardan

usi gardan mein allah jaane kaisa jadu tha

ki ab tak hafize se us ki shirini nahin jati

yahan mah-e-muharram ki numudari pe yaksan josh se

faruq-o-haidar aaisha-o-fatima mil kar

sabilen ab bhi nanhe-munne hathon se lagate hain

wo miTTi ke ghaDon par surKH gabis mal ke

un ko rahguzar par ek si tartib se ab bhi sajate hain

sabilen surKH kapDon se muzayyan jagmagati hain

har ek pyase ko rasta rok kar pani pilati hain

yahan usman baba wala uncha taziya ab bhi khaDa hota hai

jis ki jhilmilahaT mere andar aise raqsan hai

ki us ki KHirgi se ruh tak meri munawwar hai

mere andar jo hai ek dard ki nannhi si lau raushan

usi aawaz ki baalidgi ka ek partaw hai

mere usman baba ki wo ashkon se dhuli aawaz

nau ki raat ko jo wo shahadat-nama paDhta tha

gham-e-shabbir ka ye soz us par KHatm tha goya

ajab kirdar tha usman baba ka

har ek bachcha tha us ka sar-chaDha wo chahe jis ka ho

sakina marwi se le ke

wo galiyon mein jhaDu dene wale

apne joseph das ka laDka talak us ka chahita tha

ajab fihrist thi us ki ki us fihrist mein koi

na gora tha na kala tha na uncha tha na nicha tha

hamare us mohalle mein

KHuda ke fazl se har samt Dheron Dher bachche the

kabhi aisa bhi hota tha ki sab usman baba par

achanak sath hi yalghaar karte the

magar phir bhi barabar se

na jaane kis tarah hum sab mein wo jangal jalebi banT deta tha

hamare us mohalle mein kai kirdar the jin mein

wo gahri gahri kali aankhon aur shishe ki jhilmil oDhni wali

sakina marwi meri saheli thi

wo man ke sath paTri par se pine ka pani lene aati thi

hamare ghar ke aur maler ke us khet ke mabain

ye ek rail ki paTri KHat-e-tansiKH thi goya

sakina marwi bhi kya ajab laDki thi

jo meri zaban se aur main jis ki zaban se na-balad thi

phir bhi jaane kis tarah shir-o-shakar the hum

hamari chhoTi chhoTi KHwahishen har taur ham-ahang thin itni

ba-zahir to hamare darmiyan

mahaul ne ek be-zarurat hadd-e-fasil khinch rakkhi thi

magar phir bhi na jaane kya kashish thi

khiDkiyon ke us taraf se jhilmilati

marwi ki kali aankhon mein

na jaane kaun sa jadu tha un zalim dopahron mein

jo kachchi nind sota chhoD kar man ko dabe qadmon

mein aa chhupti thi peDon mein

ajab be-KHauf mausam the

hum aksar bagh se ek sath hi

amrud ki chori mein pakDe ja chuke the par

samajh mein ye nahin aata

ki mali ki har ek gali har ek patthar

akeli marwi hi ke liye maKHsus tha kyunkar

hamare is mohalle ke sire par aaKHiri ghar mae ka tha

yun to kahlati thi mae bohaD wali

lekin us ke ghar ke aangan mein faqat ek nim hota tha

koi jab puchhta mae se wajh-e-tasmiya is nam ki

to wo bahut dhire se hansti aur kahti thi

aji wo baD ka uncha peD to main hun

kabhi hansti hui aankhon mein us ki jhank kar dekho

to lagta tha chhalak uTThengi par itna hi kahti thi

kabhi lahore dekha hai

miyan wali se guzre ho

nahin dekhe agar ye shahr to kya KHak dekha tum ne duniya mein

kabhi lahore se guzro to thoDi der ko ruk kar

mohalla bohaD wala chauk mein mera kisi se nam le dena

miyan wali ko jaana ho

to wan diwar par baiThe hue kaga se

meri man ka aur pyo ka zara ahwal le lena

wo phir se hansne lagti thi

jagat man thi wo

so chhoTa baDa har koi us ko mae hi kah kar bulata tha

sawere hi sawere mae ke hathon ke

un muli bhare KHasta paraThon ke bina

kab sardiyon ka lutf aata tha

gulabi jaDe aate hi

chhaton par muKHtalif dalon ki baDiyan sukhne lagtin

zara KHunki baDhi aur til ke laDDu le ke mae aa pahunchti thi

haqiqat mein wo baD ka peD thi jis ki ghani chhaya

thi sab ke waste yaksan

mera bachpan bulata hai to mujh ko yaad aata hai

us aabaadi mein aur us rail ki paTri mein jo bhi fasla tha

us ko KHud-rau jhaDiyon ne Dhanp rakkha tha

magar aksar yahan par sal pichhe aisa hota tha

ki hum school jaane ko sawere ghar se nikle to

ThiThuk jate the pal bhar ko

hum aankhen mal ke phir se dekhte jangal mein mangal hai

wo KHud-raw jhaDiyan hum jin mein titli bhi pakaDne ko agar jate

to zaKHmi ho ke aate the

wo raaton raat chhat ke taur aur diwar ki surat

khaDi dikhlai deti thin

ye sab banjaron ke hi khurdure hathon ki barakat thi

ki KHar-o-KHas ko bhi chhu len to wo us ko chaman kar den

jahan gardun ke chhoTe chhoTe ye Tole

hazaron sal se gardish mein hain

aur kitni tahzibon ke jangal se ye guzre hain

magar apni alag tariKH aur tahzib rakhte hain

ye apne nain apne naqsh aur aawaz ka jadu

na jaane kaun sa qanun hai jis ke tahat

naslon ki aur tahzib ki yalghaar se yaksar bachae hain

jo un mein jhank kar dekho to tah-dar-tah

hazaron rang the chhoTi si duniya mein

mera mamul tha school se aate hue aksar

Thahar kar dekhti thi us nai duniya ke hangame

sunahri jhaDiyon ke bich pile phul hanste the

wo chhoTe chhoTe se

bakri ke bachchon ke gale mein ghanTiyon ka shor

aur wo murghiyon ka aur baton ka

paron ko phaDphaDana aisa lagta tha

farishte baat karte hain

hasin aankhon sunahri choTiyon wali

yahan chhoTi si jugni khelne ki umr mein

miTTi ke hathi aur ghoDe mein

jo mehnat ke anokhe rang bharti thi

meri aankhon ne phir waise khilaune hi nahin dekhe

wo gati thi to lagta tha koi dil khinche leta hai

wo man ke sath ham-awaz hoti thi

bula lo ya-rasulullah

hamein bhi apne roze par bula lo ya-rasulullah

wo sar-ta-pa faqat aawaz thi ya bansuri koi

ye chhoTa sa mohalla kya tha ek rangin duniya thi

jahan par mausamon ki saKHtiyon mein bhi anokha husn hota tha

hamesha sardiyon ki raat mein

sondhi sunahri mung-phaliyon aur chilghozon ke Thele tak

KHirad gul-KHair ki aawaz hum ko bistaraon se khinch lati thi

gulabon mein basi wo reweDiyan

aur bhobhal mein dabi miThi shakar-qandi

shakar-qandi to az KHud hai shakar-qandi

magar wo shai ki jis ko zaiqa kahte hain

wo dar-asl thi tasir miTTi ki

wo sain allah Dino ke hare amrud

lala shyam ki qulfi malai

aur Dere waliyon ke miTTiyon ke hathi ghoDe

DugDugi pankhe khilaune aur ghubbare

sabhi mein rang the kitne

yahan miTTi ke chhoTe se khilaune mein bhi

nanha sa humakta dil dhaDakta tha

yahan kaThi ke ghoDe ki uDanen aasman tak thin

mujhe jab yaad aati hai

to diwana sa kar deti hai wo KHushbu rawasan ki

wahi maler ke kheton ki albeli hawa

amrud aur shahtut ke peDon ki wo shaKHen

ki jin par mere bachpan ka basera tha

wo kanTon ki sunahri jhaDiyan

main jin mein aksar apni aankhen bhul aati thi

wo masjid jis ki chhoTi chhoTi diwaron pe

bachche dauDe phirte the

jis ke farsh par taDke ke jaisa nur tha

ThanDak thi aur aasudgi har-su

jahan dar par khaDe chhitnar gular par

rupahli champai aur kasni pariyan utarti thin

kabhi quran paDhte paDhte hum gular ki pariyon ke tasawwur mein

zara sa rehl par bas ek jhapki le ke

pariyon se gale mil ke

palaT aate the wapas maulwi sahab ki qamchi se

musalsal ta'ziyon ki panniyon se aur masjid ki munDeron se

musalsal haidar-o-faruq ki rangin sabilon se

sakina marwi ki oDhni mein jhilmilate nanhe shishon se

wo jugni wale chhoTe lal miTTi ke khilaunon se

rawasan ke daraKHton se

mera bachpan mujhe aawaz deta hai

wo kahta hai abhi tak ye mohalla pahle jaisa hai

ye mumkin hai main us ki man bhi leti

magar main ne abhi jo hosh ki aankhon se dekha hai

wo manzar aur hi kuchh kah raha hai majra kya hai

wahi kirdar hain sare wahi mera mohalla hai

wahi hain mere ham-joli har ek manus chehra hai

magar jo hai wo sahma hai

ye peDon ke bajae KHauf ke sae mein baiThe hain

ye bachche kaise bachche hain

musalsal guftugu ka in ke mehwar sirf goli hai

magar goli ke pichhe aKHtar-o-anwar bhi laDte the

mujhe bhi achchhe lagte the bahut ye KHushnuma kanche

ki jab rakh kar hatheli par use ek aankh se dekho

to khinch aate the kitne rang is nanhe se kanche mein

kabhi mahsus hota tha

ki hum ne ek hatheli par uTha rakkhi hai ye duniya

ye sare barr-e-azam bahr-e-azam ab hamari dastaras mein hain

ajab qudrat ajab taskin ka ehsas hota tha

magar ye mere ham-joli

ye jis goli ki baaten kar rahe hain

is mein chingari hai aur barud ki bu hai

abhi bilkul abhi main ne khuli aankhon se dekha hai

ki manzar kaise badla hai

wahi masjid ka darwaza wahi hai peD gular ka

aur us gular ke niche

ek hasin aankhon sunahri choTiyon wali

wo laDki meri jugni thi

abhi bilkul abhi main ne khuli aankhon se dekha hai

ki us ka jism TukDe TukDe ho kar kaise bikhra hai

magar phaile hue hathon mein ek roTi ka TukDa hai

wo masjid ka muqaddas farsh us ke KHun se bhiga hai

wo gular jis pe mere KHwab ki pariyon ka Dera tha

faqat aaseb lagta hai

dikhai kuchh nahin deta

lahu mein shor barpa hai

sunai kuchh nahin deta

jo dil par hath rakkho to

faqat itna hi kahta hai

wo isa chauk ho ya das manzil ka koi mandir

lohaari gate ho ya goTh qasim ki koi basti

wo bab-ul-ilm ho ya masjid-e-siddiq-e-akbar ho

husain-abaad ho ya wo meri faruq nagri ho

jahan bhi goliyan chalti hain mere dil pe lagti hain

har ek wo ghar jahan matam bapa hai mera apna hai

ye jitna KHun bhi ab tak baha hai mera apna hai

muqaddas KHak par bikhre hue udhDe hue aaza

junun ki aag mein jhulsa hua har lash ka chehra

agar pahchan mushkil ho to mera nam likh dena

ye aaza mere aaza hain

ye chehra mera chehra hai