ye december hai

suno maiñ jāntī huuñ ye december hai

vahāñ sardī bahut hogī

akele shaam ko jab tum thake qadmoñ se lauToge

to ghar meñ koī bhī laḌkī

sulagtī muskurāhaT se

tumhārī is thakāvaT ko

tumhāre coat par Thahrī huī bārish kī būñdoñ ko

sameTegī na jhāḌegī

na tum se coat le kar vo kisī kursī ke hatthe par

use laTkā ke apne narm hāthoñ se

chhuegī is tarah jaise tumhārā lams paatī ho

tum ātish-dān ke aage simaT kar baiTh jāoge

to aisā bhī nahīñ hogā

tumhāre paas vo aa kar

bahut hī garm coffē kā zarā sā ghūñT ḳhud le kar

vo coffē tum ko de kar tum se ye pūchhe

kaho kyā thak ga.e ho tum

tum apnī ḳhālī āñkhoñ se

yuuñ apne sard kamre ko jo dekhoge to sochoge

ThiThur kar rah gayā sab kuchh

tumhārī uñgliyoñ kī sard poroñ par

kisī ruḳhsār kī narmī

kisī ke hoñT kī garmī

tumheñ be-sāḳhta mahsūs to hogī

magar phir sard mausam kī havā kā ek hī jhoñkā

tumheñ behāl kar degā

thake haare ThiThurte sard bistar par

akele leT jāoge

suno main jaanti hun ye december hai

wahan sardi bahut hogi

akele sham ko jab tum thake qadmon se lauToge

to ghar mein koi bhi laDki

sulagti muskurahaT se

tumhaari is thakawaT ko

tumhaare coat par Thahri hui barish ki bundon ko

sameTegi na jhaDegi

na tum se coat le kar wo kisi kursi ke hatthe par

use laTka ke apne narm hathon se

chhuegi is tarah jaise tumhaara lams pati ho

tum aatish-dan ke aage simaT kar baiTh jaoge

to aisa bhi nahin hoga

tumhaare pas wo aa kar

bahut hi garm coffee ka zara sa ghunT KHud le kar

wo coffee tum ko de kar tum se ye puchhe

kaho kya thak gae ho tum

tum apni KHali aankhon se

yun apne sard kamre ko jo dekhoge to sochoge

ThiThur kar rah gaya sab kuchh

tumhaari ungliyon ki sard poron par

kisi ruKHsar ki narmi

kisi ke honT ki garmi

tumhein be-saKHta mahsus to hogi

magar phir sard mausam ki hawa ka ek hi jhonka

tumhein behaal kar dega

thake haare ThiThurte sard bistar par

akele leT jaoge