ye dharti KHub-surat hai

nahīñ fārūqī! is dhartī ko maiñ hargiz na chhoḌūñgā

mujhe jis daur ne paalā hai, vo be-shak purānā hai

mujhe mahbūb ab bhī ahd-e-rafta kā fasāna hai

magar ye daur-e-nau

ye zau

shuā-e-āgahī kī rau

maiñ itnī ḳhūb-sūrat zindagī se muñh na moḌūñgā

ajal bar-haq sahī lekin

rahegā jab talak mumkin

maiñ chāhūñgā ki lipTā hī rahūñ dhartī ke dāman se

ye dhartī āsmānoñ se ziyāda ḳhūb-sūrat hai

ye mahbūba hai

is meñ maañ kī shafqat kī bhī azmat hai

zabardastī jo maut aa.ī

(vo aatī hai aur ā.egī)

to maiñ koshish karūñgā to shāḳh-hā-e-lāla-o-gul ko

jakaḌ luuñ apne hāthoñ se

gulāboñ se kahūñgā tum abhī mujh ko na jaane do

agar haarā to is duniyā kī saarī dilkashī le kar

zamīñ kī god hī meñ ek gahrī niiñd so lūñgā

maiñ mahbūba nahīñ maañ se kahūñgā phir jagā denā

baḌā ziddī sā bālak huuñ

maiñ terī god se ḳhud shola-e-gul ban ke ubharūñgā!

ajab aalam thā

aur maiñ āsmāñ se saḳht barham thā

ḳhudā ko gāliyoñ par gāliyāñ dene meñ khoyā thā

ki munnī ne kahā ''dekho ḳhudā ne mujh ko bhejā hai''

magar is vaqt munnī bhī mujhe manhūs lagtī thī

mahīne guzre fārūqī!

magar ab sochtā huuñ maiñ

koī maane na maane ik ḳhudā hai naam jo bhī ho!

na umr-e-ishq baaqī hai

na mai-ḳhāna na paimāna

na nazroñ meñ

kisī shahnāz-e-lāla-ruḳh kā kāshāna

to kyā hamd o salām o na.at likkhūñ ye nahīñ mumkin

to masjid hī karūñ ābād kuchh karnā zarūrī hai

ḳhudā bhī mujh ko kāhil pā ke phir barham na ho jaa.e

magar fārūqī! duniyā aaj behad ḳhūb-sūrat hai

ba-īñ umr-e-tābī.ī mujh ko bhī us kī zarūrat hai

ḳhudā fankār hai vo bhī yaqīnan chāhtā hogā

ki dekhe us kī san.at se kise kitnī mohabbat hai

agar maiñ is zamīñ aur is kī ra.anā.ī ko apnā luuñ

to merā dil ye kahtā hai ki ye bhī ik ibādat hai

abhī ye sochtā huuñ kal ḳhudā hī jaane kyā sochūñ

musalsal sochte rahnā mirī bachpan kī aadat hai

divālī aur sub.h-e-īd fārūqī! mubārak ho

mujhe chhoḌo meñ jis aalam meñ huuñ vo merī qismat hai!!

nahin faruqi! is dharti ko main hargiz na chhoDunga

mujhe jis daur ne pala hai, wo be-shak purana hai

mujhe mahbub ab bhi ahd-e-rafta ka fasana hai

magar ye daur-e-nau

ye zau

shua-e-agahi ki rau

main itni KHub-surat zindagi se munh na moDunga

ajal bar-haq sahi lekin

rahega jab talak mumkin

main chahunga ki lipTa hi rahun dharti ke daman se

ye dharti aasmanon se ziyaada KHub-surat hai

ye mahbuba hai

is mein man ki shafqat ki bhi azmat hai

zabardasti jo maut aai

(wo aati hai aur aaegi)

to main koshish karunga to shaKH-ha-e-lala-o-gul ko

jakaD lun apne hathon se

gulabon se kahunga tum abhi mujh ko na jaane do

agar haara to is duniya ki sari dilkashi le kar

zamin ki god hi mein ek gahri nind so lunga

main mahbuba nahin man se kahunga phir jaga dena

baDa ziddi sa baalak hun

main teri god se KHud shola-e-gul ban ke ubharunga!

ajab aalam tha

aur main aasman se saKHt barham tha

KHuda ko galiyon par galiyan dene mein khoya tha

ki munni ne kaha dekho KHuda ne mujh ko bheja hai

magar is waqt munni bhi mujhe manhus lagti thi

mahine guzre faruqi!

magar ab sochta hun main

koi mane na mane ek KHuda hai nam jo bhi ho!

na umr-e-ishq baqi hai

na mai-KHana na paimana

na nazron mein

kisi shahnaz-e-lala-ruKH ka kashana

to kya hamd o salam o nat likkhun ye nahin mumkin

to masjid hi karun aabaad kuchh karna zaruri hai

KHuda bhi mujh ko kahil pa ke phir barham na ho jae

magar faruqi! duniya aaj behad KHub-surat hai

ba-in umr-e-tabii mujh ko bhi us ki zarurat hai

KHuda fankar hai wo bhi yaqinan chahta hoga

ki dekhe us ki sanat se kise kitni mohabbat hai

agar main is zamin aur is ki ranai ko apna lun

to mera dil ye kahta hai ki ye bhi ek ibaadat hai

abhi ye sochta hun kal KHuda hi jaane kya sochun

musalsal sochte rahna meri bachpan ki aadat hai

diwali aur subh-e-id faruqi! mubarak ho

mujhe chhoDo mein jis aalam mein hun wo meri qismat hai!!