ye dilli

sadiyoñ kī hikāyat kā kirdār hai dillī

tārīḳh ke fankār kā shahkār hai dillī

tahzīb-o-tamaddun kā rivāyāt kā markaz

iqlīm-e-vafā qibla-e-aqdār hai dillī

qarnoñ kī saqāfat hai yahāñ ab bhī humaktī

har daur kā gahvāra-e-āsār hai dillī

ujḌī hai ka.ī baar to ubhrī hai ka.ī baar

ai gardish-e-daurāñ tirā ākār hai dillī

mahbūb hai har zāviya-e-naqd-o-nazar kī

vo shoḳh vo tannāz vo tarrār hai dillī

ye 'mīr' kā 'ġhālib' kā ye 'momin' kā vatan hai

urdu-e-muallā kā alam-dār hai dillī

ye 'zauq'-o-'zafar' 'dard' ke naġhmāt kī dhartī

aur 'dāġh' se bulbul kā chaman-zār hai dillī

'kaifī'-o-'munavvar' se ka.ī ahl-e-zabāñ kā

ḳhum-ḳhāna-e-sar-mastī-e-ash.ār hai dillī

har sub.h ye āhang hai nāqūs-o-azāñ kā

har shaam ka.ī saaz kī jhankār hai dillī

jamunā ke kināroñ pe liye husn-e-tanāsub

tasvīr-e-javāñ-ġhār-o-barāñ-ġhār hai dillī

lamhoñ meñ sameTe hue barsoñ kī murādeñ

ik paikar-e-sad-shoḳhī-e-raftār hai dillī

sadiyon ki hikayat ka kirdar hai dilli

tariKH ke fankar ka shahkar hai dilli

tahzib-o-tamaddun ka riwayat ka markaz

iqlim-e-wafa qibla-e-aqdar hai dilli

qarnon ki saqafat hai yahan ab bhi humakti

har daur ka gahwara-e-asar hai dilli

ujDi hai kai bar to ubhri hai kai bar

ai gardish-e-dauran tera aakar hai dilli

mahbub hai har zawiya-e-naqd-o-nazar ki

wo shoKH wo tannaz wo tarrar hai dilli

ye 'mir' ka 'ghaalib' ka ye 'momin' ka watan hai

urdu-e-mualla ka alam-dar hai dilli

ye 'zauq'-o-'zafar' 'dard' ke naghmat ki dharti

aur 'dagh' se bulbul ka chaman-zar hai dilli

'kaifi'-o-'munawwar' se kai ahl-e-zaban ka

KHum-KHana-e-sar-masti-e-ashaar hai dilli

har subh ye aahang hai naqus-o-azan ka

har sham kai saz ki jhankar hai dilli

jamuna ke kinaron pe liye husn-e-tanasub

taswir-e-jawan-ghaar-o-baran-ghaar hai dilli

lamhon mein sameTe hue barson ki muraden

ek paikar-e-sad-shoKHi-e-raftar hai dilli