ye din

yahī din to azal se merī qismat thā

magar āñkhoñ meñ sahrā ne bharī vo ret

sab tārīk lagtā thā

maiñ kitne hī sarāboñ aur azāboñ se thī guzrī

ḳhushk hoñToñ par duā.eñ bhī nahīñ thiiñ

abhī to āsmāñ dekhā thā maiñ ne

nishāñ tak bhī nahīñ thā bādaloñ kā

ajab din hai

sar-e-sahrā hai vo jal-thal

ki ham yuuñ

bhīgte chhīñTe uḌāte

muskurāte manzaroñ ke ā.īne meñ

dekhte haiñ aks

jo āñkhoñ meñ khulte haiñ!

ragoñ meñ sā.atoñ kī

ek sarshārī samā.ī hai

yahī ik din to merī zindagī bhar kī kamā.ī hai

isī kī kokh se ubhreñge

sad-hā muskurāte din

bhulā baiThe vo saal o sin

ki jab is zindagī ko ek pal fursat nahīñ thī

aa ke mil letī

ye dekho! zindagī ne aaj ḳhud aa ke pukārā hai

yaqīñ hai

ab se har lamha hamārā hai!

yahi din to azal se meri qismat tha

magar aankhon mein sahra ne bhari wo ret

sab tarik lagta tha

main kitne hi sarabon aur azabon se thi guzri

KHushk honTon par duaen bhi nahin thin

abhi to aasman dekha tha main ne

nishan tak bhi nahin tha baadalon ka

ajab din hai

sar-e-sahra hai wo jal-thal

ki hum yun

bhigte chhinTe uDate

muskuraate manzaron ke aaine mein

dekhte hain aks

jo aankhon mein khulte hain!

ragon mein saaton ki

ek sarshaari samai hai

yahi ek din to meri zindagi bhar ki kamai hai

isi ki kokh se ubhrenge

sad-ha muskuraate din

bhula baiThe wo sal o sin

ki jab is zindagi ko ek pal fursat nahin thi

aa ke mil leti

ye dekho! zindagi ne aaj KHud aa ke pukara hai

yaqin hai

ab se har lamha hamara hai!