ye hamara ghar hai

durust phir ham pe yūrisheñ haiñ

sināneñ nezoñ kī sho'la-zan haiñ

khiñchī hai talvār phir saroñ par

laTak rahe haiñ nukīle ḳhanjar

kamīn-gāhoñ se tiir par tiir chal rahe haiñ

qadam qadam par haiñ mūsh-ḳhāne

lahū se bhīgā pasīna majrūh eḌiyoñ se

Tapak rahā hai

hai sāmne aag pīchhe dariyā

na jā.e-raftan nigāh meñ hai na pā.e-māñdan

magar hamārā yaqīñ salāmat rahā thā pahle bhī

ab bhī sābit-qadam rahegā

nizām-e-zulm-o-sitam ke aage ye sar jhukā thā

na ab jhukegā

palaT ke jaane kī baat socheñ kahīñ chhupeñ

ham se ye na hogā

farār ho kar dayār-e-aġhyār meñ baseñ

ham se ye na hogā

ki ye zamīñ to hamāre ajdād kā hai madfan

hamāre bachchoñ kā baḳht raushan hamārā ghar hai

hamārī peshāniyoñ pe sajdoñ kā naqsh ban kar

yahāñ kī miTTī chamak rahī hai

yahāñ ke shaffāf pāniyoñ meñ vuzū hamārā chhalak rahā hai

yahīñ kī miTTī kī zau liye jagmagā rahe haiñ hamāre mā'bad

khileñ ‘araq-reziyāñ hamārī hamāre khetoñ meñ fasl ban kar

hamārī mehnat kā sho'la raushan hai kār-ḳhānoñ kī bhaTTiyoñ meñ

hamārā haq is zamīñ par hai

jo apnā haq chhoḌ kar ga.e ghar se apne muñh moḌ kar ga.e to

kahīñ na basnā nasīb hogā

zalālat-o-nakbat-o-hiqārat nasīb-e-har-bad-nasīb hogā

liyā hai jo janm is zamīñ par yahīñ raheñge yahīñ baseñge

ahāliyān-e-sitam ke aage hamesha sīna-sipar raheñge

kaho ke qatre Tapak-Tapak kar zamīñ pe harf-e-vafā likheñge

hamārī mā'sūmiyat kī raushan dalīl ban kar

hameñ patā hai

ki zulm kitnā bhī ho qavī sar-nigūñ huā hai

bahā kahīñ bhī jo ḳhūn-e-nāhaq to qātiloñ ko Dubo gayā hai

hamāre bahte lahū kī dhāroñ se mausam-e-gul tulū' hogā

mohabbatoñ kī sadāqatoñ kā zuhūr hogā zarūr hogā

jazīra-e-ġhair kī taraf jaane vaalī har naav ko jalā do

hameñ to marnā bhī hai agar to yahīñ kahīñ par

isī zamīñ par

ki is zamīñ par hamārā ghar hai

durust phir hum pe yurishen hain

sinanen nezon ki sho'la-zan hain

khinchi hai talwar phir saron par

laTak rahe hain nukile KHanjar

kamin-gahon se tir par tir chal rahe hain

qadam qadam par hain mush-KHane

lahu se bhiga pasina majruh eDiyon se

Tapak raha hai

hai samne aag pichhe dariya

na jae-raftan nigah mein hai na pae-mandan

magar hamara yaqin salamat raha tha pahle bhi

ab bhi sabit-qadam rahega

nizam-e-zulm-o-sitam ke aage ye sar jhuka tha

na ab jhukega

palaT ke jaane ki baat sochen kahin chhupen

hum se ye na hoga

farar ho kar dayar-e-aghyar mein basen

hum se ye na hoga

ki ye zamin to hamare ajdad ka hai madfan

hamare bachchon ka baKHt raushan hamara ghar hai

hamari peshaniyon pe sajdon ka naqsh ban kar

yahan ki miTTi chamak rahi hai

yahan ke shaffaf paniyon mein wuzu hamara chhalak raha hai

yahin ki miTTi ki zau liye jagmaga rahe hain hamare ma'bad

khilen ‘araq-reziyan hamari hamare kheton mein fasl ban kar

hamari mehnat ka sho'la raushan hai kar-KHanon ki bhaTTiyon mein

hamara haq is zamin par hai

jo apna haq chhoD kar gae ghar se apne munh moD kar gae to

kahin na basna nasib hoga

zalalat-o-nakbat-o-hiqarat nasib-e-har-bad-nasib hoga

liya hai jo janm is zamin par yahin rahenge yahin basenge

ahaaliyan-e-sitam ke aage hamesha sina-sipar rahenge

kaho ke qatre Tapak-Tapak kar zamin pe harf-e-wafa likhenge

hamari ma'sumiyat ki raushan dalil ban kar

hamein pata hai

ki zulm kitna bhi ho qawi sar-nigun hua hai

baha kahin bhi jo KHun-e-nahaq to qatilon ko Dubo gaya hai

hamare bahte lahu ki dhaaron se mausam-e-gul tulu' hoga

mohabbaton ki sadaqaton ka zuhur hoga zarur hoga

jazira-e-ghair ki taraf jaane wali har naw ko jala do

hamein to marna bhi hai agar to yahin kahin par

isi zamin par

ki is zamin par hamara ghar hai