ye kaisi jang hai

ye kaisī jañg hai jo apnī manfa.at ke liye

ġharīb mulkoñ kī āzādiyoñ ko chhīntī hai

ye kaisī jañg hai jis meñ muqāble ke baġhair

nishāna saadh ke golī chalā.ī jaatī hai

ye kaisī jañg hai jis meñ asiir logoñ par

aziyyatoñ ke liye kutte chhoḌe jaate haiñ

ye kaisī jañg hai jis meñ bamoñ kī yūrish se

samā.ateñ bhī ḳhudā kī panāh chāhtī haiñ

ye kaisī jañg hai shahroñ kī tañg galiyāñ bhī

bhaḌakte sho.aloñ se raushan dikhā.ī detī haiñ

ye kaisī jañg hai jis meñ vafā-parastoñ kī

halākatoñ kī ḳhabar bhī uḌaa.ī jaatī hai

chalo ye pūchheñ tabāhī ke kāsht-kāroñ se

ba-nām-e-amn kahāñ tak lahū bahāoge

nikal ke dekho kabhī atomī hisāroñ se

tamām ālam-e-insāniyat hai sharminda

ye socho ḳhuun ke saudāgaro zarā socho

lahū kī nadiyāñ baheñgī agar zamīnoñ par

tumhārī kāsht ke pur-haul manzaroñ ko liye

tumhāre mulkoñ ke shahroñ ko bhī Dubo deñge

har ek zulm tumheñ apnā yaad aa.egā

panāh DhūñDoge tum raat ke añdheroñ meñ

magar vo raat bhī sho.aloñ meñ Duub jā.egī

ye vaqt tum pe qayāmat se kam nahīñ hogā

tumhāre karb kā ham ko bhī ġham nahīñ hogā

ye kaisi jang hai jo apni manfat ke liye

gharib mulkon ki aazadiyon ko chhinti hai

ye kaisi jang hai jis mein muqable ke baghair

nishana sadh ke goli chalai jati hai

ye kaisi jang hai jis mein asir logon par

aziyyaton ke liye kutte chhoDe jate hain

ye kaisi jang hai jis mein bamon ki yurish se

samaaten bhi KHuda ki panah chahti hain

ye kaisi jang hai shahron ki tang galiyan bhi

bhaDakte shoalon se raushan dikhai deti hain

ye kaisi jang hai jis mein wafa-paraston ki

halakaton ki KHabar bhi uDai jati hai

chalo ye puchhen tabahi ke kasht-karon se

ba-nam-e-amn kahan tak lahu bahaoge

nikal ke dekho kabhi atomi hisaron se

tamam aalam-e-insaniyat hai sharminda

ye socho KHun ke saudagaro zara socho

lahu ki nadiyan bahengi agar zaminon par

tumhaari kasht ke pur-haul manzaron ko liye

tumhaare mulkon ke shahron ko bhi Dubo denge

har ek zulm tumhein apna yaad aaega

panah DhunDoge tum raat ke andheron mein

magar wo raat bhi shoalon mein Dub jaegi

ye waqt tum pe qayamat se kam nahin hoga

tumhaare karb ka hum ko bhi gham nahin hoga