ye khel kya hai

mire muḳhālif ne chaal chal dī hai

aur ab

merī chaal ke intizār meñ hai

magar maiñ kab se

safed-ḳhānoñ

siyāh-ḳhānoñ meñ rakkhe

kaale safed mohroñ ko dekhtā huuñ

maiñ sochtā huuñ

ye mohre kyā haiñ

agar maiñ samjhūñ

ke ye jo mohre haiñ

sirf lakḌī ke haiñ khilaune

to jītnā kyā hai hārnā kyā

na ye zarūrī

na vo aham hai

agar ḳhushī hai na jītne kī

na hārne kā hī koī ġham hai

to khel kyā hai

maiñ sochtā huuñ

jo khelnā hai

to apne dil meñ yaqīn kar luuñ

ye mohre sach-much ke bādshāh o vazīr

sach-much ke haiñ payāde

aur in ke aage hai

dushmanoñ kī vo fauj

rakhtī hai jo ki mujh ko tabāh karne ke

saare mansūbe

sab irāde

magar aisā jo maan bhī luuñ

to sochtā huuñ

ye khel kab hai

ye jañg hai jis ko jītnā hai

ye jañg hai jis meñ sab hai jaa.ez

koī ye kahtā hai jaise mujh se

ye jañg bhī hai

ye khel bhī hai

ye jañg hai par khilāḌiyoñ kī

ye khel hai jañg kī tarah kā

maiñ sochtā huuñ

jo khel hai

is meñ is tarah kā usuul kyuuñ hai

ki koī mohara rahe ki jaa.e

magar jo hai bādshāh

us par kabhī koī aañch bhī na aa.e

vazīr hī ko hai bas ijāzat

ki jis taraf bhī vo chāhe jaa.e

maiñ sochtā huuñ

jo khel hai

is meñ is tarah usuul kyuuñ hai

piyāda jo apne ghar se nikle

palaT ke vāpas na jaane paa.e

maiñ sochtā huuñ

agar yahī hai usuul

to phir usuul kyā hai

agar yahī hai ye khel

to phir ye khel kyā hai

maiñ in savāloñ se jaane kab se ulajh rahā huuñ

mire muḳhālif ne chaal chal dī hai

aur ab merī chaal ke intizār meñ hai

mere muKHalif ne chaal chal di hai

aur ab

meri chaal ke intizar mein hai

magar main kab se

safed-KHanon

siyah-KHanon mein rakkhe

kale safed mohron ko dekhta hun

main sochta hun

ye mohre kya hain

agar main samjhun

ke ye jo mohre hain

sirf lakDi ke hain khilaune

to jitna kya hai haarna kya

na ye zaruri

na wo aham hai

agar KHushi hai na jitne ki

na haarne ka hi koi gham hai

to khel kya hai

main sochta hun

jo khelna hai

to apne dil mein yaqin kar lun

ye mohre sach-much ke baadshah o wazir

sach-much ke hain payaade

aur in ke aage hai

dushmanon ki wo fauj

rakhti hai jo ki mujh ko tabah karne ke

sare mansube

sab irade

magar aisa jo man bhi lun

to sochta hun

ye khel kab hai

ye jang hai jis ko jitna hai

ye jang hai jis mein sab hai jaez

koi ye kahta hai jaise mujh se

ye jang bhi hai

ye khel bhi hai

ye jang hai par khilaDiyon ki

ye khel hai jang ki tarah ka

main sochta hun

jo khel hai

is mein is tarah ka usul kyun hai

ki koi mohara rahe ki jae

magar jo hai baadshah

us par kabhi koi aanch bhi na aae

wazir hi ko hai bas ijazat

ki jis taraf bhi wo chahe jae

main sochta hun

jo khel hai

is mein is tarah usul kyun hai

piyaada jo apne ghar se nikle

palaT ke wapas na jaane pae

main sochta hun

agar yahi hai usul

to phir usul kya hai

agar yahi hai ye khel

to phir ye khel kya hai

main in sawalon se jaane kab se ulajh raha hun

mere muKHalif ne chaal chal di hai

aur ab meri chaal ke intizar mein hai