ye KHwabon ke sae

ye ḳhvāboñ ke saa.e

mirī niiñd kī shānt vaadī meñ

kis tarah aa.e

kisī aur duniyā ke mauhūm paikar

kisī aur jañgal kī shāḳhoñ ke saa.e

pur-asrār jazboñ kī bārish meñ bhīge nahā.e

gurezāñ ka.ī sā.atoñ ko uThā.e

mire paas aa.e

magar maiñ baḌhī jab bhī

in dhuñdle ḳhākoñ ko muTThī meñ bharne

vo ġhā.eb hue pech khāte hue

ik ghanī dhund meñ

haath mere na aa.e

magar jab kabhī haath aa.e

to un be-sadā paikaroñ ne

nihāñ ḳhāna-e-ārzū ke

ka.ī raaz mujh ko batā.e

ka.ī daaġh mujh ko dikhā.e

ye ḳhvāboñ kī bastī

ki jis kī pur-asrār rāhoñ meñ gum

raat bhar merī hastī

koī us kī gahrā.iyoñ ko bhalā kaise paa.e

koī is ke sab raaz kaise batā.e

ye KHwabon ke sae

meri nind ki shant wadi mein

kis tarah aae

kisi aur duniya ke mauhum paikar

kisi aur jangal ki shaKHon ke sae

pur-asrar jazbon ki barish mein bhige nahae

gurezan kai saaton ko uThae

mere pas aae

magar main baDhi jab bhi

in dhundle KHakon ko muTThi mein bharne

wo ghaeb hue pech khate hue

ek ghani dhund mein

hath mere na aae

magar jab kabhi hath aae

to un be-sada paikaron ne

nihan KHana-e-arzu ke

kai raaz mujh ko batae

kai dagh mujh ko dikhae

ye KHwabon ki basti

ki jis ki pur-asrar rahon mein gum

raat bhar meri hasti

koi us ki gahraiyon ko bhala kaise pae

koi is ke sab raaz kaise batae