ye phulon ki duniya

zarā apnī āñkheñ to denā

ki dekhūñ tumhārī nazar se

jahān-e-tamannā

jahāñ log kahte haiñ

nargis ne ik phuul phir se janā hai

hazāroñ baras kī sazā jhel kar

gumāñ aur afshāñ ke rangoñ meñ phir se

bahāroñ kī ḳhushbū safar kar rahī hai

ki lamhoñ kī lahroñ pe har-sū

na.ī aarzū par-fishāñ hai

tamanna kī tanhā.iyāñ muntazir haiñ

ki shāyad vahī vaqt kā qāfila

phir mile

jo un ko sulā kar batā.e binā chal diyā thā

shukriya

apnī āñkheñ to lo

hameñ apnī be-nūrī achchhī

hameñ kyā milā

hazāroñ baras kā safar

aur phir

dīda-var

ḳhud-nazar ḳhud-girafta

ye paanī ke taḳhte pe laTkā huā phuul

gumāñ aur afshāñ ke rangoñ kī hijrat kā

taaza nishāñ

de gayā dāġh-e-hijrat kī ik dukh-bharī dāstāñ

ye chashm-e-tamannā

ḳhudāyā ḳhudī thī ki thī ḳhud-numā.ī

ye phūloñ kī duniyā bhī

andherī nagrī hai

andhoñ kī duniyā hai

be-nūr-o-be-ḳhauf

insāf andhā hai

phūloñ ko phāñsī ke phande

zara apni aankhen to dena

ki dekhun tumhaari nazar se

jahan-e-tamanna

jahan log kahte hain

nargis ne ek phul phir se jana hai

hazaron baras ki saza jhel kar

guman aur afshan ke rangon mein phir se

bahaaron ki KHushbu safar kar rahi hai

ki lamhon ki lahron pe har-su

nai aarzu par-fishan hai

tamanna ki tanhaiyan muntazir hain

ki shayad wahi waqt ka qafila

phir mile

jo un ko sula kar batae bina chal diya tha

shukriya

apni aankhen to lo

hamein apni be-nuri achchhi

hamein kya mila

hazaron baras ka safar

aur phir

dida-war

KHud-nazar KHud-girafta

ye pani ke taKHte pe laTka hua phul

guman aur afshan ke rangon ki hijrat ka

taza nishan

de gaya dagh-e-hijrat ki ek dukh-bhari dastan

ye chashm-e-tamanna

KHudaya KHudi thi ki thi KHud-numai

ye phulon ki duniya bhi

andheri nagri hai

andhon ki duniya hai

be-nur-o-be-KHauf

insaf andha hai

phulon ko phansi ke phande