ye raat

sitāre chup haiñ ki chaltī hai tez tez havā

ye raat apnī mohabbat kī raat bhī to nahīñ

fazā meñ yādoñ ke jugnū chamak rahe haiñ abhī

hasīn yādoñ ko lekin sabāt bhī to nahīñ

ġham-e-hayāt se mānūs ho chalā hai dil

na.e na.e hī sahī sānehāt bhī to nahīñ

badal ke rakh deñ jo lail-o-nahār duniyā ke

abhī hayāt ke vo hādsāt bhī to nahīñ

vahī hai ḳhūn-e-tamannā vahī hai hasrat-e-ġham

ye maut bhī to nahīñ hai hayāt bhī to nahīñ

ye raat johd-e-musalsal kī ek raat sahī

tabāhiyoñ ko liye baar baar guzregī

koī batā.e kahāñ tak ki zindagī kī ye raat

fasurda guzrī hai aur sogvār guzregī

abhī to roz yahī fikr hai ji.eñ kaise

abhī to raat yūñhī be-qarār guzregī

sukūn-e-dil ke liye aaj bhī yaqīñ sā hai

yahī chaman se ḳhizāñ sharmsār guzregī

na.e charāġh jalā.eñ umīd-e-fardā se

kabhī to vādi-e-ġham se bahār guzregī

ye raat ek na.ī yādgār laa.ī hai

sajā ke zaḳhmoñ ke phūloñ kā haar laa.ī hai

sitare chup hain ki chalti hai tez tez hawa

ye raat apni mohabbat ki raat bhi to nahin

faza mein yaadon ke jugnu chamak rahe hain abhi

hasin yaadon ko lekin sabaat bhi to nahin

gham-e-hayat se manus ho chala hai dil

nae nae hi sahi sanehat bhi to nahin

badal ke rakh den jo lail-o-nahaar duniya ke

abhi hayat ke wo hadsat bhi to nahin

wahi hai KHun-e-tamanna wahi hai hasrat-e-gham

ye maut bhi to nahin hai hayat bhi to nahin

ye raat johd-e-musalsal ki ek raat sahi

tabahiyon ko liye bar bar guzregi

koi batae kahan tak ki zindagi ki ye raat

fasurda guzri hai aur sogwar guzregi

abhi to roz yahi fikr hai jien kaise

abhi to raat yunhi be-qarar guzregi

sukun-e-dil ke liye aaj bhi yaqin sa hai

yahi chaman se KHizan sharmsar guzregi

nae charagh jalaen umid-e-farda se

kabhi to wadi-e-gham se bahaar guzregi

ye raat ek nai yaadgar lai hai

saja ke zaKHmon ke phulon ka haar lai hai