zabta

ye zābta hai ki bātil ko mat kahūñ bātil

ye zābta hai ki girdāb ko kahūñ sāhil

ye zābta hai banūñ dast-o-bāzū-e-qātil

ye zābta hai dhḌaknā bhī chhoḌ de ye dil

ye zābta hai ki ġham ko na ġham kahā jaa.e

ye zābta hai sitam ko karam kahā jaa.e

bayāñ karūñ na kabhī apne dil kī hālat ko

na lā.ūñ lab pe kabhī shikva-o-shikāyat ko

kamāl-e-husn kahūñ aib ko jahālat ko

kabhī jagā.ūñ na soī huī adālat ko

ye zābta hai haqīqat ko ik fasāna kahūñ

ye zābta hai qafas ko hī āshiyāna kahūñ

ye zābta hai kahūñ dasht ko gulistāñ-zār

ḳhizāñ ke ruup ko likkhūñ faroġh-e-husn-e-bahār

har ek dushman-e-jāñ ko kahūñ maiñ hamdam-o-yār

jo kāTtī hai sar-e-haq vo chuum luuñ talvār

ḳhatā-o-jurm kahūñ apnī be-gunāhī ko

sahar kā nuur likhūñ raat kī siyāhī ko

jo miTne vaale haiñ un ke liye davām likhūñ

sanā yazīd kī aur shimr par salām likhūñ

jo Das rahā hai vatan ko na us kā naam likhūñ

samajh sakeñ na jise log vo kalām likhūñ

daroġh-goī ko sachchā.ī kā payām kahūñ

jo rāhzan hai use rahbar-e-avām kahūñ

mire junūñ ko na pahnā sakoge tum zanjīr

na ho sakegā kabhī tum se merā zehn asiir

jo dekhtā huuñ jo sach hai karūñgā vo tahrīr

matā-e-har-do-jahāñ bhī nahīñ bahā-e-zamīr

na de sakegī sahārā tumheñ koī tadbīr

fanā tumhārā muqaddar baqā mirī taqdīr

ye zabta hai ki baatil ko mat kahun baatil

ye zabta hai ki girdab ko kahun sahil

ye zabta hai banun dast-o-bazu-e-qatil

ye zabta hai dhDakna bhi chhoD de ye dil

ye zabta hai ki gham ko na gham kaha jae

ye zabta hai sitam ko karam kaha jae

bayan karun na kabhi apne dil ki haalat ko

na laun lab pe kabhi shikwa-o-shikayat ko

kamal-e-husn kahun aib ko jahaalat ko

kabhi jagaun na soi hui adalat ko

ye zabta hai haqiqat ko ek fasana kahun

ye zabta hai qafas ko hi aashiyana kahun

ye zabta hai kahun dasht ko gulistan-zar

KHizan ke rup ko likkhun farogh-e-husn-e-bahaar

har ek dushman-e-jaan ko kahun main hamdam-o-yar

jo kaTti hai sar-e-haq wo chum lun talwar

KHata-o-jurm kahun apni be-gunahi ko

sahar ka nur likhun raat ki siyahi ko

jo miTne wale hain un ke liye dawam likhun

sana yazid ki aur shimr par salam likhun

jo Das raha hai watan ko na us ka nam likhun

samajh saken na jise log wo kalam likhun

darogh-goi ko sachchai ka payam kahun

jo rahzan hai use rahbar-e-awam kahun

mere junun ko na pahna sakoge tum zanjir

na ho sakega kabhi tum se mera zehn asir

jo dekhta hun jo sach hai karunga wo tahrir

mata-e-har-do-jahan bhi nahin baha-e-zamir

na de sakegi sahaara tumhein koi tadbir

fana tumhaara muqaddar baqa meri taqdir