zakir-husain

terī fitrat meñ hai 'gobind' kā āsār magar

'ibn-e-mariyam' kā muqallid tirā kirdār magar

raam aur kirshn ke jīvan se tujhe pyaar magar

bāda-e-hubb-e-mohammad se bhī sarshār magar

sikh na īsā.ī na hindū na musalmān hai tū

terā īmān ye kahtā hai ki insān hai tū

hinduoñ se tujhe lenā hai zehānat kā kamāl

aur sikkhoñ se shujā.at ki na ho jis kī misāl

ahl-e-islām se lenā hai ibādat kā jalāl

aur issā.iyoñ se sabr lagan aur istiqlāl

in anāsir ko mohabbat se milānā hogā

kishvar-e-hind kā insān banānā hogā

man ke mandir ko munavvar kare nūr-e-islām

ka.aba-e-dil meñ rahe shām-o-sahar raam kā naam

kabhī gañgā kabhī kausar se mileñ jaam pe jaam

yuuñ baneñ shīr-o-shakar terī hukūmat meñ avaam

raam ho aur rahīm aur na hone paa.e

ab koī bachcha yatīm aur na hone paa.e

tujh se ummīd ye hai ki mulk meñ iflās na ho

tañg-dastī na aa.e kahīñ yaas na ho

alam-o-ranj kā dukh-dard kā ehsās na ho

aur ta.assub kī kisī qaum meñ bū-bās na ho

unsur-e-amn shikan ko tah-o-bālā kar de

to jo aayā hai to duniyā meñ ujālā kar de

teri fitrat mein hai 'gobind' ka aasar magar

'ibn-e-mariyam' ka muqallid tera kirdar magar

ram aur kirshn ke jiwan se tujhe pyar magar

baada-e-hubb-e-mohammad se bhi sarshaar magar

sikh na isai na hindu na musalman hai tu

tera iman ye kahta hai ki insan hai tu

hinduon se tujhe lena hai zehanat ka kamal

aur sikkhon se shujaat ki na ho jis ki misal

ahl-e-islam se lena hai ibaadat ka jalal

aur issaiyon se sabr lagan aur istiqlal

in anasir ko mohabbat se milana hoga

kishwar-e-hind ka insan banana hoga

man ke mandir ko munawwar kare nur-e-islam

kaba-e-dil mein rahe sham-o-sahar ram ka nam

kabhi ganga kabhi kausar se milen jam pe jam

yun banen shir-o-shakar teri hukumat mein awam

ram ho aur rahim aur na hone pae

ab koi bachcha yatim aur na hone pae

tujh se ummid ye hai ki mulk mein iflas na ho

tang-dasti na aae kahin yas na ho

alam-o-ranj ka dukh-dard ka ehsas na ho

aur tassub ki kisi qaum mein bu-bas na ho

unsur-e-amn shikan ko tah-o-baala kar de

to jo aaya hai to duniya mein ujala kar de