zafar

sub.h farġhāna meñ thī aur huī rañgoñ meñ shaam

āl-e-taimūr kī āshufta-sarī tujh ko salām

lama-e-āḳhir ḳhurshed sirajuddīn thā

maqtā-e-dard fazā-e-ġhazal-e-rañgīñ thā

vo shah-e-nek-nafs nek-nasab nek-nazhād

vo shah-e-nek-nazar nek-nishāñ nek-nihād

paikar-e-ḳhalq-o-vafā ḳhūgar-e-āmāl-e-husn

ḳhusrav-e-fikr-o-rasā bādshah-e-fahm-o-fatin

sāhab-e-tarz-e-nevī mālik-e-andāz-e-kuhan

faḳhr-e-dīñ faḳhr-e-zamīñ faḳhr-e-zamāñ faḳhr-e-zaman

lāl-qile kā vo suufī vo mohabbat kā amiiñ

jis kī miTTī se bhī mahrūm hai dillī kī zamīñ

martaba-dān-e-adībān-o-hakīmān-e-vatan

qadr-dān-e-sher ai hama-dān-o-hama-fan

'ġhālib'-o-'zauq' ke afkār kā vo qadr-shanās

jis ko thā 'momin'-o-'āzurda' kī azmat kā paas

arz-e-dillī ne baġhāvat kā jab elaan kiyā

surḳh-rū ho gayā aulād ko qurbān kiyā

jab bidesī kī hukūmat se zamīñ tañg huī

usī qaa.id kī qayādat meñ baḌī jañg huī

jis kā darbār thā ik majma.a-e-ālī-nishāñ

jis jagah kausar-o-tasnīm se dhultī thī zabāñ

sāz-e-hindī kī navā naġhma-e-urdū kī sadā

jis ke ash.ār se aatī hai uḳhuvvat kī nidā

mard-e-darvesh sharāfat kā gunahgār bhī thā

pārsā riñd bhī thā shā.ir-e-dīn-dār bhī thā

jis ko kahte haiñ zamīnoñ kā shah-e-arsh-nishāñ

mushkil asnāf-e-suḳhan jis ke liye the āsāñ

na ho agarche zafar-mand-o-zafar-yāb magar

falak-e-sher pe tābinda hai az-nām-e-zafar

subh farghana mein thi aur hui rangon mein sham

aal-e-taimur ki aashufta-sari tujh ko salam

lama-e-aKHir KHurshed sirajuddin tha

maqta-e-dard faza-e-ghazal-e-rangin tha

wo shah-e-nek-nafs nek-nasab nek-nazhad

wo shah-e-nek-nazar nek-nishan nek-nihad

paikar-e-KHalq-o-wafa KHugar-e-amal-e-husn

KHusraw-e-fikr-o-rasa baadshah-e-fahm-o-fatin

sahab-e-tarz-e-newi malik-e-andaz-e-kuhan

faKHr-e-din faKHr-e-zamin faKHr-e-zaman faKHr-e-zaman

lal-qile ka wo sufi wo mohabbat ka amin

jis ki miTTi se bhi mahrum hai dilli ki zamin

martaba-dan-e-adiban-o-hakiman-e-watan

qadr-dan-e-sher ai hama-dan-o-hama-fan

'ghaalib'-o-'zauq' ke afkar ka wo qadr-shanas

jis ko tha 'momin'-o-'azurda' ki azmat ka pas

arz-e-dilli ne baghawat ka jab elan kiya

surKH-ru ho gaya aulad ko qurban kiya

jab bidesi ki hukumat se zamin tang hui

usi qaid ki qayaadat mein baDi jang hui

jis ka darbar tha ek majma-e-ali-nishan

jis jagah kausar-o-tasnim se dhulti thi zaban

saz-e-hindi ki nawa naghma-e-urdu ki sada

jis ke ashaar se aati hai uKHuwwat ki nida

mard-e-darwesh sharafat ka gunahgar bhi tha

parsa rind bhi tha shair-e-din-dar bhi tha

jis ko kahte hain zaminon ka shah-e-arsh-nishan

mushkil asnaf-e-suKHan jis ke liye the aasan

na ho agarche zafar-mand-o-zafar-yab magar

falak-e-sher pe tabinda hai az-nam-e-zafar