zalzala aaTh october 2005

us raushan sub.h ke dāman meñ

ik sūraj qahr kā chamkā thā

ik taarā jī kā naġhma thā

jo vaadī vaadī gūñjā thā

ik purvā.ī thī vahshat kī

ik fitrat kā naqqārā thā

nādīda thā vo dast-e-ajal

jo dasht-o-jabal larzātā thā

aur paañv tale se dhartī ko

be-vahm-o-gumāñ sarkātā thā

ik khel rahā kuchh lamhoñ kā

kuchh lamhe the jo aa.e ga.e

sab nauhe niist ke nauhe the

nābūd kī taal pe gaa.e ga.e

bastī aur bastī vaale sab

malbe ke tale dafnā.e ga.e

ab jhelne vaale jheleñge

jo dukh hai bichhaḌne vāloñ kā

ik aag firāq kī dahkī hai

ye rasta hai angāroñ kā

bas is par chalnā aur jalnā

maqdūr hai ġham ke māroñ kā

lekin ye rang badalte din

lekin ye bhed bharī duniyā

usī raakh se ḳhaak se ubhregī

koñpal ke samān harī duniyā

ye vaqt ajab madārī hai

sau khel tamāshe laatā hai

ik manzar hañsne vaalā hai

ik manzar ḳhuun rulātā hai

aur vo jo sab kā vaalī hai

har manzar dekhe jaatā hai

us raushan subh ke daman mein

ek suraj qahr ka chamka tha

ek tara ji ka naghma tha

jo wadi wadi gunja tha

ek purwai thi wahshat ki

ek fitrat ka naqqara tha

nadida tha wo dast-e-ajal

jo dasht-o-jabal larzata tha

aur panw tale se dharti ko

be-wahm-o-guman sarkata tha

ek khel raha kuchh lamhon ka

kuchh lamhe the jo aae gae

sab nauhe nist ke nauhe the

nabud ki tal pe gae gae

basti aur basti wale sab

malbe ke tale dafnae gae

ab jhelne wale jhelenge

jo dukh hai bichhaDne walon ka

ek aag firaq ki dahki hai

ye rasta hai angaron ka

bas is par chalna aur jalna

maqdur hai gham ke maron ka

lekin ye rang badalte din

lekin ye bhed bhari duniya

usi rakh se KHak se ubhregi

konpal ke saman hari duniya

ye waqt ajab madari hai

sau khel tamashe lata hai

ek manzar hansne wala hai

ek manzar KHun rulata hai

aur wo jo sab ka wali hai

har manzar dekhe jata hai