zalzala

ek shab halkī sī jumbish mujhe mahsūs huī

maiñ ye samjhā mire shānoñ ko hilātā hai koī

aañkh uThā.ī to ye dekhā ki zamīñ hiltī hai

jis jagah shai koī rakkhī hai vahīñ hiltī hai

sahn-o-dīvār kī jumbish hai to dar hilte haiñ

bāhar aayā to ye dekhā ki shajar hilte haiñ

koī shai jumbish-e-paiham se nahīñ hai mahrūm

ek tāqat hai pas-e-parda magar nā-mālūm

chand lamhe bhī ye nairañgī-e-ālam na rahī

zalzala ḳhatm huā jumbish-e-paiham na rahī

hairat-e-dīd se añgusht-ba-dandāñ thā maiñ

shāhid-e-jalva-e-qahhārī-e-yazdāñ thā maiñ

daf.atan ek sadā āh-o-fuġhāñ kī aa.ī

mere allāh ye ghaḌī kis pe musībat laa.ī

gul kiyā zalzala-e-qahr ne kis ghar kā charāġh

kis pe Dhāyā ye sitam kis ko diyā hijr kā daaġh

jā ke nazdīk ye nazzāra-e-hirmāñ dekhā

ek hasīna ko ba-sad hāl-e-pareshāñ dekhā

baizavī shakl meñ the husn ke jalve pinhāñ

aañkh meñ sehr bharā thā magar aañsū the ravāñ

maiñ ne ghabrā ke ye pūchhā ki ye hālat kyuuñ hai

terī hastī hadaf-e-rañj-o-musībat kyuuñ hai

bolī ai shā.er-e-rañgīn-tabī.at mat pūchh

roz-o-shab dil pe guzartī hai qayāmat mat pūchh

log duniyā ko tirī mujh ko zamīñ kahte haiñ

ahl-e-zar mujh ko mohabbat meñ hasīñ kahte haiñ

maiñ unhīñ husn-parastoñ kī huuñ taḌpā.ī huī

tujh se kahne ko ye raaz aa.ī huuñ ghabrā.ī huī

zar-parastoñ se haiñ bad-dil mirī duniyā ke ġharīb

haiñ giraftār-e-salāsil mirī duniyā ke ġharīb

mujh se ye taaza balā.eñ nahīñ dekhī jaatī

zālimoñ kī ye jafā.eñ nahīñ dekhī jātīñ

chāhtī huuñ mire ushshāq meñ kuchh farq na ho

muft meñ kashtī-e-ehsās-e-vafā ġharq na ho

ek vo jis ko mayassar hoñ imārāt-o-naqīb

ek vo jis ko na ho phūñs kā chhappar bhī nasīb

sāhab-e-daulat-o-zī-rutba-o-zardār ho ek

be-navā ġham-zada-o-bekas-o-lāchār ho ek

ek muḳhtār ho, aurañg-e-jahāñbānī kā

ik muraqqa.a ho ġham-o-rañj-o-pareshānī kā

saḳht nafrat hai mujhe apne parastāroñ se

chhīn lete haiñ mujhe mere talab-gāroñ se

chīra-dastī kā miTā detī haiñ sab jāh-o-jalāl

haif-sad-haif ki haa.il hai ġharīboñ kā ḳhayāl

ye na hote to dikhātī maiñ qayāmat kā samāñ

ye na hote to miTātī maiñ ġhurūr-e-insāñ

ek karvaT meñ badal detī nizām-e-ālam

ik ishāre hī meñ ho jaatī hai ye mahfil barham

ik tabassum se jahāñ barq-ba-dāmāñ hotā

na ye ārā.isheñ hotīñ na ye sāmāñ hotā

har adā pūchhtī sarmāya-parastoñ ke mizāj

kuchh to farmā.iye hazrat ki haiñ kis haal meñ aaj

lakh-pati sañkh-patī be-sar-o-sāmāñ hote

jaan bach jaa.e bas is baat ke ḳhvāhāñ hote

barsar-e-ḳhāk nazar aate haiñ qasr-o-aivāñ

ashk-e-ḳhūnīñ se mire aur bhī uThte tūfāñ

merī āġhosh meñ sab ahl-e-sitam aa jaate

mere bartāv se bas naak meñ dam aa jaate

ba.az ke muñh ġham-e-ālām se kaale kartī

ba.az ko maut kī devī ke havāle kartī

ḳhūn-e-zardār hī mazdūr kī mazdūrī hai

maiñ jo ḳhāmosh huuñ ye bā.is-e-majbūrī hai

merī āġhosh meñ jābir bhī haiñ majbūr bhī haiñ

mere dāman hī se vābasta ye mazdūr bhī haiñ

zabt kartī huuñ jo ġham aatā hai sah jaatī huuñ

josh aatā hai magar kaañp ke rah jaatī huuñ

ek shab halki si jumbish mujhe mahsus hui

main ye samjha mere shanon ko hilata hai koi

aankh uThai to ye dekha ki zamin hilti hai

jis jagah shai koi rakkhi hai wahin hilti hai

sahn-o-diwar ki jumbish hai to dar hilte hain

bahar aaya to ye dekha ki shajar hilte hain

koi shai jumbish-e-paiham se nahin hai mahrum

ek taqat hai pas-e-parda magar na-malum

chand lamhe bhi ye nairangi-e-alam na rahi

zalzala KHatm hua jumbish-e-paiham na rahi

hairat-e-did se angusht-ba-dandan tha main

shahid-e-jalwa-e-qahhaari-e-yazdan tha main

dafatan ek sada aah-o-fughan ki aai

mere allah ye ghaDi kis pe musibat lai

gul kiya zalzala-e-qahr ne kis ghar ka charagh

kis pe Dhaya ye sitam kis ko diya hijr ka dagh

ja ke nazdik ye nazzara-e-hirman dekha

ek hasina ko ba-sad haal-e-pareshan dekha

baizawi shakl mein the husn ke jalwe pinhan

aankh mein sehr bhara tha magar aansu the rawan

main ne ghabra ke ye puchha ki ye haalat kyun hai

teri hasti hadaf-e-ranj-o-musibat kyun hai

boli ai shaer-e-rangin-tabiat mat puchh

roz-o-shab dil pe guzarti hai qayamat mat puchh

log duniya ko teri mujh ko zamin kahte hain

ahl-e-zar mujh ko mohabbat mein hasin kahte hain

main unhin husn-paraston ki hun taDpai hui

tujh se kahne ko ye raaz aai hun ghabrai hui

zar-paraston se hain bad-dil meri duniya ke gharib

hain giraftar-e-salasil meri duniya ke gharib

mujh se ye taza balaen nahin dekhi jati

zalimon ki ye jafaen nahin dekhi jatin

chahti hun mere ushshaq mein kuchh farq na ho

muft mein kashti-e-ehsas-e-wafa gharq na ho

ek wo jis ko mayassar hon imaraat-o-naqib

ek wo jis ko na ho phuns ka chhappar bhi nasib

sahab-e-daulat-o-zi-rutba-o-zardar ho ek

be-nawa gham-zada-o-bekas-o-lachaar ho ek

ek muKHtar ho, aurang-e-jahanbani ka

ek muraqqa ho gham-o-ranj-o-pareshani ka

saKHt nafrat hai mujhe apne parastaron se

chhin lete hain mujhe mere talab-garon se

chira-dasti ka miTa deti hain sab jah-o-jalal

haif-sad-haif ki hail hai gharibon ka KHayal

ye na hote to dikhati main qayamat ka saman

ye na hote to miTati main ghurur-e-insan

ek karwaT mein badal deti nizam-e-alam

ek ishaare hi mein ho jati hai ye mahfil barham

ek tabassum se jahan barq-ba-daman hota

na ye aaraishen hotin na ye saman hota

har ada puchhti sarmaya-paraston ke mizaj

kuchh to farmaiye hazrat ki hain kis haal mein aaj

lakh-pati sankh-pati be-sar-o-saman hote

jaan bach jae bas is baat ke KHwahan hote

barsar-e-KHak nazar aate hain qasr-o-aiwan

ashk-e-KHunin se mere aur bhi uThte tufan

meri aaghosh mein sab ahl-e-sitam aa jate

mere bartaw se bas nak mein dam aa jate

baz ke munh gham-e-alam se kale karti

baz ko maut ki dewi ke hawale karti

KHun-e-zardar hi mazdur ki mazduri hai

main jo KHamosh hun ye bais-e-majburi hai

meri aaghosh mein jabir bhi hain majbur bhi hain

mere daman hi se wabasta ye mazdur bhi hain

zabt karti hun jo gham aata hai sah jati hun

josh aata hai magar kanp ke rah jati hun