zamin un ke liye phul khilati hai

jab aag jalī naaf ke nīche to zamīñ phail ga.ī

aag jalī aur badan phail ga.e

āñkhoñ kī āvārgī be-rañg huī

dhuup havā chāñdnī

sab bastiyoñ meñ ḳhaak uḌī

qāfile hī qāfile the

qāfile jo dard ke vatanoñ se chale

chalte ga.e ajnabī ḳhushbū kī taraf

us kī taraf jis ke liye saarī kitāboñ meñ likhā hai

vo kabhī haath nahīñ aatī kabūtaroñ se chaTātī hai

magar raat ke darvāze pe pahuñche to sitāre na mile

log abhī sub.h kī ummīd meñ shab kāTte haiñ

log dukhī log akele haiñ

unheñ rāsta do siine se chimTā lo

har ik rāste meñ jaltī huī aag bujhā do ki badan

phailte jaate haiñ zamīñ tañg huī jaatī hai

jo aag bujhāne ke liye aa.e the

sab ḳhaak hue lauT nahīñ paa.e

havā un ke liye dastakeñ detī hai

zamīñ un ke liye phuul khilātī hai

jab aag jali naf ke niche to zamin phail gai

aag jali aur badan phail gae

aankhon ki aawargi be-rang hui

dhup hawa chandni

sab bastiyon mein KHak uDi

qafile hi qafile the

qafile jo dard ke watanon se chale

chalte gae ajnabi KHushbu ki taraf

us ki taraf jis ke liye sari kitabon mein likha hai

wo kabhi hath nahin aati kabutaron se chaTati hai

magar raat ke darwaze pe pahunche to sitare na mile

log abhi subh ki ummid mein shab kaTte hain

log dukhi log akele hain

unhen rasta do sine se chimTa lo

har ek raste mein jalti hui aag bujha do ki badan

phailte jate hain zamin tang hui jati hai

jo aag bujhane ke liye aae the

sab KHak hue lauT nahin pae

hawa un ke liye dastaken deti hai

zamin un ke liye phul khilati hai