zard-chameli

ye kis ke qadmoñ kī chaap aa.ii..... kaun aayā

ye bām-o-dar ab jo ḳhasta-jāñ haiñ

ye chauñk uTThe

aur yās-o-hasrat se shakl ham sab kī tak rahe haiñ

darāḌ apne jigar kī le kar karb kī shiddat

ko sah kar niile se paḌ ga.e .....haiñ

kisī ke hāthoñ ke lams ko taras rahe haiñ

namī ko āñkhoñ meñ DabDabā.e sehn ke raste ubuur kar ke

isī sutūñ ke shikasta saa.e meñ

sar jhukā.e guzishta yādoñ meñ kho ga.ī huuñ

vahī sutūñ jo thake thake se

malūl haiñ aur shigāf-e-tanhā.ī se surḳh īñTeñ

zaḳhm kī mānind jhāñkte haiñ aur ris rahe haiñ

jise chamelī kī zard bāheñ lagā ke siine se

kah rahī haiñ dukhoñ ko tere maiñ jāntī huuñ

tujhī meñ to jazb ho chukī huuñ

vo palkeñ ḳhvāboñ se uljhī uljhī vo surḳh joḌe meñ sahmī sahmī

basī hinā meñ laraztī bāheñ tirī hī gardan meñ thiiñ hamā.il

tumhīñ ne jis ko vidā.a kiyā thā vo duur jā kar ik aisī bastī meñ bas ga.ī hai

jahāñ koī ham-zabāñ nahīñ hai

muñDer par kī nahīf beleñ

chāroñ jānib ko dekhtī haiñ.... vo kaise boleñ ki un ke lab pe

sukūt-e-paiham kī mohreñ sī lagī huī haiñ

magar duā ik fazā meñ gūñjī

ki tū jahāñ hai vahīñ khile tū

balā se dāman hai merā ḳhālī

nahīñ mayassar jo buuñd ik bhii!

ye kis ke qadmon ki chap aai kaun aaya

ye baam-o-dar ab jo KHasta-jaan hain

ye chaunk uTThe

aur yas-o-hasrat se shakl hum sab ki tak rahe hain

daraD apne jigar ki le kar karb ki shiddat

ko sah kar nile se paD gae hain

kisi ke hathon ke lams ko taras rahe hain

nami ko aankhon mein DabDabae sehn ke raste ubur kar ke

isi sutun ke shikasta sae mein

sar jhukae guzishta yaadon mein kho gai hun

wahi sutun jo thake thake se

malul hain aur shigaf-e-tanhai se surKH inTen

zaKHm ki manind jhankte hain aur ris rahe hain

jise chameli ki zard bahen laga ke sine se

kah rahi hain dukhon ko tere main jaanti hun

tujhi mein to jazb ho chuki hun

wo palken KHwabon se uljhi uljhi wo surKH joDe mein sahmi sahmi

basi hina mein larazti bahen teri hi gardan mein thin hamail

tumhin ne jis ko widaa kiya tha wo dur ja kar ek aisi basti mein bas gai hai

jahan koi ham-zaban nahin hai

munDer par ki nahif belen

chaaron jaanib ko dekhti hain wo kaise bolen ki un ke lab pe

sukut-e-paiham ki mohren si lagi hui hain

magar dua ek faza mein gunji

ki tu jahan hai wahin khile tu

bala se daman hai mera KHali

nahin mayassar jo bund ek bhi!