zauq-e-takallum par urdu ne rah anokhi kholi hai

zauq-e-takallum par urdu ne raah anokhī kholī hai

rañg kī gahrā.ī naapī hai phuul kī ḳhushbū tolī hai

ye nāzuk jazbāt ke albele iz.hār kī bolī hai

urdu pyaar kī bolī hai

garmā.e tahzīb kī mahfil chamkāyā afsāne ko

rañg bikherā āñchal āñchal ruup kā maan baḌhāne ko

shabdoñ ke pyāle meñ is ne dil kī laalī gholī hai

urdu pyaar kī bolī hai

'mīr' ne dil kī dhaḌkan dī 'iqbāl' ne fikr kā nuur diyā

'ġhālib' ne āġhosh ko is kī husn-e-qarīb-o-dūr diyā

jis pe ḳhazīnoñ ko rashk aa.e urdu kī vo jholī hai

urdu pyaar kī bolī hai

krishn ke afsānoñ kā jaadū diloñ kā saudā kartā hai

'jigar' kā naġhma āñkhoñ hī āñkhoñ meñ ishāra kartā hai

miloñ se khaliyānoñ tak raqs meñ dīvānoñ kī Tolī hai

urdu pyaar kī bolī hai

giit 'firāq' ke jhilmil jhilmil karte haiñ mash.al kī tarah

hurmat kī lai sāya-fagan hai sāvan ke bādal kī tarah

kis lailā kā mahmil hai ye kis gorī kī Dolī hai

urdu pyaar kī bolī hai

zauq-e-takallum par urdu ne rah anokhi kholi hai

rang ki gahrai napi hai phul ki KHushbu toli hai

ye nazuk jazbaat ke albele izhaar ki boli hai

urdu pyar ki boli hai

garmae tahzib ki mahfil chamkaya afsane ko

rang bikhera aanchal aanchal rup ka man baDhane ko

shabdon ke pyale mein is ne dil ki lali gholi hai

urdu pyar ki boli hai

'mir' ne dil ki dhaDkan di 'iqbaal' ne fikr ka nur diya

'ghaalib' ne aaghosh ko is ki husn-e-qarib-o-dur diya

jis pe KHazinon ko rashk aae urdu ki wo jholi hai

urdu pyar ki boli hai

krishn ke afsanon ka jadu dilon ka sauda karta hai

'jigar' ka naghma aankhon hi aankhon mein ishaara karta hai

milon se khaliyanon tak raqs mein diwanon ki Toli hai

urdu pyar ki boli hai

git 'firaq' ke jhilmil jhilmil karte hain mashal ki tarah

hurmat ki lai saya-fagan hai sawan ke baadal ki tarah

kis laila ka mahmil hai ye kis gori ki Doli hai

urdu pyar ki boli hai