zawal ki aaKHiri hichkiyan

zavāl ke āsmānoñ meñ laḌkhaḌāte

añdhere ḳhalāoñ kī duniyāoñ meñ muallaq hote

añdhere shahroñ ke burjoñ kī gumnām fasīloñ par girte

tashaddud se ābād insānī bastiyoñ ke chehroñ se lipaTte

aur insānī vajūd kī dhajjiyāñ dekh kar chīḳhte rote

kitne hazār saal biit ga.e haiñ

kitne hazār sāloñ se zavāl kī chīḳhoñ ko sunte sunte

sā.ateñ thak ga.ī haiñ

sā.ateñ az-bas thak ga.ī haiñ

jalī huī ishtihāoñ kī qauseñ

zā.ichoñ ke hurūf dekhte dekhte dam toḌ chukī haiñ

ḳhvāhishoñ ke be-pāyāñ hujūm

hasratoñ kī surḳh mehrāboñ ke nīche

sadiyoñ kī dabīz gard ke andar dhañste chale ga.e haiñ

ḳhākistarī ayyām kī mutvarrim dhuul meñ

be-ant mutalāhaToñ ke vaar sahte sahte

sab kuchh madfūn ho gayā hai

magar ab ye zavāl kī āḳhirī chīḳh hai

sāhiloñ par parindoñ ke na.e qāfiloñ kā shor hai

aur bādbānoñ pe surḳh rañgoñ kī phaḌphaḌāhaT

gum-gashta shahroñ kī be-ābād fasīloñ ke burjoñ par

ham zavāl kī āḳhirī sā.atoñ kī

āḳhirī hichkiyāñ sun rahe haiñ

zawal ke aasmanon mein laDkhaDate

andhere KHalaon ki duniyaon mein muallaq hote

andhere shahron ke burjon ki gumnam fasilon par girte

tashaddud se aabaad insani bastiyon ke chehron se lipaTte

aur insani wajud ki dhajjiyan dekh kar chiKHte rote

kitne hazar sal bit gae hain

kitne hazar salon se zawal ki chiKHon ko sunte sunte

saaten thak gai hain

saaten az-bas thak gai hain

jali hui ishtihaon ki qausen

zaichon ke huruf dekhte dekhte dam toD chuki hain

KHwahishon ke be-payan hujum

hasraton ki surKH mehrabon ke niche

sadiyon ki dabiz gard ke andar dhanste chale gae hain

KHakistari ayyam ki mutwarrim dhul mein

be-ant mutalahaTon ke war sahte sahte

sab kuchh madfun ho gaya hai

magar ab ye zawal ki aaKHiri chiKH hai

sahilon par parindon ke nae qafilon ka shor hai

aur baadbanon pe surKH rangon ki phaDphaDahaT

gum-gashta shahron ki be-abaad fasilon ke burjon par

hum zawal ki aaKHiri saaton ki

aaKHiri hichkiyan sun rahe hain