zist-mizajon ka nauha

resha-e-ashk pe Tāñke hue ham barg-e-malāl

qarya-e-vahshat o uftād meñ haiñ ḳhema-ba-dosh

apne hisse kī jahāñgīrī uThā laa.e haiñ

kyā ḳhabar kaun nazar turfa masīhā.ī ho

kaun sā zahr tire hijr kā tiryāq bane

bas isī kār-e-farāġhat pe hai māmūr ye dil

jis pe khulte nahīñ asrār-e-ta.alluq na mizāj

apnī hī dhan meñ subuk-ḳhez chalā jaatā hai

ek andesha-e-ījāz-e-talātum kī taraf

jis kī tahzīb pe tahrīr haiñ naame tere

sāhira dekh kabhī zīst-mizājoñ kī taraf

dekh kyā rañg tire ḳhāk-nashīnoñ kā huā

par tujhe fursat-e-nazzāra-e-ḳhāshāk nahīñ

terī āñkhoñ meñ farozāñ hai sitāroñ kā vafūr

ham ki be-nūr charāġhoñ ke ḳharāshīda badan

apnī hī lau kī saḳhāvat se jale baiThe haiñ

ham jahāñgīr-mizājoñ meñ luTe baiThe haiñ

resha-e-ashk pe Tanke hue hum barg-e-malal

qarya-e-wahshat o uftad mein hain KHema-ba-dosh

apne hisse ki jahangiri uTha lae hain

kya KHabar kaun nazar turfa masihai ho

kaun sa zahr tere hijr ka tiryaq bane

bas isi kar-e-faraghat pe hai mamur ye dil

jis pe khulte nahin asrar-e-talluq na mizaj

apni hi dhan mein subuk-KHez chala jata hai

ek andesha-e-ijaz-e-talatum ki taraf

jis ki tahzib pe tahrir hain name tere

sahira dekh kabhi zist-mizajon ki taraf

dekh kya rang tere KHak-nashinon ka hua

par tujhe fursat-e-nazzara-e-KHashak nahin

teri aankhon mein farozan hai sitaron ka wafur

hum ki be-nur charaghon ke KHarashida badan

apni hi lau ki saKHawat se jale baiThe hain

hum jahangir-mizajon mein luTe baiThe hain