zindagi aur maut

maut ik ḳhvāb hai ajzā-e-badan kā hamdam

zindagī naam hai ehsās kī bedārī kā

maut jis rah-guzar-e-shauq meñ rahzan kā naqāb

zindagī raḳht isī rāh-e-talab-gārī kā

zindagī jism-o-dil-o-jāñ kī munazzam quvvat

maut iz.hār pareshānī-o-lāchārī kā

maut sahrāoñ meñ bikhre hue zarroñ kā ġhubār

zindagī naqsh unhī zarroñ kī chaman kaarī kā

maut be-mā.egī dāmān-e-zamīñ kī goyā

zindagī silsila bādal kī guhar-bārī kā

zindagī qāfila-e-sa.ī kī paiham tag-o-dau

maut dam-bhar ke liye vaqfa hai bekārī kā

zindagī kā jise ma.alūm ho matlab us ko

maut kā ḳhauf na gardūñ kī tabah-kārī kā

maut ek KHwab hai ajza-e-badan ka hamdam

zindagi nam hai ehsas ki bedari ka

maut jis rah-guzar-e-shauq mein rahzan ka naqab

zindagi raKHt isi rah-e-talab-gari ka

zindagi jism-o-dil-o-jaan ki munazzam quwwat

maut izhaar pareshani-o-lachaari ka

maut sahraon mein bikhre hue zarron ka ghubar

zindagi naqsh unhi zarron ki chaman kari ka

maut be-maegi daman-e-zamin ki goya

zindagi silsila baadal ki guhar-bari ka

zindagi qafila-e-sai ki paiham tag-o-dau

maut dam-bhar ke liye waqfa hai bekari ka

zindagi ka jise malum ho matlab us ko

maut ka KHauf na gardun ki tabah-kari ka