zindagi

malka-e-sahr-e-zindagī terā

shukr kis taur se adā kiije

daulat-e-dil kā kuchh shumār nahīñ

tañg-dastī kā kyā gila kiije

jo tire husn ke faqīr hue

un ko tashvīsh-e-rozgār kahāñ?

dard becheñge giit gā.eñge

is se ḳhush-baḳht kārobār kahāñ?

jaam chhalkā to jam ga.ī mahfil

minnat-e-lutf-e-ġham-gusār kise?

ashk Tapkā to khil gayā gulshan

rañj-e-kam-zarfī-e-bahār kise?

ḳhush-nashīñ haiñ ki chashm o dil kī murād

dair meñ hai na ḳhānqāh meñ hai

ham kahāñ qismat āzmāne jaa.eñ

har sanam apnī bārgāh meñ hai

kaun aisā ġhanī hai jis se koī

naqd-e-shams-o-qamar kī baat kare

jis ko shauq-e-nabard ho ham se

jaa.e tasḳhīr-e-ka.enāt kare

malka-e-sahr-e-zindagi tera

shukr kis taur se ada kije

daulat-e-dil ka kuchh shumar nahin

tang-dasti ka kya gila kije

jo tere husn ke faqir hue

un ko tashwish-e-rozgar kahan?

dard bechenge git gaenge

is se KHush-baKHt karobar kahan?

jam chhalka to jam gai mahfil

minnat-e-lutf-e-gham-gusar kise?

ashk Tapka to khil gaya gulshan

ranj-e-kam-zarfi-e-bahaar kise?

KHush-nashin hain ki chashm o dil ki murad

dair mein hai na KHanqah mein hai

hum kahan qismat aazmane jaen

har sanam apni bargah mein hai

kaun aisa ghani hai jis se koi

naqd-e-shams-o-qamar ki baat kare

jis ko shauq-e-nabard ho hum se

jae tasKHir-e-kaenat kare