zindagi ka waqfa

raat sannāTe kī chādar meñ paḌī hai lipTī

pattiyāñ saḌkoñ kī sab jaag rahī haiñ jaise

dekhnā chāhtī haiñ shahr meñ kyā hotā hai

maiñ hamesha kī tarah hoñToñ meñ cigarette ko dabā.e

sone se pahle ḳhayālāt meñ khoyā huā huuñ

din meñ kyā kuchh kiyā ik jā.eza letā hai zamīr

ek saada sā varaq nāma-e-āmāl hai sab

kuchh nahīñ likkhā ba-juz is ke pise jaao yūñhī

kuchh nahīñ likhā bas ik itnā ki insāñ kā nasīb

giilī gūñdhī huī miTTī kā hai ik toda sā

din meñ sau shakleñ banā kartī haiñ is miTTī se

kuchh nahīñ likhā bas ik itnā ki chyūñTī dil hai

jauq-dar-jauq jo insān nazar aate haiñ

daana le kar kisī dīvār pe chaḌhnā girnā

aur phir chaḌhnā chaḌhe jaanā yūñhī shaam o sahar

kuchh nahīñ likkhā bas itnā ki pise jaao yūñhī

aur andoh ta.assuf ḳhushī ālām nashāt

ḳhud ko sau nāmoñ se bahlāte raho chalte raho

saañs ruk jaa.e jahāñ samjho vahīñ manzil hai

aur is dauḌ se thak jaao to cigarette pī lo

raat sannaTe ki chadar mein paDi hai lipTi

pattiyan saDkon ki sab jag rahi hain jaise

dekhna chahti hain shahr mein kya hota hai

main hamesha ki tarah honTon mein cigarette ko dabae

sone se pahle KHayalat mein khoya hua hun

din mein kya kuchh kiya ek jaeza leta hai zamir

ek sada sa waraq nama-e-amal hai sab

kuchh nahin likkha ba-juz is ke pise jao yunhi

kuchh nahin likha bas ek itna ki insan ka nasib

gili gundhi hui miTTi ka hai ek toda sa

din mein sau shaklen bana karti hain is miTTi se

kuchh nahin likha bas ek itna ki chyunTi dil hai

jauq-dar-jauq jo insan nazar aate hain

dana le kar kisi diwar pe chaDhna girna

aur phir chaDhna chaDhe jaana yunhi sham o sahar

kuchh nahin likkha bas itna ki pise jao yunhi

aur andoh tassuf KHushi aalam nashat

KHud ko sau namon se bahlate raho chalte raho

sans ruk jae jahan samjho wahin manzil hai

aur is dauD se thak jao to cigarette pi lo