zindagi

aaj añdherā mirī nas nas meñ utar jā.egā

āñkheñ bujh jā.eñgī bujh jā.eñge ehsās o shu.ūr

aur ye sadiyoñ se jaltā sā sulagtā sā vajūd

is se pahle ki sahar māthe pe shabnam chhiḌke

is se pahle ki mirī beTī ke vo phuul se haath

garm ruḳhsār ko ThanDak baḳhsheñ

is se pahle ki mire beTe kā mazbūt badan

tan-e-maflūj meñ shaktī bhar de

is se pahle ki mirī biivī ke hoñT

mere hoñToñ kī tapish pī jaa.eñ

raakh ho jā.egā jalte jalte

aur phir raakh bikhar jā.egī

zindagī kahne ko be-māya sahī

ġham kā sarmāya sahī

maiñ ne is ke liye kyā kyā na kiyā

kabhī āsānī se ik saañs bhī yamrāj ko apnā na diyā

aaj se pahle bahut pahle

isī āñgan meñ

dhūp-bhare dāman meñ

maiñ khaḌā thā mire talvoñ se dhuāñ uThtā thā

ek be-nām sā be-rañg sā ḳhauf

kachche ehsās pe chhāyā thā ki jal jā.ūñgā

maiñ pighal jā.ūñgā

aur pighal kar mirā kamzor sā ''maiñ''

qatra qatra mire māthe se Tapak jā.egā

ro rahā thā magar ashkoñ ke baġhair

chīḳhtā thā magar āvāz na thī

maut lahrātī thī sau shakloñ meñ

maiñ ne har shakl ko ghabrā ke ḳhudā maan liyā

kaaT ke rakh diye sandal ke pur-asrār daraḳht

aur patthar se nikālā sho.ala

aur raushan kiyā apne se baḌā ek alaav

jānvar zab.h kiye itne ki ḳhuuñ kī lahreñ

paañv se uTh ke kamar tak aa.iiñ

aur kamar se mire sar tak aa.iiñ

som-ras maiñ ne piyā

raat din raqs kiyā

nāchte nāchte talve mire ḳhuuñ dene lage

mire a.azā kī thakan

ban ga.ī kāñpte hoñToñ pe bhajan

haDDiyāñ merī chaTaḳhne lagīñ īñdhan kī tarah

mantar hoñToñ se Tapakne lage roġhan kī tarah

''agnī maatā mirī agnī maatā

sūkhī lakḌī ke ye bhārī kunde

jo tirī bheñT ko le aayā huuñ

un ko svīkār kar aur aise dhadhak

ki machalte sho.ale khīñch leñ josh meñ

sūraj kī sunahrī zulfeñ

aag meñ aag mile

jo amar kar de mujhe

aisā koī raag mile''

agnī maañ se bhī na jiine kī sanad jab paa.ī

zindagī ke na.e imkān ne lī añgḌā.ī

aur kānoñ meñ kahīñ duur se āvāz aa.ī

buddham sharaḌam gachhamī

dhammam sharaḌam gacchami

sangham sharaḌam gacchami

chaar abrū kā safāyā kar ke

be-sile vastr se Dhāñpā ye badan

poñchh ke patnī ke māthe se damaktī biñdiyā

sote bachchoñ ko binā pyaar kiye

chal paḌā haath meñ kashkol liye

chāhtā thā kahīñ bhikshā hī meñ jīvan mil jaa.e

jo kabhī band na ho dil ko vo dhaḌkan mil jaa.e

mujh ko bhikshā meñ magar zahr milā

hoñT tharrāne lage jaise kare koī gila

jhuk ke suulī se usī vaqt kisī ne ye kahā

tere ik gaal pe jis pal koī thappaḌ maare

dūsrā gaal bhī aage kar de

terī duniyā meñ bahut hinsā hai

us ke siine meñ ahinsā bhar de

ki ye jiine kā tarīqa bhī hai andāz bhī hai

terī āvāz bhī hai merī āvāz bhī hai

maiñ uThā jis ko ahinsā kā sabaq sikhlāne

mujh ko laTkā diyā suulī pe usī duniyā ne

aa rahā thā maiñ ka.ī kūchoñ se Thokar khā kar

ek āvāz ne rokā mujh ko

kisī mīnār se nīche aa kar

allāhu-akbar allāhu-akbar

huā dil ko ye gumāñ

ki ye pur-josh azaañ

maut se degī amaañ

phir to pahuñchā maiñ jahāñ

maiñ ne dohrā.ī kuchh aise ye azaañ

guuñj uThā saarā jahāñ

allāhu-akbar allāhu-akbar

isī āvāz meñ ik aur bhī gūñjā elaan

kullo-man-alaihā-fān

ik taraf Dhal gayā ḳhurshīd-e-jahāñ-tāb kā sar

huā fālij kā asar

phaT ga.ī nas koī shiryānoñ meñ ḳhuuñ jam sā gayā

ho gayā zaḳhmī dimāġh

aisā lagtā thā ki bujh jā.egā jaltā hai jo sadiyoñ se charāġh

aaj añdherā mirī nas nas meñ utar jā.egā

ye samundar jo baḌī der se tūfānī thā

aisā taḌpā ki mire kamre ke andar aayā

aate aate vo mire vāste amrit laayā

aur lahrā ke kahā

shiv ne ye bhejvāyā hai lo piyo aur

aaj shiv ilm hai amrit hai amal

ab vo āsāñ hai jo dushvār thā kal

raat jo maut kā paiġhām liye aa.ī thī

biivī bachchoñ ne mire

us ko khiḌkī se pare pheñk diyā

aur jo vo zahr kā ik jaam liye aa.ī thī

us ne vo ḳhud hī piyā

sub.h utrī jo samundar meñ nahāne ke liye

raat kī laash milī paanī meñ

aaj andhera meri nas nas mein utar jaega

aankhen bujh jaengi bujh jaenge ehsas o shuur

aur ye sadiyon se jalta sa sulagta sa wajud

is se pahle ki sahar mathe pe shabnam chhiDke

is se pahle ki meri beTi ke wo phul se hath

garm ruKHsar ko ThanDak baKHshen

is se pahle ki mere beTe ka mazbut badan

tan-e-mafluj mein shakti bhar de

is se pahle ki meri biwi ke honT

mere honTon ki tapish pi jaen

rakh ho jaega jalte jalte

aur phir rakh bikhar jaegi

zindagi kahne ko be-maya sahi

gham ka sarmaya sahi

main ne is ke liye kya kya na kiya

kabhi aasani se ek sans bhi yamraj ko apna na diya

aaj se pahle bahut pahle

isi aangan mein

dhup-bhare daman mein

main khaDa tha mere talwon se dhuan uThta tha

ek be-nam sa be-rang sa KHauf

kachche ehsas pe chhaya tha ki jal jaunga

main pighal jaunga

aur pighal kar mera kamzor sa main

qatra qatra mere mathe se Tapak jaega

ro raha tha magar ashkon ke baghair

chiKHta tha magar aawaz na thi

maut lahraati thi sau shaklon mein

main ne har shakl ko ghabra ke KHuda man liya

kaT ke rakh diye sandal ke pur-asrar daraKHt

aur patthar se nikala shoala

aur raushan kiya apne se baDa ek alaw

jaanwar zabh kiye itne ki KHun ki lahren

panw se uTh ke kamar tak aain

aur kamar se mere sar tak aain

som-ras main ne piya

raat din raqs kiya

nachte nachte talwe mere KHun dene lage

mere aaza ki thakan

ban gai kanpte honTon pe bhajan

haDDiyan meri chaTaKHne lagin indhan ki tarah

mantar honTon se Tapakne lage roghan ki tarah

agni mata meri agni mata

sukhi lakDi ke ye bhaari kunde

jo teri bhenT ko le aaya hun

un ko swikar kar aur aise dhadhak

ki machalte shoale khinch len josh mein

suraj ki sunahri zulfen

aag mein aag mile

jo amar kar de mujhe

aisa koi rag mile

agni man se bhi na jine ki sanad jab pai

zindagi ke nae imkan ne li angDai

aur kanon mein kahin dur se aawaz aai

buddham sharaDam gachhami

dhammam sharaDam gacchami

sangham sharaDam gacchami

chaar abru ka safaya kar ke

be-sile wastr se Dhanpa ye badan

ponchh ke patni ke mathe se damakti bindiya

sote bachchon ko bina pyar kiye

chal paDa hath mein kashkol liye

chahta tha kahin bhiksha hi mein jiwan mil jae

jo kabhi band na ho dil ko wo dhaDkan mil jae

mujh ko bhiksha mein magar zahr mila

honT tharrane lage jaise kare koi gila

jhuk ke suli se usi waqt kisi ne ye kaha

tere ek gal pe jis pal koi thappaD mare

dusra gal bhi aage kar de

teri duniya mein bahut hinsa hai

us ke sine mein ahinsa bhar de

ki ye jine ka tariqa bhi hai andaz bhi hai

teri aawaz bhi hai meri aawaz bhi hai

main uTha jis ko ahinsa ka sabaq sikhlane

mujh ko laTka diya suli pe usi duniya ne

aa raha tha main kai kuchon se Thokar kha kar

ek aawaz ne roka mujh ko

kisi minar se niche aa kar

allahu-akbar allahu-akbar

hua dil ko ye guman

ki ye pur-josh azan

maut se degi aman

phir to pahuncha main jahan

main ne dohrai kuchh aise ye azan

gunj uTha sara jahan

allahu-akbar allahu-akbar

isi aawaz mein ek aur bhi gunja elan

kullo-man-alaiha-fan

ek taraf Dhal gaya KHurshid-e-jahan-tab ka sar

hua falij ka asar

phaT gai nas koi shiryanon mein KHun jam sa gaya

ho gaya zaKHmi dimagh

aisa lagta tha ki bujh jaega jalta hai jo sadiyon se charagh

aaj andhera meri nas nas mein utar jaega

ye samundar jo baDi der se tufani tha

aisa taDpa ki mere kamre ke andar aaya

aate aate wo mere waste amrit laya

aur lahra ke kaha

shiw ne ye bhejwaya hai lo piyo aur

aaj shiw ilm hai amrit hai amal

ab wo aasan hai jo dushwar tha kal

raat jo maut ka paigham liye aai thi

biwi bachchon ne mere

us ko khiDki se pare phenk diya

aur jo wo zahr ka ek jam liye aai thi

us ne wo KHud hi piya

subh utri jo samundar mein nahane ke liye

raat ki lash mili pani mein