zindagi maut ka aaina

jaisī zindagī ham guzārte haiñ vaisī maut hameñ miltī hai

ham buzdil aadmī kī zindagī guzārte haiñ

to hameñ maut bhī vaisī hī buzdil nasīb hotī hai

ham ḳhūbsūrat zindagī jiite haiñ

to maut bhī ḳhūbsūrat miltī hai

ham mohabbat kī zindagī guzārte haiñ

to maut bhī mahbūba kī tarah hameñ miltī hai

insān ne har shai ko gadlā kiyā hai

har qīmtī ādarsh ko mailā kiyā hai

har lafz ko be-ma.anī kiyā hai

allāh kī banā.ī huī chīzoñ ko masḳh karne kī koshish kī hai

lekin insān maut ko gadlā nahīñ kar sakā

mailā nahīñ kar sakā

be-ma.anī nahīñ kar sakā

masḳh nahīñ kar sakā

maut se zyāda ḳhālis shai duniyā meñ nahīñ hai

is se zyāda bā-ma.anī shai maujūd nahīñ hai

magar maiñ kyuuñ aisā kah rahā huuñ

mujhe to ek bahut hī ḳhūbsūrat zindagī basar karnī hai

mohabbat se labrez

raqs kartī huī zindagī

jis meñ raqqās ġhā.eb ho jaatā hai

aur sirf raqs baaqī rahtā hai

mujhe ek behad lazzat-bharī

rasīlī zindagī se gale milnā hai

taaki merī maut bhī ḳhūbsūrat ho

jaisi zindagi hum guzarte hain waisi maut hamein milti hai

hum buzdil aadmi ki zindagi guzarte hain

to hamein maut bhi waisi hi buzdil nasib hoti hai

hum KHubsurat zindagi jite hain

to maut bhi KHubsurat milti hai

hum mohabbat ki zindagi guzarte hain

to maut bhi mahbuba ki tarah hamein milti hai

insan ne har shai ko gadla kiya hai

har qimti aadarsh ko maila kiya hai

har lafz ko be-mani kiya hai

allah ki banai hui chizon ko masKH karne ki koshish ki hai

lekin insan maut ko gadla nahin kar saka

maila nahin kar saka

be-mani nahin kar saka

masKH nahin kar saka

maut se zyaada KHalis shai duniya mein nahin hai

is se zyaada ba-mani shai maujud nahin hai

magar main kyun aisa kah raha hun

mujhe to ek bahut hi KHubsurat zindagi basar karni hai

mohabbat se labrez

raqs karti hui zindagi

jis mein raqqas ghaeb ho jata hai

aur sirf raqs baqi rahta hai

mujhe ek behad lazzat-bhari

rasili zindagi se gale milna hai

taki meri maut bhi KHubsurat ho