ziyaada pas mat aana

ziyāda paas mat aanā

maiñ vo tah-ḳhāna huuñ jis meñ

shikasta ḳhvāhishoñ ke an-ginat aaseb baste haiñ

jo aadhī shab to rote haiñ phir aadhī raat hañste haiñ

mirī tārīkiyoñ meñ

gum-shuda sadiyoñ ke gard-ālūd nā-āsūda ḳhvāboñ ke

ka.ī ifrīt baste haiñ

mirī ḳhushiyoñ pe rote haiñ mire ashkoñ pe hañste haiñ

mire vīrān dil meñ reñgtī haiñ makaḌiyāñ ġham kī

tamannāoñ ke kaale naag shab-bhar sarsarāte haiñ

gunāhoñ ke jane bichchhū

damoñ par apne apne Dañk laade

apne apne zahr ke sho.aloñ meñ jalte haiñ

ye bichchhū dukh nigalte aur pachhtāve ugalte haiñ

ziyāda paas mat aanā

maiñ vo tah-ḳhāna huuñ jis meñ

koī rauzan koī khiḌkī nahīñ baaqī

faqat qabreñ hī qabreñ haiñ

kahīñ aisā na ho tum bhī inhī qabroñ meñ kho jaao

inhī meñ dafan ho jaao

gulābī ho kahīñ aisā na ho tum zard ho jaao

mohabbat kī harārat kho ke bilkul sard ho jaao

sarāpā dard ho jaao

so mere sāda-o-māsūm mujh ko raas mat aanā

ziyāda paas mat aanā

ziyāda paas mat aanā

ziyaada pas mat aana

main wo tah-KHana hun jis mein

shikasta KHwahishon ke an-ginat aaseb baste hain

jo aadhi shab to rote hain phir aadhi raat hanste hain

meri tarikiyon mein

gum-shuda sadiyon ke gard-alud na-asuda KHwabon ke

kai ifrit baste hain

meri KHushiyon pe rote hain mere ashkon pe hanste hain

mere viran dil mein rengti hain makaDiyan gham ki

tamannaon ke kale nag shab-bhar sarsaraate hain

gunahon ke jane bichchhu

damon par apne apne Dank lade

apne apne zahr ke shoalon mein jalte hain

ye bichchhu dukh nigalte aur pachhtawe ugalte hain

ziyaada pas mat aana

main wo tah-KHana hun jis mein

koi rauzan koi khiDki nahin baqi

faqat qabren hi qabren hain

kahin aisa na ho tum bhi inhi qabron mein kho jao

inhi mein dafan ho jao

gulabi ho kahin aisa na ho tum zard ho jao

mohabbat ki hararat kho ke bilkul sard ho jao

sarapa dard ho jao

so mere sada-o-masum mujh ko ras mat aana

ziyaada pas mat aana

ziyaada pas mat aana