آفرینش کے ہفتے میں چھ روز تک ایک تصویر پیہم بنائی گئی

دن ضیا ساز ہاتھوں سے ظاہر ہوا اور مصور کی کاری گری رات ہے

ایک طرف کچھ ہونٹ محبت کی روشن آیات پڑھیں

اک صف میں ہتھیار سجائے سارے جنگ پرست رہیں

تار کس کر کوئی راگنی چھیڑ دے اے طوائف اذیت بھری رات ہے

جانتی ہے سرائے کی ہر اونٹنی اس مسافر کی یہ آخری رات ہے

چند گھنٹوں میں سورج نکل آئے گا تب یہ زینہ اتر کر چلی جائیو

زندگی دیکھ آگے بیابان ہے شمع گل ہو گئی رک اری رات ہے

دس محرم کی فاقہ شکن عصر کا سر جھکائے ہوئے بیٹھ کر سوچنا

چند پھولوں میں لپٹی ہوئی فجر تھی کچھ چراغوں کی نوحہ گری رات ہے