محشر لکھنوی
نام سید کاظم حسین، محشر تخلص۔ ۱۶؍اکتوبر ۱۸۶۶ء کو پیدا ہوئے۔ وطن لکھنؤ تھا۔میر علی محمد عارف سے تلمذ حاصل تھا۔ ان کے انتقال کے بعد پیارے صاحب رشید کو کلام دکھانا شروع کیا۔ عربی، فارسی میں اچھی خاصی مہارت تھی۔انگریزی اسکول سے انٹرنس کا امتحان پاس کیا تھا۔ محشر ابتدائے سن شباب سے ہی شیخ علی عباس کے یہاں ملازم ہوگئے تھے۔ ان کو داروغہ کا عہدہ سونپا گیا تھا۔ کاغذ پر محشر صاحب کی تنحواہ چار روپیہ تھی، مگر شیخ صاحب جو کپڑے پہنتے تھے وہی ان کو پہناتے اور جو کھانا خود کھاتے وہی ا ن کو کھلاتے تھے۔انھوں نے کبھی محشر صاحب کو اپنے بھائی سے کم نہیں سمجھا۔ ملازمت کے بعد دو تین برس تک محشر صاحب اپنی ملازمت پر برقرار رہے، مگر بعدمیں ان کو ملازمت سے علاحدہ ہونا پڑا۔ تفریحی مشاغل میں شعروسخن کے علاوہ کبوتر پالنا تھا۔مہاراجا سرمحمد علی محمد خاں، والئ محمودآباد کو خبر ہوئی تو انھوں نے محشر لکھنوی کو بلا کر اپنے دامن دولت سے منسلک کرلیا۔ ان کی ملازمت کے ڈیڑھ یا دوسال بعد مہاراجا کا انتقال ہوگیا۔ محشر صاحب نوکری سے سبک دوش ہو کر گھر میں گوشہ نشین ہوگئے ۔ ۱۹۳۵ء میں ان کا انتقال ہوا۔

بحوالۂ:پیمانۂ غزل(جلد اول)،محمد شمس الحق،صفحہ:243