ham gunahgāroñ ke kyā ḳhuun kā phīkā thā rañg

mehñdī kis vāste hāthoñ pe rachā.ī pyāre

hum gunahgaron ke kya KHun ka phika tha rang

mehndi kis waste hathon pe rachai pyare

ham farāmosh kī farāmoshī

aur tum yaad umr bhar bhūle

hum faramosh ki faramoshi

aur tum yaad umr bhar bhule

tere mizhgāñ kī kyā karūñ tārīf

tiir ye be-kamān jaatā hai

tere mizhgan ki kya karun tarif

tir ye be-kaman jata hai

kaun kahtā hai ki tū ne hameñ haT kar maarā

dil jhapaT aañkh laḌā nazroñ se DaT kar maarā

kaun kahta hai ki tu ne hamein haT kar mara

dil jhapaT aankh laDa nazron se DaT kar mara

jilāo maaro durkāro bulā lo gāliyāñ de lo

karo jo chāho ham kis baat se ikrāh rakhte haiñ

jilao maro durkaro bula lo galiyan de lo

karo jo chaho hum kis baat se ikrah rakhte hain