go ham sharāb piite hamesha haiñ de ke naqd

lekin mazā kuchh aur hī paayā udhār meñ

go hum sharab pite hamesha hain de ke naqd

lekin maza kuchh aur hi paya udhaar mein

jab bosa le ke mudda.ā maiñ ne bayāñ kiyā

bole ziyāda paañv pasārā na kījiye

jab bosa le ke muddaa main ne bayan kiya

bole ziyaada panw pasara na kijiye

kholā darvāza samajh kar mujh ko ġhair

khā ga.e dhokā mirī āvāz se

khola darwaza samajh kar mujh ko ghair

kha gae dhoka meri aawaz se

phaaḌ kar ḳhat us ne qāsid se kahā

koī paiġhām-e-zabānī aur hai

phaD kar KHat us ne qasid se kaha

koi paigham-e-zabani aur hai

zāhid mirī samajh meñ to donoñ gunāh haiñ

tū but-shikan huā jo maiñ tauba-shikan huā

zahid meri samajh mein to donon gunah hain

tu but-shikan hua jo main tauba-shikan hua