خود اپنے آپ سے ملنے کی خاطر

ابھی کوسوں مجھے چلنا پڑے گا

میں نے کہا تھا مجھ کو اندھیرے کا خوف ہے

اس نے یہ سن کے آج مرا گھر جلا دیا

جذبوں پر جب برف جمے تو جینا مشکل ہوتا ہے

دل کے آتش دان میں تھوڑی آگ جلانی پڑتی ہے

ایک آواز میں نے سنی تھی ابھی کون بولا تھا یہ تو خبر ہی نہیں

یہ تعلق ضروری ہے کس نے کہا وہ بھی خاموش تھا میں بھی خاموش تھی

ایسے کچھ حادثے بھی گزرے ہیں

جن پہ میں آج تک نہیں روئی

مجھ کو اس کے نہیں خود میرے حوالے کرتے

کم سے کم یہ تو مرے چاہنے والے کرتے

میں ایک روز اسے ڈھونڈ کر تو لے آؤں

وہ اپنی ذات سے باہر کہیں ملے تو سہی

بے قراری سے مرے پاس وہ آیا لیکن

اس نے پوچھا بھی تو بس یہ کہ فلاں کیسا ہے

سرد ہوتے ہوئے وجود میں بس

کچھ نہیں تھا الاؤ آنکھیں تھیں