bas ki faalumma-yurid hai aaj

bas ki fa.ālummā-yurīd hai aaj

har silah shor englistāñ kā

ghar se bāzār meñ nikalte hue

zohra hotā hai aab insāñ kā

chauk jis ko kaheñ vo maqtal hai

ghar banā hai namūna zindāñ kā

shahr-e-dehlī kā zarra zarra ḳhaak

tishna-e-ḳhūñ hai har musalmāñ kā

koī vaañ se na aa sake yaañ tak

aadmī vaañ na jā sake yaañ kā

maiñ ne maanā ki mil ga.e phir kyā

vahī ronā tan o dil o jaañ kā

gaah jal kar kiyā kiye shikva

sozish-e-dāġh-hā-e-pinhāñ kā

gaah ro kar kahā kiye bāham

mājrā dīda-hā-e-giryāñ kā

is tarah ke visāl se yārab

kyā miTe dil se daaġh hijrāñ kā

bas ki faalumma-yurid hai aaj

har silah shor englistan ka

ghar se bazar mein nikalte hue

zohra hota hai aab insan ka

chauk jis ko kahen wo maqtal hai

ghar bana hai namuna zindan ka

shahr-e-dehli ka zarra zarra KHak

tishna-e-KHun hai har musalman ka

koi wan se na aa sake yan tak

aadmi wan na ja sake yan ka

main ne mana ki mil gae phir kya

wahi rona tan o dil o jaan ka

gah jal kar kiya kiye shikwa

sozish-e-dagh-ha-e-pinhan ka

gah ro kar kaha kiye baham

majra dida-ha-e-giryan ka

is tarah ke visal se yarab

kya miTe dil se dagh hijran ka