سفر ہے شرط۔۔۔

قرون وسطیٰ کے مفرور شہر یاروں کے عشرت خانوں سے دور ایک قلندر نےاپنا مسکن بنایا، اتنی دور کہ اگر ایوانِ شاہی کی ہولناک عشرتوں کی بے ادب اور بے محابا صدائیں باریاب ہونے کی جسارت کریں تو چلتے چلتے ہانپنے لگیں۔ سلطانوں کی سلطانیاں ماہ و سال کے آتشیں گھوڑوں کے سموں کے نیچے کچلی گئیں۔ لیکن اس قلندر کے آستانہ کج کلاو کی ڈیوڑھی میں وقت آج بھی مودب کھڑا ہے۔ وقت اپنی ساری بے پناہی کے باوجود خاک ساری پر مجبور کردیا گیا ہے۔ یہیں خسرو سو رہا ہے۔ امیر خسروؔ جس کے دامن حیات پر سات سات بادشاہوں کے دریا سوکھ گئے اور جس کے قلم نے سات سات زبانوں کو سیراب کردیا، جس نے اپنے مخدوم کے پائے مبارک سے اتگری ہوئی ایک جوتی کی خریداری کے لیے ستر اونٹوں پر لدی ہوئی دولت لٹادی اور عمر بھر اس سودے کے سود پر ناز کرتا رہا۔ ہماری تاریخ۔۔۔ ہماری شاندار تاریخ کے پاس بھی ایسے کتنے صاحب السیف و قلم ہیں جن کے ایک ہاتھ میں فتوحات کی گردنیں ہوں اور دوسرے ہاتھ میں تصنیفات کی جلدیں؟ یہیں جہاں آرا بھی آسودۂ خواب ہے۔ چاہتی تو اپنے حکم سے بنوائی ہوئی شاندار مسجد کے کشادہ صحن میں سورہتی۔ لیکن اس نے بھی مسجد پر سلطان جی کے جوار رحمت کو ترجیح دی۔ انسان مرکر بھی انسان کا قرب چاہتا ہے۔ یہیں غالبؔ سو رہا ہے۔ کل تک جس کی قبر تھی اور آج جس کا مزار ہے۔ اور ایسے نہ جانے کتنے گردن فراز یہاں سربسجود ہیں جن کی ہیبت سے ان کے زمانے کے ولی کانپتی ہوگی، اسی قدیم بستی کو جانے والی سڑک پر جب ٹیکسی مڑنے لگی تو میں کانپ اٹھا کہ اس مقام پر توبڑے بڑے شہنشاہ اپنے خدم و حشم کے ساتھ پاپیادہ ہوگئے ہوں گے۔ تھوڑی دور چل کر مغلیٔ طرز کا وہ سالخوردہ اور شاندار پھاٹک ملا جس کے چلو پہلو میں ’’غالب اکیڈمی‘‘ کی جدید طرز کی عمارت کھڑی ہے۔ جیسے کسی بوڑھے عرب امیر کے پہلو میں نوجوان سکریٹری کھڑی ہو اور جسے دہلی کے ایک مخیر اردو پرست اور غالب نواز تاجر نے تعمیر کیا ہے میں ان لوگوں سے اتفاق نہیں کرتا جو ایسی تعمیرات کو تاجرانہ مصلحتوں ک فیتے سے ناپ کر چھوٹا ثابت کردیتے ہیں۔ اسی گئی گزری حالت میں بھی دہلی کے مسلمان تاجروں میں ایسے کتنے ہی دولت مند ہوں گے جو ایسی ایسی کتنی عمارتیں شراب کے گلاسوں میں گھول کر پی چکے ہوں گے۔ لیکن کسی کو اس کا خیر کی توفیق نہ ہوئی۔ اب اگر کسی کو اس کی توفیق ہوئی ہے تو وہ ہماری بے لوث داد و ستائش کا مستحق ہے۔ سیڑھیوں پر کچھ لوگ کھڑے ہیں۔ ان میں قمر چمک رہے ہیں۔ قمر رئیس اردو کے ترقی پسند نقادو اور شاعر، شعبۂ اردو دہلی یونیورسٹی میں ریڈر، میانہ قد، بھاری بدن، سلونا رنگ، پیشانی کے داہنے گوشے پر سیاہ بالوں کی جھالر پڑی ہوئی ہلتی ہوئی لڑکیوں کی سی شرماتی شرماتی مسکراہٹ سے لال ہونٹ کھلتی بند ہوتی آنکھوں میں کچھ نیند کا قصور کچھ بنتِ عنب کی خطا، بھوری ڈھیلی جیکٹ اور کرشچوفکی طرح ڈھیلے ڈھالے پتلون پر سرخ ٹائی باندھے آنے والوں کے استقبال کے لیے کھڑے ہیں۔ ٹائی توند کی طرف مائل ہوتے ہوئے پیٹ پر چمک رہی ہے۔ پھر کسی طرف سے انور عظیم طلوع ہوئے سانولا رنگ اچھا چوڑا چکلا بدن، جھوا بھربال (جو کم بخت آج تک سیاہ ہیں) ٹوٹی پھوٹی کریز والاسرمئی پتلون، لاولا سا کوٹ کسمیلی سی قمیض اور عجیب سی چپل (جیسے پیشاوری ناگرے اور چپل کو جوڑ کر دو سے تقسیم کردیا گیا ہے) اپنے سر سے پاؤں تک انتظام بنے میرے پاس رک گئے ہیں۔ رسمیات کا تبادلہ ہوا اور وہ کسی طرف کھو گئے۔ پھر شارب آگئے۔ شارب رودولوی۔۔۔ میں تو اس شارب کو جانتا ہوں جس نے لکھنؤ یونیورسٹی میں داخلہ لیا تھا۔ جب میں یونیورسٹی چھوڑ رہا تھا۔ وہ شارب تو دبلا پتلا گورا چٹا ریشمی ریشمی ساایک لڑکا تھا اور آج کا شارب تو لمبا چوڑا بھاری بھرکم سرخ سفید آدمی ہے۔ جس سے اظہار شفقت کرتے ہوئے تکلیف ہوتا ہے۔ کئی کتابوں کے مصنف اور مولف شاربؔ رودولوی اپنی بیگم کے ساتھ آرہے ہیں۔ جو خود بھی دہلی یونیورسٹی میں لکچرار ہیں۔ اور افسانے لکھتے ہیں اور کم از کم دو اچھے افسانوں کی خالق ہیں۔ لیجیے وہ اقبال مجید بھی آگئے، ’’پلور‘‘ نے پیٹ کو اور نمایاں کردیا ہے۔ ’’یاروں‘‘ سے ملاقات کی خوشی نے چہرے کی تھکن کو سرخیمیں تبدیل کردیا ہے۔ جب ہم لوگ لکھنو یونیورسٹی میں پڑھتے تھے۔ اس وقت میں شعر کہتا تھا اور اقبال افسانے لکھتے تھے۔ اور ’’حددچچا‘‘ لکھ کر ادبی حلقوں میں قبولیت حاصل کرچکے تھے۔ پھر اچانک کہیں کھو گئے اور اچانک ہی کہیں سے برآمد بھی ہوگئے۔ تھوڑے دن ہوئے ان کا ایک مجموعہ شائع ہوا ہے میں سیتاپور کی خیریت پوچھ رہا ہوں اور وہ اتنے خوش ہیں کہ بات ہونٹوں میں ٹوٹ پھوٹ جاتی ہے۔ پھر بلراج کومل اور دیویندر اسّر کے ساتھ نیرا نظر آئے بلراج نیرا اور میں ان کو دیکھ کر علی گڑھ پہنچ گیا ہوں۔ ابھی علی گڑھ میں اترا بھی نہ تھا کہ بنے بھائی آگئے سر پر چاندی کا ایک ایک تار سلیقے سے جما ہوا۔ عمر کی تاب سے کسی حد تک سنولایا ہوا رنگ سیاہ گوگلز نیچے کی طرف ہلکا سا جھکا ہوا نچلا سرمئی ہونٹ، اس کے نیچے عنابی ٹائی کی چست گرہ فارن کارڈ راے کا ہلکا سبز کوٹ، پریس کیا ہوا پتلون پالش کیا ہوا جوتا، ٹپ ٹاپ بڑھاپے کا اپنا حسن ہوتا ہے۔ جو اول جلول رہنے سے مسک جاتا ہے اور بناؤ سنگار سے مسخ ہوجاتا ہے۔ ان کو دیکھ کر کتنے ہی بوڑھے حسین آدمیوں کا خیال آگیا۔ لیکن ان کا ذکر نہیں کرسکتا کہ ان میں تو سرفہرست تو احتشام صاحب ہیں، اور احتشام صاحب کے نام کے ساتھ صیغہ ماضی کا استعمال کرتے ہوئے ہاتھ کانپنے لگتا ہے۔ ہڈیاں سرد ہونے لگتی ہیں اور آنسو!

آنسو رکیں تو قلم چلے

بنے بھائی کی نرم شفیق آواز و الفاظ میں شرابور ہو رہاتھا کہ رضیہ آپا نظر آئیں۔ رضیہ سجاد ظہیر۔ بالوں کی تھکی تھکی مصنوعی سیاہی کے نیچے ہلکا ہلکا میک اپ، ڈھکے ڈھکے رنگ کی پھولی پھولی ساڑی پر سرخ سوئٹر، چھوٹے چھوٹے قدم رکھتی چلی آرہی ہیں۔ وقت کتنی تیزی سے گزرتا ہے۔ ابھی کل ہی کی تو بات ہے لال باغ لکھنو میں سرور صاحب کی کوٹھی کے درانڈے میں انجمن ترقی پسند مصنفین کا جلسہ ہو رہا ہے میں باقر مہدی کے ساتھ گیا ہوں، باقر مہدی تڑپ رہے ہیں۔ مچل رہے ہیں اور میں رددی کے کونے میں خاموش بیٹھا ہوں اور سامنے دیوار سے پشت لگائے سفید چکن کی ساڑی باندھے بڑے سے جوڑے میں بیلے کی کلیاں پروئے ایک شاندار خاتون بیٹھی سگریٹ پی رہی ہیں۔ میں نے باقر مہدی سے پوچھا یہ کون ہیں؟ انہوں نے کہا ’’رضیہ سجاد ظہیر‘‘ اور میں انہیں دیکھ رہا ہوں پھر آزاد ہوئی اور انہوں نے ہاتھ بڑھاکر ساری کا پلو سر پر ڈال لیا اور میرے ذہن میں کتنے ی سوال پیدا ہوگئے۔ بلکہ سوال شکاری کتوں کی طرح مجھ پر نظر آنے لگے۔ پھر رضیہ آپا سے میرا تعارف ہوا۔ اور لکھنے والے دوسرے لڑکوں کی طرح شفقت کی ایک چٹکی میرے حصے میں بھی آئی۔ یہ وہی رضیہ آپا ہیں؟ میری سوچ پہلو بدل رہی تھی کہ کسی نے کہا سہیل صاحب!

اور سہیل صاحب مجھے لپٹارہے تھے پھولوں سے نبار کی طرح نازک، سر سے پاؤں تک سفید یاد نہیں کہ وہ کرتا پہنے تھے یا شیروانی کہ ان کا کرتا بھی شیروانی سے چھوٹا نہیں ہوتا۔ بوڑھا جسم، بوڑھا چہرہ، لیکن جوان آنکھیں جو ان ہنسی اور جواں اخلاق، اور جوانوں ہی کی طرح منھ میں خوب رچایا ہوا پان وہ مجھ سے اس کانفرنس کے متعلق پوچھ رہے ہیں اور میں ان سے اختر صاحب (اور رضوی) کی خیریت پوچھ رہا ہوں، شکیلہ آپا کی ب(بیگم شکیلہ اختر) مزاج پرسی کر رہا ہوں۔ ان دونوں کے متعلق جو کچھ میں سن رہا ہوں اس طرح سن رہا ہوں جیسے لوگ افطار کے بعد کھانا کھاتے ہیں۔ ہم لوگ سیڑھیوں سے اترآئے ہیں۔ سہیل صاحب کاحکم ہے کہ کسی چائے خانے میں چائے پی جائے میں تذبذب ہوں کہ نگاہ قمر سے لڑگئی اور قمر رئیس نے مجھے گھورا ہے۔ پھر کوئی سہیل صاحب کے پاس آگیا ہے۔ وہ رکے ہیں اور ساتھ ہی انور عظیم کی آواز آتی ہے کہ آپ لوگ اندر تشریف لے چلیں میں داخل ہو رہا تھا کہ کے۔پی۔ سنگھ سے ملاقات ہوگئی۔ کے۔پی۔ سنگھ شعبہ ہندی مسلم یونیورسٹی میں استاذ ہیں اور انجمن ترقی پسند مصنفین علی گڑھ کے سکریٹری ہیں اور اردو کی ادبی تحریکات سے آشنا ہیں اور اس کانفرنس میں شرکت کے لیے علی گڑھ سے آئے ہیں۔ انہیں کے ساتھ بلدیو مرزا مل گئے۔ بلدیو مرزا ’’اسکائی لارک‘‘ کے ایڈیٹر ہیں۔ اور شرکت کے لیے علی گڑھ سے آئے ہیں۔ لوگ بیٹھنے لگے ہیں کہ کسی نے آہستہ سے پیٹھ پر دھپ لگائی۔ مڑکر دیکھا تو عابد سہیل کھڑے تھے اور ان کے ہونٹ مشین کی طرح چل رہےتھے، معلوم نہیں وظیفہ پڑھ رہے تھے یا گالیاں بک رہے تھے، ویسے مجھے ان کی طرف سے پہلی بات کے سلسلے میں اندیشہ کم ہے۔ پکارنگ، کشادہ اور نمایاں خطوط، بال، جیسے ابھی دیہات کے لاری سےاترے ہوں اور منھ پونچھ کر سیدھے چلےآئے ہوں۔ نیلا سوٹ پہنے، پائپ نچا نچاکر باتیں کر رہے ہیں، میں پائپ کی طرف دیکھتا ہوں، لیکن بولتا نہیں ہوں اور میرا نہ بولنا عابد کو کھل رہا ہے، وہ جواب میں مسیح الحسن رضوی، منظر سلیم، احمد جمال پاشا اور عثمان غنی کا حال احوال بتلا رہے ہیں۔ عابد سہیل کی بیگم کو عابد کے کسی دوست کے بجائے ’’کتاب‘‘ سے شکایت رہتی ہے۔ اس لیے کہ عابد سہیل نے کتاب کو گود لے رکھا ہے۔ اور وہ اسے اپنی اکلوتی بیٹی پر فضیلت دیتے ہیں، کیا کیا جائے۔ ہماری سوسائٹی میں جہاں اور بہت سی خامیاں ہیں، ایک یہ بھی ہے کہ لڑکے کو لڑکی پر ترجیح دی جاتی ہے۔ لڑکا آخر بڑھاپے کا سہارا بھی تو ہوتا ہے۔ لیکن کتاب تو عابد سہیل کی جوانی کو گھن کی طرح لگ گیا ہے، خیر یہ ان کا خانگی معاملہ ہے۔

براہ کرم تشریف رکھیے تاکہ جلسے کی کارروائی شروع ہو۔

انور عظیم نے تنبیہ کی ہے۔میں یاروں سے باتوں کی لالچ میں پیچھے بیٹھنا چاہتا ہوں۔ لیکن بنے بھائی نے اپنے پاس بٹھالیا ہے۔ پھر قمر رئیس نے جو اس کانفرنس کے کنوینر ہیں، صدارت کے لیے میرا نام پکارا ہے۔ پریسیڈیم میں بلراج منیرا کے علاوہ اقبال مجید بھی ہیں۔ ہم تینوں اونچے شان دار ڈائس کی طرف آہستہ آہستہ بڑھ رہے ہیں۔ میرے داہنے بازو پر بلراج منیرا ہیں اور بائیں پر اقبال مجید، اور ان کے برابر رکھی ہوئی کرسی کے سامنے قمررئیس کھڑے ہیں۔ تقریر کر رہے ہیں۔

ترقی پسند ادیبو ں اور دانش وروں نے ادب اور

زندگی کے جس تعلق اور ادیب کے سماجی شعور اور

آگہی پر جو زور دیا ہے، آج بھی اس کی اہمیت سے

انکار ممکن نہیں۔

میرے سامنے ٹائپ کیا ہوا پروگرام رکھا ہوا ہے۔ پہلے اجلاس کی پریسڈیم میں رتن سنگھ کا نام کٹا ہوا ہے۔ اس کی جگہ اقبال مجید کا نام لکھا ہوا ہے، میں سوچ رہا ہوں کہ رتن سنگھ کا نام کیوں نہیں آئے رتن سنگھ کی شخصیت کے پاس دراز قد، سفید صافے اور قدرے ترشی ہوئی سیاہ داڑھی کے علاوہ کچھ بھی نہیں ہے۔ جس پر بہت سی سفید چونٹیاں رینگ رہی ہیں لیکن ان کے روئیں روئیں سے امڈتا ہوا ہے محاباخلوص ہر شئی کی تلافی کردیتا ہے۔ اور اپنے تاثر میں آدمی کو بہالے جاتا ہے میں سوچ رہا ہوں کہ اس سمینار میں اگر کرشن چندر، راجند سنگھ بیدی، عصمت چغتائی قرۃ العینی، سید احتشام صاحب، اخترنقوی اور ڈاکٹر محمد حسن نہیں ہیں تو نہ سہی کہ ان سب کا جمع کرلینا آسمان سے دودھ دوہنا ہے لیکن عیات احمد گدی، رام لال، جوگندرپال، اقبال متین، بلونت سنگھ، شکیلہ آپا، جیلانی بانو اور واجدہ تبسم کو تو ہونا ہی چاہیے تھا۔ کیسی خوبصورت محفل ہوتی تہلکہ ڈال دینے والی محفل تالیاں گڑگڑا رہی ہیں۔ قمر رئیس تعارفی تقریر ختم کرچکے ہیں، میں نے انور عظیم کانام پکارا ہے۔ وہ لمبے لمبے ڈگ بھرتے ڈائس کی طرف آرہے ہیں۔ چہرے بشرے کی پریشانی سے انتظام کی بوندیں چمک رہی ہیں۔

اور میں؟

ایک بار سرور صاحب نے مسکراتے ہوئے کہا تھا،

’’امسال میں قاضی صاحب کی رعایت سے فکشن پر سمینار کرنا چاہتا ہوں۔‘‘

اور فکشن پر سمینار ہونے والا تھا۔ قراۃ العین حیدر نہیں آرہی تھیں۔ راجندر سنگھ بیدی ’’دستک‘‘ کی نمائش میں مبتلا تھے، اختر صاحب بیمار تھے اس لیے شکیلہ آپا بھی نہیں آرہی تھیں۔ ڈاکٹر محمد حسن نے معذرت کرلی تھی اور میں غیاث احمد گدی کے جواب کے انتظار میں مبتلا تھا، کہ اچانک ان کا خط ملا۔ بالکل نہیں صاحب کے خط کی طرح نہیں مہین لکھا ہوا میں نےخط اس طرح پڑھا جس طرح ندیدے لڑکے میٹھا کا دونا چٹ کرتے ہیں۔ وہ سخت بیمار تھے لیکن میرے پاس کھڑے تھے۔

جولائی کا مہینہ اور یونیورسٹی میں سہالک کا زمانہ تھا، ایک شام کلب جانے کے لیےنکلنے والا تھا کہ کسی نے دستک دی۔ دروازے پر بڑھاپے کی طرف مڑتی ہوئی اور دبلے پتلے جسم والے ایک صاحب کرتا پاجامہ اور چپل پہنے کھڑے تھے اور ان کے منحنی سے سائے میں ایک صاحبزادے میں ڈرگیا کہ پکڑے گئے۔۔۔ وہی داخلے کا چکر!

’’قاصی عبدالستار صاحب ہیں؟‘‘

میں چونکا۔

’’آپ؟‘‘

’’غیاث احمد گدی!‘‘

ان سے بغل گیر ہوکر مدتوں بعد اپنی جسمانی صحت کی برتری کا احساس ہوا۔

’’آپ کا سامان کہاں ہے؟‘‘

وہ چکراگئےاور بہت دھیرے سے بولے۔

’’ہوٹل میں‘‘

کیا مطلب؟ آپ یہ چالتے ہیں کہ جب میں جھریا آؤں تو کسی ہوٹل میں قیام کروں۔‘

اور وہ کھڑے ہوگئے اسی وقت سامان آگیا، اور ہم لوگ جو زندگی میں پہلی بار ملے تھے اس طرح ملے جس طرح برسوں کے بچھڑے ہوئے یار ملتے ہیں۔ ہم لوگ دنیا جہاں کی باتیں کرتے رہے۔ بیچ بیچ میں داؤں پیچ بھی ہوتے رہے۔ وہ ادبداکر میرے ناولوں اور افسانوں کا ذکر کرتے اور میں جھکائیاں دے کر ان کی خوب صورت کہانیاں کو گھسیٹ لانا۔ رات اکسپریس ٹرین کی طرح اڑتی چلی جارہی تھی۔ لیکن ہم دونوں ایک دوسرےمیں کھوئے ہوئے تھے۔ باتوں کا یہ سلسلہ دہلی کی اس رات ختم ہوا جب غیاث حسن نعیم کے مہمان تھے اور میں شعیب قدوائی کے یہاں ٹھہرا ہوا تھا اور ہم سب اس محفل ناؤنوش میں خودفراموش ہوچکے تھے۔ جیسے عمیزا، کمار پاشی اور اظہار اثر نے برپا کیا تھا۔ اور اس عالم میں اور اتنی رات گئے شعیب کے گھر جانے کی نہ ہمت پڑ رہی تھی اور نہ غیاث اور حسن نعیم چھوڑ رہے تھے اور ہم دونوں اسی کمرے میں رات بسر کرنےوالے تھے جس میں چھوٹے قد کاموٹا تازہ ایک پلنگ پڑا ہوا تھا۔ اور فرش پر قالین بچھا تھا، جب حسن نعیم چلے گئے اور صبح کاذب انگڑائیاں لینے لگی اور نیند آنکھوں سے گزر کر اعتصا پر سوار ہونے لگی۔ تو لیٹنے کا مسئلہ پیدا ہوا۔ غیاث مجھ سے بڑے تھے، بیمار تھے اور میں ان کا مہمانتھا اور پلنگ ایک تھا۔ جس پر ہم دونوں کی سمائی ممکن نہ تھی اور ہم دونوں ایک دوسرے کو لٹانے کے لیے اڑ رہے تھے۔ پھر فیصلہ اس طرح ہوا جس طرح پتھروں کے زمانے سے آج تک ہوتا آیا ہے۔یعنی طاقت کے زور سے اور مدتوں بعد میرے جسم نے ایک لڑائی جیت لی، میں نے غیاث کو پلنگ پر لٹادیا اور خود قالین پر لیٹ گیا وہ لی ٹے لیٹے گھات لگاکر اٹھتے اور میں جھپٹ کر ان کے بازو دبادیتا، اور وہ اس محبت سے مجھے دیکھتے جس محبت سے کم لوگوں نے دیکھا ہے۔ لیکن غیاث احمد گدی نہیں آرہے تھے۔ غیاث احمد گدی نہیں آئے تھے۔

تالیاں بج رہی ہیں جیسے دیوالی کی رات دور بہت سے پٹاخوں کے زنجیرے ایک ساتھ چھٹ رہے ہوں۔ انور عظیم جاچکے ہیں۔ میں اقبال مجید کا نام پکارتا ہوں۔ اب ہال بھر چکا ہے تمام کا تمام کچھ لوگ بالکونی پر نظر آرہے ہیں اور میں علی گڑھ میں ہوں۔

علی گڑھ۔۔۔ سرسید کا علی گڑھ۔۔۔ جس نے ہندوستان کو اسپین بننے سے بچالیا، جس نے تاریخ کے اس جبر کو انگیز کرلیاجو بڑی بڑی قوموں کو مٹا دیتا ہے۔ علی گڑھ۔۔۔ جس کے لیے ذاکر صاحب نے کہاتھا کہ مستقبل کے ہندوستان کاجو مقدر ہوگا اس میں علی گڑھ کی رہنمائی کا بڑا حصہ ہوگا۔علی گڑھ۔۔۔ علی گڑھ جس نےاردو نثر کو بلوغت عطا کی جس کے مشرق سے تنقید کا آفتاب طلوع ہوا۔ اور جس کے نقش پا اردو ادب کی تاریخ میں چراغوں کی طرح روشن ہیں۔ علی گڑھ علم و ادب کا معبد ہی نہیں تہذیب کا مرکز اور تمدن کا معیار بھی ہے۔ دنیا کے پاس ایسے کتنے ادارے ہیں جن کے چہروں کی خرشیں کروڑوں دنوں کو لہولہان کر دیتی ہیں۔ اسی علی گڑھ میں آج بہت چہل پہل بے فیکلٹی آف آرٹس کی شان دار عمارت کا ہال آہستہ آہستہ بھر رہا ہے۔ شمالی دیورا کے ساتھ تختے پر اردو اور ہندی میں سمینار کا عنوان لکھا ہے۔ دراصل یہی وہ پہلا سمینار ہے جس نے ترقی پسند ادیبوں اور دانش وروں کو جھنجھوڑنے کا کام انجام دیا تھا۔ لمبی چوڑی میز کے پیچھے تین کرسیاں رکھی ہیں ان کے درمیان سانولی رنگت اور دراز قامت کاایک نوجوان کانپ رہا ہے۔ یہ کے۔پی۔ سنگھ ہیں اس سیمینار کے کنوینر اور جن کو میں اقتدار عالم خاں کا گنیٹیو کہتا ہوں۔ اور نگیٹیو کی اہمیت فوٹو گرافر جانتا ہے۔ لانبے قد کے گورے چٹے اقتدار عالم خاں پردے کے پیچھے کے آرٹسٹ رہے ہیں۔ لیکن اب کھل کر سامنے آگئے ہیں۔ ادب کی تاریخ کا یہ عہد بھی خوب ہے۔ ہکلاتے ہوئے خیالات اور تتلاتی ہوئی زبان کا چار جامہ چڑھائے۔ لکڑی کے گھوڑوں کی ٹانگوں میں کچھ لوگ دندناتے پھر رہے ہیں۔کسی کے پاس مدیروں کی تعریف اور فن کاروں ی تضحیک سے بھرے کچھ خط ہیں۔ کسی کے پاس چند تبصرے ہیں کسی کے پاس دو ایک مضمونچے۔ لیکن یہ سب ادیب ہیں کہ صحافت کے سیلاب نے ادب کے میزان بہادیے۔ اقتدار عالم خاں نے تو مستقل موضوعات پر مفصل اور مدلل مضامین لکھے ہیں۔ جو نقوش اور فکر و نظر میں شائع ہوچکے ہیں لیکن اپنے آپ کو ادیب نہیں کہتے خاکساری میں، قدامت ہوئی نا؟ میز کے داہنے بازو کی دوسری رو میں شعبہ سیاسیات کے ناصر صاحب ہیں۔ اقتدار عالم خاں کے اور میرے درمیان ڈکٹر رویندر بیٹھے ہیں۔ ہندی کے مشہور شاعراور نقاد اور نصف درجن کتابوں کے مصنف جن کی میانہ روی کے پاس قلہ کی دلیل ہے میرے سامنے ڈاکٹر عقیل ہیں۔ دبلے پتلے بجھے بجھے سے۔ شاید ابھی سفر کی تکان نہیں اتری۔ ان کے قریب تفن صاحب شیعہ کے ڈین چھڑی کا سہارا لیے بیٹھے ہیں۔ جو لکھنؤ کو نہیں جانتا وہ بھی تقّن صاحب کو جانتا ہوگا۔ انہیں کے برابر سنی تھیولوجی کے ڈین مولانا سعید احمد اکبر آبادی ہیں۔ ان کے پیچھے مسعود علی غوقی، خلیل الرحمن اعظمی، وحید اختر اور شہریار پاس پاس بیٹھے یں۔ ہندی کے مشہور نقاد نامور سنگھ چوہان نے ڈاکٹر ہربنس لال شرما صدر شعبۂ ہندی کے کان میں کچھ کہا ہے اور وہ سرخ ہوگئے ہیں۔ اسی قطار میں پروفیسر اسلوب احمد انصاری، ڈاکٹر انور انصاری، اولاد احمد صدیقی، ڈاکٹر ہریش رائے زادہ، اور ڈاکٹر منیر بیٹھے ہوئے ہیں۔ دبئی سے قمر رئیس کے ساتھ شریف احمد اور صدیق الرحمن قدوائی بھی آگئے۔ آگے جگہ نہیں ہے، پیچھے جارہے ہیں۔ اب ہاگل بھر گیا ہے، ڈاکٹر خورشید الاسلام کے ساتھ ڈاکٹر محمد حسن بھی داخل ہوئے، کہیں جگر نہیں ہے۔ بالکل پیچھے جارہے ہیں، ان کی پشت پر جاوید کمال بھی ہیں۔ سچ پوچھنے جاوید کمال پورے سیمینار کی پشت پر ہیں، سارا انتظام ساری دوڑ دھوپ ان کے بھاری بھرکم وجود کی مرہون کر رہی ہے۔ سجاد ظہیر آئے اور جذبی صاحب کے پاس ہی بیٹھ گئے۔ کھڑے ہوئے سوٹ گلے تک بند نستعلیق شیروانیاں، سیاہ برقعے، جدید اور قدیم اور حسین اور سنجیدہ لباس سب مسکرا رہے ہیں جیسے سبزے پر پھولوں کی کیاریاں دہک رہی ہوں۔ اور علیم صاحب۔ آگئے مسلم یونیورسٹی کے وائس چانسلر ترقی پسند نقاد جو شعر بھی موزوں کرلیتے ہیں چوری دار پاجامہ اور شیروانی پہنے ہیں۔ جس کاج آخری بٹن سب سے بلند ہے۔ سرخ چہرے پر سفید فرانسیسی داڑھی، پیشانی کی طرف چڑھتے ہوئے ابرو ان کے چہرے کی خصوصیت ہیں۔ ان کے بیٹھتے ہی کے، پی سنگھ نے افتتاح کی گزارش کی، وہ مسکراتے ہوئے مائک پر آگئے، بالکل اسی طرح جس طرح درجنوں جلسوں کو خطاب کرتے دیکھ چکا ہوں۔ میں انہیں معروضی نہیں، تنقیدی نگاہ سے دیکھ رہا ہوں۔ لیکن پروفیسر ڈاکٹر علیم اور وائس چانسلر ڈاکٹر علیم میں کوئی تبدیلی نہیں نظر آرہی ہے، جو علی گڑھ سے واقف ہیں، وہ علی گڑھ کے وائس چانسلر کے معنی جانتے ہیں۔ کرنل بشیر حسین زیدی سابق وائس چانسلر مسلم یونیورسٹی علی گڑھ نے ایک بار کہا تھا کہ حیدرآباد، بھوپال، رام پور، سب کا اختتام ہوچکا، بس ایک علی گڑھ باقی ہے۔

علیم صاحب تقریر کر رہے ہیں،

’’میں افتتاح کو پسند نہیں کرتا۔ لیکن یہ افتتاح رسمی نہیں ہے۔ میں اس موقع پر اپنے خیالات آپ کے سامنے پیش کرنا چاہتا ہوں۔ فنون لطیفہ میں سب سے زیادہ سماجی عمل ادب کا ہے اور اسی لیے اس کا ذریعہ زبان ہے جو خود سماجی عمل کی مرہون منت ہے۔ اس لیے تجریدی مصوری تو شاید ممکن ہو لیکن تجریدی زبان اور تجریدی ادب ممکن نہیں۔۔۔ ترقی پسندی کسی فیشن یا فارمولے کا نام نہیں۔ کوئی ایک بندھا ٹکا نقطہ نظر نہیں ہے بلکہ انسانی تعلقات کی فکر و جذبے کی۔ افراد و معاشرے کی کش مکش اور ہم آہنگی کی خواہش کے حقیقت پسندانہ اظہار سے عبارت ہے۔ یہ بھی ممکن ہے کہ اس کش مکش کی عکاسی تو ہو لیکن ادبی تقاضے پورے نہ ہوسکیں۔ اس صورت میں فنکار اپنے منصب کو پورا نہیں کرسکا۔ ترقی پسند ادیبوں کے لیے ضروی ہے کہ وہ جو کچھ لکھیں اس میں ادبی حسن اور اعلیٰ فنی قدروں کو ملحوظ رکھیں جو لوگ ادب کی سماجی ذمہ داری سے انکار کرتے ہیں وہی لوگ روٹی، روزی اور سماجی منصب کے حصول کے لیے عام انسانوں کی طرح تمام کن استعمال کرتے ہیں۔ لیکن ادب میں اپنے آپ کوئی عام انسانوں سے اور سماج سے الگ تھلک اور غیر متعلق رکھنے کی کوشش کرتے ہیں۔ کیا سماج کو اس کا حق نہیں کہ وہ بھی اپنے آپ کو غیرمتعلق قرار دے سکے، جو ادب کسی کی سمجھ میں نہ آئے یا ترسیل سے بے پروائی برتے اس کو میں سماج دشمن سمجھتا ہوں۔ نئی بات کہنے کی خواہش مبارک ہے لیکن اس کوشش کے نشے میں ادب کے بنیادی منصب کو فراموش نہیں کرنا چاہیے۔۔۔‘‘

تالیاں گرج رہی ہیں۔ مقبول احمد خاں اور رضا امام اور اقبال حسن سرگوشیاں کر رہے ہیں۔ کنوینر نے ڈاکٹر خورشید الاسلام کا نام صدارت کے لیے تجویز کیا ہے۔ خورشید صاحب آرہے ہیں۔ دبا ہوا قدر، ڈھکا ہوا رنگ، بالوں پر جمتی راکھ عنابی شیروانی اور چوڑی دار پائجامہ پہنے، چشمہ لگائے آہستہ آہستہ آئے۔ اور کرسی صدارت پر بیٹھ گئے، جس نے خورشید صاحب کی نثر پڑھی ہے وہ اسی کے اسلوب کا قائل ہے۔ جس نے ان کی باتیں سنی ہیں وہ ان کی طاقت لسانی سے چور ہے، خورشید صاحب کی کمزوری ان کی یہی باتیں ہیں۔ وہ خوب صورت اور نادر خیالات جو اپنے اظہار کے لیے ان کو تحریر پر مجبور کرتے باتوں کی کیچڑ میں کھوجاتے ہیں اور چالاک سننے والے چن چن کر اپنی گردن کا ہار بنالیتے ہیں اب سجاد ظہیر اپنا مقالہ پڑھنے کے لیے اٹھے ہیں، سجاد ظہیر، بنے بھائی، نقاد شاعر افسانہ نگار، ناولسٹ اور رہنما۔۔۔ جنہوں نے ترقی پسند تحریک کا خواب دیکھا اور اس کی تعبیر کو گرفتار کرلیا گوگلس اتار کر جیب میں رکھے۔ نرم اور پراعتماد آواز میں پڑھنا شروع کیا۔

’’علی گڑھ یونیورسٹی کی کسی ادبی محفل میں زبان کھولنا آسان کام نہیں۔ باہر سے ہر آنے والے کو اس کا احساس ہوتا ہے کہ سید احمد خاں، حالی، شبلی، اور حسرتؔ موہانی کی فکر اور ان کے تخلیق سر چشموں کا مرکز ہے، آج بھی رشید احمد صدیق، مجنوں گورکھپوری ڈاکٹر عبدالعلیم، معین احسن جذبی، آل احمد سرورؔ، اختر انصاری جیسے مستند اساتذہ یہاں موجود ہیں۔ خورشید الاسلام، منیب الرحمن، قاضی عبدالستار اور خلیل الرحمن اعظمی اور راہیؔ معصوم رضا کی ہستیاں ایسی ہیں جنہوں نے جدید اردو ادب کے ایوان میں قابل قدر مقام حاصل کیا ہے۔‘‘

اب ہندی کے نامور نقاد اور ادیب ڈاکٹر نامور سنگھ چوہان تقریر کرنے اٹھے ہیں۔ سفید کھدر کا لانبا کرتا، (جسے ان کے قد نے اور لانبا کردیا ہے) اور دھوتی پہنے ہیں شانوں پر چادر پڑی ہے اور پوری شخصیت کی ساری آگ آنکھوں میں دبک رہی ہے۔ ڈاکٹر موصوف کو احساس ہے کہ سننے والوں کا اکثریت ہندی کم سمجھتی ہے اور اسی لیے وہ انگریزی اصلاحوں کی بھرمار کر رہے ہیں۔

اب مائک پر ڈاکٹر محمدحسن آرہے ہیں، مشہور نقاد اور ڈرامہ نگار دبلے، سانولے، کشیدہ قامت، چشمہ لگائے، بالوں کی کھچڑی میں دال کم اور چاول زیادہ اور آنکھیں دیکھیے تو گیا ابھی نہاکر نکلے ہیں۔ بے جھپک اور بے باک انداز میں مقالہ پڑھ رہے ہیں۔ ان کی آواز میں وہ قوت ہے جو مطالعے اور غور و فکر سے پیدا ہوتی ہے اور میں ان کی ذات سے وابستہ خوب صورت یادوں کے سنہرے دیس کھوگیا ہوں۔

اب کنور پال سنگھ نے ڈاکٹر عرفان حبیب کا نام پکارا ہے۔ چھوٹا قد، چمپئی رنگ، الجھے بال، سیدھا سادہ چشمہ، بے نیازی کے رنگ کا لباس پہنے تیز قدموں سے آئے اور مدھم آواز میں مضمون پڑھنے لگے، یہ واحد مضمون تھا جو انگریزی میں پڑھا گیا۔ بیچ بیچ میں خالص آکسفورڈ کے انداز میں مزاج لطیف میں لیٹا ہوا چھوٹا سا فقرہ چپکے سے ٹانک دیا۔ محفل تازہ دم ہوئی اور یہ آگے بڑھ گئے۔

تالیوں کی گونج میں عرفان صاحب جارہے ہیں اور خورشید صاحب کھڑے ہوگئے ہیں۔ خورشید صاحب کی تقریر میں بھی تحریر کی طرح ان کا اپنا رنگ ہے۔ لطیف طنز، شیریں چٹکیاں۔ آواز کا زیروبم سب کچھ انانیت کے دھاگے میں پرویا ہوا ہے۔ وہ گرج رہے ہیں اور برس رہے ہیں۔

’’چند ادیبوں کو جان لیوا تنہائی محسوس ہوتی ہے۔ ایسے لوگوں سے سوال کرنا چاہیے کہ یہ کس بناپر ہوتی ہے۔ اور آپ اس سے کس طرح عہدہ برآہوئے ہیں۔ تہائی کو FETISH بنانے والے ادیب ان فقیروں سے مشابہ ہیں جو اپنی پنڈلی پر کلیجی باندھ کر بیٹھ جاتے ہیں اور ہر آنے جانے والے کو یہ زخم دکھاکر بھیک مانگتے رہتے ہیں۔ تنہائی کااحساس اگر آفاقی ہے تو مبارک ہے ورنہ ریاکاری ہے۔ موت کا خوف اگر تحمل پیدا کرتا ہے تو مبارک ہے ورنہ یہ درد شکم کو دردِ زہ سمجھنے یا جتلانے کے مترادف ہے۔‘‘

اب آزاد لائبریری پر شام اتر رہی ہے۔ دور تک کا ہی مخمل کی میٹنگ بچھی ہے جس کے حاشیے پر اشوک کے جوان درخت سبز ٹیڈی سوت پہنے کھڑے ہیں اور کچھ شمشاد اور صنوبر انسانوں کا روپ دھارےٹہل رہے ہیں۔ اور تھوڑی تھوری دور پر ہفت رنگ قالین بچھے ہیں اور کنورپال سنگھ مجھ سے کہہ رہے ہیں کہ آپ ہمارے سیمینار میں مضمون پڑھیے۔ میں چپ ہو جاتا ہوں۔ پھر اسی رات اقتدار عالم خاں اسٹاف کلب کے ’’بلیرڈ روم‘‘ میں داخلہوئے ہیں۔ ’’کیو‘‘ لیے ہوئے ان کے پاس ہی رک گیا ہوں۔ انہوں نےمضمون پڑھنے کے لیے کہا ہے اور میں نے جواب میں قہقہہ لگایا ہے۔ اقتدار عالم خاں کا چہرہ کہہ رہا ہے کہ اس قہقہے سےان کو خوشی نہیں ہوئی۔ شاید اس کا جذبات کے بے محابہ اظار کو پسند نہیں کرتا لیکن فنکار تو جذبات کا پتلا ہوتا ہے۔ ہنستا ہے تو شادمانی ہنسنے لگتی ہیں، روتا ہے تو پتھر آب دیدہ ہوجاتے ہیں۔

اقتدار عالم خاں چلے گئے ہیں، میں کھیلتا رہا اور سوچتا رہا۔ ذہن۔۔۔ جھوٹ کو سچ اور سچ کو جھوٹ کہنے پر اصرار کرنے والا ذہن مادی اور ذاتی فائدے اور نقصان کے درمیان پنڈولم کی طرح دھڑکنے والا ذہن، مجھے خاموش رہنے کا مشورہ دیتا ہے۔ لیکن دل جو ہمیشہ بائیں بازو میں رہتا ہے جو دن میں خواب دیکھتا ہے، جو عاشق کو وفا اور ادیب کو بغاوت پر اکساتا ہے۔ جو راتوں کی گردن میں بیدار یوں کے بار پہناکر خوش ہوتا ہے۔ جو جوانی میں چہرے کومسخ اور بالوں کو سفید کرڈالتا ہے۔ اپنی سی کر گزرنے پر اصرار کرتا ہے لیکن اب تو میرا مضمون ختم ہوگیا اور کنور پال سنگھ نے ڈاکٹر عقیل کو ڈانس پر آنے کی دعوت دی ہے۔ ان کی آواز کمزور اور لہجہ دھیما ہے۔ دور بیٹھے ہوئے لوگ کچھ سن نہیں پارہے ہیں۔ اس امید پر کہ تھوڑی دیر بعد شاید آواز بلند ہوجائے۔ خاموش بیٹھے ہیں۔ امید جس کے گرد خوابوں کے شامیانے لگے ہیں۔ اب لاؤنچ بھرگیا ہے۔ جگہ جگہ انسانی جسموں کے جھاڑ روشن ہیں۔

اب ہندی کے شاعر اور شعبہ ہندی دہلی یونیورسٹی کے استاد شوناتھ ترپاٹھی مضمون پڑھنے اٹھے ہیں۔ چھوٹا سا دلچسپ اور خیال انگیز مقالہ پڑھا۔ درد لی اور چلے گئے۔ پھر شریف احمد استاد شعبہ اردو دہلی یونیورسٹی بحث کا آغاز کرنے اٹھے ہیں۔ نہ شخصیت میں چمک دمک ہے اور نہ آواز میں گھن گرج ہے۔ سیدھے سادے اسکالر ہیں چپکے سے آئے۔ اپنی بات کہی اور بے نیازی سے چلے گئے۔ پھر نعمان احمد صدیقی کھڑے ہوکے، نزلے نے جوانی سے جوانی چھین لی۔ پتلے سے چہرے پر شکنوں کا جال بچھا ہے۔ چھوٹے سے چھوٹا ردعمل ان کے چہرے کے خطوط کی معنی خیز جنبشوں سے پڑھا جاسکتا ہے۔ ایسے حساس چہرے بہت کم ہوتے ہیں۔ اگر خاموش بیٹھے رہیں تو کسی کی نظرنہ پڑے، اور اگر بولنے کھڑے ہوجائیں تو بڑے بڑے جغادری ادیب و شاعر نوٹس لینے پر مجبور ہوجائیں۔ جب ترقی پسندی اپنے عروج پر تھی تو یہ لبرل تھے۔ جب ترقی پسندی کا سیلاب اترا تو یہ ترقی پسند ہوگئے۔ وہی بائیں بازو والی بات۔ آواز جس پر اعتماد کا صیقل ہے گونج رہی ہے۔ کنور پال سنگھ کھڑے ہوئے تو میں سمجھا کہ کسی کے نام سمن جاری کرنے والے ہیں، لیکن وہ خود تقریر کرنے لگے ہیں۔

کنور پال سنگھ نے خلیل الرحمن اعظمی سے اپنے خیالات کے اظہار کے لیے کہا ہے لیکن وہ بیٹھے رہے۔ اور اقتدار عالم خاں ڈائس پر آگئے۔ جدیدیت کے سمینار میں انہوں نے جو تقریر کی تھی وہ اپنی آتش نفسی اور شعلہ بیانی کے لیے مدتوں یاد رہے گی۔ لیکن یہ اقتدار میزبان اقتدار ہیں۔ نہ صرف یہ کہ تلوار نیام میں ہے بلکہ سرے سے کمر خالی ہے۔

پھر لنچ کا وقفہ ہوا۔

تیسرے اجلاس کی صدارت سید سجاد ظہیر کر رہے ہیں۔ علی گڑھ کے کسی ادبی جلسے کی آخری صدارت کر رہے ہیں۔ ابھی آنکھوں پر احتشام صاحب کے موت کا قرض ب اقی تھا۔ سجاد ظہیر کی موت نے دستک دینا شروع کردی۔

صدیق الرحمن قدوائی ڈائس پر آگئے ہیں۔ گول مٹول بدن، گول چہرہ، بڑھا ہوا شیو، خوش اخلاس، سنجیدہ اور کم گو۔ اسٹینڈ پر جھکے ہوئے اٹک اٹک کر مضمون پڑھ رہے ہیں۔ شاید صاف کرنے کا موقع نہیں ملا۔ سماعت لنگرارہی ہے۔ لیکن سب پرسکون ہیں طالب علموں کی ایسی مہذب خاموشی کا تماشا بھی علی گڑھ ہی میں دیکھا جاسکتا ہے۔

اب قمر رئیس مقالہ پڑھنے جارہے ہیں۔ مقالے کا لفظ۔۔۔ بکنیک کے طور پر استعمال کیاگیا ہے۔ ورنہ ضخامت میں ریڈیو ٹاک سے زیادہ نہیں تھا۔ کانفرنس اور سمینار میں جو لوگ دفتر کھول کر بیٹھ جاتے ہیں وہ گھاٹے میں رہتے ہیں۔ قمررئیس کو یہ راز معلوم ہے۔ میں مقالہ سن رہا ہوں کہ قمر نے مجھے دیکھا اور ایک تلوار سی چمکادی۔۔۔

قاضی عبدالستار کا مقالہ ایک تخلیقی فن کار کا مقالہ ہے لیکن انہوں نے پریم چند کی کہانی ’’کفن‘‘ کا جس طرح ذکر کیا ہے اس سے مجھے اتفاق نہیں ہیں، میں ’’کفن‘‘ کو پریم چند کی نمائندہ کہانی ماننے سے انکار کرتا ہوں۔‘‘

قمر کی بات ابھی ختم نہیں ہوئی تھی کہ علیم صاحب آگئے اور ڈائس کے قریب ہی بیٹھ گئے۔ مجھے اپنی آواز سننے کا شوق نہیں ہے۔ لیکن قمر نے چھیڑ جو دیا۔ ڈاکٹر حسن احمد کے بعد ڈاکٹر بھر مراٹھے ہیں۔ ایک ہاتھ اسٹینڈ پر رکھ لیا ہے دوسرے سے سیدھے پیچھے الٹے ہوئے کھچڑی بالوں کو سہلایا ہے۔ اور عادل کے مطابق پنجوں پر کھڑے ہوگئے ہیں۔ ان کی تقریر کے بعد ڈاکٹر محمد حسن آگئے ہیں، اور جیسے اعلان کر رہے ہیں،

’’ترقی پسندی کوئی جامع فارمولا یا مذہبی عقیدہ نہیں ہے، دراصل ایک نقطۂ نظر ہے اور اس نقطۂ نظر کی تعبیر و توجیہہ مختلف حالات میں مختلف طریقوں پر کی جائے گی۔ آج کے ہندوستان میں ترقی پسندوں کے تقاضوں کو جاننے اور خدوخال پہچاننے کے لیے ضروری ہے کہ آج کے ہندوستان کی تصویر پیش نظر ہو، قاضی عبدالستار نے اپنے مقالے میں یہ اہم بات کہی ہے کہ ہندوستان کی بیاسی فی صدی آبادی دیہات میں رہتی ہے۔ لیکن ہم نے سماجی حقیقت نگاری کے لیے نمائندہ آبادی مزدوروں کو سمجھ لیا ہے جو کروڑوں کسانوں کے مقابلے میں بہت کم ہیں اور نمائندہ حقیقت نہیں ہیں۔‘‘

میں ابھی علی گڑھ میں تھا کہ بلراج مین رانے مجھے جگادیا۔ اقبال مجید جاچکے تھے کہ میں ڈاکٹر گوپی چند نارنگ سے تقریر کے لیے کہوں، میں نے انکار کردیا ہے کہ کرسی صدارت کسی سے گزارش نہیں کرتی۔ منیرا نے خود کہا، اور ڈائس پر آگئے۔ ڈاکٹر نارنگ کی تقریر ان کے اپنے نقطہ نظر کی ٹھنڈے لہجے پالی مانی زبان اور اقصدالی انداز سے کی ہوئی وکالت کر رہی ہے۔ پورے سمینار میں ایک خاص قسم کی سجدیدیت کی وکالت نارنگ جی نے کی۔ اب بنے بھائی۔۔۔۔ ڈائس پر آگئے ہیں۔ رک رک کر بول رہے ہیں۔ بڑھاپے کے باوجود آواز پر جوانی ہے، لہجے میں تیزی ہے، ڈاکٹر نارنگ کی تقریر کا جواب دے رہےہیں۔ علم دلیلوں کے ڈھیر لگا رہا ہے۔ بلیغ ظرافت چٹکیاں لے رہی ہے۔ قمر نے میرے کان میں کہا کہ میں بنے بھائی کو ٹوک دوں کہ وہ بہت سارا وقت لے چکے، میں نے انکار کردیا۔ کوئی ہم عصر ہوتا تو شاید میں یہ کرگزرتا لیکن وہ تو بنے بھائی ہیں اور موجیں مار رہے ہیں اور میں تماشہ کر رہا ہوں، پھر عابد سہیل آئے۔ علامت نگاری پر چھوٹی سی خوبصورت تقریر کی اور چلے گئے اب دو بج رہے ہیں اور کئی نام ہیں جو بحث میں حصہ لینے کے لیے ڈائس پر آنا چاہتے ہیں۔ اور جسم روحانی غذا سے سیر ہوچکا ہے تھک چکا ہے اور مادی غذا کے لیے بے قرار ہے، مادہ ہم خاکیوں کے اعمال کا محور ہے، جی چاہتا ہے کہ میں خطبہ صدارت کے نام پر ایک چھوٹی سی تقریر کروں لیکن۔۔۔ پٹنہ یونیورسٹی کا شعبۂ اردو غالب سنٹیزی منارہا تھا۔ تیسرے اجلاس کی میں صدارت کر رہا تھا۔ آج کی طرح وہاں بھی گھڑی دیکھی تھی۔ جس میں آج ہی کی طرح دو بج رہا تھا اور میں نے جلسہ برخاست ہونے کا اعلان کردیا تھا۔

لکھنؤ میں نئے ادیبوں اور شاعروں کا سیمینار تھا۔ رام لال کنوینر تھے اور میں صدر وہاں بھی میں نے کرسی صدارت کو خاموشی رہنے کی تعلیم دی تھی، پھر آج وہ روایت کیوں توڑی جائے آج بھی میں جلسے کی برخاستگی کا اعلان کرتا ہوں۔

میری طرح دوسرے مہانوں کے ساتھ کچھ میزبان بھی غالب اکیڈمی کے زمین دوز ہال میں داخل ہوجاتے ہیں جہاں تھوڑی سی پلیٹوں میں تھوڑا سا کھانا رکھا ہے۔ اور بہت سے آدمی تھوڑا تھوڑا کھاکر بہت سا پانی پی لیتے ہیں۔

دوسرا اجلاس جو دن کے ڈھائی بجے شروع ہونے والا تھا۔ ساڑھے تین بجے شروع ہو رہاہے۔ ہال میں کرسیوں کی آخری قطار کے سامنے تاباں صاحب کھڑے ہیں غلام ربانی تاباں گورے چٹے لانبے چوڑے، خضاب آلود سیاہ بال کے نیچے سیاہ چشمہ لگا ہے۔ چالے تو مکتبہ جامعہ سربراہی پر ڈٹے رہتے ہیں۔۔۔عمر اور اس زمانے میں جب کہ لوگ ملازمتوں سے جونک کی طرح چمٹے رہنے پر حضرت درآبرو کی بازی لگادیتے ہیں۔ محض ایک اصول کی خاطر ایسی ملازمت چھوڑدی اور اس طرح چھوڑدی جیسے لوگ دودھ کے پیالے میں کچھ کالا کالا دیکھ کر چھوڑ دیتے ہیں۔ میں ان سے گفتگو کر رہا تھا کہ سانولے رنگ اور گداز جسم کی ایک بی بی اپنی سفید ساری کا آنچل درست کرتی آئیں۔ آداب کیا۔ میں پہچان گیا۔

’’آپ صغری بہاری ہیں؟‘‘

’’جی!‘‘

’’آپ کا ناول ’’پابچولا‘‘ میں نے پڑھ لیا ہے، مجھے بہت اچھا لگا۔‘‘

’’میں نے تو آپ کو بھیجا تھا۔‘‘

’’جی ہاں۔۔۔ اقتدار عالم خاں ذکر کیا تھا۔ لیکن عجیب اتفاق ہے۔‘‘

قمر رئیس نے دوسرے اجلاس کا اعلان کردیا ہے۔ رکی سینی بیٹھ گئے۔ ان کے ساتھ پریسڈیم میں دیوندر اسر اور افصح ظفر بیٹھے ہیں، اور میرے ذہن میں علیم مسرورکا ناول ’’بہت دیر کردی‘‘ گھوآرہا ہے۔ شعبہ اردو دہلی یونیورسٹی کی طالبات کے جھرمٹ میں کوثر اور قیصر نظر آئی ہیں۔ میں نےان دونوں کو اپنے پاس بلاکر بٹھالیا ہے۔ سامنے نوجوان شاعر عنوان چشتی بیٹھے ہوئے ہیں ان کو دیکھ کر اس بیماری کا خیل آگیا جس کا ذکر انہوں نے لکھنو کی اساتذہ اردو کی کانفرنس سے واپسی پر کیا تھا، اس سفر سے ایک حسین یاد وابستہ ہے۔ لکھنو اکسپریس کے اسی ڈبے میں ڈاکٹر محمد حسن تھے۔ قمر رئیس تھے۔ شارب رودولوی تھے۔ عنوان چشتی تھے اور میں تھا۔۔۔ گاڑی چلنے کے بعد تبرک کی خاطر کم اور پزیرائی کے خیال سے زیادہ ناشتے دان کھولا گیا۔ جو عنوان چشتی یا ڈاکٹر محمد حسن کے کسی عزیز یا دوست نے ساتھ کردیا تھا۔ تھوڑے سے اصرار کے بعد سب شریک ہوگئے ہیں۔ معذور تھا کہ میرے داہنے ہاتھ کا انگوٹھا بری طرح پک گیا تھا اور نوالہ بنانے سے قاصر تھا۔ میں انکار کر رہا تھا کہ ڈاکٹر محمد حسن کے ہاتھ کا نوالہ میرے ہونٹوں تک آگیا۔ میں نے ذرا سے تکلف کے بعد منھ کھول دیااور وہ اسی طرح ایک نوالہ مجھے کھلاتے اور دوسرا خود کھاتے رہے۔ مجھے یاد نہیں کہ میں نے اپنے ہوش میں اس طرح کسی کے ہاتھ سے کھانا کھایا ہو۔ کھانے تو اس سے اچھے بھی کھانے کو ملتے رہیں گے لیکن اس کھانے کی لذت!

صدیق الرحمن قدوائی مضمون پڑھ رہے ہیں، بھاری آواز چبھتے ہوئے فقرے میرے بائیں طرف کا دروازہ کھلا ہے، اور وہ درگاہ مبارک کی مشہور عمارت ’’بارہ کھمبا‘‘ سفید سنگین مغلئی محرابیں چمک گئیں اور میرے تخیل کے تلواروں میں گدگدی ہونے لگی ہے۔ لیکن میں تھوڑی دیر ذہنی طور پر بھی اس اجلاس میں موجود رہنا چاہتا ہوں۔ افصح ظفر میرے سامنے ہیں، بہار سےآئے ہیں اور بڑے اعتماد کے ساتھ مضمون پڑھ رہے ہیں اور میں ان کے گزشتہ مضامین کے متعلق سوچ رہا ہوں۔ میرے پاس ہی تنویر علوی بیٹھے ہوئے ہیں جو ابھی حال ہی میں جامعہ ملیہ یونی ورسٹی کے شعبہ اردو کی ریڈر شپ کے منصب پر فائز ہوئے ہیں۔ انہوں نے جھک کر عنوان چشتی کے کان میں کچھ کہا ہے، کیا کہا ہے یہ تو نہیں معلوم لیکن ان کی کرسی کی چیخ میں بھی سنی ہے۔ اب تقی حیدر مقالہ پڑھ رہے ہیں، آج لنچ پر بہت دنوں بعد ملاقات ہوئی ہے۔ لیکن وہ ویسے ہی نظرآئے، جیسے فرج میں رکھے ہوئے ہوں۔ صرف بالوں پر بیتی ہوئی چاندنی راتوں کے نقش پا لمبے اور گہرےہوگئے ہیں۔ صاف ستھری، جچی تلی دوٹوک باتیں ہیں جو تیز پاٹ دار آواز میں گندھی ہوئی ہیں۔ ذرا دور پر ظہیر احمد صدیقی بیٹھے ہوئے ہیں خاموش اور پرسکون لیے دیے رہنے والا انداز۔ سر سے پاؤں تک سلامت روی کا نمونہ۔ انہیں کے پاس ڈاکٹر شریف احمد ہیں۔ میں یہ سوچ رہا ہوں کہ یہ خاموش کیوں ہیں۔ علی گڑھ کے سمینار میں ڈاکٹر شریف نے بہت اچھا مضمون پڑھا تھا اور فکشن پر انہوں نے کئی قابل ذکر مضامین لکھے ہیں۔ تقی بدر ڈائس سے اتر رہے ہیں، قمر رئیس نے ڈاکٹر عقیل کا نام پکارا ہے۔ ڈاکٹر عقیل ڈائس پر جارہے ہیں۔ سانولا رنگ، دبلا پتلا جسم، پیشانی دور تک چلی گئی ہے، پتلے سے چہرے کے دونوں طرف ہلکے ہلکے کھچڑی بالوں کے چوڑے چوڑے بریکٹ لگے ہیں۔ آنکھوں میں چھوٹے چھوٹے مدھم مدھم انگاروں کی چمک ہے۔ جسے چشموں کے شیشوں نے اور دبادیا ہے۔ مدھم مہذب آواز اور خاکسارانہ انداز میں مقالہ پڑھ رہے ہیں، مطالعے اور محنت کی چمک سے فقرے جگر گا رہے ہیں، اور میں نیاز حیدر کو دیکھ رہا ہوں، زردی مائل سفید بڑے بڑے بال گردن پر ڈھیر ہیں ؎۔ سفید گنجان داڑھی گریبان کو سہلا رہی ہے۔ سرمئی سرمئی ہاتھ، بار بار بالوں پر لپکتے ہیں۔ بار بار پہلو بدلتے ہیں۔ چہرے کا ایک ایک نقش بول رہا ہے۔ اس بے قراری کی چغلی کھار پی رہا ہے۔ جسے باطن میں دیکھتے ہوئے الاؤ جنم دیتے ہیں اور جو اس عمر تک پہنچتے پہنچتے راکھ کا ڈھیر ہوجایا کرتے ہیں۔ لیکن یہاں تو ابھی تک کسی کسی طرح روشن ہیں، میں نے نیاز حیدر کو پہلی بار اتنے قریب سے دیکھا ہے۔ شاید کسی بوڑھے آدمی کے ایسے جوان جوش و خروش نے متاثر کیا ہو۔

ڈاکٹر اسلم پرویز مضمون پڑھنے جارہے ہیں۔ سلام مچھلی شہری اسی طرح آکر بیٹھ گئے ہیں۔ بیماری سے اٹھے ہیں سدابہار چہرہ مضمحل ہوگیا ہے۔ بدن کی قامت ڈھیلی ہوگئی ہے۔ لیکن سوچتی ہوئی آنکھوں میں بولتی ہوئی مسکراہٹ آج بھی زندہ ہے۔ ایک دہائی کم نصف صدی ہونے کو آئی ہے کہ اردو شاعری کا ایوان سلامؔ کے کلام سے گونج رہا ہے۔ وہ کون سا شعری تجربہ ہے جو ان کے قلم کی زور سے محفوظ رہ سکا ہے۔ اور سلامؔ نے تجربے کے شوق میں تجربہ نہیں کیا ہے۔ یعنی سر کے بل نہیں کھڑے ہوئے ہیں بلکہ تجربہ ان کی شعری شخصیت کی زر خیز مٹی سے پودے کی طرح پھوٹا ہے۔ نہ صرف یہ بلکہ وہ اپنے گنے چنے ہم عصروں کی طرح صاحب طرز بھی ہیں۔ اور یہی وہ کسوٹی ہے جس پر اچھی شاعری ہی نہیں، بڑی شاعری بھی کسی جاتی ہے اور اس سے اہم بات یہ ہے کہ وہ آج تک لکھ رہے ہیں۔ ان کا قلم سوکھا نہیں۔ کیسی ہی کڑی دھوپ ہو، ان کاقلم نم رہا، چلتا رہا۔ اضافے کرتا رہا سلام کی بدنصیبی یہ کہ انہوں نے اپنی شخصیت کی طرح اپنے آرٹ کو وہ سنجیدگی نہ دی جس کا وہ مستحق تھا۔ کاش سلامؔ کسی یونیورسٹی میں پروفیسر ہوتے تو کتنے ہی ریسرچ اسکالر ان پر مضامین لکھ کر لیکچرر ہوچکے ہوتے اور اپنے قلم کے لٹھ سونت کران کی عظمت منوالیتے، خیر سلام صاحب کم از کم یہ تو ہوا کہ آپ پدم شری ہوگئے۔

ڈاکٹر اسلم پرویز مقالہ پڑھ رہے ہیں۔ نوجوان ہیں، اس لیے غصہ ان کی جاگیر ہے، مضمون لکھا بھی غصے میں ہے اور پڑھ بھی غصے میں رہے ہیں۔ میں ان کا مضمون بھی سن رہا ہوں اور ان کے ساتھی ضمیر حسن کو تلاش بھی کر رہا ہوں۔ ضمیر حسن کو یہاں ہونا چاہیے تھا مضمون پڑھنا چاہیے تھا، بحث میں حصہ لینا چاہیے تھا۔ انہوں نے کئی خوب صورت افسانے لکھے ہیں، اور میں دہلی یونیورسٹی کے شعبہ اردو کے استاد فضل حق سے پوچھنے گیا ہوں، اور فضل حق نے مجھے یقین دلایا ہے کہ ضمیر حسن کو دعوت نامہ بھیجا گیا ہے۔

ڈائس پر ڈاکٹر نارنگ پھر آگئے ہیں۔ صدیق الرحمن قدوائی کے مقالے پر اعتراضات کر رہے ہیں۔ لہجے سے ذاقی رنجش کا بخار اٹھ رہا ہے، عقب کے قطاروں میں بے چینی پھیل رہی ہے۔ درمیانی قطاروں سے بھی آوازیں اٹھنے لگی ہیں۔ ان میں نیاز حیدر کی آواز اپنی پیرانہ سالی کے باوجود سب سے جوان اور تندرست ہے۔ لہجہ سے برداشت نہیں ہو رہا ہے، مجھے حیرت ہے کہ چیر خاموش کیوں ہے۔ قمر خاموش کیوں ہے، یہ ڈاکٹر نارنگ کی نہیں، ہمارے پٹرسیڈیم کی توہین ہے، یہ پہلا سمینار تھا جس میں میری شرکت برائے نام تھی، مجھے بہت سی باتیں کہنا تھیں۔ لیکن وہ باتیں اپنے طور پر سجاد ظہیر، عابد سہیل اور انور عظیم کہہ چکے تھے اور میں اپنی آواز سننے کے شوق میں کبھی مبتلا نہ ہوا، جو لوگ ہر سمینار کے ہر مقالے پر بحث میں اپنی موجودگی کا ڈھول پیٹتے ڈائس پر ہاڑ بولتے ہیں، میرے نزدیک وہ ذہنی مریض ہوتےہیں۔ ان کو نہیں معلوم ہوتا کہ میلے کے ہر خوانچہ فروش کی دوکان پر پتے چاٹنے والے امیر نہیں چٹورے ہوتے ہیں۔ اپنی آواز سننے کی چاٹ بھی ایک طرح کا چٹورا پن ہے۔ میری ناگزاری کا ایک اور بھی سبب ہے، آج سے کئی سال قبل علی گڑھ میں ایک سمینار ہوا تھا۔ وہی سمینار جس میں جدیدیدت تولد ہوئی تھی۔ علی گڑھ کا وہ سمینار اس لیے اور صرف اس لیے۔۔۔ کا مقتحق ہے کہ اسی سمینار میں یہ طرح پڑھی تھی کہ جو شخص ہمارے یعنی منتظمین سمینار کے نقطہ نظر کے خلاف تقریر کرے گا اسے سننے نہیں دیا جائے گا۔ انہیں بولنے نہیں دیا جائے گا۔ مشاد سیمہ و فیسر گڑڑ، داستانیں اور دیوراج کی تقریر پر ایک گروپ باتیں کرنے لگا، ہنسنے لگا، قہقہے لگانے لگا۔ ڈاکٹر رویندر بھرمر کی تقریر پر سوال و جواب ہونے لگے۔ ڈاکٹر محمد حسن کی تقریر پر لقمے دیے جانے لگے، ایسا اس لیے ممکن ہوسکا کہ ہم کو سرور صاحب کی کنویر شپ کی سلامت روی اور میانہ روی سے اس کا اندیشہ نہ تھا نہ صرف یہ بلک ہم کو گمان تھا کہ سرور صاحب سیمینار کے مضمون میں سمینار کا انعقاد کر رہے ہیں، اور سمینار ہوتا ہی اسی لیے ہے کہ مختلف نقاد نظر کے لوگ اپنی رائے کا اظہار کریں۔ علمی غور و فکر کے بعد کسی ایک مثبت اور آسان نتیجے پر پہنچیں۔ لیکن ہوا یہ کہ سمینار کے معنوں کی نفی پراصرار کرنے لگا۔ اور جو ہم سوتےمیں پکڑے گئے تھے۔ متحیر تھے یہ عمل دوسرے مقامات پر دوہرایا گیا اور پھر روشن ہوا۔ جو ہمیشہ عمل کے مقابلے میں شدید ہوا کرتا ہے۔ میں ہال کا ہنگامہ دیکھ رہا ہوں اور کئی سال قبل اسی دہلی میں ترقی پسند مصنفین نے اجلاس کا تماشہ کر رہا ہوں، سجاد ظہیر صدر ہیں۔ احتشام صاحب تقریر کرچکے ہیں، میں ڈائس پر جاتا ہوں۔ سخت الفاظ اور کڑوے لہجے میں بنیادی اعتراضات کرتا ہوں۔ سجاد ظہیر، سردار جعفری کو پرچہ لکھ کر ڈائس پر بلاتے ہیں۔ سردار جعفری جو اس وقت تقریر کے موڈ میں نہیں تھے بولنے کھڑے ہوتے ہیں۔ سردار جتنے بڑے شاعر اور نقاد ہیں اس سے بڑے خطیب ہیں۔ میں تو کس شمار میں ہوں اردو کے بڑے بڑے نام ان کی خطابت کی مار نہیں سہہ سکتے! انہوں نے مجھے ادھیر کر پھینک دیا ہے لیکن علم اور ادب کو ایک لمحے کے لیے فراموش نہیں کیا گی اگ، یہ بھی نہیں ہوا تھا کہ ایسے حالات پیدا کردییے جاتے کہ میں خاموش ہوجانے پر مجبور کردیا جاتا، اور جب فکشن پر سمینار ہوا اور اسی علی گڑھ کے اسی ہال میں وہی پھرانی تکنیک دوہرانے کی کوشش کی گئی تو ناکام بنادیا گیا۔ اس لیے کہ فکشن کے سمینار میں ہم جاگ رہے تھے اور ہوشیار تھے۔ یعنی جب جوگندر پال، شمس الرحمن فاوروقی کاجواب دینے کھڑے ہوئے تو شمش الرحمن فاروقی نے بڑے فخر سے انہیں بیٹھ جانے کو کہا اور وہ تذبذب نظر آنے لگے، اسی وقت میں کھڑا ہوا۔ میں نے سرور صاحب سے کہا کہ جوگندر پال بھی میرے مہمان ہیں اور یہ کچھ کہنا چاہتے ہیں اور جو کچھ یہ کہیں گے ہمیں سننا پڑے گا اور سرور صاحب نے شمس الرحمن فاروقی کو بیٹھ جانے اور خاموش رہنے کا اشارہ کیا، اور جوگندر پال سے گزارش کی کہ وہ اپنے خیالات کا اظہار کریں۔ ڈاکٹر نارنگ نے مائک چھوڑا ہی تھا کہ دیوندر اسر اٹھے اور تلخ اور گرم لہجے میں منتظمین سے اس حادثے پر شکایت کی۔ یہ تو ٹھیک تھا، لیکن میں نہیں جانتا کہ اگر دیوندر اسر علی گڑھ کے اس سمینار میں ہوتے جس نے ادبی آمریت کی وکالت کی بنیاد ڈالی تھی تو ان کا رویہ کیا ہوتا۔ تاہم میں ڈائس پر گیا، ہاؤس سے گزارش کی کہ پریسیڈیم کی حرمت کا تقاضہ ہے کہ ڈائس پر آنے والے کا احترام کیا جائے۔ مائک پر آنے والے ہر شخص کو جو کچھ وہ کہنا چاہتا ہے، کہنے دیا جائے اور یقین کیا جائے کہ ہم ایک ایک بات کا بہتری باتوں سے جواب دینے کی قدرت رکھتے ہیں۔