abhi abhi mere pas aae the janab-e-husain

abhī abhī mire paas aa.e the janāb-e-husain

vahī ye muntazir āñkheñ vahī ye ḳhvāb-e-husain

hamārī ḳhaak se bū-e-bahisht aatī hai

ki is meñ ḳhuub milāyā gayā hai āb-e-husain

maiñ zaḳhm-ḳhurda-o-darmāñda ḳhāk-ālūda

paḌā huā huuñ ki vā ho rahā hai bāb-e-husain

bas ek zaḳhm ba-faiz-e-husain aayā hai

ki is sanad pe hī ho jā.ūñ bāzyāb-e-husain

ye ek lamha-e-hastī tamām hāsil-e-'umr

husain bahr-e-vajūd aur maiñ hubāb-e-husain

panāh-gāh hamārī husain kā saaya

hamārā matl.a-e-ummīd āftāb-e-husain

maiñ zer-e-dars huuñ maktab meñ karbalā vaale

so aaj tak bhī nahīñ fāriġh-e-nisāb-e-husain

hamārī ḳhaak meñ sargarm karbalā ke biij

ki jald aane ko hai fasl-e-inqalāb-e-husain

salām kahte raho tum yuuñ hī miyāñ 'ehsās'

ba'īd kyā ki kisī din mile javāb-e-husain

abhi abhi mere pas aae the janab-e-husain

wahi ye muntazir aankhen wahi ye KHwab-e-husain

hamari KHak se bu-e-bahisht aati hai

ki is mein KHub milaya gaya hai aab-e-husain

main zaKHm-KHurda-o-darmanda KHak-aluda

paDa hua hun ki wa ho raha hai bab-e-husain

bas ek zaKHm ba-faiz-e-husain aaya hai

ki is sanad pe hi ho jaun bazyab-e-husain

ye ek lamha-e-hasti tamam hasil-e-'umr

husain bahr-e-wajud aur main hubab-e-husain

panah-gah hamari husain ka saya

hamara matla-e-ummid aaftab-e-husain

main zer-e-dars hun maktab mein karbala wale

so aaj tak bhi nahin farigh-e-nisab-e-husain

hamari KHak mein sargarm karbala ke bij

ki jald aane ko hai fasl-e-inqalab-e-husain

salam kahte raho tum yun hi miyan 'ehsas'

ba'id kya ki kisi din mile jawab-e-husain