ye hai majlis-e-shah-e-ashiqan koi nazr-e-jaan ho to le ke aa

ye hai majlis-e-shah-e-āshiqāñ koī nazr-e-jāñ ho to le ke aa

yahāñ chashm-e-tar kā rivāj hai dil-e-ḳhūñ-chakāñ ho to le ke aa

ye fazā hai 'ambar-o-'ūd kī ye mahal hai vird-e-darūd kā

ye namāz-e-'ishq kā vaqt hai koī ḳhush-azāñ ho to le ke aa

ye jo ik 'azā kā shi'ār hai ye 'ajab du'ā kā hisār hai

kisī nā-rasā ko talāsh kar koī be-amāñ ho to le ke aa

ye 'alam hai haq kī sabīl kā ye 'alam hai ahl-e-dalīl kā

kahīñ aur aise qabīl kā koī sā.ebāñ ho to le ke aa

ye huzūr-o-ġhaib ke silsile ye matā-e-fikr ke marhale

ġham-e-rā.egāñ kī bisāt kyā ġham-e-jāvedāñ ho to le ke aa

sar-e-lauh-e-āb likhā huā kisī tishna-mashk kā mājrā

sar-e-fard-e-reg likhī huī koī dāstāñ ho to le ke aa

tire naqsha-hā-e-ḳhayāl meñ had-e-nainvā kī nazīr kā

koī aur ḳhitta-e-āb-o-gil tah-e-āsmāñ ho to le ke aa

kabhī kunj-e-hur ke qarīb jā kabhī tā-ba-sahn-e-habīb jā

kabhī sū-e-bait-e-shabīb jā koī armuġhāñ ho to le ke aa

mire madd-o-jazr kī ḳhair ho ki safar hai dajla-e-dahr kā

kahīñ misl-e-nām-e-husain bhī koī bādbāñ ho to le ke aa

na 'anīs' huuñ na 'dabīr' huuñ maiñ 'nasīr' sirf 'nasīr' huuñ

mire zarf-e-harf ko jāñchne koī nukta-dāñ ho to le ke aa

ye hai majlis-e-shah-e-ashiqan koi nazr-e-jaan ho to le ke aa

yahan chashm-e-tar ka riwaj hai dil-e-KHun-chakan ho to le ke aa

ye faza hai 'ambar-o-'ud ki ye mahal hai wird-e-darud ka

ye namaz-e-'ishq ka waqt hai koi KHush-azan ho to le ke aa

ye jo ek 'aza ka shi'ar hai ye 'ajab du'a ka hisar hai

kisi na-rasa ko talash kar koi be-aman ho to le ke aa

ye 'alam hai haq ki sabil ka ye 'alam hai ahl-e-dalil ka

kahin aur aise qabil ka koi saeban ho to le ke aa

ye huzur-o-ghaib ke silsile ye mata-e-fikr ke marhale

gham-e-raegan ki bisat kya gham-e-jawedan ho to le ke aa

sar-e-lauh-e-ab likha hua kisi tishna-mashk ka majra

sar-e-fard-e-reg likhi hui koi dastan ho to le ke aa

tere naqsha-ha-e-KHayal mein had-e-nainwa ki nazir ka

koi aur KHitta-e-ab-o-gil tah-e-asman ho to le ke aa

kabhi kunj-e-hur ke qarib ja kabhi ta-ba-sahn-e-habib ja

kabhi su-e-bait-e-shabib ja koi armughan ho to le ke aa

mere madd-o-jazr ki KHair ho ki safar hai dajla-e-dahr ka

kahin misl-e-nam-e-husain bhi koi baadban ho to le ke aa

na 'anis' hun na 'dabir' hun main 'nasir' sirf 'nasir' hun

mere zarf-e-harf ko jaanchne koi nukta-dan ho to le ke aa