ایک اور زندگی

اور ایک لمحے کے لیے پرکاش کے دل کی دھڑکن جیسے رکی رہی۔ کتنا عجیب تھا وہ لمحہ۔۔۔ آکاش سے ٹوٹ کر گرے ہوئے ستارے جیسا! کہرے کے سینے میں ایک لکیر سی کھینچ کر وہ لمحہ ماضی ہوگیا۔ کہرے میں سے گزر کر جاتی ہوئی شکلوں کو اس نے ایک بار پھر دھیان سے دیکھا۔ کیا یہ ممکن تھا کہ انسان کی آنکھیں اس حدتک اسے دھوکا دیں؟ تو جو کچھ وہ دیکھ رہا تھا، وہ سچ نہیں تھا؟

کچھ ہی لمحے پہلے جب وہ کمرے سے نکل کر بالکنی پر آیا تھا تو کیا اس نے تصور میں یہ سوچا تھا کہ آکاش کے اور چھور تک پھیلے ہوئے کہرے میں، گہرے پانی کی نچلی سطح پر تیرتی ہوئی مچھلیوں جیسی جوشکلیں نظر آرہی ہیں، ان میں کہیں وہ دوشکلیں بھی ہوں گی؟ مندر والی سڑک سے آتے ہوئے دو کہریلے رنگوں پر جب اس کی نظر پڑی تھی، تب بھی کیا اس کے من میں کہیں ایسا شک جاگا تھا؟ پھر بھی نہ جانے کیوں اسے لگ رہاتھا جیسے بہت دیر سے، بلکہ کئی دنوں سے، وہ ان کے وہاں سے گزر نے کا منتظر رہا ہو، جیسے کہ انہیں دیکھنے کے لیے ہی وہ کمرے سے نکل کر بالکنی پر آیا ہو اور انہیں کو ڈھونڈتی ہوئی اس کی آنکھیں مندر والی سڑک کی طرف مڑی ہوں۔ یہاں تک کہ اس دھانی آنچل اور نیلی نیکر کے رنگ بھی جیسے اس کے پہچانے ہوئے ہوں اور کہرے کے پھیلاؤ میں وہ ان دورنگوں کو ہی کھوج رہا ہو۔ ویسے ان شکلوں کے بالکنی کے نیچے پہنچنے تک اس نے انہیں پہچانا نہیں تھا۔ لیکن ایک لمحے میں اچانک وہ شکلیں اس طرح اس کے سامنے واضح ہو اٹھی تھیں جیسے وجدان کے لمحے میں لاشعور کی گہرائی میں ڈوبا ہوا کوئی خیال ایکا ایک شعور کی سطح پر کوند گیا ہو۔

نیلی نیکر والی شکل گھوم کر پیچھے کی طرف دیکھ رہی تھی۔ کیا اسے بھی کہرے میں کسی کی کھوج تھی؟ اور کس کی؟ پرکاش کامن ہوا کہ اسے آواز دے دے مگر اس کے گلے سے لفظ نہیں نکلے۔ کہرے کا سمندر اپنی گمبھیرتا میں خاموش تھا مگر اسے اس کی اپنی خاموشی ایک ایسے طوفان کی طرح لگتی تھی جو ہوا نہ ملنے سے اپنے اندر ہی گھمڑ کر رہ گیا ہو۔ نہیں تو کیا وہ اتنا ہی ناتواں تھا کہ اس کے گلے سے ایک لفظ بھی نہ نکل سکے؟

وہ بالکنی سے ہٹ کر کمرے میں آگیا۔ وہاں آتے ہی اپنے الٹ پلٹ سامان پر نظر پڑی تو جسم میں مایوسی کی ایک لہر دوڑ گئی۔ کیا یہی وہ زندگی تھی جس کے لیے اس نے۔۔۔؟ لیکن اسے لگا کہ اس کے پاس کچھ بھی سوچنے کے لیے وقت نہیں ہے۔ اس نے جلدی جلدی کچھ چیزوں کو اٹھایا اور رکھ دیا، جیسے کوئی چیز ڈھونڈ رہا ہو جو اسے مل نہ رہی ہو۔ اچانک کھونٹی پر لٹکتی ہوئی پتلون پر نظر پڑی تو اس نے پاجامہ اتار کر جلدی سے اسے پہن لیا۔ پھر پل بھر کھویا سا کھڑا رہا۔ اسے سمجھ نہیں آرہا تھا کہ وہ کیا چاہتا ہے۔ کیا وہ ان دونوں کے پیچھے جانا چاہتا تھا؟ یابالکنی پر کھڑا ہوکر پہلے کی طرح انہیں دیکھتے رہنا ہی چاہتا تھا؟

اچانک اس کا ہاتھ میز پر رکھے ہوئے ایک تالے پر پڑگیا تو اس نے اسے اٹھا لیا۔ جلدی سے دروازہ بند کرکے وہ زینے سے اترنے لگا۔ زینے پر آکر پتا چلا کہ جوتا نہیں پہنا۔ وہ پل بھر کے لیے ٹھٹک کر کھڑا رہا مگر لوٹ کر نہیں گیا۔ نیچے سڑک پر پہنچتے ہی پاؤں کیچڑ میں لت پت ہوگئے۔ دور دیکھا۔۔۔ وہ دونوں شکلیں گھوڑوں کے اڈے کے پاس پہنچ چکی تھیں۔ وہ جلدی جلدی چلنے لگا۔ پاس سے گزرتے ہوئے ایک گھوڑے والے سے اس نے کہا کہ وہ آگے جاکر نیلی نیکر والے بچے کو روک لے۔۔۔ اس سے کہے کہ کوئی اس سے ملنے کے لیے پیچھے آرہا ہے۔ گھوڑے والا گھوڑا دوڑاتا ہوا گیا مگر ان دونوں کے پاس نہ رک کر ان سے آگے نکل گیا۔ وہاں جاکر اس نے نہ جانے کسے اس کا پیغام دے دیا۔

جلدی جلدی چلتے ہوئے بھی پرکاش کو لگ رہا تھا جیسے وہ بہت آہستہ چل رہا ہو، جیسے اس کے گھٹنے جکڑ گئے ہوں اور راستہ بہت، بہت لمبا ہوگیا ہو۔ اس کا من اس اندیشے سے بے چین تھا کہ اس کے پاس پہنچنے تک وہ لوگ گھوڑوں پر سوار ہوکر وہاں سے چل نہ دیں، اور جس دوری کو وہ ناپنا چاہتا تھا وہ جوں کی توں نہ بنی رہے۔ مگر جوں جوں فاصلہ کم ہو رہا تھا، اس کا کم ہونا بھی اسے اَکھر رہا تھا۔ کیا وہ جان بوجھ کر اپنے کو ایک ایسی صورت حال کی سمت لے جارہا تھا جس سے اسے اپنے کو بچانا چاہیے تھا؟

ان لوگوں نے گھوڑے نہیں لیے تھے۔ جب وہ ان سے تین چار گز دور رہ گیا تو اچانک اس کے قدم رک گئے۔ تو کیا سچ مچ اب اسے اس صورت حال کا سامنا کرنا ہی تھا؟

’’پاشی!‘‘ اس سے پہلے کہ وہ طے کرپاتا، فوراً اس کے منھ سے نکل گیا۔

بچے کی بڑی بڑی آنکھیں اچانک اس کی طرف گھوم گئیں۔۔۔ ساتھ ہی اس کی ماں کی آنکھیں بھی۔ کہرے میں اچانک کئی کئی بجلیاں کوند گئیں۔ پرکاش دو ایک قدم اور آگے بڑھ گیا۔ بچہ متحیر آنکھوں سے اس کی طرف دیکھتا ہوا اپنی ماں کے ساتھ سٹ گیا۔

’’پلاش، ادھر آمیرے پاس!‘‘ پرکاش نے ہاتھ سے چٹکی بجاتے ہوئے کہا، جیسے کہ یہ ہر روز کی ایک معمول کی بات ہو اور بچہ ابھی کچھ منٹ پہلے ہی اس کے پاس سے اپنی ماں کے پاس گیا ہو۔ بچے نے ماں کی طرف دیکھا۔ وہ اپنی آنکھیں ہٹاکر دوسری طرف دیکھ رہی تھی۔ بچہ اور بھی اس کے ساتھ سٹ گیا اور اس کی آنکھیں حیرت کے ساتھ ساتھ ایک شرارت سے چمک اٹھیں۔

پرکاش کو وہاں کھڑے کھڑے الجھن ہو رہی تھی۔ اسے لگ رہا تھا کہ خود چل کر اس دوری کوناپنے کے سوا اس کے پاس کوئی راستہ نہیں ہے۔ وہ لمبے لمبے ڈگ بھر کر بچے کے پاس پہنچا اور اسے بانہوں سے اٹھالیا۔ بچے نے ایک بار کلکارکر اس کے ہاتھوں سے چھوٹنے کی کوشش کی، لیکن دوسرے ہی لمحے اپنی چھوٹی چھوٹی بانہیں اس کے گلے میں ڈال کر وہ اس سے لپٹ گیا۔ پرکاش اسے لیے ہوئے تھوڑا ایک طرف کو ہٹ آیا۔

’’تونے پاپا کو پہچانا نہیں تھاکیا؟‘‘

’’پیتانا تھا!‘‘ بچہ بانہیں اس کے گلے میں ڈال کر جھولنے لگا۔

’’تو تُو جھٹ سے پاپا کے پاس آیا کیوں نہیں؟‘‘

’’نہیں آیا۔‘‘ کہہ کر بچے نے اسے چوم لیا۔

’’تو آج ہی یہاں آیا ہے؟‘‘

’’نہیں، تل آیا تھا۔‘‘

’’رہے گا یا آج ہی لوٹ جائے گا؟‘‘

’’ابھی تین چال دن لہوں دا۔‘‘

’’توپاپا کے پاس ملنے آئے گانا؟‘‘

’’آؤں دا۔‘‘

پرکاش نے ایک بار اسے اچھی طرح اپنے ساتھ چمٹاکر چوم لیا تو بچہ چلاکر اس کے ماتھے، آنکھوں اور گالوں کو جگہ جگہ چومنے لگا۔

’’کیسا بچہ ہے!‘‘ پاس کھڑے ایک کشمیری مزدور نے سرہلاتے ہوئے کہا۔

’’تم تہاں لہتے ہو؟‘‘ بچہ بانہیں اس کی گردن میں ڈالے ہوئے، جیسے اسے اچھی طرح دیکھنے کے لیے تھوڑا پیچھے کو ہٹ گیا۔

’’وہاں!‘‘ پرکاش نے دور اپنے کمرے کی بالکنی کی طرف اشارہ کیا، ’’تو کب تک وہاں آئے گا؟‘‘

’’اب اوپل جاکل دودپیوں دا، اچھ کے بعد تمالے پاچھ آؤں دا۔‘‘ بچے نے ایک بار اپنی ماں کی طرف دیکھا اور اس کی بانہوں سے نکلنے کے لیے مچلنے لگا۔

’’میں وہاں بالکنی میں کرسی ڈال کر بیٹھا رہوں گا اور تیرا انتظار کروں گا۔‘‘ بچہ بانہوں سے اتر کر اپنی ماں کی طرف بھاگ گیا تو پرکاش نے پیچھے سے کہا۔ لمحہ بھر کے لیے اس کے آنکھیں بچے کی ماں سے مل گئیں لیکن دوسرے ہی لمحے دونوں دوسری دوسری طرف دیکھنے لگے۔ بچہ جاکر ماں کی ٹانگوں سے لپٹ گیا، تو وہ کہرے کے پاردیواروں کی دھندلی ریکھاؤں کو دیکھتی ہوئی اس سے بولی، ’’تجھے دودھ پی کر آج کھلن مرگ نہیں چلنا ہے کیا؟‘‘

’’نہیں۔‘‘ بچے نے اس کی ٹانگوں کے سہارے اچھلتے ہوئے سپاٹ جواب دیا، ’’میں دود پی تل پاپا تے پاچھ جاؤں دا۔‘‘

تین دن تین راتوں سے آسمان گھرا ہوا تھا۔ کہرا دھیرے دھیرے اتنا گھنا ہوگیا تھا کہ بالکنی سے آگے کوئی روپ، کوئی رنگ نظر نہیں آتا تھا۔۔۔ آسمان کے شفاف پن پر جیسے گاڑھاسفیدہ پوت دیا گیا تھا۔ جوں جوں وقت بیت رہاتھا، کہرا اور گھنا ہوتا جارہا تھا۔ کرسی پر بیٹھے ہوئے کسی کسی لمحے محسوس ہونے لگتا تھا جیسے وہ بالکنی پہاڑیوں سے گھری ہوئی کھلی وسعت میں نہ ہوکر فضاکے کسی پر اسرار پردیس میں بنی ہو۔۔۔ نیچے اور اوپر صرف آکاش ہی آکاش ہو، جس کی تہہ میں بالکنی کی موجودگی ایک اپنے آپ میں مکمل اور خودمختار دنیا کی طرح ہو۔۔۔

اس کی آنکھیں اس طرح ایک ٹک سامنے کی طرف دیکھ رہی تھیں جیسے آسمان اور کہرے میں اسے کوئی معنی ڈھونڈنا ہو۔ جیسے وہ اپنی بالکنی کے وہاں ہونے کے راز کو جانتا ہو۔ ہوا سے کہرے کے بادل کئی روپ لے کر اِدھر اُدھر بھٹک رہے تھے۔۔۔ اپنی گہرائی میں پھیلتے اور سمٹتے ہوئے وہ اپنی تھاہ نہیں پارہے تھے۔ بیچ میں کہیں کہیں دیواروں کی پھنگیاں ایک ہری لکیر کی طرح نکلی ہوئی تھیں، کہرے کے آسمان پر لکھی گئی ایک خلط ملط تحریر جیسی۔ دیکھتے دیکھتے وہ لکیر بھی گم ہوجاتی تھی؛ کہرے کا ہاتھ اسے رہنے دینا نہیں چاہتا تھا۔ لکیر کومٹتے دیکھ کر رگوں میں ایک تناؤ سا آرہا تھا، جیسے کسی بھی طرح وہ اس لکیر کو مٹنے سے بچالینا چاہتا ہے۔ لیکن جب ایک بار لکیر مٹ کر باہر نہیں نکلی تو اس نے سر پیچھے کو ڈال لیا اور خود بھی کہرے میں کہرا ہوکر پڑ رہا۔۔۔

ماضی کے کہرے میں کہیں وہ ایک دن بھی تھا جو چار برس بیت جانے پر بھی آج تک بیت نہیں سکاتھا۔۔۔ بچے کی پہلی سال گرہ تھی اس دن۔۔۔ وہی ان کے جیون کی سب سے بڑی گرہ بن گئی تھی۔

بیاہ کے کچھ مہینے بعد سے ہی پتی پتنی الگ الگ رہنے لگے تھے۔ بیاہ کے ساتھ جو رشتہ جڑنا چاہیے تھا وہ جڑ نہیں سکا تھا۔ دونوں الگ الگ جگہ کام کرتے تھے اور اپنا اپنا خود مختار تانا بانا بُن کر جی رہے تھے۔ زمانے کے دستور کے ناتے سال چھ مہینے میں کبھی ایک بار مل لیا کرتے تھے۔ وہ زمانے کا دستور ہی اس بچے کو دنیا میں لے آیا تھا۔۔۔

بینا سمجھتی تھی کہ اس طرح جان بوجھ کر اسے پھنسا دیا گیا ہے۔ پرکاش سوچتا تھا کہ انجانے میں اس سے ایک گناہ ہوگیا ہے۔ لیکن پیدائش کے پانچویں یا چھٹے روز بچے کی حالت اچانک بہت خراب ہوگئی تو وہ اپنے کمرے میں اکیلا بیٹھا، ہوا میں بچے کے چہرے کو دیکھتا ہوا، کہتا رہاتھا، ’’دیکھ، تجھے جینا ہے۔ تو اس طرح نہیں جاسکتا۔ سن رہا ہے؟ تجھے جینا ہے، ہر حالت میں جینا ہے۔ میں تجھے جانے نہیں دوں گا۔ سمجھا؟‘‘

سال بھر سے بچہ ماں کے پاس ہی رہ رہا تھا۔ بیچ میں بچے کی دادی چھ سات مہینے اس کے پاس رہ آئی تھی۔

پہلی سال گرہ پر بینا نے لکھا تھا کہ وہ بچے کولے کر اپنے پتا کے یہاں لکھنؤ جارہی ہے۔ وہیں پر بچے کے جنم دن کی پارٹی کرے گی۔ پرکاش نے اسے تاردیا تھا کہ وہ بھی اس دن لکھنؤ آئے گا۔ اپنے ایک دوست کے یہاں حضرت گنج میں ٹھہرے گا۔ اچھا ہوگا کہ پارٹی وہیں پر کی جائے۔ لکھنؤ کے کچھ دوستوں کو بھی اس نے مطلع کردیا تھا کہ اس کے بچے کی سال گرہ کے موقعے پر وہ اس کے ساتھ چائے پینے کے لیے آئیں۔

اس نے سوچا تھاکہ بینا اسے اسٹیشن پر مل جائے گی لیکن وہ نہیں ملی۔ حضرت گنج پہنچ کر نہادھو چکنے کے بعد اس نے بینا کے پاس پیغام بھیجا کہ وہ وہاں پہنچ گیا ہے ؛ کچھ لوگ ساڑھے چار پانچ بجے چائے پر آئیں گے، اس لیے وہ اس وقت تک بچے کو لے کر لازماً وہاں پہنچ جائے۔ لیکن پانچ بجے، چھ بجے، سات بج گئے، بینا بچے کو لے کر نہیں آئی۔ دوسری بار پیغام بھیجنے پر پتا چلا کہ وہاں ان لوگوں کی پارٹی چل رہی ہے۔ بینا نے کہلا بھیجا کہ بچہ آٹھ بجے تک فارغ نہیں ہوگا، اس لیے وہ اس وقت اسے لے کر نہیں آسکتی۔ پرکاش نے اپنے دوستوں کو چائے پلاکر رخصت کردیا۔ بچے کے لیے خریدے ہوئے تحفے بینا کے پتا کے یہاں بھیج دیے۔ ساتھ میں پیغام بھی بھیجا کہ بچہ جب بھی فارغ ہو، اسے تھوڑی دیر کے لیے اس کے پاس بھیج دیا جائے۔

مگر آٹھ کے بعد نو بجے، دس بجے، بارہ بج گئے، لیکن بینا نہ تو بچے کو لے کر آئی اور نہ ہی اس نے اسے کسی اور کے ساتھ بھیجا۔ پرکاش رات بھر سویا نہیں۔ اس کے دماغ کو جیسے کوئی چھینی سے چھیلتا رہا۔ صبح اس نے پھر بینا کے پاس پیغام بھیجا۔ اس بار بینا بچے کو لے کر آگئی۔ اس نے بتایا کہ رات کو پارٹی دیرتک چلتی رہی، اس لیے اس کا آنا ممکن نہیں تھا۔ اگر واقعی اسے بچے سے پیار تھا تو اس کا فرض تھا کہ وہ اپنے تحفے لے کر خود ان کے یہاں پارٹی میں آجاتا۔ اس دن صبح سے شروع ہوئی بات آدھی رات تک چلتی رہی۔ پرکاش بار بار کہتا رہا، ’’بینا، میں اس بچے کا پتا ہوں۔ پتا ہونے کے ناتے مجھے یہ حق تو ہے ہی کہ میں بچے کو اپنے پاس بلاسکوں۔‘‘

لیکن بینا کا جواب تھا، ’’آپ کے پاس پتا کا دل ہوتا تو کیا آپ پارٹی میں نہ آتے؟آپ مجھ سے پوچھیں تو میں کہوں گی کہ یہ ایک اتفاقی حادثہ ہی ہے کہ آپ اس کے پتا ہیں۔‘‘

’’بینا!‘‘ وہ پھٹی پھٹی آنکھوں سے اس کے چہرے کی طرف دیکھتا رہ گیا، ’’تم بتاؤ، تم چاہتی کیا ہو؟‘‘

’’کچھ بھی نہیں۔ میں آپ سے کیا چاہوں گی؟‘‘

’’تم نے سوچا ہے کہ اس بچے کے مستقبل کا کیا ہوگا؟‘‘

’’جب ہم اپنے ہی مستقبل کے بارے میں نہیں سوچ سکتے تو اس کے مستقبل کے بارے میں کیا سوچیں گے۔‘‘

’’کیا تم یہ پسند کروگی کہ بچے کو مجھے سونپ دو اور خود آزاد ہوجاؤ؟‘‘

’’بچے کو آپ کو سونپ دوں؟‘‘ بیناکے لہجے میں تلخی گہری ہوگئی، ’’اتنی بے وقوف میں نہیں ہوں۔‘‘

’’تو کیا تم یہی سوچتی ہو کہ اس کا فیصلہ کرنے کے لیے عدالت میں جایاجائے؟‘‘

’’آپ عدالت میں جانا چاہیں تو مجھے اس پر بھی اعتراض نہیں ہے۔ ضرورت ہونے پر میں سپریم کورٹ تک لڑوں گی۔ آپ کابچے پر کوئی حق نہیں ہے۔‘‘

’’بچے کو پتا سے زیادہ ماں کی ضرورت ہوتی ہے۔‘‘ کئی دن۔۔۔ کئی ہفتے وہ اندر ہی اندر جنگ کرتارہا، ’’جہاں اسے دونوں نہ مل سکتے ہوں وہاں اسے ماں تو ملنی ہی چاہیے۔ اچھا ہے، تم بچے کی بات بھول جاؤ اور نئے سرے سے اپنی زندگی بنانے کی کوشش کرو۔‘‘

’’مگر۔۔۔‘‘

’’فضول کی حجت میں کچھ نہیں رکھا ہے۔ بچے وچے تو ہوتے ہی رہتے ہیں۔ تم رشتہ توڑ کر پھر سے بیاہ کرلو تو گھر میں بچے ہی بچے ہوجائیں گے۔ سمجھ لینا کہ اس ایک بچے کے ساتھ کوئی حادثہ پیش آگیا تھا۔۔۔‘‘

سوچنے سوچنے میں دن، ہفتے اور مہینے نکلتے گئے۔ کیا سچ مچ انسان پہلے کی زندگی کو مٹاکر نئے سرے سے زندگی شروع کرسکتاہے؟ کیا سچ مچ زندگی کے کچھ برسوں کو ایک برے خواب کی طرح بھولنے کا حوصلہ کیا جاسکتا ہے؟ بہت سے انسان ہیں جن کی زندگی کہیں نہ کہیں، کسی نہ کسی دوراہے سے غلط سمت کی جانب بھٹک جاتی ہے۔ کیا یہی مناسب نہیں کہ انسان اس راستے کو بدل کر اپنی غلطی سدھارلے؟ آخر انسان کو جینے کے لیے ایک ہی جیون تو ملتا ہے۔۔۔ وہی تجربے کے لیے اور وہی جینے کے لیے۔۔۔ تو کیوں انسان ایک تجربے کی ناکامی کو جیون کی ناکامی مان لے؟

کورٹ میں کاغذ پر دستخط کرتے سمے چھت کے پنکھے سے ٹکراکر ایک چڑیا کا بچہ نیچے آگرا۔

’’ہائے ہائے، چڑیا مرگئی!‘‘ کسی نے کہا۔

’’مری نہیں، ابھی زندہ ہے، ‘‘ کوئی اور بولا۔

’’چڑیا نہیں ہے، چڑیا کا بچہ ہے۔‘‘ کسی تیسرے نے کہا۔

’’نہیں، چڑیا ہے۔‘‘

’’نہیں، چڑیا کابچہ ہے۔‘‘

’’اسے اٹھاکر باہر ہوا میں چھوڑدو۔‘‘

’’نہیں، یہیں پڑا رہنے دو۔ باہر اسے کوئی بلی کھاجائے گی۔‘‘

’’یہ یہاں آیا کس طرح؟‘‘

’’جانے کس طرح؟ روشن دان کے راستے آگیا ہوگا۔‘‘

’’بے چارہ کیسے تڑپ رہا ہے!‘‘

’’شکر ہے پنکھے نے اسے کاٹ ہی نہیں دیا۔‘‘

’’کاٹ دیا ہوتا تو بلکہ اچھا تھا۔ اب اس طرح بے چارہ کیاجیے گا؟‘‘

تب پتی پتنی دونوں نے کاغذ پر دستخط کردیے تھے۔ بچہ اس سمے کورٹ کے احاطے میں کووں کے پیچھے بھاگتا ہواکلکاریاں مار رہاتھا۔ وہاں دھول اڑ رہی تھی اور چاروں طرف مٹیالی سی دھوپ پھیلی تھی۔

پھر وہی دن، ہفتے اور مہینے۔۔۔

اڑھائی سال گزرجانے پر بھی پرکاش پھر سے زندگی شروع کرنے کاطے نہیں کرپایاتھا۔ اس عرصے میں بچہ تین بار اس سے ملنے کے لیے آیا تھا۔ وہ نوکر کے ساتھ آتا تھا اور دن بھر رہ کر اندھیرا ہونے پر لوٹ جاتا تھا۔ پہلی بار وہ اس سے شرماتارہا تھا مگر بعد میں اس سے ہل گیا تھا۔ پرکاش بچے کو لے کر گھومنے جاتا تھا، اسے آئس کریم کھلاتا تھا، کھلونے لے دیتا تھا۔ بچہ جانے کے وقت ہٹ کرتا تھا، ’’ابی نہیں جاؤں دا۔ دود پی تل جاؤں دا۔ تھانا تھاتل جاؤں دا۔‘‘

جب بچہ اس طرح کی بات کہتا تھا تو اس کے اندر اچانک کوئی چیز سلگ اٹھتی تھی۔ اس کا من ہوتا تھا کہ نوکر کو جھڑک کر واپس بھیج دے اور بچے کو ہمیشہ ہمیشہ کے لیے اپنے پاس رکھ لے۔ جب نوکر بچے سے کہتا تھا، ’’بابا، چلو، اب دیر ہو رہی ہے۔‘‘ توپرکاش کاجسم ایک بے بس غصے سے کانپنے لگتا اور بہت مشکل سے وہ اپنے کو سنبھال پاتا۔ آخری بار بچہ رات کے نو بجے تک رکا رہ گیا تھا تو ایک اجنبی شخص اسے لینے کے لیے چلا آیا تھا۔

بچہ اس وقت اس کی گودی میں بیٹھا کھانا کھارہا تھا۔

’’دیکھیے، اب بچے کو بھیج دیجیے، اسے بہت دیر ہوگئی ہے۔‘‘ اجنبی نے آکر کہا۔

’’آپ دیکھ رہے ہیں بچہ کھانا کھارہا ہے!‘‘ اس کا من ہوا کہ مکار مار کراس آدمی کے دانت توڑ دے۔

’’ہاں، ہاں، آپ کھانا کھلادیجیے۔‘‘ اجنبی نے شائستگی کے ساتھ کہا، ’’میں نیچے انتظار کر رہا ہوں۔‘‘

غصے کے مارے پرکاش کے ہاتھ اس طرح کانپنے لگے کہ اس کے لیے بچے کو کھانا کھلانا ناممکن ہو گیا۔

جب نوکر بچے کو لے کر چلا گیا تو اس نے دیکھا کہ بچے کی ٹوپی وہیں پر رہ گئی ہے۔ وہ ٹوپی لیے ہوئے بھاگ کر نیچے پہنچا تو دیکھا کہ نوکر اور اجنبی کے علاوہ بچے کے ساتھ کوئی اور بھی ہے۔۔۔ اس کی ماں۔ وہ لوگ چالیس پچاس گز آگے پہنچ گئے تھے۔ اس نے نوکر کو آواز دی تو چاروں نے مڑ کر ایک ساتھ اس کی طرف دیکھا۔ نوکر ٹوپی لینے کے لیے لوٹ آیا اور باقی تینوں آگے چلتے رہے۔

اس رات وہ ایک دوست کی چھاتی پر سر رکھ کر دیر تک روتا رہا۔

نئے سرے سے پھر وہی سوال من میں اٹھنے لگا۔ کیوں وہ اپنے کو اس ماضی سے پوری طرح آزاد نہیں کرلیتا؟ اگر بسا ہوا گھر بار ہو تو اپنے آس پاس بچوں کی چہل پہل میں وہ اس دکھ کوبھول نہیں جائے گا؟ اس نے اپنے کو بچے سے اسی لیے تو الگ کیا تھا کہ اپنے جیون کو ایک نیا موڑدے سکے۔۔۔ پھر وہ اس طرح اکیلی زندگی کی اذیت کس لیے سہہ رہاتھا؟لیکن نئے سرے سے جیون شروع کرنے کی خواہش میں سدا ایک اندیشہ ملا رہتا تھا۔ وہ اس اندیشے سے جتنا لڑتا تھا، وہ اتنا ہی اور بے قابو ہواٹھتا تھا۔ جب ایک تجربہ کامیاب نہیں ہوا تو یہ کیسے کہا جاسکتا تھا کہ دوسرا تجربہ کامیاب ہی ہوگا؟

وہ پہلے کی بھول کو دہرانا نہیں چاہتا تھا، اس لیے اس کے اندیشوں نے اسے بہت محتاط کردیاتھا۔ وہ جس کسی لڑکی کو اپنی ہونے والی بیوی کے روپ میں دیکھتا، اسی کے چہرے میں اسے اپنی پہلی زندگی کی پرچھائیں نظر آنے لگتی۔ حالانکہ وہ واضح طور پر اس بارے میں کچھ بھی سوچ نہیں پاتا تھا، پھر بھی اسے لگتا تھا کہ وہ ایک ایسی ہی لڑکی کے ساتھ جیون گزارسکتا ہے جو ہرلحاظ سے بینا سے الٹ ہو۔ بینا میں بہت گھمنڈ تھا، وہ اس کے برابر پڑھی لکھی تھی، اس سے زیادہ کماتی تھی۔ اسے اپنی خودمختاری کابہت مان تھا اور وہ سمجھتی تھی کہ کسی بھی آزمائش کا وہ اکیلی رہ کر مقابلہ کرسکتی ہے۔ جسمانی لحاظ سے بھی بینا کافی لمبی اونچی تھی اور اس پر بھاری پڑتی تھی۔ بات چیت بھی کھلے مردانہ ڈھنگ سے کرتی تھی۔ وہ اب ایک ایسی لڑکی چاہتاتھا جوہر طرح سے اس پر انحصار کرے، جس کی کمزوریاں ایک شوہر کے سہارے کی امید رکھتی ہوں۔

اور کچھ ایسی ہی لڑکی تھی نرملا۔۔۔ اس کے ایک گہرے دوست کرشن جونیجا کی بہن۔ اس نے دو ایک بار اس لڑکی کو دیکھا تھا۔ بہت سیدھی سادی معصوم سی لڑکی تھی۔ بات کرتے ہوئے اس کی آنکھیں نیچے کو جھک جاتی تھیں۔ معمولی پڑھی لکھی تھی اور بہت سادہ انداز سے رہتی تھی۔ اسے دیکھ کر بے اختیار دل میں ہمدردی امنڈ آتی تھی۔ چھبیس ستائیس برس کی ہوکر بھی دیکھنے میں وہ اٹھارہ انیس سے زیادہ کی نہیں لگتی تھی۔ وہ جونیجا کے گھر کی مشکلات کو جانتا تھا۔ ان مشکلات کے باعث ہی شاید اتنی عمر تک اس لڑکی کا بیاہ نہیں ہوسکا تھا۔ اس کے ساتھ نرملاکے بیاہ کی بات چلائی گئی تو اس کے دل کے کسی کونے میں سویا ہواجوش اچانک جاگ اٹھا۔

اسے سچ مچ لگا جیسے اس کاکھویا ہواجیون اسے واپس مل رہا ہو، جیسے اندر کی ایک ٹوٹی ہوئی آرزو پھر سے ٹھوس شکل حاصل کر رہی ہو۔ ہوا اور آسمان میں اسے ایک اور ہی لبھاؤ لگنے لگا، راستے میں بکتی ہوئی پھولوں کی مالائیں پہلے سے کہیں مہکیلی محسوس ہونے لگیں۔ نرملا بیاہ کر اس کے گھر میں آئی بھی نہیں تھی کہ وہ شام کو لوٹتے ہوئے اس کے لیے مالائیں خریدکر لانے لگا۔ اس کے لیے اس نے ایک بڑا گھر لے لیا اور اسے سجانے کے لیے نیا نیا سامان خریدلیا۔ پاس میں زیادہ پیسے نہیں تھے اس لیے قرض لے لے کر بھی اس نے نرملا کے لیے نہ جانے کیا کچھ بنواڈالا۔

نرملا ہنستی ہوئی اس کے گھر میں آئی۔۔۔ اور ہنستی ہی رہی۔

پہلے تو کچھ دن وہ نہیں سمجھ سکا کہ وہ ہنستی کیوں ہے۔ نرملا جب کبھی بغیر بات کے ہنسنا شروع کر دیتی اور دیر تک ہنستی رہتی، وہ خاموش ہوکر اسے دیکھتا رہتا۔ تین تین، چار چار سال کے بچے بھی اس طرح بے اختیار انداز سے نہیں ہنس سکتے تھے جیسے وہ ہنستی تھی۔ کوئی شخص اس کے سامنے گرجاتا یا کوئی چیز کسی کے ہاتھ سے گر کر ٹوٹ جاتی تو اس کے لیے اپنی ہنسی روکناناممکن ہوجاتا۔ لگاتار دس دس منٹ تک وہ ہنسی سے بے حال رہتی۔ وہ اسے سمجھانے کی کوشش کرتا کہ ایسی باتوں پر نہیں ہنسا جاتا، تونرملا کو اور بھی ہنسی چھوٹتی۔ وہ اسے ڈانٹ دیتا تو وہ اسی طرح بے اختیار انداز سے بستر پر لیٹ کر ہاتھ پیر پٹکتی ہوئی رونے لگتی، چلا چلاکر اپنی مری ہوئی ماں کو پکارنے لگتی اور آخر میں بال بکھیر کر اور دیوی کاروپ دھار کے گھر بھر کو بددعا دینے لگتی۔ کبھی اپنے کپڑے پھاڑ کر اِدھر اُدھر چھپادیتی اور گہنے جوتوں کے اندر ڈال دیتی۔ کبھی اپنی بانہہ پر پھوڑے کاوہم کرکے دودودن اس کے درد سے کراہتی رہتی اور پھر اچانک تندرست ہوکر کپڑے دھونے لگتی اورصبح سے شام تک کپڑے ہی دھوتی رہتی۔

جب من شانت ہوتا تو منھ گول کیے وہ انگوٹھا چوسنے لگتی۔

اٹھتے بیٹھتے، کھاتے پیتے، پرکاش کے سامنے نرملا کے طرح طرح کے روپ آتے رہتے اور اس کا من ایک اندھے کنویں میں گرنے لگتا۔ راستے پر چلتے ہوئے اس کے چاروں طرف ایک خلاسا گھر آتااور وہ کئی بار بھونچکا سا سڑک کے کنارے کھڑا ہوکر سوچنے لگتا کہ وہ گھر سے کیوں آیاہے اور کہاں جارہا ہے؟ اس کا کسی سے بھی ملنے اور کہیں بھی آنے جانے کو دل نہ کرتا۔ اس کا دل جس خلا میں بھٹکتا رہتا، اس میں کئی بار اسے ایک بچے کی کلکاریاں سنائی دینے لگتیں اور وہ بالکل ساکت ہوکر دیر دیر تک ایک ہی جگہ پرکھڑا یا بیٹھا رہتا۔ ایک بار چلتے چلتے کھمبے سے ٹکراکر وہ نالی میں گرگیا۔ ایک بار بس پر چڑھنے کی کوشش میں نیچے گرجانے سے اس کے کپڑے پیچھے سے پھٹ گئے اور وہ اس سے بے خبردوسری بس میں چڑھ کر آگے چل دیا۔ اسے پتا تب چلا جب کسی نے راستے میں اس سے کہا، ’’جنٹل مین، تمہیں کیا گھر جاکر کپڑے بدل نہیں لینے چاہئیں؟‘‘

اسے لگتا تھا جیسے وہ جی نہ رہا ہو، صرف اندر ہی اندر گھٹ رہا ہو۔ کیا یہی وہ زندگی تھی جسے پانے کے لیے اس نے برسوں تک اپنے سے مقابلہ کیا تھا؟اسے غصہ آتا کہ جونیجا نے اس کے ساتھ اس طرح کا دھوکا کیوں کیا؟ اس لڑکی کو کسی دماغی اسپتال میں بھیجنے کی جگہ اس کا بیاہ کیوں کردیا؟ اس نے جونیجا کو اس معاملے میں خط لکھے لیکن اس کی جانب سے اسے کوئی جواب نہیں ملا۔ اس نے جونیجا کو بلابھیجا تو وہ آیا بھی نہیں۔ وہ خود جونیجا سے ملنے کے لیے گیا تو اسے جواب ملا کہ نرملا اب اس کی بیوی ہے۔ نرملا کے میکے کے لوگوں کا اس معاملے سے اب کوئی تعلق نہیں ہے۔

اور نرملا گھر میں اسی طرح ہنستی اور روتی رہی۔۔۔

’’تم میرے بھائی سے کیا پوچھنے کے لے گئے تھے؟‘‘ وہ بچکانہ انداز اختیار کیے ہوئے کہتی، ’’تم بینا کی طرح مجھے بھی طلاق دینا چاہتے ہو؟ کسی تیسری کو گھرمیں لانا چاہتے ہو؟ مگر میں بینا نہیں ہوں!وہ ستی ناری نہیں تھی، میں ستی ناری ہوں۔ تم مجھے چھوڑنے کی بات بھی من میں لاؤگے تو میں اس گھر کو جلاکر بھسم کردوں گی۔۔۔ سارے شہر میں بھونچال لے آؤں گی۔ لاؤں بھونچال؟‘‘ اور بانہیں پھیلاکر وہ کہنے لگتی، ’’آ، بھونچال، آ۔۔۔ آ! میں ستی ناری ہوں۔ تو اس گھر کی اینٹ سے اینٹ بجادے۔ آ، آ، آ!‘‘

وہ اسے بہلانے کی کوشش کرتا تو وہ کہتی، ’’تم مجھ سے دور رہو۔ میرے جسم کو ہاتھ مت لگاؤ۔ میں ستی ہوں۔ دیوی ہوں۔ سادھوی ہوں۔ تم مجھے ناپاک کرنا چاہتے ہو؟ خراب کرنا چاہتے ہو؟ میراتم سے بیاہ کب ہوا ہے؟ میں تو اب تک کنواری ہوں۔ چھوٹی سی معصوم بچی ہوں۔ سنسار کا کوئی بھی مرد مجھے نہیں چھو سکتا۔ میں روحانی زندگی جیتی ہوں۔ مجھے کوئی چھو کر دیکھے تو سہی!‘‘

اور بال بکھیرے ہوئے اسی طرح بولتی ہوئی کبھی وہ گھر کی چھت پر پہنچ جاتی اورکبھی باہر نکل کر گھر کے آس پاس چکر کاٹنے لگتی۔ پرکاش نے دوایک بار ہونٹوں پر ہاتھ رکھ کر اس کا منھ بند کردینا چاہا تو وہ اور بھی زور سے چلااٹھی، ’’تم میرا منھ بند کرنا چاہتے ہو؟ میرا گلاگھونٹنا چاہتے ہو؟ مجھے مارنا چاہتے ہو؟ تمہیں پتا ہے میں خود دیوی ہوں؟ میرے چاروں بھائی میرے چار شیر ہیں!وہ تمہیں نوچ نوچ کر کھاجائیں گے۔ انہیں پتا ہے ان کی بہن دیوی کا اپنا روپ ہے۔ کوئی میرا برا چاہے گا تو وہ اسے اٹھاکر لے جائیں گے اور کال کوٹھری میں بند کردیں گے۔ میرے بڑے بھائی نے ابھی ابھی نئی کار لی ہے۔ میں اسے چٹھی لکھ دوں تو وہ ابھی کار لے کر آجائے گا اور ہاتھ پیر باندھ کر تمہیں کار میں ڈال کر لے جائے گا۔ چھ مہینے بند رکھے گا، پھر چھوڑے گا۔ تمہیں پتا نہیں وہ چاروں کے چاروں شیر کتنے ظالم ہیں۔ وہ راکشس ہیں راکشس۔ آدمی کی بوٹی بوٹی کاٹ دیں اور کسی کو پتا بھی نہ چلے۔ مگر میں انہیں نہیں بلاؤں گی۔ میں ستی ناری ہوں، اس لیے اپنے ستیہ سے ہی اپنی رکشاکروں گی!‘‘

سب تدبیروں سے ہار کر پرکاش تھکا ہوا اپنے پڑھنے کے کمرے میں بند ہوکر پڑجاتا تو آدھی رات تک وہ ساتھ کے کمرے میں اسی طرح بولتی رہتی۔ پھر بولتے بولتے اچانک چپ ہوجاتی اور تھوڑی دیر کے بعد اس کا دروازہ کھٹکھٹانے لگتی۔

’’کیا بات ہے؟‘‘ وہ کہتا۔

’’اس کمرے میں میری سانس رک رہی ہے۔‘‘ نرملا جواب دیتی، ’’دروازہ کھولو، مجھے اسپتال جانا ہے۔‘‘

’’اس وقت سوجاؤ۔‘‘ وہ کہتا، ’’صبح تم جہاں کہوگی وہاں لے چلوں گا۔‘‘

’’میں کہتی ہوں دروازہ کھولو، مجھے اسپتال جانا ہے۔‘‘ اور وہ زور زور سے دھکے دے کر دروازہ توڑنے لگتی۔

پرکاش دروازہ کھول دیتا تو وہ ہنستی ہوئی اس کے سامنے آجاتی۔

’’تمہیں ہنسی کس بات کی آرہی ہے؟‘‘ پرکاش کہتا۔

’’تمہیں لگتا ہے میں ہنس رہی ہوں؟‘‘ وہ اور بھی زور سے ہنسنے لگتی، ’’یہ ہنسی نہیں، رونا ہے رونا!‘‘

’’تم اسپتال چلنا چاہتی ہو؟‘‘

’’کیوں؟‘‘

’’ابھی تم کہہ رہی تھیں۔۔۔‘‘

’’میں اسپتال چلنے کے لیے کہاں کہہ رہی تھی؟ میں تو کہہ رہی تھی کہ مجھے اس کمرے میں ڈر لگتا ہے، میں یہاں تمہارے پاس سوؤں گی۔‘‘

’’دیکھو نرملا، اس وقت میرا من ٹھیک نہیں ہے۔ تم تھوڑی دیر میں چاہے میرے پاس آجانا، مگر اس سمے تھوڑی دیر کے لیے۔۔۔‘‘

’’میں کہتی ہوں، میں اکیلی اس کمرے میں نہیں سوسکتی۔ میرے جیسی معصوم بچی کیا کبھی اکیلی سوسکتی ہے؟‘‘

’’تم معصوم بچی نہیں ہو نرملا!‘‘

’’تو تمہیں میں بڑی نظر آتی ہوں؟ ایک چھوٹی سی بچی کو بڑی کہتے تمہارے دل کو کچھ نہیں ہوتا؟ اس لیے کہ تم مجھے اپنے پاس سلانا نہیں چاہتے؟ مگر میں یہاں سے نہیں جاؤں گی۔ تمہیں مجھے اپنے ساتھ سلانا پڑے گا۔ میں ودھوا ہوں جو اکیلی سوؤں گی؟ میں سہاگن ناری ہوں۔ کوئی سہاگن کیا کبھی اکیلی سوتی ہے؟ میں بھانورے لے کر تمہارے گھر میں آئی ہوں، ایسے ہی اٹھاکر نہیں لائی گئی۔ دیکھتی ہوں تم کیسے مجھے اس کمرے میں بھیجتے ہو!‘‘ اور وہ پرکاش کے پاس لیٹ کر اس سے لپٹ جاتی۔

کچھ دیر میں جب اس کے اعصاب پرسکون ہوجاتے تو لگاتار اسے چومتی ہوئی کہتی، ’’میرا سہاگ! میرا چاند! میرا راجا! میں تمہیں کبھی اپنے سے الگ رکھ سکتی ہوں؟ تم میرے ساتھ ایک سو چھتیس برس کی عمر تک جیوگے۔ مجھے یہ اعزاز ملا ہوا ہے کہ میں ایک سو چھتیس برس کی عمر تک سہاگن رہوں گی۔ جس کی بھی مجھ سے شادی ہوتی، وہ ایک سو چھتیس برس کی عمر تک جیتا۔ تم دیکھ لینا میری بات سچی نکلتی ہے یا نہیں۔ میں ستی ناری ہوں اور ستی ناری کے منھ سے نکلی ہوئی بات کبھی جھوٹ نہیں ہوسکتی۔۔۔‘‘

’’تم صبح میرے ساتھ اسپتال چلوگی؟‘‘ پرکاش کہتا۔

’’کیوں، مجھے کیا ہوا ہے جو اسپتال جاؤں گی؟ مجھے تو آج تک سردرد بھی نہیں ہوا۔ میں اسپتال کیوں جاؤں؟‘‘

ایک دن پرکاش اس کے لیے کئی کتابیں خریدلایا۔ اس نے سوچا تھا کہ شاید پڑھنے سے نرملا کو ایک سمت مل جائے اور وہ دھیرے دھیرے اپنے من کے اندھیرے سے باہر نکلنے لگے۔ مگر نرملا نے ان کتابوں کو دیکھا تو منھ بناکر ایک طرف ہٹادیا۔

’’یہ کتابیں میں تمہارے پڑھنے کے لیے لایا ہوں۔‘‘ پرکاش نے کہا۔

’’میرے پڑھنے کے لیے؟‘‘ نرملا حیرت کے ساتھ بولی، ’’میں ان کتابوں کو پڑھ کر کیا کروں گی؟ میں نے تو مارکسزم، نفسیات اور سبھی کچھ چودہ سال کی عمر میں پڑھ لیا تھا۔ اب اتنی بڑی ہوکر میں یہ کتابیں پڑھنے لگوں گی؟‘‘

اور اس کے پاس سے اٹھ کر انگوٹھا چوستی ہوئی وہ کمرے سے باہر چلی گئی۔

’’پاپا!‘‘

کہرے کے بادلوں میں بھٹکا ہوا ذہن اچانک بالکنی پر لوٹ آیا۔ کھلن مرگ کو جانے والی سڑک پر بہت سے لوگ گھوڑے دوڑاتے جارہے تھے۔۔۔ ایک دھندلے نقش کی بجھی بجھی شبیہوں جیسے۔ ویسی ہی بجھی بجھی شکلیں کلب سے بازار کی طرف آرہی تھیں۔ بائیں طرف برف سے ڈھکی ہوئی پہاڑی کی ایک چوٹی کہرے سے باہر نکل آئی تھی اور جانے کدھر سے آتی ہوئی سورج کی کرن نے اسے روشن کردیا تھا۔ کہرے میں بھٹکے ہوئے کچھ پنچھی اڑتے ہوئے اس چوٹی کے سامنے آگئے تو اچانک ان کے پنکھ سنہرے ہواٹھے مگر اگلے ہی لمحے وہ پھر دھندلکے میں کھوگئے۔

پرکاش کرسی سے اٹھ کھڑا ہوا اور جھانک کر نیچے سڑک کی طرف دیکھنے لگا۔ کیا وہ آواز پلاش کی نہیں تھی؟ لیکن سڑک پر دور دور تک ایسی کوئی شکل دکھائی نہیں دے رہی تھی جسے اس کی آنکھیں اس بچے کے روپ میں پہچان سکیں۔ آنکھوں ہی آنکھوں میں ٹورسٹ ہوٹل کے گیٹ تک جاکر وہ لوٹ آیا اور گلے پر ہاتھ رکھ کر، جیسے مایوسی کی چبھن کو روکے ہوئے، پھر کرسی پر بیٹھ گیا۔ دس کے بعد گیارہ، بارہ اور پھر ایک بھی بج گیا تھا اور بچہ نہیں آیا تھا۔ کیا بچے کے پہلے جنم دن کی واردات آج پھر دہرائی جانی تھی؟ مٹھیاں بند کیے ان پر ماتھا رکھ کر وہ بالکنی پر جھک گیا۔

’’پاپا!‘‘

اس نے چونک کر سراٹھایا، وہی کہرا اور وہی دھندلی سنسان سڑک۔ دور گھوڑوں کی ٹاپوں اور دھیمی چال سے اس طرف کو آتا ہوا ایک کشمیری مزدور۔ کیا وہ آواز اسے اپنے کانوں کے پردوں کے اندر سے ہی سنائی دے رہی تھی؟تبھی ان پردوں کے اندر دو ننھے پیروں کی آواز بھی گونج گئی اور اس کی بانہوں کے بہت پاس ہی بچے کالہجہ کلکار اٹھا، ’’پاپا!‘‘ ساتھ ہی دو ننھی ننھی بانہیں اس کے گلے سے لپٹ گئیں اور بچے کے گھنے بال اس کے ہونٹوں سے چھوگئے۔ پرکاش نے ایک بار بچے کے جسم کو سر سے پیر تک چھوکر دیکھ لیا کہ یہ بدن بھی اس کے تصور کا خواب تو نہیں ہے۔ یقین ہوجانے پر کہ بچہ سچ مچ اس کی گودی میں ہے، اس نے اس کے ماتھے اور آنکھوں کو کس کر چوم لیا۔

’’تو میں جاؤں، پلاش؟‘‘ ایک بھولی ہوئی مگر مانوس آواز نے پرکاش کو پھر چونکادیا۔ اس نے گھور کر پیچھے دیکھا۔ کمرے کے دروازے کے باہر بینا دائیں طرف نہ جانے کس چیز پر آنکھیں گڑائے کھڑی تھی۔

’’آپ۔۔۔؟ آ۔۔۔ آئیے آپ۔۔۔!‘‘ کہتا ہوا بچے کو بانہوں میں لیے پرکاش ہکا بکا ساکرسی سے اٹھ کھڑا ہوا۔

’’نہیں، میں جارہی ہوں۔‘‘ بینا نے پھر بھی اس کی طرف نہیں دیکھا، ’’مجھے اتنا بتادیجیے کہ بچہ کب تک لوٹ کر آئے گا؟‘‘

’’آپ۔۔۔ جب کہیں، تبھی بھیج دوں گا۔‘‘ پرکاش بالکنی کی دہلیز لانگھ کر کمرے میں آگیا۔

’’چاربجے اسے دودھ پینا ہوتا ہے۔‘‘

’’تو چار بجے تک میں اسے وہاں پہنچادوں گا۔‘‘

’’اس نے ہلکا سا سویٹر ہی پہن رکھا ہے۔ دوسرے پُل اوور کی ضرورت تو نہیں پڑے گی؟‘‘

’’آپ دے دیجیے۔ ضرورت پڑے گی تو میں اسے پہنادوں گا۔‘‘

بینا نے دہلیز کے اس طرف سے ہی پل اوور اس کی طرف بڑھادیا۔ اس نے پل اوور لے کر اسے شال کی طرح بچے کو اُڑھادیا۔ ’’آپ۔۔۔‘‘ اس نے بینا سے کہنا چاہا کہ وہ اندر آجائے، مگر اس سے کہا نہیں گیا۔ بینا چپ چاپ زینے کی طرف چل دی۔ پرکاش کمرے سے نکل آیا۔ زینے سے بینا نے پھر کہا، ’’دیکھیے، اسے آئس کریم مت کھلائیے گا۔ اس کا گلابہت جلد خراب ہوجاتاہے۔‘‘

’’اچھا۔‘‘

بینا پل بھر رکی رہی۔ شاید اسے اور بھی کچھ کہنا تھا مگر پھر بغیر کچھ کہے وہ نیچے اترگئی۔ بچہ پرکاش کی گودی میں اچھلتا ہوا ہاتھ ہلاتا رہا، ’’ممی، ٹاٹا! ٹاٹا!‘‘ پرکاش اسے لیے بالکنی پر لوٹ آیا تو وہ اس کے گلے میں بانہیں ڈال کر بولا، ’’پاپا، میں آئچھ کلیم جلول تھاؤں دا۔‘‘

’’ہاں ہاں، بیٹے!‘‘ پرکاش اس کی پیٹھ پر ہاتھ پھیرنے لگا، ’’جو تیرے من میں آئے سو کھانا، ہاں؟‘‘

اور کچھ دیر کے لیے وہ اپنے کو، بالکنی کو اور یہاں تک کہ بچے کو بھی بھولا ہوا، آسمان کو دیکھتا رہا۔ کہرے کا پردہ دھیرے دھیرے اٹھنے لگا تو میلوں میں پھیلے ہوئے ہریالی کے رنگ منچ کی دھندلی لکیریں اچانک نمایاں ہو اٹھیں۔ وہ دونوں گولف گراؤنڈ پار کرکے کلب کی طرف جارہے تھے۔ چلتے ہوئے بچے نے پوچھا، ’’پاپا، آدمی کے دوٹانگیں کیوں ہوتی ہیں؟ چار کیوں نہیں ہوتیں؟‘‘

پرکاش نے چونک کر اس کی طرف دیکھااور کہا، ’’ارے!‘‘

’’کیوں پاپا۔۔۔‘‘ بچہ بولا، ’’تم نے ارے کیوں کہا ہے؟‘‘

’’تو اتنا صاف بول سکتا ہے تو اب تک تتلاکر کیوں بول رہا تھا؟‘‘ پرکاش نے اسے بانہوں میں اٹھاکر ایک ملزم کی طرح اپنے سامنے کرلیا۔ بچہ کھلکھلاکر ہنس پڑا۔ پرکاش کو لگا کہ یہ ویسی ہی ہنسی ہے جیسے کبھی وہ خود ہنسا کرتا تھا۔ بچے کے چہرے کے خطوط سے بھی اسے اپنے بچپن کے چہرے کی یاد آنے لگی۔ اسے لگا جیسے ایکاایک اس کا تیس برس پہلے کاچہرہ سامنے آگیا ہو اور وہ خود اس چہرے کے سامنے ایک ملزم کی طرح کھڑا ہو۔

’’ممی تو ایچھے ہی اچھلا لدتا ہے۔‘‘ بچے نے کہا۔

’’کیوں؟‘‘

’’میلے تو نہیں پتا۔ تم ممی چھے پوچھ لینا۔‘‘

’’تیری ممی تجھے زور سے ہنسنے سے بھی منع کرتی ہے؟‘‘ پرکاش کو وہ دن یاد آرہے تھے جب اس کے کھلکھلاکر ہنسنے پر بینا کانوں پر ہاتھ رکھ لیا کرتی تھی۔ بچے کی بانہیں اس کی گردن کے پاس کس گئیں۔ ’’ہاں!‘‘ وہ بولا، ’’ممی تہتی ہے اچھے بچے جول چھے نہیں ہنچھتے۔‘‘

پرکاش نے اسے بانہوں سے اتاردیا۔ بچہ اس کی انگلی پکڑے ہوئے گھاس پر چلنے لگا۔ ’’تیوں پاپا۔۔۔‘‘ اس نے پوچھا، ’’اچھے بچے جول چھے تیوں نہیں ہنچھتے؟‘‘

’’ہنستے ہیں، بیٹے!‘‘ پرکاش نے اس کے سر کو سہلاتے ہوئے کہا، ’’سب اچھے بچے زور سے ہنستے ہیں۔‘‘

’’تو ممی میلے تو تیو لوتتی ہے؟‘‘

’’نہیں روکتی، بیٹے۔ اب وہ تجھے نہیں روکے گی۔ اور تو تتلاکر نہیں، ٹھیک سے بولاکر۔ تیری ممی تجھے اس کے لیے بھی منع نہیں کرتی۔ میں اس سے کہہ دوں گا۔‘‘

’’تو تم نے پہلے ممی چھے تیوں نہیں تہا؟‘‘

’’ایسے نہیں، کہہ کہ تم نے پہلے ممی سے کیوں نہیں کہا۔‘‘

’’بچہ پھر ہنس دیا، ‘‘ تو تم نے پہلے ممی سے کیوں نہیں کہا؟‘‘

’’پہلے مجھے یاد نہیں رہا۔ اب یاد سے کہہ دوں گا۔‘‘

کچھ دیر دونوں چپ چاپ چلتے رہے۔ پھر بچے نے پوچھا، ’’پاپا، تم میرے جنم دن کی پارٹی میں کیوں نہیں آئے؟ ممی کہتی تھی تم ولایت گئے ہوئے تھے۔‘‘

’’ہاں بیٹے، میں ولایت گیا ہوا تھا۔‘‘

’’تو پاپا، اب تم پھر سے ولایت نہیں جانا۔‘‘

’’کیوں؟‘‘

’’میرے کو اچھانہیں لگتا۔ ولایت جاکر تمہاری شکل اور ہی طرح کی ہوگئی ہے۔‘‘

پرکاش ایک روکھی سی ہنسی ہنسا اور بولا، ’’کیسی ہوگئی ہے شکل؟‘‘

’’پتا نہیں کیسی ہوگئی ہے۔ پہلے دوسری طرح کی تھی، اب دوسری طرح کی ہے۔‘‘

’’دوسری طرح کی کیسے؟‘‘

’’پتا نہیں۔ پہلے تمہارے بال کالے کالے تھے، اب سفید سفید ہوگئے ہیں۔‘‘

’’تم اتنے دن میرے پاس نہیں آئے، اسی لیے میرے بال سفید ہوگئے ہیں۔‘‘

بچہ اتنے زور سے ہنسا کہ اس کے قدم لڑکھڑاگئے، ’’ارے پاپا، تم تو ولایت گئے ہوئے تھے۔‘‘ اس نے کہا، ’’میں تمہارے پاس کیسے آتا؟ میں کیا اکیلاولایت جاسکتا ہوں؟‘‘

’’کیوں نہیں جاسکتا؟ تو اتنا بڑا تو ہے۔‘‘

’’میں سچ مچ بڑا ہوں نا پاپا؟‘‘ بچہ تالی بجاتا ہوا بولا، ’’تم یہ بات بھی ممی سے کہہ دینا۔ وہ کہتی ہیں میں ابھی بہت چھوٹا ہوں۔ میں چھوٹا نہیں ہوں نا پاپا؟‘‘

’’نہیں، تو چھوٹا کہاں ہے!‘‘ کہہ کر پرکاش میدان میں دوڑنے لگا، ’’تو بھاگ کر مجھے پکڑ۔‘‘

بچہ اپنی چھوٹی چھوٹی ٹانگیں پٹکتا ہوا دوڑنے لگا، پرکاش کو پھر اپنے بچپن کی ایک بات یاد آئی۔ تب اسے دوڑتے دیکھ کر ایک بار کسی نے کہا تھا، ’’ارے یہ بچہ کیسے ٹانگ پٹک پٹک کر دوڑتا ہے۔ اسے ٹھیک سے چلنا نہیں آتا ہے کیا؟‘‘

بچے کی انگلی پکڑے ہوئے پرکاش کلب کے بار روم میں داخل ہوا تو بار مین عبداللہ اسے دیکھتے ہی دور سے مسکرایا، ’’صاحب کے لیے دوبوتل بیئر!‘‘ اس نے پاس کھڑے بیرے سے کہا، ’’صاحب آج اپنے ایک مہمان کے ساتھ آیا ہے۔‘‘

’’بچے کے لیے ایک گلاس پانی دے دو۔‘‘ پرکاش نے کاؤنٹر کے پاس پہنچ کر کہا، ’’اسے پیاس لگی ہے۔‘‘

’’خالی پانی؟‘‘ عبداللہ بچے کے بالوں کو پیار سے سہلانے لگا، ’’اور سب دوستوں کو تو صاحب بیئر پلاتا ہے اور اس بے چارے کو خالی پانی؟‘‘ اور ٹھنڈے پانی کی بوتل کھول کر وہ گلاس میں پانی ڈالنے لگا۔ جب وہ گلاس اس بچے کے منھ کے پاس لے آیا تو بچے نے وہ اس کے ہاتھوں سے لے لیا۔ ’’میں اپنے آپ پیوں گا۔‘‘ اس نے کہا، ’’میں چھوٹا تھوڑے ہی ہوں؟ میں تو بڑا ہوں۔‘‘

’’اچھا تو بڑاہے؟‘‘ عبداللہ ہنسا، ’’تب تو تجھے پانی دے کر میں نے غلطی کی۔ بڑے لوگوں کو تو میں بیئر پلاتا ہوں۔‘‘

’’بیئر کیا ہوتا ہے؟‘‘ بچے نے منھ سے گلاس ہٹاکر پوچھا۔

’’بیئر ہوتا نہیں، ہوتی ہے۔‘‘ عبداللہ نے جھک کر اسے چوم لیا، ’’تجھے پلاؤں کیا؟‘‘

’’نہیں۔۔۔‘‘ کہہ کر بچے نے اپنی بانہیں پرکاش کی طرف پھیلادیں۔ پرکاش اسے لے کر ڈیوڑھی کی طرف چلا تو عبداللہ بھی ان دونوں کے ساتھ ہی ساتھ باہر چلاآیا، ’’کس کا بچہ ہے صاحب؟‘‘ اس نے دھیمے لہجے میں پوچھا۔

’’میرا لڑکا ہے۔‘‘ کہہ کر پرکاش بچے کو سیڑھی سے اتارنے لگا۔

عبداللہ ہنس دیا، ‘‘ صاحب بہت خوش دل آدمی ہے۔‘‘ اس نے کہا۔

’’کیوں؟‘‘

عبداللہ ہنستا ہوا سرہلانے لگا، ’’آپ کا بھی جواب نہیں ہے۔‘‘

پرکاش غصے میں کچھ کہنے کو ہوا مگر اپنے کو روک کر بچے کو لیے ہوئے آگے چل دیا۔ عبداللہ ڈیوڑھی میں رکا ہوا پیچھے سے سرہلاتا رہا۔ بیرا شیر محمد اندر سے نکل کر آیا، تو وہ پھر کھلکھلاکر ہنس دیا۔

’’کیا بات ہے؟ اکیلا کھڑا کھڑا کیسے ہنس رہا ہے؟‘‘ شیر محمد نے پوچھا۔

’’صاحب کا بھی جواب نہیں ہے۔‘‘ عبداللہ کسی طرح ہنسی پر قابو پاکر بولا۔

’’کس صاحب کا جواب نہیں ہے؟‘‘

’’اس صاحب کا۔‘‘ عبداللہ نے پرکاش کی طرف اشارہ کیا، ’’اس دن بولتا تھا کہ اس نے ابھی اسی سال شادی کی ہے اور آج بولتا ہے کہ یہ پانچ سال کا بابا اس کا لڑکا ہے۔ جب آیا تھا تو اکیلا تھا اور آج اس کے لڑکا بھی ہوگیا!‘‘ پرکاش نے ایک بار گھوم کر تیکھی نظر سے اس کی طرف دیکھ لیا۔ عبداللہ ایک بار پھر کھلکھلا اٹھا، ’’ایسا خوش دل آدمی میں نے آج تک نہیں دیکھا۔‘‘

’’پاپا، گھاس ہری کیوں ہوتی ہے؟ لال کیوں نہیں ہوتی؟‘‘ کلب سے نکل کر پرکاش نے بچے کو ایک گھوڑاکرائے پر لے دیا تھا۔ کھلن مرگ کو جانے والی پگ ڈنڈی پر وہ خود اس کے ساتھ ساتھ پیدل چل رہا تھا۔ گھاس کے ریشمی پھیلاؤ پر کہرے کاآسمان اس طرح جھکا ہوا تھا جیسے خواہش کا جنون اسے پھر سے گھر آنے کے لیے مجبور کر رہاہو۔ بچہ پرشوق آنکھوں سے آس پاس کی پہاڑیوں کو اور بیچ سے بہہ کر جاتی ہوئی پانی کی پتلی دھار کو دیکھ رہاتھا۔ کبھی کچھ لمحوں کے لیے وہ اپنے کو بھولارہتا، پھر کسی انجانے جذبے کے اثر سے کاٹھی پر اچھلنے لگتا۔

’’ہرچیز کااپنا رنگ ہوتا ہے۔‘‘ پرکاش نے بچے کی ایک جانگھ کو ہاتھ سے دباتے ہوئے کہااور کچھ دیر کے لیے خود بھی ہریالی کے پھیلاؤ میں کھویا رہا۔

’’ہرچیز کا اپنا رنگ کیوں ہوتا ہے؟‘‘

’’یہ قدرت کی بات ہے۔ بیٹے، قدرت نے ہر چیز کا اپنا رنگ بنادیا ہے۔‘‘

’’قدرت کیا ہوتی ہے؟‘‘

پرکاش نے جھک کر اس کی جانگھ کو چوم لیا، ’’قدرت یہ ہوتی ہے۔۔۔‘‘ اس نے ہنس کر کہا۔ جانگھ پر گدگدی ہونے سے بچہ بھی ہنسنے لگا۔

’’تم جھوٹ بولتے ہو۔‘‘ اس نے کہا۔

’’کیوں؟‘‘

’’تم کو اس کا پتا ہی نہیں ہے۔‘‘

’’اچھا، مجھے پتا نہیں ہے تو تو بتا گھاس کا رنگ ہراکیوں ہوتا ہے؟‘‘

’’گھاس مٹی کے اندر سے پیدا ہوتی ہے، اس لیے اس کارنگ ہراہوتا ہے۔‘‘

’’اچھا؟ تم کو اس کا پتا چل گیا؟‘‘

بچہ اچھلتا ہوا لگام کو جھٹکنے لگا، ’’میرے کو ممی نے بتایا تھا۔‘‘

پرکاش کے ہونٹوں پر ادھوری سی مسکراہٹ آگئی، جسے اس نے کسی طرح دبالیا۔ اسے لگاجیسے آج بھی اس کے اور بینا کے بیچ میں معرکہ چل رہاہو اور بینا اس معرکے میں اس پر بھاری پڑنے کی کوشش کر رہی ہو۔ ’’تیری ممی نے تجھے اور کیا کیا بتارکھا ہے؟‘‘ وہ بچے کو تھپتھپاکر بولا، ’’یہ بھی بتا رکھا ہے کہ آدمی کے دو ٹانگیں کیوں ہوتی ہیں اور چار کیوں نہیں؟‘‘

’’ہاں، ممی کہتی تھی کہ آدمی کے دوٹانگیں اس لیے ہوتی ہیں کہ وہ آدھا زمین پر چلتا ہے اور آدھاآسمان میں۔‘‘

’’اچھا؟‘‘ پرکاش کے ہونٹوں پر ہنسی اور دل میں اداسی کی لکیر پھیل گئی، ’’مجھے اس کا پتا نہیں تھا۔‘‘ اس نے کہا۔

’’تم کو تو کچھ بھی پتا نہیں ہے پاپا!‘‘ بچہ بولا، ’’اتنے بڑے ہوکر بھی پتا نہیں ہے!‘‘

گھاس، برف اور آسمان کے رنگ دن میں کئی کئی بار بدل جاتے تھے۔ بدلتے ہوئے رنگوں کے ساتھ دل بھی اور سے اور ہونے لگتا تھا۔ صبح اٹھتے ہی پرکاش بچے کے آنے کا انتظار کرنے لگتا۔ بار بار وہ بالکنی پر چلاجاتا اور ٹورسٹ ہوٹل کی طرف آنکھیں کیے دیر دیر تک کھڑا رہتا۔ ناشتہ کرنے یا کھانا کھانے کے لیے بھی وہ وہاں سے نہیں ہٹنا چاہتا تھا۔ اسے ڈر لگتا تھا کہ بچہ اس بیچ آکر لوٹ نہ جائے۔ تین دن میں اسے ساتھ لیے ہوئے وہ کتنی ہی بار گھومنے کے لیے گیا تھا، اس کے گھوڑے کے پیچھے پیچھے دوڑا تھا اور اس کے ساتھ گھاس پر لوٹتا رہا تھا۔ کبھی ایک دوست کی طرح وہ اس کے ساتھ کھلکھلاکر ہنستا، کبھی ایک نوکر کی طرح اس کے ہر حکم کی تعمیل کرتا۔ بچہ جان بوجھ کر راستے کے کیچڑ میں اپنے پاؤں لت پت کرلیتا اور پھر ہونٹ بسور کر کہتا، ’’پاپا، پاؤں دھودو۔‘‘ وہ اسے اٹھاے ہوئے اِدھر اُدھر پانی ڈھونڈتا پھرتا۔ بچے کو وہ جس زاویے سے بھی دیکھتا، اسی زاویے سے اس کی تصویر لے لینا چاہتا۔