جو نگری نگری بھٹکائے

صائمہ نے تیسری منزل سے نیچے جھانک کر دیکھا۔ کیمپس سے ہوسٹل تک کی خالی سڑک پر نہر کے کنارے کنارے اکیلے چلنا نہایت بور کام ہے۔ اگر کہیں سے وہ کم بخت طوبیٰ مل جائے جس کی زندگی مصروفیات سے پر اور وقت کمیاب تھا۔

لیکن وہ نیچے نہیں تھی۔ وہ کیفے ٹیریا بھی نہیں تھی۔ وہ ڈاکٹر غزنوی کے کمرے میں بھی اسے جھانک آئی۔ اگر اتنی دیر اسے تلاشنے کی بجائے وہ ہوسٹل کی طرف چل پڑی ہوتی تو اب تک دو دفعہ ہوسٹل پہنچ چکی ہوتی۔ آخر وہ گئی کہاں؟ وہ اس کے لیے تھوڑی سی فکر مند ہو گئی۔ وہ صبح بھی اداس تھی۔ مگر اس نے اپنی اداسی کا اعتراف نہیں کیا۔ لیکن اب اسے اعترافوں کی ضرورت بھی نہیں تھی۔ جس شخص کے ساتھ آپ دن رات رہتے ہوں اور آپ اسے اتنا پسند بھی کرتے ہوں، اس سے سوال جواب کی ضرورت بھی نہیں ہوتی۔ تم خوش ہو۔ تم اداس ہو۔ یہ بہت رسمی سی باتیں ہیں۔ منافقت سے پر۔

ایک آخری چکر بینک کا لگانے کی نیت سے وہ الٹے قدموں پلٹی ہی تھی کہ اسے شیریں نے پل کے دوسری طرف سے پکار لیا،’’ہوسٹل نہیں جانا آج؟‘‘

’’جانا تو تھا۔ طوبیٰ کو دیکھا ہے؟‘‘

’’صبح تو دیکھا تھا۔ کیوں کام تھا کوئی؟‘‘

پھر پیچھے سے آنے والے ریلے کے ساتھ جیسے وہ دھکا کھاتی ہوسٹل کی طرف گھسٹتی چلی گئی۔ ہر چند منٹ کے بعد ایک قافلہ ہوسٹل کی طرف روانہ ہوتا ہے۔ وہ کھلکھلا کر ہنستی، بےسری لے سے سر اٹھاتی لڑکیوں کے درمیان چلتی چلتی پلٹ کر دیکھتی رہی۔

’’کہیں وہ اکیلی نہ رہ جائے۔‘‘ اس نے ثنا کے ٹہوکا مارنے پر شرمندہ ہو کر کہا تھا۔

’’اس دنیا میں سب اکیلے ہیں۔ کوئی کسی کا نہیں۔‘‘ اس نے بڑی رقّت سے اعلان کیا تھا۔

’’اور اگر کھانا نہ مل سکا تو پھر؟‘‘

وہ ایس ٹی سی کے پاس کچھ دیر کے لیے رُکی۔ کوئی پیانو بجا رہا تھا یا شاید اپنا غصہ اتار رہا تھا۔ لیکن وہ بہرکیف طوبیٰ نہیں تھی اور جب وہ میس سے کھانا کھاکر اور اس کا حصہ پلیٹ میں بھر کر کمرے میں آئی تو غصے کے مارے بھنا گئی۔ وہ سکون سے پاؤں دیوار سے ٹیکے Comics Double Digest پڑھ رہی تھی۔ وہ اتنی محو تھی جیسے فلسفے کے کسی ادق باب میں کھو سی گئی ہو۔

’’حد ہوتی ہے طوبیٰ!‘‘ اس نے مارے غصے کے پلیٹ میز پر پٹخی اور کتابیں اس کے منہ پر دے ماریں،’’اور میں تمہارے لیے وہاں پریشان ہوتی پھر رہی ہوں۔ تم کہہ کر بھی نہیں آ سکتی تھیں؟‘‘

کبھی کبھی جب ہمارے بےبنیاد واہمے ہوا ہوتے ہیں تو ہم بجائے پرسکون ہونے کے زیادہ جھنجلا جاتے ہیں۔ حالاں کہ ہم جو کچھ سوچ رہے تھے، وہ ہوا نہیں ہوتا۔ اس نے بیٹی اور ویرونیکا (Betty or Veronica) کی تصویر والی کتاب ایک طرف ڈال کر غور سے اس کی طرف دیکھا۔

وہ غالباً اس کے پیچھے خوب ہی روتی رہی ہے۔

’’میں بور ہو رہی تھی اور تم بہت پڑھاکو ہو۔ کیا ہے اس پلیٹ میں؟‘‘

’’میں نے تم سے کہا تھا؟ میں پڑھاکو ہوں، میں ضرور جاؤں گی کلاس میں؟‘‘

’’میراجی نہیں چاہ رہا تھا دراصل۔‘‘ وہ چھلانگ مار کر خیرات کے مزے والے چنے چاول بڑی رغبت سے کھانے لگی۔

’’میں بہت بور ہو رہی تھی اور سر شفیق کے لیکچر سلا ڈالتے ہیں۔‘‘

صائمہ کرسی پر گر سی گئی۔ کتنی دیر تک اسے ڈھونڈنے کے لیے ٹانگوں کی مارچ پاسٹ جاری رہی تھی اور وہ اسی طرح کھڑے کھڑے پلیٹ میں ہاتھ ڈال ڈال کر چاول منہ میں بھر رہی تھی اور چہرے سے ایسے دکھائی دیتی تھی جیسے اسے زمانے بھر کی پروا نہ ہو۔ اس کو کیا ضرورت پڑی تھی اس کی خاطر خوار ہونے کی۔ صائمہ نے جھنجلاکر بستر پر بکھری اس کی چیزیں سمیٹتے سوچا۔

’’طغرل بھائی! دراصل یہ محبت بڑی ذلیل چیز ہے۔‘‘ کولڈ کافی کے گلاس سے ٹپکتے یخ برفیلے قطرے اس نے ٹشو پیپر سے صاف کیے۔ پھر اس نے اسٹرا (Straw) منہ میں دبالی۔

اگلی سیٹ پر بیٹھی طوبیٰ کچھ دیر اس کے اگلے فقروں کی منتظر رہی۔ پھر وہ کھلکھلا کر ہنس دی، ’’یہ کس قسم کی فلاسفی ہے۔ اس قدر بودی۔ نہ تم نے دلائل دئیے نہ بحث کی، بس فیصلہ سنا دیا۔‘‘

’’اس سلسلے میں دلائل کی ضرورت بھی نہیں۔‘‘ طغرل نے پوری طرح متفق ہوتے ہوئے کہا تھا، ’’دراصل یہ سٹیٹمنٹ ہر طرح سے مکمل ہے۔ وہ جو انگریزی کا محاورہ ہے نا۔ سورج ساکن ہے۔ اس کی طرح۔‘‘

’’پتا نہیں کیوں لیکن مجھے پورا یقین ہے، محبت ذلیل و خوار کرتی ہے۔ اب دیکھیے اگر طغرل بھائی کی امی کو پتا چل جائے کہ فوٹریس سٹیڈیم کی ان سڑکوں پر ان کا راج دلارا کس کس طرح خوار نہیں ہوتا تو وہ محبت کے بارے میں کیا نظریہ پیش کریں گی؟‘‘

سائیڈ مرر سے صائمہ نے طوبیٰ کا رنگ اڑتے دیکھا۔ شاید اس نے خود کو تھوڑی دیر کے لیے تحقیر کی زد میں محسوس کیا ہو۔ لیکن وہ اس کی دوست تھی اور اس کو اتنا یقین ہونا چاہیے کہ وہ کبھی اس کا مذاق نہیں اڑا سکتی۔ طغرل اپنی ہتک کے احساس سے تپ سا گیا۔ ذرا دیر کو اس کو احساس ہوا، صائمہ نے کبھی طنزیہ گفتگو سے ہٹ کر اس کے ساتھ کوئی بات کی بھی نہیں تھی پھر وہ کیوں اس کے کسی نظریے سے سو فیصدی متفق ہونے پر آمادہ ہو گیا تھا۔ اس نے انہیں یونیورسٹی کے پارکنگ لاٹ میں ڈراپ کیا تو صائمہ کے ایک احمقانہ سے نظریے سے ساری فضا بوجھل بوجھل ہو گئی۔

صائمہ کا خیال تھا۔ اسے دونوں منزلوں تک طوبیٰ کے کسی لمبے لیکچر کا سامنا کرنا پڑےگا۔ لیکن کار سے اترتے ہی وہ جس دھن کے سر پکڑنے کی کوشش میں فکر مند تھی، ڈاکٹر غزنوی کے آفس تک اسی سے جھگڑتی رہی۔ یوں تو دنیا بسےگی۔ تنہائی پھر بھی ڈسےگی۔ آخری لفظوں سے اس کی تسلی نہ ہوتی تو پھر پورا سر پکڑ کر شروع کر دیتی۔

’’میں بھی طالب علمی کے زمانے میں بڑا زبردست ٹریڈ یونیسٹ تھا۔ تم لوگوں کی طرح تقریریں کرنا، نعرے لگوانا۔ ایک مرتبہ جب میرے چاروں طرف سے سن سن کر کرتی گولیاں گزر رہی تھیں۔‘‘

صائمہ نے کن اکھیوں سے دیکھا۔ جانے کیوں طوبیٰ کے اردگرد ایسے لوگوں کا مجمع رہتا ہے جو اس کو پرسکون رکھنے کی بجائے اشتعال دلائے رکھتے ہیں۔ اس کی رنگت شدت جذبات سے سرخ سی ہو رہی تھی۔ وہ پوری محویت سے ڈاکٹر غزنوی کے قصے میں گم ہو گئی تھی۔

صائمہ کو سرے سے طوبیٰ کی جذباتیت پسند ہی نہیں تھی۔ فائنل کے امتحان سر پر تھے۔ مزدوروں کی خیر خواہی کے لیے کچھ کرنا بھی تھا تو امتحانوں کے بعد سہی اور خوامخواہ میں وہ فیل ہو گئی تو صائمہ کو ساتھ دینا پڑےگا اور اس کے سرمایہ دار باپ کے علم میں بھی آ گیا کہ اس کی بیٹی مزدور لیڈر بنی سرخ جھنڈا اٹھائے دنیا کا مقدر بدلنے نکلی ہے تو۔ تو؟ (اس کی سوچ کی روانی رک گئی۔) ان کی بلا سے۔ وہ اسے بھی کسی باغی مزدور لیڈر کی طرح مسل کر رکھ دیں گے۔

’’کسی بھی چیز کو باہر سے نہیں دیکھتے۔ کوڑا چننے والے بھی کوڑے کے ڈھیر میں اترتے ہیں۔‘‘

ڈاکٹر غزنوی اپنے گھر کے سرسبز لان میں اسے دلچسپ قصے سنا کر اکساتے رہتے۔

’’جناب مارشل لاء کا دَور تھا اور مارشل لاء بھی کون سا، اصلی والا مارشل لاء۔ سارے ٹریڈ یونیسٹ انڈر گراؤنڈ تھے۔ سرمایہ داروں کی چاندی تھی۔ میں نے ایک لیبر لیڈر کے ساتھ مل کر کمپنی کی اہم دستاویزات چرا لیں۔ راتوں رات ہم نے اس کے نوٹس بنائے۔ صبح خاموشی سے واپس رکھ دئیے۔ رکھنے میں غلطی یہ ہوئی کہ، چوں کہ ریکارڈ رکھنے کے کام کا تو تجربہ تھا نہیں، پتا نہیں رکھنے میں کیسے سب الٹ پلٹ ہو گیا۔ صبح صبح کمپنی میں سائرن بچ گئے۔ پولیس آ گئی۔ سب سے پہلے طاہر علی گرفتار ہوا۔ میں نے بھی خود کو گرفتاری کے لیے پیش کر دیا۔ وہ بے چارہ تو بے گناہ تھا۔ انکوائری ہوئی تو پتا چلا، کوئی نقصان نہیں ہوا۔ بس میرا تعلیمی سال ضائع ہو گیا۔ ہاں فائدہ یہ ہوا کہ ایک کی بجائے میں نے دو کتابیں لکھیں۔ ایک ٹریڈ یونین کی ہسٹری پر اور ایک جیل پر۔‘‘

’’آپ اسے کس طرف لے جا رہے ہیں؟ یہ لڑکی ہے، یہ کام کسی لڑکے کو کہیں۔‘‘ مسز غزنوی چائے کی پیالی پر جھکی ناگواری سے اپنے انٹی لیکچوئیل شوہر سے بولی تھیں۔

’’مصیبت یہ ہے کہ لڑکے جلد باز ہوتے ہیں۔ وہ دیانت داری سے کام نہیں کرتے اور لڑکی ہونے میں کیا حرج ہے، اس کے پاس کم دماغ تو نہیں۔

مجھے یقین ہے طوبیٰ مراد! ہم دونوں کے تعاون سے لکھی یہ کتاب اس سے پہلے اردو زبان نے نہیں دیکھی ہوگی۔‘‘

وہ رات تک تکیے پرسر رکھے چھت کو گھورتی اپنی کتاب کے ایک ایک باب کو تحریر ہوتے دیکھتی رہی۔ اس نے صائمہ کی ہر دلیل ٹھکرا دی تھی۔ ہر بات رَد کر دی تھی۔ حتیٰ کہ اس کی محبت پر شک کا کھلم کھلا اظہار کر دیا تھا۔

’’تم مجھے خوش دیکھنا نہیں چاہتیں صائمہ۔ مجھ سے زیادہ بھی کسی نے زمانے کو ننگی آنکھوں سے دیکھا ہے؟ کیا ہوگا زیادہ سے زیادہ، جو کچھ میرے ساتھ ہو چکا ہے اس سے زیادہ؟ جب میرے ماں باپ میں علیحدگی ہوئی تو میری عمر چار سال تھی۔ عمر بھر ان دونوں نے میری بدتر بیتی کا الزام ایک دوسرے پر لگایا اور جب ان کی طلاق ہو گئی تو فاتحوں کی طرح مجھے رسہ سمجھ کر اپنی طرف کھینچنے لگے۔ اب مجھے کسی چیز سے ڈر نہیں لگتا۔ میرے ساتھ جو زیادہ سے زیادہ ہو سکتا تھا، وہ زیادہ سے زیادہ ہو چکا ہے۔‘‘

صائمہ جھنجلا کر پلٹ گئی۔

’’تم آخر معاف کرنا کیوں نہیں سیکھ لیتیں؟ تم اتنی ابنارمل کیوں ہو؟‘‘

’’اس لیے صائمہ جان۔‘‘ اس نے زور سے سانس پھیپھڑوں میں کھینچا، ’’کیوں کہ میرا ماضی ابنارمل رہا ہے۔‘‘

’’ٹھیک ہے۔ پھر بھرو ٹھنڈی آہیں۔‘‘

طغرل ان دنوں اس کی اس غیرفانی کتاب سے قطعی بے پروا ہو رہا تھا۔ اس کو اس بات سے کوئی دلچسپی نہیں تھی کہ ڈاکٹر غزنوی اور طوبیٰ مراد، ٹریڈ یونین ازم کی دنیا میں کون سا تیر مارنے جا رہے ہیں۔ اسے صرف طوبیٰ مراد سے دلچسپی تھی اور اس کی دوست کے بقول وہ بہت معصوم تھی۔ زمانہ بڑی آسانی سے اسے اپنے مقصد کے لیے استعمال کر سکتا تھا۔ لیکن پتا نہیں ممی کو وہ کیوں سخت ناپسند تھی۔ وہ اس کے ساتھ منگنی پر بھی آمادہ نہ ہوتیں اگر اس کے باپ کا سوشل سٹیٹس ان کی کمزوری نہ بن گیا ہوتا۔ رشتے ناتے اپنے برابر کے لوگوں سے جوڑنے چاہئیں۔ (اور اپنے برابر ہی کا تو کوئی نظر نہیں آتا)۔

’’بروکن فیملی کی لڑکیاں اچھی نہیں ہوتیں۔ دبو سی، سہمی سہمی یا بالکل باغی، اصول و روایت توڑتی۔ اب طوبیٰ کو دیکھ لو۔ ساری دنیا کہتی ہے، طوبیٰ کو نسبت روڈ پر دیکھا تھا۔ طوبیٰ کو گوالمنڈی میں دیکھا تھا۔ یہ جگہیں ہیں جہاں اس گھرانے کی بہو کو مارے مارے پھرنا چاہیے؟‘‘

’’وہ دراصل غریبوں کے مسائل پر کتاب لکھ رہی ہے، اپنے پروفیسر کے ساتھ مل کر۔‘‘

’’طغرل! اپنے لہجے کی مرعوبیت پر قابو پاؤ۔‘‘ ممی نے ناگواری سے کہا، ’’وہ پہلے ہی تمہیں جوتے کی نوک پر رکھتی ہے اور برائے کرم جب تم اس سے کہیں ملتے ہو یا وہ کہیں جاتی ہے تو مجھے اطلاع دے دیا کرو۔ مجھے لوگوں کا سامنا کرتے سخت خجالت ہوتی ہے۔‘‘

اور اگلی ہی میٹنگ میں طوبیٰ کو اس نے بہت پیار سے سمجھایا تھا:

’’کون سی ایسی معلومات ہیں جن کی خاطر تم سڑکوں پر دربدر پھر رہی ہو۔ چلو میں تمہیں اپنی کمپنی لے چلتا ہوں۔ تمہیں جی ایم سے لے کر چپڑاسی تک جو کچھ پوچھنا ہے، تفصیل سے پتا چل جائےگا۔ ہمارا پی آر ڈیپارٹمنٹ بھی تمہیں مکمل معلومات دے سکتا ہے۔ ہاں طوبیٰ تم یوں لور لور کرتی سڑکوں پر پھرتی اچھی لگوگی؟ جو سہولتیں تمہیں گھر بیٹھ کر حاصل ہیں، کیا ضروری ہے تم جوتیاں چٹخا کر حاصل کرو۔ مڈل کلاس لوگوں کی طرح اور جب تمہیں کہیں جانا ہوتا ہے، گاڑی منگوا لیا کرو۔ ممی کو رکشاؤں کے انتظار میں فٹ پاتھ پر کھڑے رہنا پسند نہیں۔‘‘

طوبیٰ برا نہیں مانتی تھی۔ وہ جانتی تھی وہ بےچارہ تو دو طرف کی فرمانبرداری میں مارا جا رہا ہے۔ حتیٰ کہ دونوں طرف بحث کرتے ا س کے منہ میں زبان بھی اپنی نہیں ہوتی۔ پھر اس دن وہ ممی کو فون کر کے اسے زبردستی اپنے آفس لے گیا۔

’’یہ لو۔ اب جوکچھ پوچھنا ہے، سب یہیں سے پوچھ ڈالو۔‘‘

اس کے آفس کے یخ کمرے میں آرام دہ کرسی میں دھنسی وہ باری باری لوگوں کو آتے اور اپنے دکھ بیان کرتے سنتی رہی۔

’’مینجمنٹ بہت اچھی ہے۔ یہاں کا ماحول بالکل گھر کا ماحول ہے۔ ہمیں ہر طرح کی سہولتیں میسر ہیں۔‘‘

’’ہاؤس رینٹ ہے۔ طبی سہولتیں ہیں۔ بیمہ سکیم ہے۔ پینشن سکیم ہے۔‘‘

’’ہمیں ورکرز کی بہتری کا ہر طرح خیال رہتا ہے۔ سالانہ بونس ہے۔ ہیلتھ الاؤنس۔ ایجوکیشن الاؤنس۔ یہ الاؤنس۔ وہ الاؤنس۔‘‘

طغرل کرسی پر اپنا بوجھ پیچھے کی طرف گرائے نیم دراز دھیمے دھیمے مسکراتا رہا۔ لوگ نصابی کتابوں کی باتیں کر کے سبق سنا کر چلے گئے تھے۔ اسے لگا کہ وہ ایک جنت میں بیٹھی تھی، جہاں ہر شخص کو مکمل خوشی حاصل ہے۔

لوگ ہمیشہ وہ کہانی سناتے ہیں جو دراصل ہونی چاہیے، وہ نہیں جو ہوتی ہے۔ لوگ سچ بولنے سے بہت زیادہ ڈرتے ہیں۔

وہ ویک اینڈ پر اپنی ہونے والی سسرال گئی۔ یہ فرض اس کو اپنی ساری ذمہ داریوں میں سے ڈھونڈ کر نبھانا پڑتا تھا۔ طغرل ان دنوں کسی بزنس ٹور پر مانچسٹر میں تھا۔ اس کی بہنیں کسی ضروری کام سے ادھر ادھر تھیں۔ ممی نے کچھ دیر اس کی اور صائمہ کی کمپنی نبھائی، حالات سے ڈرایا اور چند سبق آموز کہانیاں سنائیں۔ پھر لنچ پر ملنے کا وعدہ کرکے آرام کرنے چلی گئیں۔

صائمہ ڈر سی گئی۔ گو وہ اس کو ڈرانا نہیں چاہتی تھی۔ اس کو ڈرا کر وہ لے جاتی بھی کہاں۔ یونہی صائمہ نے لائف کی فوٹو گرافی کے کمالات دیکھنے شروع کر دئیے اور طوبیٰ سیاسی اخباروں کے لرزا دینے والے قصے پڑھتی رہی۔ چھٹی کا یہ دن صبح سے ر ات تک یوم سزا ہوتا۔ ہوسٹل آ کر لگا، گھر واپس آ گئے ہیں۔

کتنی رات تک جاگنے کے بعد طوبیٰ نے جیسے کوئی اہم فیصلہ کر لیا۔

’’تم سے ایک بات کہنی ہے، صائمہ۔‘‘

صائمہ نے لیمپ کی روشنی میں اسے کاغذوں کے ڈھیر میں گم دیکھا تھا۔ اب پتا نہیں فیصلے کی نوعیت کیا ہو۔ اس کے گھر والے کیسے ہی کیوں نہ ہوں، طغرل برا نہیں ہے۔ وہ سانس روک کر بستر پر منتظر سی بیٹھ رہی۔

’’میں کل سے نوکری کر رہی ہوں۔‘‘

’’نوکری؟ کیا مطلب؟‘‘

’’یہ میں نے اخبار میں ایک اشتہار دیکھا تھا۔‘‘ اس نے کٹا ہوا تراشا اس کے سامنے ڈال دیا۔ ’’ڈسپیچ کلرک کی عارضی آسامی۔ بنیادی درجہ تقرری مساوی درجہ ہشتم۔ تعلیمی قابلیت میٹرک یا اس کے مساوی۔‘‘

’’تم نوکری کیوں کر رہی ہو اور وہ بھی ایسی نوکری؟ طغرل کو کیا کہوگی؟‘‘

اس کو سمجھانا فضول تھا، اسی لیے اس نے بعد کے حالات پر نظر ڈالی تھی۔ بحث کرنا، حالات سے مطابقت کرتی دلیلیں دینا، اس کو کچھ بھی سنائی نہ دیتا۔

’’اور ہوسٹل والے۔ ان سے کون اجازت لےگا؟‘‘

’’میں نے سوچا ہے صائمہ۔‘‘ اس نے چھلانگ مارکر بستر پر آتے ہوئے کہا،’’ کتاب لکھنے کا سب سے اچھا طریقہ ہے کہ آپ جن پر لکھیں، ان کا ایک حصہ ہوں۔ ان کے درمیان اٹھتے بیٹھتے، کھاتے پیتے ہوں۔‘‘

صائمہ کی باقی رات کی نیند اڑا کر وہ سکھ سے سو گئی تھی۔

جیل روڈ پر کسی دو منزلہ بڑے سے مکان پر بنی یہ عمارت دفاتر کے کام آتی تھی۔ اس کا پروڈکشن یونٹ کہیں بھائی پھیرو کے پاس تھا۔ یہ معلومات اس نے انٹرویو کے لیے آئی باقی لڑکیوں سے بیٹھتے ہی حاصل کر لی تھیں۔

پہلی مرتبہ اس کو احساس ہوا، اس کا دل دھک دھک کر رہا ہے۔ اگر یہ نوکری نہ ملی (اور اگر مل گئی؟) سامنے بیٹھی لڑکی سے خوشبو کی لپیٹیں پھوٹ رہی تھیں۔ اس کی لپ اسٹک کا رنگ تازہ اور جان دار تھا۔ رخساروں کی ابھری ہڈیوں پر خون کی طرح چمک مارتا بلشر۔

بےساختگی میں اس کاہاتھ اپنے گالوں پر چلا گیا۔ صبح اٹھ کر نہائی تھی، کپڑے بھی بدلے تھے اور صائمہ کو بھی توفیق نہ ہو ئی کہ سج سنور کر جانے کی روزانہ والی نصیحت آج بھی دہرا ڈالتی۔ لڑکیاں باری باری اندر جارہی تھیں۔ جانے سے پہلے وہ رک کر لپ اسٹک کی نئی تازہ تہ جماتیں۔ افسوس! اس نے بے سبب پرس میں جھانکا۔ اس کا پرس اس قسم کے تمام لوازمات سے ہمیشہ عاری رہا تھا۔ وہی صائمہ کے بقول ’’ابنارمل ازم۔‘‘

اس نے اپنی باری پر کمرے میں قدم رکھا تو اسے لگا، ہاں شاید یہاں پر ہی تلاش کا خاتمہ ہو جائے۔ لمبی سی مستطیل میز کے گرد اپنی اپنی لیاقتوں اور عہدوں کے گمان میں ڈوبے افسران اعلیٰ۔ موٹی موٹی توندیں۔ سرے اڑتے بال۔ چشموں کے پیچھے سے جھانکتی، تحقیر سے گھورتی آنکھیں اور ان کے بیچ بیٹھی وہ۔ مجبور۔ مؤدب۔ محکوم۔ (تضاد کی اعلیٰ مثال)۔

اس نے ایک نظر اپنے دائیں بائیں بیٹھے پینل پر ڈالی۔ یہ اس قدر معمولی آسامی کے لیے کیل کانٹوں سے لیس اس قدر مسلح ہوکر آنے کی کیا ضرورت تھی بھلا۔ اسے ہنسی آ گئی۔ پہلے ہنستے پھر ہنسی روکنے کی کوشش کرتے، اس کو ٹیبل کے مرکز پر بیٹھے جس شخص نے دیکھا۔ اتفاق سے اس کی نظر اس سے پہلے اس پر نہیں پڑی تھی۔

معاملے کی تہ تک پہنچتی نظریں۔ سوچتی اور پرکھتی آنکھیں۔ مخاطب کے اندر تک کھب جانے والی۔ اس نے جلدی سے دائیں طرف رخ پھیر لیا۔ وہاں رسمی سوالوں کی یلغار تھی۔ حالاں کہ وہ سب کچھ درخواست پر لکھا ہوا تھا۔

آپ کا نام۔ والد کا نام۔ میٹرک کس سن میں کیا۔ دیگر تعلیمی قابلیت۔

’’میٹرک تو آپ نے چھے سال پہلے کیا تھا۔ آگے کیوں نہیں پڑھا؟‘‘

پہلا سوال وہاں سے آیا، جہاں سے اسے توقع بھی نہیں تھی۔ اس نے سر اٹھاکر اس کی طرف دیکھا۔ بات کریدنے کا کوئی خاص مقصد تو لگتا نہیں تھا اور آدمی بھی اپنے حلیے سے مختلف لگتا ہے۔ پتا نہیں باس یہ ہوگا یا کوئی اور؟

’’ہاں جی۔ جواب دیجئے۔ آپ نے چھے سال کے خالی عرصے میں آگے کیوں نہیں پڑھا؟‘‘

اس کے نزدیک بیٹھے کسی گنجے نے توتے کی طرح مالک کا فقرہ دہرایا تھا۔

’’چھے سال تک میں نے۔‘‘ وہ گڑبڑا گئی۔ اس سوال کے بارے میں تو اس نے کچھ سوچا بھی نہیں تھا۔’’ وہ دراصل حالات۔۔۔‘‘

اس نے حلق کے پیچھے اٹکتے بڑے سے گولے کو گھونٹ کے ساتھ نگل لیا۔ جھوٹ بولنے کے لیے غیر معمولی مہارت چاہیے اور وہ ابھی نوآموز تھی اور اسے یقین ہو چلا تھا، سامنے بیٹھا شخص مخاطب کو بلا جھجک اس کے آرپار دیکھ لیتا ہے۔

’’حالات۔ کیسے حالات؟‘‘ اسے گردن بائیں طرف گھمانی پڑی۔ اب کے سوال اس طرف سے آیا تھا۔

’’والد حیات ہیں؟‘‘

’’والدہ کو کہیں ملازمت ملی ہے؟‘‘

’’بہن بھائی کتنے ہیں؟‘‘

’’کتنوں کو نوکری مل چکی ہے؟‘‘

’’کتنے بھائی بہن آپ کے زیر کفیل ہیں؟‘‘

اس کی گردن سوالوں کی یلغار میں اس طرح گھوم رہی تھی جیسے وہ گھر سے ٹیبل ٹینس کا میچ دیکھنے آئی ہو۔

’’آپ ہمارے ساتھ کام کریں گی تو آپ کو ان سوالوں کے جواب دینا ہوں گے۔‘‘ سب سے موٹے شخص نے زور دے کر کہا تھا، ’’آپ اس دفتر میں ملازمت کر رہی ہیں تو آپ کو اعتماد بھی کرنا پڑےگا۔‘‘

’’اس کا مطلب ہے، مجھے ملازمت مل گئی ہے؟‘‘ اس نے کسی بھی سوال کا جواب دئیے بغیر اعتماد سے موٹے کی آنکھوں میں جھانک کر پوچھا تھا۔

مرکزی کرسی پر ری لیکس کے لیے بیٹھا شخص قطعی اطمینان سے سوالوں کے ڈبے ایک دوسرے کے پیچھے بھاگتے دیکھ کر مزے لے رہا تھا۔ اس کے فقرے کے کسی حصے پر وہ چونک کر سیدھا ہو گیا۔ اس نے کتنی دیر تک حیرت سے اس کی آنکھوں میں دیکھا تھا۔ حماقت یہ ہوئی کہ وہ اس کی آنکھوں میں سیدھی جھانکتی اس کے ارادے پڑھنے کی کوشش کرتی رہی۔ کتنی دیر بعد اسے احساس ہوا کہ آنکھ جیسی چیز بہت سارے راز کھولتی ہے، اس کی پردہ داری ضروری ہے۔ جب تک طوبیٰ نے آنکھیں نیچی کیں، بہت دیر ہو چکی تھی۔ طوبیٰ نے سنا، وہ کہہ رہا تھا:

’’ہمیں چالاک لوگوں کی ضرورت نہیں۔ چالاک لوگ خطرناک ہوتے ہیں۔‘‘

’’حالاں کہ بےوقوف لوگ خطرناک ہوتے ہیں۔‘‘ وہ انجام کی پروا کیے بغیر دھم سے بحث میں کود پڑی۔

مخاطب اس کے دوستوں کے حلقے میں سے نہیں تھا۔ نہ ڈاکٹر غزنوی کی طرح مہربان۔ نہ طغرل کی طرح نازاں۔ نہ صائمہ کی طرح جان نچھاور کرنے والا۔

اس نے اپنے دونوں ہاتھوں کی انگلیاں الجھائیں اور ذرا سا جھک کر ا س کی طرف متوجہ ہو گیا۔ اس نے اپنے پاؤں پر آپ کلہاڑی ماری تھی۔ اس نے تاسف سے سوچا۔ وہ تو اس سے مخاطب تھا، نہ اس طرف متوجہ۔ لیکن اب وہ کہنیوں کے زور پر میز پرجھک آیا تھا۔

’’حالاں کہ میرے تجربے کے مطابق۔۔۔‘‘ وہ کہہ رہی تھی، ’’زیادہ خطرناک وہ لوگ ہوتے ہیں جو بےوقوف دکھائی دیتے ہیں۔‘‘

’’آہ۔ آپ کا تجربہ؟ میٹرک کرنے کے بعد کے خالی سال آپ خود پر تجربات کرتی رہی ہیں؟‘‘

وہ مذاق کرتا تو نہیں لگ رہا تھا اور اس کا اس سے مذاق والا کوئی رشتہ بھی نہیں تھا۔

’’علاوہ تجربوں کے، ان چھے سالوں میں آپ نے کیا کیا، کیا؟‘‘

’’میں نے بےشمار کتابوں پڑھی ہیں۔‘‘ یہ غنیمت ہوا کہ کوئی جواب تو اس کو اپنے دفاع میں سوجھا تھا۔

’’کہیں نوکری کی؟ کسی جگہ، کسی بھی قسم کی؟‘‘

’’جی نہیں۔‘‘

’’امید ہے، آپ غلط بیانی سے کا م نہیں لے رہی ہوں گی۔‘‘

’’ہرگز نہیں۔‘‘ اس نے بغیر پلک جھپکے اس کی آنکھوں میں دیکھا تھا، ’’اب بداعتمادی کی فضا آپ پیدا کر رہے ہیں۔‘‘

اسے محسوس ہوا دائیں اور بائیں کچھ سرسراہٹ سی ہوئی تھی۔ بےچینی کی لہر جیسے گستاخ کو ٹکٹکی سے باندھ دیا جائےگا۔ وہ تو غنیمت ہوا کہ ہیڈ ہنس دیا۔اس کے ہنستے ہی لوگ وقفوں وقفوں سے ہنسنے لگے۔ محفل زعفران زار ہو گئی۔

چشموں میں قید آنکھوں نے سکڑ کر مرکزی کرسی والے کے ارادوں کو دیکھنا چاہا۔ کسی ہوئی مٹھیاں ڈھیلی ہو گئیں، تنی ہوئی پشت کرسی سے جا ٹکی۔ ابھی کیا جلدی تھی۔ باہر بہت سے لوگ بیٹھے تھے اور ان کے مقدروں سے کھیل کر مزہ آ رہا تھا۔

وہ ہوسٹل واپس آئی تو تکان سے چور چور تھی۔ اس کے باوجود اسے ڈاکٹر غزنوی کی رپورٹ کرنی تھی۔ کم از کم اس نے پہلی اینٹ تو لگا دی تھی۔

انہوں نے جشن مسرت منانے کے لیے گوگو سے کافی پی، پان کھائے اور جب پھٹ پھٹ کرتے رکشا سے وہ ہوسٹل کے دروازے پر رکی تو اسی طرح اداس تھی۔

صائمہ انٹرویو کی تفصیل جاننے کے لیے مارے تھرل کے پاگل ہو رہی تھی۔ وہ ہوسٹل کے ٹیرس سے اپنے اور اس کے دھلے ہوئے کپڑوں کا ڈھیر اٹھا کر لائی تو وہ جوگرز سمیت بستر پر اوندھی پڑی تھی۔

’’نہیں ملی نا نوکری؟ میں نے تمہیں کہا بھی تھا، ہیل پہن لو، جوڑا بنالو۔ انٹرویو دینے سب اسی طرح جاتے ہیں۔ اچھا اب یہ گندے جوگرز تو اٹھاؤ دھلے کپڑوں سے۔‘‘ اس نے تسمہ کھینچ کر جوگرز والی ٹانگ نیچے گرا دی۔

’’کیا مصیبت ہے۔ اب کاہے کا ڈپریشن ہے۔ نہیں ملی نوکری تو کیا ہوا۔ آج چولہا نہیں جلےگا؟ روٹی نہیں پکےگی؟‘‘

’’کبھی کبھی بڑا عجیب احساس ہوتا ہے صائمہ۔ تم نے کبھی سوچا ہے پھر کیا ہوگا؟‘‘ وہ تکیہ گود میں رکھ کر بستر سے پاؤں لٹکاکر سخت فلسفی بنی بیٹھی رہی۔

’’آپ ایک چیز کو منزل سمجھ لیتے ہیں۔ اس کے پیچھے بھاگتے ہیں۔ اب یہ نوکری مل گئی تو پھر کیا ہو گا۔ کتاب چھپ گئی تو پھر کیا ہوگا۔ تمہیں ’’پھر کیا ہوگا‘‘ کے پیچھے نہیں بھاگنا پڑتا۔ تمہارا ’’پھر کیا ہوگا‘‘ سوچنے کے لیے تمہارے پاس بہت سے لوگ ہیں۔ ماں باپ ہیں۔ بہن بھائی ہیں۔‘‘

’’تم بھی خود کو ڈھیلا چھوڑ دو۔‘‘ اس نے رسان سے کہا، ’’جب پانی میں ڈوبنے لگیں تو ہاتھ پاؤں مارنے کی بجائے خود کو چھوڑ دینا چاہیے۔ پانی کا دھارا آپ کنارے پر لے آتا ہے۔‘‘

’’تمہارا مطلب ہے اگر زندہ نہ لا سکے تو لاش کو تو لے ہی آئےگا۔‘‘ طوبیٰ کے کھل کر ہنسنے کے باوجود صائمہ کو ہنسی نہیں آئی۔

’’بےجوڑ شادیاں اسی طرح ہوتی ہیں طوبیٰ۔ اگر ساتھ نبھائے جاتے تو تم آج ان سے کہتیں کہ تمہیں علیحدہ ہو جانا چاہیے تھا۔ وہ علیحدہ ہو گئے ہیں تو تم کہتی ہو، میرے بارے میں کون سوچےگا۔ جتنی دکھی تم ہو، وہ بھی اپنی اپنی جگہ اتنے ہی دکھی ہوں گے۔‘‘

’’ڈاکٹر غزنوی کے بقول Vicarious Living کا حصہ ہے۔ ہوتا کچھ نہیں۔ بس ہم سوچ لیتے ہیں۔ ہمارے بغیر دنیا تباہ ہو گئی ہے۔

تم کبھی سوچ سکتی ہو صائمہ کہ آپ بھرے ہوئے پرس سے بھی کوئی ایسی چیز نہیں خرید سکتے جو آپ کو خوش کر دے۔‘‘

’’پل پر بخشی کھڑا ہے۔ چلتی ہو دہی بھلے کھانے؟‘‘ نومیہ نے سر اندر ڈال کر اعلان کیا۔

’’چلو۔‘‘ اس نے ایک جھپا کے سے چھلانگ ماری۔ نہ سہی بڑی بڑی خوشیاں، چھوٹی چھوٹی خوشیوں کی بھی کمی تو نہیں۔

صبح جب کھڑکیوں سے سورج کی پہلی کرن اس کے بستر تک آئی تو وہ خوش باش اٹھ بیٹھی۔ صائمہ، پیسٹ برش اٹھائے تولیا کندھے پر لٹکائے غسل خانے کی طرف جا رہی تھی۔

’’کل میں خوامخواہ ہی اتنی قنوطی ہو گئی تھی۔ تم بالکل ملال نہ کرنا صائمہ۔ افوہ بابا! مجھے اپنی کتاب لکھنی ہے۔ کتاب۔ میری زندگی کا سب سے اہم حصہ۔‘‘

’’میں نے ہرگز ملال نہیں کیا۔ بےفکر رہو۔‘‘ وہ دھپ سے دروازہ بند کر کے باہر نکل گئی۔

’’فی الحال تو نوکری کے بارے میں پتا کرنا ہے۔‘‘ وہ میس کے ہال میں جلدی جلدی انڈا ٹھونستی بولی، ’’اور نوکری مل جائے تو پورے ہاسٹل میں کسی کو ہوا نہ لگے۔ یہ تمہاری ذمہ داری ہے۔ مسز بشیر کو تو ہرگز نہیں۔‘‘

ری سیپشن پر بیٹھے سکیورٹی آفیسر نے فائل کھولی۔ عینک کے اوپر خالی حصوں سے جھانکا۔ ’’کل آئی تھیں آپ انٹرویو دینے۔ نام طوبیٰ مراد اور ڈی جی صاحب مجھ پر چلا رہے تھے۔ آپ نے اپنے اوریجنل سر ٹیفیکیٹ لینے میرے پاس آنا ہے کہ نہیں۔ ڈی جی صاحب الگ ناراض کہ تمہیں روکنے کو کہا تھا، روکا کیوں نہیں۔ جائیں آپ اندر جی۔ آپ کی نوکریاں سلامت رہیں۔ ہماری بے شک ختم ہو جائیں۔‘‘ اس نے عینک کو پھر پڑھنے کے زاویے پر رکھا اور خشمگیں نگاہوں سے فائل پر غصہ اتارنے لگا۔

’’کہاں جاؤں اب میں؟‘‘

’’ڈائری سیکشن میں جائیں جی۔ بائی ہینڈ اپنا اپائنٹمنٹ لیٹر لیں۔ آپ کی فائل وہیں ہے۔‘‘

اس نے گھوم کر عمارت کی طرف دیکھا۔ باہر سے تو یہ کسی طغرل و غرل قسم کے آدمی کا گھر لگتا تھا۔ یہاں بیڈ روم، لونگ روم، ٹی وی لاؤنج تو وہ تلاش کر سکتی تھی، لیکن ڈائری سیکشن؟ وہ اس کی اٹھی انگلی کے تعاقب میں اندازے سے ہی چلی گئی۔ یہ ایک لمبا سا شور بھرا کمرا تھا۔ ڈسپیچ سیکشن کے کوئی کلرک صاحب اس کو اس کمرے میں چھوڑ کر انچارج کمرا کے حوالے کر کے چلے گئے۔ اس کمرے میں عجیب سی باس تھی۔ پرانے اخبار، گتے، فائلیں، کاغذ قسم کی تقریباً ہر چیز یہیں تھی۔

اس نے خاموشی سے اپنی کرسی سنبھالی۔ میز پر چیزیں رکھیں اور بیٹھ گئی۔

فائل اٹھا کر اس نے سب سے پہلے آج کے نوٹس اتارے۔

’’میری آمد پر ہال میں سناٹا چھا گیا۔ ان کے خیال میں، میں سفارشی ہوں۔‘‘

اس قسم کی چٹیں یادداشتوں کے طور پر استعمال کی جائیں گی اور تھیسس کا آخری باب لکھنے میں مدد گار ثابت ہوں گی۔ اس نے پہلے دن کی تاریخ ڈالی اور ایک سرسری سی نظر سے ہال کی طرف دیکھا۔ جیسے کمرے میں اس کی بجائے سانپ داخل ہوا تھا، وہ سب کو سونگھ کر کرسی پر جا بیٹھا تھا۔ سب سے پہلے ہیڈ کلرک صاحب میں جان آئی۔ وہ ایک چھوٹی پیالی لےکر اس کی طرف آئے، جو شیرے والی چائے سے لبالب بھری تھی۔

اس نے مسکراتے ہوئے دو گھونٹ بھرے۔ یہ چینی اور دودھ کا ملغوبہ بھی ٹریڈ یونین کا ایک حصہ ہے۔ اس نے تیسرا گھونٹ بھرا اور پیالی خالی ہو گئی۔

ہیڈ کلرک صاحب مسکرائے۔ ’’اس چائے کو پینے کا یہ طریقہ نہیں ہے۔ پہلے آپ سڑپے بھر کر پرچ خالی کریں اس طرح۔‘‘ انہوں نے اپنی پرچ سے منہ لگاکر ایک سانس میں خالی کر دی، ’’اور اب پیالی کی چائے پئیں۔ دراصل اچھا اورخالص والا چائے کا حصہ تو پرچ میں ہوتا ہے اور نام کیا ہے بیٹی کا؟‘‘

’’میرا نام۔‘‘ وہ پرچ پیالی کے پریکٹیکل سے چونکی، ’’میرا نام طوبیٰ مراد۔‘‘

’’ماشاء اللہ۔ ماشاء اللہ۔‘‘ وہ اس کی میز کے سامنے والی کرسی گھسیٹتے بولے، ’’پہلے بھی نوکری کی کہیں؟‘‘

’’نہیں جی۔‘‘

’’اور اب بیٹی نے نوکری کا کیوں سوچا؟‘‘

’’حالات۔‘‘ اس نے سکون سے کہا۔ یہ لفظ بہت موزوں تھا اور روزگار دلانے کا سبب بھی یہی بنا تھا۔

’’اللہ رحم کرے۔ اللہ۔‘‘ ہیڈ کلرک صاحب دفعتاً مایوس ہو کر کرسی پر چلے گئے۔ کوئی فائدہ نہیں۔ ایک اور ان کے جیسی حالات کی کھائی۔ وہ تو ذرا دیر کو خوش ہوئے تھے۔ ایک تازہ دم، ہنستا مسکراتا چہرہ اس بوسیدہ تھکے ہوئے ماحول میں داخل ہوا تھا۔

’’کس گریڈ میں آپ کی تقرری ہوئی ہے؟‘‘

’’گریڈ۔‘‘ اس نے تھوک نگلا۔ اس قسم کی باتوں کی تو اسے اے بی سی نہیں آتی۔

’’آپ کی جاب فیکٹری آرڈیننس کے تحت ہے یا لیبر رولز کے؟‘‘

’’جی؟‘‘ اس نے چاروں طرف بوکھلا بوکھلا کر دیکھا۔

وہی فائل والے کلرک صاحب شیشے میں سے دور کہیں اپنی نشست سے اٹھتے نظر آئے اور عملہ چوکس ہو گیا۔ وہ کمرے میں پہنچے۔ ایک طائرانہ سی نظر ڈالی۔

اس کے ساتھ والی ٹیبل پر بیٹھے اس کے کسی ہمدرد ساتھی نے کلرک صاحب کی آنکھ بچاکر اسے کچھ اشارے سے سمجھایا تھا اور وہ سمجھ گئی، یہ یقیناً کسی کا چمچہ تھا اور اس کو اس سے محتاط رہنا تھا۔ اس نے فائل بغل میں دبائے دبائے میزوں اور آدمیوں کو گن کر آپس کا میزان برابر کیا۔ لوگ کام میں شدت سے محو ہو گئے۔ کیا یہ کلرک اس قدر اہم ہے۔ اس نے پرچی پر نوٹ بنایا اور دراز میں ڈال دیا۔

’’شش۔ ڈی جی۔‘‘ وہ نئی نئی آئی تھی، مہمان نوازی نبھانا اس کا حق تھا۔ اس نے اردگرد دیکھا۔ ہولناک خاموشی میں اپنی اپنی فائلوں میں غرق لوگ۔ وہ کس چیز میں غرق ہوتی۔ اس کے پاس کوئی کام بھی نہیں تھا۔

’’کلاس سٹینڈ‘‘ جیسے عمل کے ساتھ اس نے دیکھا لوگ اچانک کھڑے ہو گئے۔ آہستہ رفتار سے چھت پر لٹکتا پنکھا کاغذوں کو چھیڑتا ان میں سرسراہٹ پیدا کرتا رہا۔ ورنہ ہال میں سناٹا تھا۔ کیا ہوا؟ کوئی جگا ڈاکو آ گیا ہے؟

’’سب ٹھیک ہے۔‘‘ ڈی جی نے ہال میں اچٹتی سی نظر ڈالی۔ یہاں سے وہاں تک۔

وہ بڑی دلچسپی سے کلرک کی حرکات و سکنات کا جائزہ لینے لگی۔ اچانک اس کی نظر اس نئی والی پر پڑی۔ پھر وہ ایک دم رک گیا۔ اس ہال میں ایک نیا چہرہ بھی تھا اور شاید وہ اس چہرے کو وہاں ڈال کر بھول ہی گیا تھا۔

’’جوائن کر لیا آپ نے؟‘‘

وہ سب کی دیکھا دیکھی بڑی محویت سے کاغذ میں سر چھپانے کی کوشش کر رہی تھی اور وہ یہ اندازہ بھی نہیں کر سکی کہ ڈی جی کا مخاطب ان سب میں کون ہوگا۔ اس نے کوئی جواب دینے کی بجائے پنسل اور کاغذ کا کوئی بےتکا ساکھیل جاری رکھا اور اندازے کی یہی غلطی اس کا ناقابل معافی جرم بن گئی۔ اسے لگا ڈی جی اس کی میز کے پاس غالباً اسی کے جواب کا منتظر تھا۔ اس نے منہ اٹھایا تو وہ اس سے مایوس ہو کر پلٹ رہا تھا۔

’’آپ انچارج ڈائری سیکشن کے ساتھ میرے کمرے میں آئیے۔‘‘ اس نے سنا وہ جاتے جاتے کہہ رہا تھا۔

’’آپ نے ان کی بات کا جواب کیوں نہیں دیا؟‘‘

’’مجھے کیا پتا، انہوں نے مجھ سے پوچھا ہے۔ انہوں نے میرا نام تو نہیں لیا۔‘‘

’’آپ کو الرٹ (Alert) ہونا چاہیے۔ یہ کوئی کلاس روم نہیں، جہاں نام پکارے جائیں۔‘‘

’’چلئے، اب۔‘‘ پان کھائے دانتوں والے صاحب نے اپنی نوکری کے چلے جانے کے خوف سے لرزاں کہا۔ پتا نہیں یہاں سب کی سب نوکریاں لطیفہ کیوں ہیں اور عجیب لطیفہ ہیں کہ ہنسی بھی نہیں آتی۔

’’ایک تو صبح آپ آئیں دیر سے۔ پھر نہ جوائن کیا نہ رپورٹ لکھی۔ کرسی سنبھال لی۔ میرے پاس آئیں آپ؟ میں کہہ دوں گا ڈی جی سے میرا کوئی قصور نہیں۔‘‘

وہ اس سے آگے آگے قدم اٹھاتے جو باتیں صاحب کو کہنی تھیں، اسی کو کہتے دوڑتے جا رہے تھے۔ وہ سکون سے اٹھی ،اپنی کرسی پیچھے کی اور ان کے ساتھ قدم ملانے کی کوشش کرنے لگی۔

وہ ڈی جی کے آفس میں آگے پیچھے داخل ہوئے۔ حالاں کہ اس افراتفری کی چنداں ضرورت نہیں تھی۔ ڈی جی صاحب راؤنڈ سے پلٹے ہی نہیں تھے۔

’’بیٹھ جائیں آپ۔‘‘ انہوں نے جھنجلاکر کہا،’’ یہ کل کی لڑکیاں سر میں خاک ڈلوائیں گی۔ یہ جو چھت تک رجسٹر تنے ہوئے ہیں۔ کیا سمجھتی ہیں آپ۔ یہ میرے لکھے ہوئے ہیں۔ آپ لکھ سکتی ہیں؟‘‘

’’کیا کروں صوفی صاحب۔‘‘ اس نے لوگوں کی دیکھا دیکھی آہستگی سے ان کا نام پکارا، ’’یہ میری پہلی نوکری ہے اور میں مجبور نہ ہوتی تو کبھی۔‘‘

صوفی صاحب کی ساری بدمزاجی ہوا ہو گئی۔ وہ یک لخت خاموش ہو کر اپنے ہاتھوں کی پشت پر مکڑی کے جال کی طرح تنی ہوئی جھریوں کو گننے لگے۔

اچانک طوبیٰ کو احساس ہوا، علاوہ حالات کے دوسرا لفظ مجبوری بھی تیر کی طرح جا کر گڑتا ہے۔ حالاں کہ اس نے ہرگز بھی اس لفظ کو ان معنوں میں استعمال نہیں کیا تھا۔

’’آجائےگا۔ آجائےگا۔ آتے آتے ہی آئےگا ناں کام۔ آخر آپ کو ایک دن ہماری جگہ لینی ہے۔ پچیس سال بعدآپ بھی کسی کو فخر سے بتائیں گی کہ یہ سارے رجسٹر آپ نے لکھے ہیں۔‘‘

ڈی جی اپنے خوشامدیوں کے ساتھ راؤنڈ لیتا اندر آیا تو بہت تیزی میں تھا۔ وہ اپنی سیکریٹری کو ہدایت دینے کے ساتھ ساتھ فضا میں کسی نامعلوم دشمن کے خلاف صف آراء بھی تھا۔

’’کون ہے۔ آخر ہے تو ہم میں سے۔ کیا یہاں بھوت آ گئے ہیں۔ نوٹ کر لیجیے میرے دستخط کے بغیر ڈاک کا ایک لفافہ نہیں کھلےگا۔ آپ لوگ تشریف رکھیے۔‘‘ اس نے پہلی نظر اپنے گینگ کی طرف اور دوسری صوفی صاحب کی طرف پھینکی۔

’’ہمیں ایک ایمرجینسی میٹنگ کال کرنی ہے۔ یہ میٹنگ لنچ تک چلےگی۔‘‘

صوفی صاحب کے دماغ میں جیسے کوئی تار برقی جڑا تھا۔ وہ جھپاک سے اٹھے اور باہر نکل گئے۔ وہ آرام دہ کرسی کے پیڈڈ بازوؤں پر اپنے ہاتھ رکھے کمرے کی خنکی کا مزہ لے رہی تھی۔

’’ہاں جی تو تیار ہیں آپ لوگ؟‘‘ ڈی جی نے اپنی کرسی سنبھال کر میٹنگ میں شامل ممبران کی طرف دیکھا۔

’’مسٹر خان آپ کو۔۔۔‘‘ سخت جھنجلا کر اس نے کرسی پر پھیلی آرام کرتی اس لڑکی کی طرف دیکھا۔ باوجود غصے کے فوری طور پر اس کے ذہن میں نئی لڑکی کا نام ہی نہیں آیا۔

’’میں نے آپ سے تشریف لے جانے کے لیے درخواست کی تھی۔‘‘

’’کب؟‘‘ طوبیٰ کو غصہ آ گیا، ’’بلکہ آپ نے تو مجھے اس کمرے میں آنے کے لیے کہا تھا۔‘‘

جواباً ڈی جی سے زیادہ ڈی جی کے چمچے نے غصہ دکھایا تھا۔ ’’ابھی آپ کو بتایا نہیں میٹنگ ہو رہی ہے، کونفیڈنشیل۔۔۔ اس میں آپ کا کیا کام؟‘‘

اس نے ڈی جی کے چمچے کی کر نجی آنکھوں کو براہِ راست دیکھا، ’’مجھے پزل حل کرنے نہیں آتے۔ جو بات کہنی ہے، سیدھی طرح کہا کریں۔‘‘

اس نے کرسی پیچھے کھسکائی۔ ٹیبل سے اپنا پرس اٹھایا اور کھڑی ہو گئی۔

’’سمجھنا سیکھو۔ سمجھنا سیکھو۔ بولتی زیادہ ہو اور نئی نوکری ہے۔‘‘ اس نے فخر سے داد کے لیے ڈی جی کی طرف دیکھا۔ غالباً اس فقرے کی داد کی توقع اسی طرف سے کی جا سکتی تھی۔

’’اگر عقل استعمال نہیں کرو گی تو کام کیسے کروگی؟‘‘

’’خوشامد سے۔‘‘ طوبیٰ نے چاہا بھی نہیں اور اس کے منہ سے پھسل گیا۔ طغرل ٹھیک کہتا تھا۔ اس نے کبھی منہ کھولنے سے پہلے عقل استعمال نہیں کی اور یہ صرف وہی تھا جو اسے برداشت کیے جا رہا تھا۔

طوبیٰ کا رنگ اڑ گیا۔

اس ساری بحث سے بےنیاز ڈی جی اپنی درازیں کھولے جیسے کسی کاغذ کی تلاش میں سرگرداں تھا۔ اس نے اپنا جھکا ہوا سر چونک کر اٹھایا۔ حیرت سے اس کی طرف دیکھا۔

اب گئی نوکری بچہ اور ڈاکٹر غزنوی جو شرمندہ ہوں گے۔ علاوہ ازیں اس کی اپنی شدید ترین خواہش، بہر کیف اپنی جلد بازی کے ہاتھوں بہت کچھ گنوانا پڑتا ہے۔

کتنا اس کا جی چاہا وہ ایک بے مقصد سا آئی ایم سوری کر دے۔ کتنے گرتے مینار یہ کمزور سا لفظ سہار لیتا ہے لیکن اب بہت دیر ہو چکی تھی۔ اس نے اپنا جھکا ہوا سر اٹھایا۔ ڈرتے ڈرتے باس کی طرف دیکھا۔

اس نے پہلی مرتبہ اس تنے ہوئے چہرے کو آہستگی سے نرم پڑتے دیکھا۔ اسے شبہ ہوا، وہ لمحہ بھر کو مسکرایا بھی تھا لیکن پھر خشمگی اور سنجیدگی اس کی مکمل مسکراہٹ کے درمیان حائل ہو گئی۔

’’آپ اپنی سیٹ پر بیٹھیں۔ لنچ بریک ڈیڑھ بجے ختم ہوگا۔ میں ڈیڑھ بجے آپ کو دوبارہ بلواؤں گا۔‘‘ وہ لفظ لفظ کی مکمل وضاحت کرتا پھر سر کی طرف متوجہ ہوا۔

’’ڈیڑھ بجے اچھا۔‘‘ حالاں کہ وہ بالکل ہی کند ذہن ہوتی تو بھی اس واضح فقرے کو تو سمجھ لیتی۔ لیکن چمچہ اپنا فرض بجا لانا نہیں بھولا۔

وہ اپنے کمرے میں واپس آئی تو کام پر بہار آ گئی تھی۔ سب سنجیدہ تھے۔ رجسٹر ڈی جی کے آفس میں دوڑتے پہنچائے جا رہے تھے اور دوڑتے واپس۔

معلوم نہیں صوفی صاحب نے کس مہارت سے فقرے کے بریکٹ ڈی کوڈ کیے اور پلک جھپکتے میں باہر۔ اصل داد تو ان کو ملنی چاہیے۔ واقعی عمر کا تجربہ بڑی اہمیت رکھتا ہے۔

’’گنجا خوشامدی ہے بلکہ بورڈ کے سب ہی لوگ۔‘‘ اس نے فل سکیپ پیپر کے اوپر سے باریک سی چھال اتاری، تحریر گھسیٹی اور دراز میں گھسیڑ دی۔

’’یونین بکی ہوئی ہے جی۔ یونین کے لوگ کون ہیں۔ کمپنی کے اپنے کرتا دھرتا۔ ادھر ووٹ لیے، ادھر مکان بن گیا۔ گاڑی آ گئی۔ اطوار ہی بدل جاتے ہیں۔ رنگ ڈھنگ بدل جاتے ہیں۔ ہم تو کسی کا نام نہیں لیتے۔ آپ خود دیکھ لیں ،سمجھ دار ہیں۔‘‘

’’ٹیکس کے ادا کرنے کا وقت آئے تو یونین ہڑتال کر دیتی ہے۔ مطالبات کی منظوری کے لیے۔ یونین اور اونرز (مالکین) کے مذاکرات شروع۔ کمپنی گھاٹا ظاہر کرتی رہتی ہے۔ ادھر ہمیں کہتے ہیں کہ الاؤنس بڑھوا رہے ہیں۔ رینٹ بڑھ جائےگا۔ کمپنی نقصان میں جائے تو کمپنی کو ٹیکس سے چھوٹ مل جاتی ہے۔ ہمارا تھوڑا سا الاؤنس بڑھ جاتا ہے۔ کمپنی بھی خوش۔ ہم بھی خوش۔‘‘

اگر اس کمرے میں ہفتہ بھر یونین اور ورکروں کا جھگڑا ہوتا ہے تو لمبی چوڑی ریسرچ کی ضرورت نہیں پڑےگی، سارا کچا چٹھا نکل کر سامنے آ جائےگا۔

’’ورکرز کے مفاد کے لیے۔۔۔‘‘ بحث جاری تھی اور پوائنٹس کاڈھیر لگ گیا تھا۔

لنچ ٹائم پون سے ڈیڑھ تک رہا اور لوگوں نے کام ایسے چھوڑا جیسے وہ بہت ہی مصروف تھے۔ سڑک کے پار ایک چھوٹا سا ریسٹورنٹ تھا، جہاں لوگ کھانا خریدتے بھی تھے اور ساتھ لایا گرم بھی کرواتے۔ لوگ اپنے ٹفن اٹھا کر کوہ ندا کی جانب روانہ ہو گئے۔ اس کے ساتھ ایسی کوئی علت نہیں تھی ایک تو کام اچانک شروع ہو گیا اور نہ بھی ہوتا تو اس کو ٹفن بناکر دینے والا کون تھا۔

’’کیا آپ پہلے بھی یہاں ہوتی تھیں؟ میں نے آپ کو نہیں دیکھا۔‘‘ کسی لڑکی نے بڑے اشتیاق سے پوچھا تھا۔

ایک ہی جگہ کام کرنے کا آرام یہ رہتا ہے کہ آپ کو رسمی تعارف کی ضرورت نہیں رہتی اور آپ باہمی دلچسپیوں اور عدم دلچسپیوں کے باجود ایک دوسرے کے نزدیک آ جاتے ہیں اور ایک دوسرے کے دوست بن جاتے ہیں۔ خواہ قدیم کلیے کے مطابق، آپ ندی کے دوکنارے ہی کیوں نہ ہوں۔

’’میں نے آج ہی، بلکہ ابھی جوائن بھی نہیں کیا۔‘‘

’’اچھا۔ کون سے سیکشن میں؟‘‘

’’ڈس پیچ۔‘‘

’’عو۔‘‘ اس نے ناگواری کے اظہار کے لیے لپ اسٹک سے سجے ہونٹ سکیڑے۔’’ وہاں تو زیادہ تر آدمی ہیں۔‘‘ پھر اس کے کان پر جھکی،’’ بلکہ بابے ہیں۔‘‘

’’تم ڈیپارٹمنٹ سے کہو۔ تمہیں ادھر ٹرانسفر کر دے ہماری طرف۔‘‘

’’تمہاری ایجوکیشن کیا ہے؟‘‘

’’ایم۔۔۔‘‘ اس نے اچانک خود کو چیک کیا، ’’میٹرک۔‘‘

’’عو۔‘‘ پھر مایوسی مخاطب کا مقدر بنی، ’’پھر ٹرانسفر نہیں ہو سکتا۔ اگر تم ایف اے ہوتیں۔ انڈر ایف اے تو صرف ڈائری سیکشن کی طرف ہوتے ہیں۔‘‘

’’واقعی!‘‘ طوبیٰ کو بھی دلی ملال ہوا۔ وہ اعلیٰ تعلیم حاصل کرتے کرتے بال برابر رہ گئی تھی اور اب اس کی ہمراہیوں کے بقول کچھ نہیں ہو سکتا تھا۔

کیفے ٹیریا کھچا کھچ بھرا ہوا تھا۔ لڑکیوں کی میز پر جس قسم کے مذاق ہو رہے تھے، وہ سینسر کیے بغیر چٹوں پر لکھے بھی نہیں جا سکتے تھے۔ وہ سب اس کی طرف تنقید اور دلچسپی سے دیکھ رہی تھیں۔ اسے معلومات فراہم کر رہی تھیں۔ نوکری کے گُر سکھا رہی تھیں۔ صرف پون گھنٹے میں ہی طوبیٰ کو پتا چل گیا کہ کون لڑکی کس افسر پر مر رہی ہے، کون دل ہی دل میں مرتی ہے اور کس خوش قسمت کو اظہار کے مواقع نصیب ہو چکے ہیں۔ کوئی سیلز والے پر مر رہی ہے کسی کو اکاؤنٹس والے میں دلچسپی ہے اور وہ جو کمپیوٹر سیکشن میں داڑھی والا لڑکا ہے۔

ہاں البتہ ایک شخص ایسا تھا جس پر سب اجتماعی طور پر مر رہی تھی۔ باوجود اپنے اپنے انفرادی عشق کے۔ وہ تھا کمپنی کا ڈی جی۔ عادل نواز۔مگر انہیں اس کا نصیب پسند تھا، طبیعت نہیں۔

اس کے ذکر پر ان سب کے چہرے بدل جاتے۔ وہ ساتھ والی کو کہنی مارتیں اور ہنستی رہتیں۔

’’جتنا بھی بدمزاج ہے ڈی جی۔ عارفہ کو ہنس ہنس کر دیکھتا ہے۔‘‘

’’اور کیوں تجھے جو اس دن کہہ رہا تھا۔ آپ کا کوئی مسئلہ تو نہیں؟‘‘ اس نے پنجابی بولتے بولتے بڑے ٹھہرے لہجے میں اردو بول کر نقل اتاری۔

وہ سب بہت معصوم تھیں اور بےضرر سی۔ ان کو صرف وقت کاٹنا تھا۔ یہ محبت کرنا اور مرنا تو انہوں نے ٹھس سی بورسی روٹین میں اپنے ہنسنے کے سامان پیدا کرنے کو کیا تھا۔

’’کوئی پریشانی ہو۔ کوئی کام ہو۔ ہمیں بتانا۔‘‘ ان سب نے فرداً فرداً کہا تھا۔

’’بہت شکریہ۔‘‘ اس نے خلوص سے کہا تھا۔

بریک ختم ہو گئی تھی۔ قاعدے کے مطابق اسے پھر ڈی جی کی خدمت میں پیش ہونا تھا۔ لیکن بہتر یہ تھا کہ صوفی صاحب کے ساتھ ساتھ رہا جائے۔ وہ عقل مند آدمی ہیں، معاملے کی نزاکت کو سنبھال لیتے ہیں۔

وہ ان کے قدموں کے پیچھے قدم رکھتی آفس میں داخل ہوئی تو اس نے شکر کیا، چمچوں کا گروپ جا چکا تھا۔ ڈی جی نے اپنی ریوالونگ کرسی کا رخ میز سے پلٹ کر اس دیوار کی طرف کر لیا تھا جہاں ایک ان ڈور گملے کے علاوہ کچھ بھی نہیں تھا۔ وہ اس کے موٹے نوکیلے پتوں پر نظر جمائے غالباً اس سے مخاطب ہونے کو اب بھی آمادہ نہیں تھا۔ صوفی صاحب بیٹھے نہیں تھے۔ وہ بھی کرسی گھسیٹ کر بیٹھتے بیٹھتے رک گئی۔

اس نے دروازے سے ان کے اندر داخل ہونے اور اجازت چاہنے کی آواز پر اثبات میں سر ہلایا تھا۔ یہ عجیب جگہ ہے یہاں زیادہ تر احکامات بریکٹس میں دئیے جاتے ہیں۔ اس پر افسرانہ خوبو اپنی جگہ کہ میرے پاس تو وقت نہیں ہے اور دنیا جیسے فارغ پھر رہی ہے۔ (پتا نہیں کبھی کبھی بدمزاجی کا حملہ سا کیوں ہو جاتا ہے۔ صائمہ سے پوچھنا پڑےگا)۔

وہ کانٹےدار کیکٹس پر نظریں جمائے وقفے وقفے سے پلکیں بھی جھپک رہا تھا۔ غالباً کوئی ایسا مسئلہ جس کے حتمی نتیجے پر اب وہ پہنچنے ہی والا ہے۔ اس کی پیشانی پر ایک موٹی سی رگ پھڑپھڑا رہی تھی۔

’’باس خوش رہنے کا عادی نہیں۔ آج صائمہ کو یہ بھی بتانا ہے۔‘‘