قدموں کا نوحہ گر

’’اور اب میرا کتا

اپنے منہ میں دبائے لیے چلا آرہا ہے

میں جنہیں پھینک آیا تھا

ایک گندی نالی میں

مجھے معلوم ہے کہ وہ انہیں ڈال دے گا میرے قدموں میں۔‘‘

(بہت پہلے کہی گئی ایک نظم سے)

(۱)

اب جب کہ میں ٹکڑے ٹکڑے ہونےکے قریب ہوں اور گھورے کے اس ڈھیر پر پڑے پڑے ایک بھیانک بدبو میں بدل چلاہوں۔ تو شاید اپنی کہانی بیان کرنے کے لیے اس سے زیادہ ایماندار وقت پھر کبھی میری زندگی میں نہ آسکے۔ ہر ایک کو اپنی کہانی تب ہی بیان کرنی چاہیےجب وہ ایک بدبو، ایک بگولے یا پھر میلے پانی میں بدل گیا ہو۔

آخر کوڑے کے اس خطرناک ڈھیر پر لیٹے لیٹے آسمان کی طرف اسی طرح پلکیں جھپکا جھپکا کر دیکھتے رہنے کا کیا فائدہ جس طرح رات کے آخری پہر میں ستارے اس بے رحم زمین کو دیکھتے رہتے ہیں۔ میں تو اس زمین کی طرف اب نظر اٹھانا بھی گوارا نہیں کرتا۔ میں اس سے رگڑ کھاتے کھاتے تنگ آچکا ہوں۔

وہ کتنا طویل، خوفناک اور کربناک سفر تھا جو میں نے طے کیا۔ اگرچہ سفر میں دن اور رات دونوں شامل ہوتے ہیں مگر میرے اس سفر میں راتیں اس طرح آتی رہیں جیسے چراغ گل ہوتے ہیں۔ راتیں لگاتار میرا پیچھا کرتی رہیں۔ کون جانے یہ سلسلہ پھر کب شروع ہوجائے اور کوڑا بیننے والے لڑکےآکر ایک بار پھر مجھے بوری میں بند کرکے لے جائیں۔ اب اگر اپنی کہانی نہیں سنائی تو پھر شاید کبھی نہ سناسکوں۔

کہانی کیسے سنائی جاتی ہے؟ کیا واقعی کوئی کسی کی کہانی سنتا ہے؟

مجھے ابتداء میں ہی اس کی وضاحت کردینی چاہیے کہ جس طرح انسان کبھی کبھی اپنے آپ کو مختلف ضمائر میں تقسیم کردیتا ہے اور اپنے اسم کی تلاش میں لگ جاتا ہے، اس سے بھی کہیں زیادہ میں یعنی ایک معمولی جوتا تو تمام زندگی صرف اسی اذیت ناک مشغلے کو اپنی تقدیر بنائے زمین پرچلتا رہتا ہے لہٰذا ابھی ابھی میں خود کاایک ٹکڑا نوچ کراسے اپنی پرچھائیں میں بدل لیتا ہوں۔ مجھے یقین ہے کہ میری یہ پرچھائیں میری ہی طرح مایوس اور اکیلی ہے اور اسے اپنی یا میری کہانی سننے میں ضرور دلچسپی ہوگی۔ اس لیے یہ کہانی ایک ایسے ماتمی مکالمے میں تبدیل ہو جاتی ہے جو کسی مشترک سانحے پر دولوگ آپس میں ایک دوسرےسے گلے مل مل کر اور رو رو کر کرتے ہیں۔

مگر ٹھہریے۔ ایک جوتے کااپنی داستان بیان کرنااتنا آسان نہیں ہے۔ اسے چند دشواریوں کا سامنا کرنا پڑ سکتا ہے۔ پہلی بات تو یہ اگرچہ میں اپنے سائے سے ہی مخاطب ہوں مگرنہ جانے کیوں مجھے دوسروں کی موجودگی کاہراساں کردینے والا احساس بھی ہے اس لیے بے خیالی میں مجھے ان دوسروں کو بھی مخاطب کرنےکی غلطی سرزد ہوسکتی ہے۔ جب کہ میں جانتا ہوں کہ ان دوسروں کے لیے میری کہانی وہ ناقابل فہم اور کریہہ آوازیں ہیں جو سڑک پر رگڑ کھاتے ہوے یا پھسلتے ہوئے میرے وجود سے پیدا ہوتی ہے۔

دوسری مشکل یہ ہے کہ اس وقت تو میں واقعی بالکل اکیلا ہوں مگر ہمیشہ ہی ایسا تو نہ تھا لہٰذا اپنی کہانی کےاس پہلے حصے میں میں اپنےساتھی کو بھی شامل کر رہا ہوں۔ میرا ساتھی یعنی میرا نصف وجود۔ انسان کے دوسرے پیر کا جوتا جسے میرے ساتھ ہی تخلیق کیا گیا ہے۔ انسان کے دو ہاتھوں، پیروں، دوکانوں، دو آنکھوں، ناک کے دو نتھنوں اور دونوں جبڑوں میں دانتوں کی دو قطاروں کی طرح۔ اس لیے یہ واضح ہوجانا چاہیے کہ کہانی کےاس پہلے حصے میں ’میں‘ صرف ’میں‘ ہی نہیں ہوں اس میں وہ بھی شامل ہے۔ میں نے جان بوجھ کر ’ہم‘ کا صیغہ استعمال نہیں کیا۔مجھے’ہم‘ سے ہمیشہ غیریت کی بو آتی ہے۔ یہ درست ہے کہ ’ہم‘ اجتماعیت کا نمائندہ ہے مگر مجھے اس سے کچھ لینا دینا نہیں ہے۔ یہ انسانوں کے ڈھکوسلے ہیں۔ ان کا ’کلچر‘ ہے۔ میری سمجھ میں نہیں آتا کہ انسان کو آخر اتنے ڈھیر سارے کلچر کی ضرورت کیوں رہتی ہے۔ بہرنوع میں اپنی کہانی میں ’ہم‘ کی غیریت اور دوری کا شائبہ بھی برداشت نہیں کرسکتا۔ ہم کی غلط فہمی نے ہی انسان کو کبھی اپنے آپ کو سمجھنے کا موقع ہی نہیں دیا جس طرح خاوند اور بیوی ہمیشہ غیر ہوتے ہیں وہ ایک دوسرے کے جسم کے حصے ہرگز نہیں ہوتے اور ان کا ’ہم‘ انھیں ایک دوسرے سےبے وفائی کرنے پر مجبور کردیتا ہے۔ ’ضمائر جمع‘ سے بڑی غلط فہمی دوسری کوئی نہیں ہوسکتی۔

پھر ایک مجبوری یہ بھی ہے کہ ’’کہہ پانے‘‘ کے کرب سے پتہ نہیں کیوں مجھے ہی نوازا گیا حالانکہ وجود کا کرب میں نے اور اس نے ایک عرصے تک ساتھ ساتھ ہی جھیلا مگر وہ ہمیشہ بے زبان رہا۔ آج اگر وہ یہاں ہوتا تو اپنی کہانی ہرگز نہ سناتا۔ مجھے بھی نہیں۔ ابھی میرے ’میں‘ میں دونوں شامل ہیں اور اس سے بڑھ کر اپنائیت تو وہ جوڑے بھی نہیں دکھا سکتے جو ایک دوسرے کی کمر میں ہاتھ ڈالے سڑکوں پر گھوما کرتے ہیں۔ اپنے جوتوں کو ڈانس فلور پر گھسا کرتے ہیں مگر دونوں کی وفاداریاں کہیں اور ہوتی ہیں۔ ان کی آرزوئیں کہیں اور جاکر دم توڑتی ہیں۔ اس لیے ’میں‘ ایک جوتا انسانوں کے ’ہم‘ پر نفرت سے تھوکتے ہوئےاس کے خلاف احتجاج کرتا ہوں اور یہاں ’میں‘ کا صیغہ استعمال کرنےمیں فخر محسوس کرتا ہوں۔ مگر افسوس کہ کہانی کے دوسرے حصے میں میں واقعتاً اکیلا ہوجاؤں گا۔ بالکل آج کی طرح اکیلا۔ مگر وہ ایک الگ داستان ہے۔

سمجھ میں نہیں آتا کہ اس سفر کی روداد کس طرح بیان کروں۔ کیا اس پتھر کے زمانے سے جب انسان ننگے پیر رہتاتھا مگر پھر اس نے اپنے گھٹنوں کو ٹھنڈسے بچانے کے لیے جانوروں کی کھال سے ڈھکنا شروع کیا؟ ہاں کہانی کا آغاز قدرے بھونڈا ہوتے ہوئے بھی میری دانست میں مناسب ترین ہے۔ شاید انسانی پیروں کی خدمت کایہی اولین سلسلہ تھا جس کو ’موچی‘ نام کے عظیم پیشے نے آگے بڑھایا۔ جوتے کے حق میں چمڑے کا ہمیشہ ہی اہم رول رہا (چمڑے اورخون کاتعلق بہت واضح ہے اور یہیں سے میری کہانی میں پہلی بار خون کی بو شامل ہوتی ہے۔) مگر لکڑی اور کپڑے کے سینڈل اور چپلیں بھی چلن میں تھیں۔ مجھے اپنے دور کے رشتہ دار ’بوٹ‘ سے نفرت ہے جو گھنٹوں تک اونچے ہوتےہیں مگر سوائے شکاریوں، فوجیوں اور پولیس والوں کے بے رحم اور سخت پیروں کے وہ کسی پیر میں نہیں سجتے۔ بوٹ ہمیشہ زمین اور انسان دونوں کے دلوں کو دہشت سے کپکپادینے پر مجبور کرتے ہیں۔

میں تو خیر ایک ایسا جوتاہوں جو تاریخی اعتبار سےبہت بعد کی پیداوار ہے۔ اس زمانے کی جب فیکٹریوں میں مشینوں کے ذریعے بہت بڑی تعداد میں جوتے تیار کیے جانے لگے تھے مگر پھر بھی مجھے ہمیشہ اس بات کا شدت سے احساس رہا کہ میرا اصل خالق تو موچی ہی ہے۔ اس کے ہاتھ میں پہنچتے ہی میں ایک روحانی کیفیت سے سرشارہوجاتا ہوں۔ میں نے موچی کے بھدے اور کھردرے ہاتھوں کو اس وقت بھی چومنے کی کوشش کی ہے جب وہ میرے تلے میں چھوٹی چھوٹی کیلیں ٹھونکتا ہے یا موٹے سوئے سے میرے اندر ٹانکے لگاتا ہے۔ جب وہ مجھ پر پالش کرتا ہے تو اس کے محنت بھرے مگر محروم ہاتھوں کے لمس سےمیری جلد ہی میں نہیں میری روح میں بھی اجالا پھیل جاتا ہے۔

اکثر لوگ عبادت گاہوں، باورچی خانوں اور صاف ستھرے قالینوں والے ڈرائنگ روموں کے باہر مجھے اپنے پیروں سےاتار کر رکھ دیتے ہیں۔ مہنگے اسپتالوں کے اعلیٰ کمروں میں بھی مجھے جانے کی اجازت نہیں ہے وہاں انسان کےننگے پیر کو مجھ پر ترجیح دی جاتی ہے۔ کچھ سادھو فقیر قسم کے لوگ بھی مجھے پہننا پسند نہیں کرتے۔ اس کی کوئی نہ کوئی وجہ ضرور ہوگی مگر جہاں تک میں سمجھتا ہوں وہ یہ ہے کہ زمین اور انسانی پیر دونوں ہی کو پاک صاف مانا جاتا ہے جب کہ میں ان دونوں کے درمیان کی ایک کڑی، اپنےگندے ہونے کے مقدر سےکبھی چھٹکارا نہیں حاصل کرسکا۔ صدیوں سے انسان کے پیروں کی بے لوث خدمت اور حفاظت کرتے رہنے کایہی ایک صلہ ہے جو انسان نےمجھے دیا ہے۔ میں دلدل، کیچڑ اور خون سے بھیگی زمین پر چلتا اور دھنستا رہاہوں مگر پاک صاف جگہوں پر جانےکی مجھے کبھی اجازت نہ ملی۔ اس کی مجھے کوئی شکایت بھی نہیں ہے۔ آخر ایک حقیر سےجوتے کی شکایت کے معنی ہی کیا؟

میں نے ایک کتے کی طرح آدمی کے ساتھ وفاداری نبھائی ہے۔ انسان کو یہ یاد بھی نہ ہوگا کہ کس طرح اچانک ایک دن اس کے ارتقا کے سفر میں اس کے پیروں پر ایک گھنے چھتنار درخت کا سایہ بن کر چھا گیا تھا۔ میں انسان کے جسم کے آخری سرے پر جگمگاتا ہوا ایک ستارہ ہوں۔ کیا پاؤں انسانی جسم کی وسعت کی آخری حد نہیں؟ پاؤں جس کے بعد انسان ختم ہو جاتا ہے۔ جہاں تک دماغ کاسوال ہے تو وہ تو صرف انسان کی ابتدا ہے۔ ایک موہوم نقطہ جہاں سے وہ شروع ہوتا ہےاورجسے ایک بے ضرر معمولی ٹوپی بھی ڈھک لیتی ہے بے وجہ ہی انسان کے دماغ کا دنیا میں اتنا پروپیگنڈا کیا جاتا رہا ہے۔ انسانوں کے سروں کو ڈھکنے والی ٹوپیاں اور اس کی گردن کو تنی رکھنے پرمجبور کرنے والی، گلے میں لٹکتی ہوئی ٹائیاں اس بھیانک سفر کو کیا جانیں جو انسانوں کے پیروں میں فیتوں سےبندھے جوتوں نے طے کیا ہے۔ بھیانک سیاہ دلدل، سفید اورخاموش برف اور خون سے بھری اس زمین کا ایک کبھی نہ ختم ہونے والا سفر۔

یہ زمین جس میں موت کی خوشبو ہے۔ وہ خون کو اپنی طرف بلاتی ہے۔ وہ صرف ایک مذبح بننے کی طرف گامزن ہے۔ میں موت کی اس خوشبو کو اپنےتلے میں بسائے خون پر ہی چلتارہا۔ خون کو ہی رگڑتا، پونچھتا اور یہاں تک کہ چھپاتا بھی رہا۔ مجھے یاد نہیں کہ میں کون کون سے پاؤں میں چلتا رہا۔ ایک جوتے کی زندگی میں کبھی کبھی اتنا اندھیراچھا جاتا ہے کہ اسے اپنے پہننےوالے پیر بھی نظر نہیں آتے۔ میں اکثر بےآواز رویا ہوں مگر آپ نےمیرے گھسٹنے کی آوازیں سنی ہیں، میری کراہیں نہیں۔جب مجھے کوڑے کے ایک ڈھیر پر پھینک دیا گیا تھا اور میں غلاظت میں لپٹا خاموش پڑا تھا تو ایک دن کوڑا بیننے والے چند بچوں نے آکر مجھے اپنی پھٹی پرانی بوری میں ڈال لیا۔ ان بچوں کے ہاتھ کوڑے میں پڑے شیشے یا ٹین کے کسی ٹکڑے سے ٹکراکر کٹ گیے تھے۔ ان کی انگلیوں سے لگاتار خون بہہ رہا تھا۔ خون بہتی انگلیوں سے ان بچوں نے مجھے نہ جانے کون سے مقام پر لے جاکر بوری سے نکالا تھا۔

آپ نے اکثر سناہوگا کہ جوتا پیر میں کاٹ لیا کرتا ہے مگر یہ کاٹنا کسی زہریلے سانپ یا کیڑے کا کاٹنا نہیں ہے بلکہ یہ توایک ایسی محبت آمیز جسمانی قربت کا نتیجہ ہے جس میں کبھی کبھی تشدد کی آمیزش نہ چاہتے ہوئے بھی ہوہی جاتی ہے۔ انسانوں کو اس سے بد گمان نہیں ہونا چاہیے۔ وہ تو ہمیشہ سے ہی اپنی محبوبہ کے ہونٹوں کو زخمی کرتے چلے آرہے ہیں۔ جب قربت ڈھیلی پڑجاتی ہے وقت کے ساتھ ساتھ تو محبوبہ کے ہونٹ صرف لپ اسٹک سے ہی زخمی رہتے ہیں آپ کے پیار سے نہیں۔ اسی طرح جب ایک جوتا ڈھیلا پڑجاتا ہے تو وہ کاٹنا بند کردیتا ہےاور جوتے اورپیر کے درمیان ایک خالی ہوا آکر بیٹھ جاتی ہے دونوں کو گھورتی ہوئی ایک خالی بے رنگ ہوا۔

میں شروع شروع میں اس کے پیروں کو کاٹ لیا کرتا تھا۔ وہ ایک دولت مند شخص تھا۔ مگر اس نے مجھے جوتوں کی ایک اوسط درجے کی دوکان سے خریدا تھا۔ میں خود بھی ایک اوسط درجے کا جوتا ہی تھا مگر میرا چمڑا بہت چکنا، چمکدار اور پہاڑی کوے کی طرح کالا تھا۔ مجھ پر اتنی اچھی طرح پالش کی گئی تھی کہ کوئی بھی شخص جھک کر اس میں اس طرح اپنا عکس دیکھ سکتا تھا جیسے کسی صاف و شفاف تالاب میں۔ میری ٹو کافی چوڑی اور پروقار تھی اور ایڑی اونچی تھی۔میرے فیتے بہت لمبے لمبے تھے جن سے میری خوبصورتی میں اضافہ ہوتا تھا بشرطیکہ انہیں سلیقے سے ایک پھول کی شکل دیتے ہوئے باندھ لیا جائے۔ وہ شخص پستہ قد تھا مگر مجھے اپنے پیروں میں ڈال کر قدآور نظر آنےلگتا تھا۔ میری سمجھ میں یہ نہیں آیا کہ اتنا دولت مند اور بڑا آدمی ہوتے ہوئے بھی وہ آخر مجھے ہی کیوں خریدنے پر بضد تھا۔

’’آج کل تم بیڈ روم میں جوتے پہنےکیوں گھسے چلے آتے ہو؟‘‘ ایک رات اس کی بیوی نے اسے درشتگی کےساتھ ٹوکا۔ کوئی اور تو یہ محسوس نہیں کر سکتا تھا مگر میں نے اس کے پیروں کو کانپتے ہوئے محسوس کیا۔

’’ادھر آؤ۔‘‘ اس نے آہستہ سے بیوی سے کہا۔

’’کیوں؟‘‘

’’آؤ تو۔‘‘ اس نے پھر کہا۔

’’بس رہنے دو۔‘‘ بیوی کے لہجے میں بہت تلخی تھی۔

وہ بیڈ روم کے چکنے ماربل کے فرش پر مجھے پہنے سیدھا اور قدرے تن کر کھڑا تھا مگر اس کے پیر اب بھی کانپ رہے تھے۔ بیوی بستر پر نیم دراز تھی۔وہ ایک بھاری جسم اور پورے قد کی عورت تھی۔ جب وہ اس کے برابر کھڑی ہوتی تو اس سے اونچی نکل جاتی۔ میں نے غور کیا تھا کہ اس عورت کے کولہے ضرورت سے زیادہ بڑے اور پیچھے کی طرف نکلے ہوئے ہیں۔ ان کولہوں پر ایک قسم کی بے رحمی، بے مروتی اور بےوفائی کی چھوٹ پڑتی محسوس ہوتی تھی۔ یہ بڑی حیرت انگیز بات تھی کہ اس کے کولہے اور اس کے ہونٹ آپس میں خطرناک حدتک مماثلت رکھتے تھے۔ ان ہونٹوں کو کوئی بھی مرد چومنے کی ہمت نہیں کر سکتا تھا۔

’’بس ایک منٹ کو آجاؤ۔‘‘ وہ ہمت کرکے دوبارہ بولا تھا۔

’’لو آگئی۔‘‘ وہ ایک جھٹکے کے ساتھ اٹھی اور اس کے سامنے آکر کھڑی ہوگئی۔ میں نے مرد کے قد کو عورت کے قد کے برابر کردیا تھا مگر اس کے پیر اب پہلے سے بھی زیادہ کانپنے لگے تھے۔ میں نے حتی الامکان اس کپکپاہٹ کو روکنے کی پورے کوشش کی۔

’’اب بتاؤ کیا کرناہے؟‘‘ وہ طنزیہ مسکرائی جس میں اس کے بے رحم کولہوں نے پراسرار انداز میں ہل کر اس کا ساتھ دیا۔

’’کچھ نہیں۔ یہ جوتے دیکھو۔‘‘ وہ مایوس سا ہوگیا۔ بیوی نے اوپر سے نیچے تک اس کا جائزہ لیتےہوئے میری طرف نظریں مرکوز کردیں۔

’’میں نے اتنے گندے جوتے آج تک نہیں دیکھے۔ تم اپنے ساتھ بہت دھول خاک لے کر گھر میں آتے ہو۔‘‘ اس نے ہونٹ بھینچ کر جواب دیا مگر وہ بھنچ نہ سکے۔ وہ اس کے کولہوں کی طرح فاحشانہ شان کے ساتھ آگے کو نکلے رہے۔

یہ تو خیر سچ تھا کہ میرے اوپر دھول اور مٹی بہت جما کرتی تھی۔ اس میں کچھ تو اس کے چلنے کا انداز اور صفائی کی طرف سے بے احتیاطی کا دخل تھا اور کچھ میرا ڈیزائن بھی اس قسم کا تھا کہ دھول مٹی کے سالموں کو ہوا کے ارتعاشات کے ذریعےمیرے اوپر اکٹھا کرتے جانے میں مددگار ثابت ہوتا تھا۔ ہر جوتا ایسا نہیں ہوتا۔ میرے اندر ایک قسم کا دیہاتی مردانہ اور کھرکھرے قسم کا حسن تھا۔ زمین پر چلتے وقت میرے اندر سے ’’کھٹ کھٹ‘‘ کی جو آواز نکلتی تھی وہ ایک ایسی صلابت سے بھری ہوئی تھی جیسی کہ دھمک زمین سےزیادہ فضامیں جذب ہوتی محسوس ہوتی تھی۔ ایسی آواز پر آدھی رات کو جاگتے رہو، کی صدا لگانے والے چوکیدار کی لاٹھی بھی شرما سکتی تھی۔ میں نے دل ہی دل میں سوچا کہ اگر وہ اس طرح فرش پر خاموش نہ کھڑا ہو کر وہاں ٹہلنے لگتا تو ممکن تھا کہ میری آواز سے بیوی مرعوب ہوجاتی۔

’’میرا خیال ہے کہ تم اب دوسرے کمرے میں سونا شروع کردو۔ مجھے یہ سب بہت گھناؤنا سا لگنے لگاہے۔‘‘ اس بار بیوی کا لہجہ بے حد سرد تھا۔اس کے ٹھنڈے ہوتے ہوئے پنجے میرے اندر پھر بری طرح کانپے۔ وہ تیزی کے ساتھ مڑا اور اپنی بیوی کے خطرناک کولہوں کو ہلتا ہوا چھوڑ کر بیڈروم سے باہر نکل گیا۔

اس دن کے بعد پھر وہ کسی رات وہاں نہیں گیا۔ اس عالی شان مکان میں ایک چھوٹا سا ویران کمرہ تھا۔ وہ اسی میں اپنا زیادہ تر وقت گزارنےلگا۔ کمرے میں ایک چھوٹا سا پلنگ اور ایک بوسیدہ سی لکڑی کی میز کے سوا کچھ نہ تھا۔ ممکن ہے کہ یہ کمرہ کبھی نوکروں کے رہنے کے لیےبنایا گیا ہو۔رات کو سونے سےپہلے وہ مجھے اتار کر میز کے نیچے رکھ دیتا تھا اور خود پلنگ پر لیٹ کر خراٹے لینے لگتا تھا۔ یہ خراٹے اداس تھے۔ آدمی رات میں اس کے ان اداس خراٹوں کی آواز میرے اوپر ٹپ ٹپ کرتی ہوئی ایک اذیت ناک اندھیری بارش کی طرح گرنے لگتی۔

اس شخص کے ساتھ میں نے بے بہت زیادہ عرصہ نہیں گزارا۔ کبھی کبھی وہ مجھے پہن کر شام کے وقت کلب میں جایا کرتا تھا۔ کلب میں ڈانس فلور پر میں نے ایک عجیب منظر دیکھامگر اس منظر کو صرف ایک جوتا ہی دیکھ سکتا تھا۔ میں نے دیکھا کہ ہر ناچنے والے کے جوتے اس کے پیروں کے لیے اجنبی بن گیے تھے۔ وہ اس ’ڈسک جو کی‘ سے کنٹرول نہیں کیے جارہے تھے جس کے اشارے پر عورت اور مرد ناچ رہے تھے۔ بظاہر ضرور ایسا معلوم ہوتا تھا جیسے جوتے اپنے پیروں کے ساتھ ناچ رہے ہیں مگر ایسا تھا نہیں۔ جوتے کہیں اور جانا چاہتے تھے۔ وہ کوئی دوسرا رقص کرنا چاہتے تھے۔ تو کیا کوئی جوتوں کو بھی کنٹرول کر رہا تھا؟ کوئی نادیدہ، پراسرار، بہت دور بیٹھا ’’شوجوکی۔‘‘ جوتوں کی دنیا انسانوں کی دنیا سے اتنی مختلف ہے ساتھ ساتھ رہتے ہوئے بھی اتنی مختلف! مگر آہستہ آہستہ اس نے کلب جانا بند کردیا۔ وہ رات گیے تک اپنےآفس میں ہی بیٹھا رہتا۔ گھر آکر وہ کھانا بھی نہیں کھاتا تھا بس بے تحاشہ چائے پیتا رہتا تھا۔

ایک رات جب میں میز کےنیچے سے اس پلنگ پر لیٹا ہوا دیکھ رہا تھا، اچانک مکان میں ایک عجیب سی آہٹ ہوئی جیسے کوئی ایک خطرناک ہنسی ہنس کر خاموش ہوگیا ہو۔ اس کے وہ اداس خراٹے رک گیے۔ وہ چونک کر اٹھ بیٹھا پھر اس نے جھپٹ کر کمرے کی وہ کھڑکی کھولی جو باہر بیڈروم کی طرف کھلتی تھی۔ تاروں کی چھاؤں میں میں نے بھی صاف صاف دیکھا۔ ایک لمبا سا مردانہ سایہ اس کے بیڈروم سے نکل کر آہستہ آہستہ پائیں باغ کی طرف رینگ رہا تھا۔ وہ خاموشی کے ساتھ دوبارہ پلنگ پر لیٹ گیا۔ مگر اب اس کے خراٹےندارد تھے۔

مجھے افسوس ہے کہ میری ایڑی اسےاتنا اونچا نہ کرسکی جتنا کہ وہ سایہ جو آدھی رات میں اس کی بیوی کے کمرے سے باہر آکر اندھیرے میں گم ہوگیا تھا۔ لوگ لمبے اور اونچے ہونا چاہتے ہیں۔ کبھی کبھی تو وہ خدا کی برابری کرنا چاہتے ہیں۔ افسوس کہ ایک کمزور سا جوتا اس مقصد میں ان کی بہت مدد نہیں کرسکتا۔

مگر رکیے۔ کیا آپ نے بھی سنجیدگی سے یہ سوچا ہے کہ جوتا ایک ہتھیار بھی تو ہے۔ ایک ایسا ہتھیار جسے ہر انسان اپنے ساتھ لیے لیے گھومتا ہے۔جوتے کے لیےکسی لائسنس کی ضرورت نہیں ہے۔ انسان کے کمینے پن میں بھی میں نے اس کا ساتھ نبھایا ہے۔ کسی کو ذلیل کرنے کے لیے میری شکل اچانک مکروہ ہوجاتی ہے اور میرے تلے میں بڑے بڑے درانت نکل آتے ہیں جو کاٹنے سے زیادہ چڑانے اور ذلیل کرنے کے کام آتے ہیں۔ میں ایک ٹچے ہتھار میں بدل جاتا ہوں جس سےکسی کو صرف بے عزت کیا جاسکتا ہے، شہید نہیں۔ اس معاملے میں خنجر، تلوار اور بندوق وغیرہ کا رتبہ یقیناً مجھ سے بلند ہے۔

صبح ہوتے ہی اس نے اپنی بیوی پر جوتا نکال لیا۔ وہ مجھے ہاتھ میں اونچا کیے ہوئے اس طرح تھامے ہوا تھا جیسے کوئی کسی مقدس پرچم کو سنبھالے ہو۔ بیوی کے سفاک ہونٹوں پر ایک سیاہ مسکراہٹ رینگنے لگی۔ پتہ نہیں وہ اس مسکراہٹ سےخوف زدہ ہوا یا پھر اس کے بے رحم کولہوں سے۔ میں اس کے ہاتھ میں اس طرح ہلنے لگا جیسے تیز آندھی میں کاغذ کا کوئی ٹکڑا۔

’’آخر کس بوتے پر؟ کیا آج کل وہ مریل چھپکلی تمہاری آگ ٹھنڈی نہیں کرپاتی؟‘‘ بیوی نے کچھ اس طرح کہا جیسے وہ اس سے مخاطب نہ ہو کر مجھ سے ہو اور میں نے بھی نہ جانے کیوں خود کو لاجواب محسوس کیا۔

’’کمینی، فاحشہ۔‘‘ وہ بڑبڑایا یا اور اس کا ہاتھ کانپنے لگا مگر اس نے مجھ کو زمین پر نہیں گرنے دیا۔ اس رات میزکے نیچے پڑا ہوا میں اسےلگاتار دیکھتا رہا۔ میں اس منحوس رات کا گواہ ہوں جو صبح ہونے تک ایک پراسرار سردی سے ٹھٹھرتی رہی۔ ایسی سردی جسے صرف ریڑھ کی ہڈی ہی محسوس کرتی ہے۔

شاید موت انسان کی وہ ناگزیر تخلیق ہے جسے ہر انسان کو بہرحال جنم دینا ہی پڑتا ہے۔ خدا نے ہر انسان کو یہ عطیہ بخشا ہے مگر افسوس اس کاہے کہ ہر تخلیق کی طرح موت سے پہلے بھی تکلیف تو ہوتی ہی ہے۔ وہ نیند جس میں بھیانک خوابوں سے بھی نجات مل جائے، خواب آور گولیوں سے حاصل نہیں کی جا سکتی۔ ایسی نیند کو انسان کو اپنے اندر سے باہر نکال کر اسے اوڑھنا پڑتا ہے۔ ایک چادر کی طرح۔ ہرتخلیق کی طرح موت کے بھی اسلوب، ڈکشن اور تکنیک الگ الگ ہیں۔

اس رات میں نے اسے خودکشی کرتے ہوئے دیکھا۔

کھڑکی کے باہر کوئی ہنس رہاتھا۔وہ آہستہ آہستہ، ننگے پاؤں زہر کی نیلی شیشی کی طرف بڑھ رہا تھا۔ اس نے میری طرف غور سے دیکھا تھا۔ کیا وہ ان لمحات میں مجھے اپنے پیروں میں پہننا چاہتا تھا؟ میں اسی جگہ پڑا پڑا اسے یک ٹک گھورتا رہا۔ ایک جوتے کی آنکھ انسانوں کی آنکھ کونظر نہیں آتی ورنہ ممکن ہے کہ اس کے ہاتھ سے زہر کی وہ نیلی شیشی فرش پر گر کر چکنا چور ہوجاتی۔

نہیں۔ اس کی آنکھوں میں بزدلی کے کوئی آثار نہ تھے۔ پہلی بار مجھے اس کا چہرہ ایک چھوٹے سے بچے کا سا نظر آیا جس پر معصومیت اور بہادری دونوں کا نور تھا۔ بیڈروم کی طرف کھلنے والی کھڑکی کے پٹ بند تھے مگر اس کے چہرے کی اس فیصلہ کن چمک نے کھڑکی بندپٹوں کو چیر کر باہر پھیلے گہرے اندھیرے کو روشن کردیا۔ اس روشنی میں باہر بھٹکنے والے بدکار ساؤں کی ہنسی خوف زدہ ہوکر کونےمیں دبک گئی۔

زہرکو اپنے منہ میں انڈیلنے کے بعد وہ اچانک میز کے قریب آیا۔ جھکا اور میرے اور پر اس طرح ہاتھ پھیرا جیسے کوئی بچہ اپنی ٹیڈی بیئر پر ہاتھ پھیرتا ہے۔ میرے کالے اور سخت چمڑے کے سوکھے ہوئے مساموں میں سے آنسوؤں جیسےکوئی شے باہرنکلنے کو ہوئی۔ رات بھر اس کی لاش فرش پر اس طرح پڑی رہی کہ اس کاسر میز کے نیچے تھا۔ خاص میری ’ٹو‘ پر اور پاؤں بے ترتیبی کے ساتھ ادھر ادھر۔زہر کی وجہ سے شاید اس کی آنتیں کٹ گئی تھیں اس لیے اس کے منہ سے خون کی ایک پتلی لکیر بہتی ہوئی مجھ تک چلی آئی تھی۔ میرا سارا تلا اس خون میں ڈوبنے لگا۔

کسی انسان کو کھالینے کے بعد اگر کوئی شے کھانے یا کسی کودینے لائق بچتی ہے تو وہ صرف ’جوتا‘ ہی ہے۔ یقیناً اس مشہور فلم کے سین کی طرح جس میں ’’بھوک‘‘ مٹانے کے لیے دولوگ مجھے پکا کر کھاتے ہیں۔ یہ بھی سچ ہے کہ ’ایڑی‘ کی طرف میں زیادہ مزے کا ہوتا ہوں۔ میں اپنے گوشت کا ذائقہ جانتا ہوں کیونکہ ہر جوتے کا مقصد آخرکار خود کو نوچتے اور کھسوٹتے رہنا ہی ہے۔اس لیے مجھے اس پر کوئی حیرت نہیں ہوئی اس کی موت کے ہفتے بھر بعد، اس کی بیوی نے دروازے پر آئے ایک غریب اور بیمار شخص کو ’مجھے‘ مرے ہوئےآدمی کے جسم کی ایک کٹی ہوئی بوٹی کی طرح بخشش یا خیرات میں دے دیا۔

’’مجھے اس پر کوئی ملال نہیں ہوا کیونکہ میں خود بھی اس منحوس گھر میں نہیں رہنا چاہتا تھا۔ غریب اور بیمار شخص مجھے پلاسٹک کے ایک میلے سے تھیلے میں ڈال کر ’بہت سنبھال کر‘ تقریباً اپنےسینے سے لگائے ہوئے اپنے گھر کی طرف چلا۔

تھیلے میں بند ہوئے میں نے اور میرے جڑواں نے ایک دوسرے کی طرف غور سے دیکھا۔ میں اس کے مقابلے میں زیادہ پھٹے حال نظر آتا تھا۔ اس کی ایک وجہ یہ ہے کہ میں انسان کے بائیں پیر میں پہننے کے لیے بنایا گیا تھا۔ لوگ اکثر بائیں پیر پر ہی زیادہ زور ڈالتے ہیں اور گرتے پھسلتے بھی بائیں طرف ہی زیادہ ہیں۔ یہی وجہ ہے کہ بائیں پیر والے جوتے کی ایڑی جلدی گھس جاتی ہے۔ میرے ساتھ بھی یہی ہوا ہے۔ دوسرے یہ کہ میرے تلے میں جو خون سوکھ کر اب کالا پڑگیا ہے، اس کی وجہ سے بھی میں نسبتاً زیادہ گندا محسوس ہوتا ہوں۔ میراجڑواں تو ابھی بھی نیا ہی نظر آتا ہے مگر آگے چل کر ایک ایسا وقت بھی آیا تھا جب وہ خون سے بھیگا اور میں یونہی بے داغ خراش پر پڑا رہا مگر یہ بہت بعد کی بات ہے۔

یہ سچ ہے کہ ایک جوتے کا انسان کے پیر سے وہی تعلق ہوتا ہے جو انسانی شعور کا وقت کے ساتھ۔ جس طرح شعور وقت کے ساتھ ساتھ چلا کرتا ہے اسی طرح جوتا انسان کے پیر کے ساتھ۔ جس طرح انسان وقت کو ٹھوس رویے میں دیکھنے سےقاصر رکھتا ہے، اس طرح ایک پیر بھی ’جوتے‘ کے اصل وجود سےنابلد ہی رہتاہے۔ مگر یاد رکھیے کہ ہر جوتے کا ایک پیر ہوتا ہے۔ جولوگ محض اندازے سے یا کاغذ پر پنسل سے اپنے پاؤں کے ناپ کا نقش دیتے ہوئے جوتا منگواتے ہیں، ان کے پیر کو وہ کہیں نہ کہیں سے دباتا ضرور ہے زیادہ تر ایڑی یاپنجے کی طرف سے۔ اس میں جوتے کا بہرحال کوئی قصور نہیں اور جیسا کہ میں نے پہلے کہا تھا کہ یہ ایک تشدد آمیز قربت ہے۔ مگر شاید ہی کسی کو یہ احساس ہوگا کہ صرف جوتے ہی نہیں، انسان کے پیر نے بھی جوتے کو کاٹا ہے۔ جوتے نےتو سانپ کے زہر کو اپنی رگوں میں پی لیا ہے اور انسان کے پیرکو بچا لیا ہے مگر انسانوں نے زمین پر جس غلط طریقے سے قدم رکھے ہیں، اس کی وجہ سے ان کے بے زبان جوتوں کے تلے میں کیلیں ابھر آئیں ہیں جو یوں تو ان کے تلوے میں بھی چبھتی ہیں۔ مگر ان کیلوں نےجوتوں کے وجود کو لہولہان کر ڈالا ہے پھر بھی وہ دنیا کے ان کبھی نہ ختم ہونے والے راستوں پر گھسٹتا اور رگڑتا ہوا چلتا ہی جاتا ہے۔

معاف کیجیے۔ یہ دل کی بھڑاس نکالنے کا موقع ہرگز نہیں ہے۔ میں کہانی کی طرف واپس آتا ہوں حالانکہ یہ بھڑاس بھی میری کہانی کا ایک باب ہے۔ دراصل میں اس غریب اور بیمار شخص کے ناپ کا جوتا نہیں تھا۔ میں اسےآگے یعنی پنجے کی طرف تھوڑا دباتا تھا جس کی وجہ سے اس کی چال میں ہلکی سی لنگڑاہٹ پیدا ہوجاتی تھی۔ اس بات کے لیے میں آج بھی شرمندہ ہوں۔

وہ غریب اور بیمار شخص ایک سبزی فروش تھا۔ پوپھٹتے ہی وہ گھر سے نکلتا اور اپنا ٹوٹا پھوٹا سا ٹھیلا لے کر سبزیوں کی آڑھت کی طرف چل دیتا۔ اس وقت شہر کی تمام سڑکیں سنسان ہوتیں جن پر ٹھیلے کےخستہ حال لکڑی کے پہیوں کی آواز میری ’کھٹ کھٹ‘ کے ساتھ مل کر ایک ایسے گیت کاالتباس پیدا کرتی جیسے صبح کی عبادت کے لیے رچا گیا ہو۔ ویسے کیا کبھی کسی نے غور کیا ہےکہ انسانی پیر میں کس کے فیتے سے بندھے ہوئے جوتے کی زمین پر چلتے رہنے کی آواز سےبڑھ کر دوسری کوئی موسیقی نہیں ہے۔ جوتے کی یہ آواز ایک تنہا ’سر‘ ہے جو کبھی خاموشی کی طرف نہیں بڑھتا۔ وہ بڑھتا ہے کسی پراسرار اندھیرے کی طرف۔

آڑھت پر ہر جگہ رنگ برنگی سبزیوں کا ڈھیر لگا رہتا۔ ہر طرف ٹرک پر ٹرک کھڑے نظر آتے جن سے تازہ سبزیوں کی بوریوں کو اپنے کاندھوں اور پشت پر لاد کر اتارتے ہوئے مزدوروں کاایک جمگھٹا لگا ہوتا۔وہ اپنا ٹھیلا کھڑا کرکے سبزیوں کی ڈھیر کی طرف بڑھ جاتا۔میرے تلے زمین پر بکھری ہوئی باسی اور سڑی ہوئی سبزیاں اور ترکاریاں کچلتی رہتیں ۔وہ اکثر جن پر پھسلتے پھسلتے بچتا۔ کبھی کبھی وہ اکڑوں بیٹھ جاتا اور ان باسی یا سڑی ہوئی سبزیوں کو الگ کرتے ہوئے ایسی مولیوں، گاجروں اور آلو یا ساگ وغیرہ کو بیننے لگتا جو خراب ہونے سے بچ گیے تھے۔ ایک دن وہ اکڑوں بیٹھا ہوایہی کر رہا تھا کہ اس کی پیٹھ پر ایک سخت جوتے کی نوک پڑی۔ وہ باسی سبزیوں پر اوندھے منھ گر پڑا۔ اس کی آنکھوں، منھ اور ناک میں سڑتے ہوئے ساگ کے پتے اور اس میں بجبجاتے ہوئے چھوٹے چھوٹے سفید کیڑے گھس آئے۔

’’کیوں بے۔ تو نے روز کا ڈھرہ بنالیاہے۔ مفت میں مال لے جاتا ہے؟‘‘ اس کے پیچھے دونوں ہاتھ کمر پر رکھے وہ لحیم شحیم پہلوان جیسا نظر آنے والا آڑھتی کھڑا تھا۔وہ اپنےدونوں ہاتھ زمین پر ٹیکتے ہوئے بمشکل اٹھ سکا۔گرتے وقت شاید اس کی زبان دانتوں کے درمیان پھنس کر بری طرح زخمی ہوگئی تھی۔ کیونکہ اس کے قابل رحم انداز میں کھلے ہوئے اور معافی مانگتے ہوئے منھ سے لگاتار خون بہہ رہا تھا۔ یہی نہیں اس کا سر بھی چوٹ کھا گیا تھا کیونکہ ماتھے پر بھی خون رس آیا تھا میں نے غور کیا کہ زمین پر پڑے ساگ کے ہرے ہرے لیس میں اس کے منہ سے نکلی خون کی سرخی بھی شامل ہوگئی ہے۔ زمین پر یہ کون سی پینٹنگ بن رہی تھی؟ کیا کسی ملک کے پرچم کے لیے کلر اسکیم تیار ہو رہی تھی؟ میں آڑھتی کے اس کمینے اور بے رحم جوتے پر جھپٹ کر وار کرنا چاہتا تھا مگر تب ہی میں نے محسوس کیا کہ میں جن کمزور پیروں میں بندھا ہوا ہوں، وہ اس کی اجازت مجھے نہ دیں گے۔

’’سالے۔ آئندہ یہاں سبزیاں بینتے نہ دیکھوں ورنہ تیری ماں۔۔۔‘‘ انسان کے اس غیرانسانی بیٹے نے کہا اور پھر اپنے جوتے کی نوک سے زمین پر عورتوں اور مردوں کے پوشیدہ اعضا کی نہایت صاف تصویریں بنانے لگا۔ مزدوروں اور غریبوں کی کمر پر وار کرنے والا یہ جوتا ایک آرٹسٹ کا برش بھی تو تھا۔اس صبح وہ خالی ہاتھ آڑھت سے واپس آیا۔ اپنے پھٹے ہوئے سر کے ساتھ سڑک پر اپنا خالی ٹھیلا کھینچتے ہوئے۔

ہر انسان کا سر پھٹا ہوا ہے اور اس کا خون بہہ رہا ہے۔ وہ پھٹے ہوئے اور بہتے ہوئے خون کے ساتھ نہ جانے کہاں بھٹک رہے ہیں۔ یہ ایک المناک مگر مضحکہ خیز سلسلہ بھی ہے۔ انسان کے قدموں کے اس سفر کا گواہ صرف ایک ’جوتا‘ ہے۔ اس کے پیروں کے شعور کے ساتھ وقت کی طرح لپٹا ہوا۔آہستہ آہستہ اس کی کھانسی بڑھنے لگی۔ شام ہوتے ہی اسے تیز بخار چڑھ آتا اور پھر رات بھر کھانسی کاسلسلہ جاری رہتا۔ اس کی بیوی تمام رات جاگ کر اس کا سینہ سہلاتی رہتی جو ربڑ کے غبارے کی طرح پھولتا اور پچکتا رہتا۔

میں اس کے پلنگ کی پائنتی پڑا پڑا اسے کھانستا ہوا دیکھتا رہتا۔ انسان کی کھانسی میں موت اور خون کی بو چھپی ہوتی ہے۔ اس کی گرمی اور حبس کی طرح جس کے بالکل عقب میں ایک خوفناک بارش کھڑی رہتی ہے۔ ایک ایسے اداکار کی طرح جو اشارہ پاتے ہی پردے کے پیچھے سے نکل کر اسٹیج پر آکھڑا ہوتا ہے۔ میں نے اس بو کو اپنے اندر جذب ہوتے محسوس کیا۔ ’’یہ بو‘‘ اس دن بہت زیادہ تھی جب وہ سرکاری اسپتال کے ایک کمرے میں ڈاکٹروں کے ایک گروپ کے سامنے مجرموں کی طرح سرجھکائے کھڑا تھاسب سے بڑے ڈاکٹر کے ہاتھ میں اس کی ایکس رے رپورٹ تھی۔

’’بیڑی پیتے ہو؟‘‘ ڈاکٹر نے پولیس آفیسر کی طرح سوال کیا۔

’’پیتا تھا صاحب مگر دوسال ہوئے چھوڑدی۔‘‘ اس نے مجرموں کی طرح اعتراف کیا اور اس کا سر اس جرم کے لیے شرمندگی سے جھک گیا۔ میں اسے اور وہ مجھے خالی خالی نظروں سے تکے جارہے تھے۔

’’ہوں۔‘‘ ڈاکٹر نے غور سے ایکس رے کو روشن بلب کے پاس لے جاتے ہوئے کہا۔

’’گٹکا کھاتے ہو؟‘‘ ڈاکٹر اس بار تقریباً گرجا۔

’’ارے صاحب بالکل نہیں۔ گٹکا تو آج تک چھوا بھی نہیں۔‘‘ وہ خوش ہوکر بولا۔ اس کا سرگویا غرور سے اوپر اٹھ گیا۔ یہ اس کے جرم سے بری ہونے کا ثبوت تھا۔

’’ہوں۔‘‘ ڈاکٹر نےایک طویل سانس لی اور پھر اپنےماتحت ڈاکٹروں کو ایکس رے کی طرف اشارہ کرتے ہوئے انگریزی میں کچھ سمجھانےلگا اور وہ سب با ادب انداز میں اپنے سروں کو جنبش دینے لگی۔

غریب سبزی فروش بچوں کی طرح خوش ہو رہا تھا کہ شاید آج اتنے بہت سے ڈاکٹر اسے اتنی توجہ کے ساتھ دیکھ رہے ہیں۔ مگر میں جانتا تھا کہ بڑا ڈاکٹر ایک بہت ہی خطرناک بیماری کی علامات کے بارے میں اپنے ماتحتوں کو سمجھا رہاتھااور وہ سبزی فروش ان سب کے لیے ایک مینڈک سےزیادہ وقعت نہیں رکھتا تھا۔اپنے ہاتھوں میں چند دوائیاں اور جسم میں چند نادیدہ سیاہ دھبے لیے وہ خوش خوش گھر واپس آیا۔

’’اپنے لیے کوئی پھل بھی لے آتے۔‘‘ اس کی بیوی نے شکایت بھرے لہجے میں کہا۔

’’پھل؟‘‘ وہ اداس ہوگیا اور اسے اپنے ٹھیلے کے پہیے یاد آگیے۔

اس شام جب وہ اپنے گھر کے کچے آنگن میں کھڑاتھا، اچانک اسے بہت زور کی کھانسی آئی۔ اس نے کھنکار کر تھوکا تو سارا بلغم خون سے بھرا ہوا تھا۔ وہ گھبراگیا۔ اس نے ادھر ادھر دیکھا۔ شاید وہ نہیں چاہتا تھا کہ اس کی بیوی یہ خون دیکھے۔ جب اس کی سمجھ میں کچھ نہ آیا تو اس نے خون کو میرے نیچے دبا دیا اور کچی مٹی میں اسے بری طرح رگڑنے لگا۔ اس پوری رات ایک سڑی ہوئی ہوا چلتی رہی۔ یہ حبس اور نمی کی چادر کے نیچے جمی ہوئی ہوا تھی۔ یہ ہوا جب بہتی ہے تو کچھ نہیں ہلتا۔ نہ کوئی چادر، نہ قمیص کا کالر، نہ کرتے کا دامن اور نہ سر کے بال۔ میں اس سڑتی ہوئی ہوا کے دوکناروں کے بیچ، اس کی پائنتی پڑا خاموش اسے بخار میں آہستہ آہستہ جلتا ہوا دیکھتا رہا۔ اس کی بیوی کئی راتوں کی جاگی ہوئی تھی۔ آج اس کی آنکھ لگ گئی۔

رات میں کتنی بار اسے منہ سے خون آیا مجھے یاد نہیں۔ مجھے یاد ہے تو صرف اتنا کہ ہر بار ایسا ہونے پر وہ بخار سے جلتے ہوئے اپنے ہاتھوں سے مجھے تھام کر اس خون کو کچی زمین میں رگڑ رگڑ کر جذب کرنے کی کوشش کرتا۔ اس کے بخارزدہ ہاتھوں کے لمس سے میں پگھل پگھل کر بہہ جانے کو ہوا۔ صبح ٹھیک اسی وقت جب پو پھٹ رہی تھی اور جو اس کے ٹھیلا لے کر گھر سے نکلنے کا وقت تھا، اچانک اس کی کھانسی رک گئی۔ رات بھر اس کی بیوی کو اس نہ رکنے والی کھانسی نے اتنا نہیں چونکایا تھا جتنا کہ اس خاموشی نے۔

عجیب خاموشی تھی۔

وہ جلدی سے اٹھی۔

زمین پر پلنگ کی پائنتی کے پاس خون ہی خون بکھرا ہوا تھا۔ میرا تلا اس خون میں چپکا ہوا تھا۔

دور کسی مسجد میں فجر کی اذان ہوئی۔ اس کی بیوی کے بین بلند ہوئے۔

دیکھا آپ نے! میرے پیروں کے نیچے کیا کیا کچلا گیا۔ دبی مری گھاس ،گوبر، کیڑے مکوڑے، سوکھے پتے، کیچڑ اور سڑی ہوئی سبزیاں۔ مگر کیا آپ واضح طور پر یہ محسوس نہیں کرتے کہ مجھے بار بار خون سے لتھڑنا پڑتا ہے۔ خون کو پھلانگنا پڑتا ہے۔ میں اس خون کو کتنی بار پھلانگوں؟مرنے والے کی بیوی کا ایک غریب بھانجہ کسی گاؤں سے آکر اس شہر کے کالج میں پڑھنےلگا تھا۔ سوئم کے روز جب وہ فاتحہ میں شرکت کے لیے آیا تو مرنےوالے کی بیوی نےمجھے ایک گیلے کپڑے سےصاف کیا اور پھر اسے سونپ دیا۔ اس کی ایک وجہ تو یہ تھی کہ لڑکے کے کپڑے کے بنے ہوئے جوتے بالکل پھٹ گیے تھے دوسرے یہ بھی مردہ لوگوں کی بہت سی چیزیں دوسروں کو ثواب کی غرص سے دینے کا رواج تو رہا ہی ہے اور اگر وہ دوسرے اس کی مستحق ہوں تو یہ عین نیکی ہے۔

وہ لڑکا یقیناً مستحق تھا۔ ٹیوشن پڑھا پڑھا کر وہ اپنی تعلیم کا خرچ پورا کیا کرتا تھا اکثر بے چارے کو فاقہ بھی کرنا پڑتا تھا کیونکہ وہ جس کوٹھری میں کرائے پر رہتا تھا، اس کا کرایہ ادا کرنا بھی اس کے لیے مشکل تھا۔ مگر وہ تھا بہت ذہین اور محنتی۔ میں اسے تمام رات لالٹین کی روشنی میں پڑھتے ہوئے دیکھتا تھا۔ جیسا کہ میرا مقدر رہا تھا، میں اس کے پلنگ کے نیچے پڑا پڑا تمام رات جاگ کر گزارتا تھا۔ ایسا نہیں ہے کہ جوتے کو نیند نہیں آتی ہے جوتا بھی سوجاتا ہے، آپ کے وفادار گھوڑے یا کتے کی طرح مگر فی الحال زمین پر جو حالات چل رہے ہیں، ان میں ایک جوتے کی آنکھ لگ جانا ممکن نہیں ہے۔

وہ جس قسم کی کتابیں پڑھتا رہتا تھا وہ ایک قسم کی داخلی غلط فہمی پر مبنی تھیں۔ کتابوں میں چھپے ان الفاظ کے کوئی معنی نہیں تھے۔ یہ صرف استعاروں کی ایک اندھی فوج تھی جسےزمین پر بچھائی گئی بارود کی سرنگوں سےگزر کر پرزے پرزے ہوکر اڑ جانا تھا۔ مگر افسوس کہ یہ حقیقت بھی صرف ایک جوتا ہی جانتا تھا۔

لڑکا شہر کے ایک دولت مند اور بارتبہ شخص کی بیٹی کو بھی ٹیوشن پڑھانےجایا کرتا تھا۔ لڑکی عمرمیں اس سے بس تھوڑی ہی چھوٹی ہوگی۔ جیسا کہ ان حالات میں اکثر ہوا کرتا ہے، دونوں میں زبردست عشق ہوگیا۔ اس عشق میں ان دونوں سے زیادہ لطف مجھے آتا تھا کیونکہ ان کی محبت کے درمیان میں وہی کام انجام دے رہاتھا جو ایک گلاب کا پھول انجام دیتا ہے۔

وہ لڑکی خوبصورت تو نہیں تھی مگر اس کی چال بہت پرکشش تھی۔ ایسا لگتا تھا جیسے وہ زمین پر کسی ملکوتی حسن کی پرچھائیں کی طرح چل رہی ہو۔ یا پھر اس کے وہ دوپتلے پتلے سے ہاتھ جو اکثر لکڑیوں کی طرح نظر آتے تھے اور جن میں گوشت پوست کی ارضیت کا کوئی نام و نشان تک نہ تھا۔ یہ ہاتھ دوسفید خشک لکڑیوں کی طرح پاکیزہ تھے۔ ایسے پاکیزہ ہاتھ جن میں کانچ کی چوڑیوں کو بجتے ہوئے یقیناً شرم آئے گی۔

وہ دونوں جب بھی ملتے تو لڑکی اس سے جوتے اتارنے کی فرمائش کرتی۔ لڑکا میرے فیتے کھول کر مجھے اپنے پیروں سے نکال لیتا۔ تب لڑکی آہستہ سے اپنےنازک پیر میرے اندر ڈال دیتی۔ میں اس کے پیروں سے بہت بڑا تھا۔ اس کے پیر جب میرے اندر داخل ہوتے تو مجھے احساس ہوتا کہ کوئی ملائم خرگوش میرے اندر چھپ کر سوگیا ہے۔

لڑکی کو یہ عجیب خبط تھا۔ شاید ہر سچے عشق میں ایک مقدس دیوانگی کا عنصر ضرور شامل رہتا ہے۔ مجھے پہن کر وہ فرش پر چکر لگانا شروع کردیتی۔ وہ اس طرح چلتی جیسےاڑ رہی ہو۔ مجھے محسوس ہوتا جیسے میں سخت زمین پر نہیں بلکہ ہوا کی ایک تنی ہوئی قنات پر چل رہا ہوں۔ مگر مجھے اس بات پر بہت زیادہ شرمندگی ہوتی تھی کہ میرے اندر ایڑی کی طرف کمبخت ایک کیل ڈھیلی ہوکر اوپر کی طرف ابھر آئی تھی۔ یہ کیل لڑکی کے نازک پیر کی ایڑی پر ضرور چبھتی ہوگی۔ مجھے اپنی خستہ حالی پر بھی شرم آتی تھی۔ لڑکے کو کبھی اتنی توفیق ہی نہیں ہوتی کہ وہ مجھے کسی موچی کے پاس لے جاکر تھوڑی سی مرمت کروا دیتا۔ مجھے اندیشہ تھا کہ اگر یہی حالت رہی تو بہت جلد میرے تلے میں سوراخ ہوجائیں گے۔

لڑکا اسے فرش پر چلتا ہوا دیکھتا رہتا۔

’’چلو اب جیومٹری پڑھ لو۔‘‘ آخر وہ تھک کر کہتا۔

’’میں تو نہیں پڑھوں گی۔‘‘ لڑکی اپنے قدم گنتے ہوئے کہتی۔

’’پڑھ لو۔ تمہاری جیومٹری بہت کمزور ہے۔‘‘

’’اس جوتے کی جیومٹری کیا ہے؟ اچھا بتاؤ یہ تم نے کتنے میں خریدا تھا؟‘‘ وہ مسکراکر سوال کرتی لڑکا خاموش اور اداس ہوجاتا تھا۔ پھر وہ فرش پر چکر لگاتے لگاتے تھک کر بیٹھ جاتی اور لڑکے کو محبت بھری نظروں سے دیکھنے لگتی۔ یہ ان دو محبت کرنے والوں کا روز کا کھیل تھا جس میں کسی چاکلیٹ، آئس کریم، ریستوران یا بائیک کے بجائے ایک پھٹے جوتے کا ہی سب سے اہم رول تھا۔

سردی جارہی تھی۔ یہ دن بڑے عجیب ہوتے ہیں، موسم گرم ہونے لگتا ہے۔ مگر اتنابھی نہیں کہ لوگ اپنے سوئیٹر اتار پھینکیں۔ جب ہوا زیادہ گرم ہوجاتی ہے تو ان دنوں اولے گرتے ہیں۔ اس شام بھی ہوا گرم تھی اور آسمان بادلوں سے گھرا ہوا تھا۔ ایسے بادل حبس پیدا کرتے ہیں اور ہر چیز بے وجہ ہی دھول میں لپٹی ہوئی نظر آتی ہے۔ مگر وہ زیادہ دور نہیں تھی یعنی بارش ۔وہ اس کے پیچھے ہی کھڑی تھی اچانک اس نے حبس کو ایک طرف کیا اور نکل کر سامنے آئی۔ زوردار گرج چمک کے ساتھ بارش شروع ہوگئی۔

لڑکا لڑکی کے گھر جارہا تھا۔ ادھر کی گلیوں میں پانی بہت بھر جاتا تھا۔ نالیاں اور پرنالے امنڈنے لگتے۔ ایسی ہی ایک سڑک پر وہ پانی میں پھنس گیا۔ بارش رکنے کانام نہیں لے رہی تھی۔ سڑکوں، گڈھوں، نالیوں اور ندیوں میں پانی بھرنے لگا۔ لمبی ویران سڑک پروہ گھٹنوں گھٹنوں چڑھ آئے پانی میں اپنی پتلون کے پائنچے اٹھائے خاموش کھڑا تھا۔ میں پانی میں ڈوب چکا تھا۔ اچانک رات آگئی۔ بس ایسا لگا جیسے بارش رات میں بدل گئی تھی۔ آسمان پر ایک بار بادل بہت زور سے گرجے اور تب جاکر کہیں وہ اولے گرنا شروع ہوئے۔ گرتے اور ناچتے ہوئے روئی کے گالے جیسے سفید اولے پانی کے اوپر تیر رہے تھے۔ آسمان سے زمین تک اولوں کی ایک سفید باریک سی چادر تن گئی اور جس کے ڈھیلے ہوتے ہوئے پنجوں سے نکل کر ہوا بھی چلنے لگی۔ سردی بڑھ رہی تھی۔ بڑھتی ہی جارہی تھی۔ وہ مجھ میں آکر اکٹھا ہونے لگی۔لڑکا سردی سے بری طرح کانپتا ہوا اپنے بھیگے ہوئے کپڑوں سمیت ایک بند دوکان کے ٹین کے شیڈ کے نیچے آکھڑا ہوا۔ ہوا بہت تیز تھی اور شیڈ اس سے بری طرح پھڑ پھڑا رہا تھا۔

بہت دیر بعد بارش رکی۔ میرے اوپر تھکان طاری ہونے لگی۔ میں پانی میں تر ہوکر بے حد بوجھل ہوگیا تھا۔ مجھے عجیب سی بے چینی محسوس ہورہی تھی۔ جس طرح زلزلہ آنے سے پہلے حشرات الارض بے چین ہوکر ادھر ادھر نکل کر بھاگتے ہیں اس طرح ایک جوتا بھی زمین کے تمام پوشیدہ اور پراسرار ارتعاشات کو خوب سمجھتا ہے۔اس رات بہت دیر ہوگئی تھی جب لڑکا لڑکی کے گھر پہنچا۔ میری مرضی نہیں تھی کہ اس وقت وہ وہاں جائے۔ لڑکے کو عقل کا استعمال کرنا چاہیے تھا۔ عقل خطرے کے بدلے میں اداکیے جانے والا ایک تاوان ہے۔ یقیناً لڑکے نے یہ تاوان ادا نہیں کیا۔

’’تم آج۔ ایسی بارش میں کیسے آگئے؟‘‘ لڑکی نے کہا اور اس کی آنکھیں غیرمعمولی تہہ تک حساس نظر آئیں جیسے گہرے پانیوں میں رہنے والی مچھلیوں کی ہوتی ہیں۔

’’آتا کیسے نہیں۔‘‘

’’نہیں۔ تمہیں اس وقت نہیں آنا چاہیے تھا۔ اسے خبر لگ گئی ہے اور میں آج گھر میں اکیلی ہوں۔‘‘

’’مجھے تمہارے اکیلے پن سے کوئی غرض کبھی نہیں رہی۔‘‘

اس کے کپڑوں سے پانی ٹپک رہا تھا اور میں تو بھیگ کر بالکل شل ہوچکا تھا۔

’’تمہیں سردی لگ رہی ہے؟‘‘

’’نہیں تو۔‘‘

’’کانپ جو رہے ہو۔‘‘

’’نہیں تو۔‘‘

’’اگر بخار آگیا؟‘‘

’’نہیں آئے گا۔‘‘

’’تم ضدی ہو۔‘‘

’’تم آج جوتے نہیں پہنوگی؟‘‘

’’نہیں۔‘‘

’’کیونکہ وہ بھیگ گیے ہیں؟‘‘

’’نہیں۔‘‘

’’پھر؟‘‘

’’تمہیں سردی لگ رہی ہے؟‘‘ تم کانپ رہے ہو؟‘‘

’’ہاں!‘‘

’’میرے قریب آجاؤ۔‘‘

’’نہیں،تم جوتے پہن لو۔‘‘

’’اچھا!‘‘

لڑکی اس کے قدموں کے پاس جھک آئی اور میرے فیتے کھولنے لگی جو گیلے ہونے کے باعث بڑی مشکل سے کھل پائے۔ وہ اسی طرح چپ چاپ کھڑا رہا۔ اس کے جسم سے ٹپکتے ہوئے پانی نے فرش کو گیلا کرنا شروع کردیا تھا۔لڑکی نے اپنے دبلے پتلے، لکڑیوں جیسے دونوں ہاتھوں میں مجھے اٹھایا۔ پہلے اس نے اپنے دائیں پیر میں میرے نصف وجود، میرے جڑواں کو ڈالا پھر دوسرے ہاتھ سے مجھے اٹھاکر غور سے دیکھنےلگی۔ وقت محبت کے سکھ کے ساتھ، ہر قسم کی فکر اور اندیشے کو غبار کی طرح اڑاتا ہوا، بے نیازانہ، ایک مست جھومتے ہوئے ہاتھی کی طرح چلا جارہاتھا کہ اچانک وقت پردکھ ایک چمکدار خنجر کی طرح لپکا۔

(۲)

سب سے پہلے تو وہ ماں کی ایک گندی گالی تھی جو فضا میں گونج کر رہ گئی۔ کیا گالی سے زیادہ ہلاکت خیز دنیا کی کوئی اور شے بھی ہوسکتی ہے؟ گالی زبان کو اس طرح مار ڈالتی ہے کہ اپنی موت کے ساتھ ہی زبان ایک خوفناک بھوت بن جاتی ہے۔ گالی زبان نہیں، مری ہوئی زبان کا وہ بھوت ہے جو یوں تو انسان کے جسم کو ذلیل کرتا ہے مگر اس کی مار درحقیقت انسان کی روح کو سہنا پڑتی ہے۔

’’تیری حرکت بہت دنوں سے دیکھ رہا تھا۔ آج تیری بوٹی بوٹی الگ کردوں گا۔ بھڑوے‘‘ ایک ایسی آواز نے کہا جو جاہل عورتوں کی طرح بیٹھی ہوئی، مہین اور جلن و حسد سے بھری ہوئی تھی۔ مگر جن ہونٹوں سے یہ آواز نکلی تھی وہ عورت کے ہرگز نہیں تھے۔ لڑکی گھبراکر دور کرنے میں جاکھڑی ہوئی۔ میں اس کے ہاتھ سے پھسل کر نہ جانے کب زمین پر گر چکا تھا۔ بس اب ہوشیار ہوجائیے کہ اسی مقام سے میرے خالص اکیلے پن کی ابتدا ہوتی ہے۔ میرے ’میں‘ کےاندر سےمیرا ’نصف وجود‘ باہر نکل گیا ہے۔

لڑکا ننگے پاؤں اسی طرح اس جگہ کھڑا رہا۔ اس کے کپڑوں سے ابھی ابھی پانی ٹپک رہا تھا۔ مگر وہ کانپ نہیں رہا تھا۔ وہ تو اس وقت بھی نہیں کانپا جب وہ فحش اور مہین آواز اس کی طرف لوہے کی ایک سیاہ وزنی سلاخ لیے آگے بڑھتی جارہی تھی۔

’’نہیں۔ خدا کے لیے اسے نہیں مارو۔ مجھے تمہاری ہر بات منظور ہے۔‘‘ لڑکی کی چیخ سے وہ کونا کانپ اٹھا جہاں وہ ایک پیر میں جوتا پہنے سہمی اور سمٹی کھڑی تھی۔ میں فرش پر، تھوڑی دور پڑا بے بسی کے ساتھ یہ دل ہلادینے والا منظر دیکھے گیا۔ لوہےکی وزنی سلاخ کی چوٹ کے نیچے میں نے اس کے سر کی ہڈیوں کو چٹختے ہوئے محسوس کیا۔ اس کے منہ سے ایک عجیب سی آواز نکلی اور وہ فرش پر ڈھیر ہوگیا۔ ہوا میں خون کی بو شامل ہوگئی۔ لڑکی کامنھ کسی ہذیانی چیخ کے لیے کھلے کا کھلا رہ گیا۔ اس کے پتلے پتلے لکڑیوں جیسے ہاتھ خلا میں پھیل گیے۔ لڑکےکے سر سےخون کا فوارہ پھوٹ رہا تھا۔ چند ہی لمحوں میں بہتا ہوا خون کونے میں آکر لڑکی کے قدموں کو چھونے لگا۔ اس کے ننگے پیر کو بھی اور اس پیر کو بھی جس میں جوتا۔ یعنی میرا ہمشکل یا میرا آدھا وجود موجود تھا۔

عورتوں جیسی وہ مہین مگر فاحشہ آواز لڑکی کو اس حالت میں کسی جانور کی طرح ہنکاتی ہوئی کمرے سے باہر دور ایک رکی ہوئی بارش کے نیچے پھیلے بیکراں اندھیرے میں لے گئی۔ اب میں اس تاریک کمرے میں اس کی لاش کے ساتھ بالکل اکیلا تھا۔ اب میں صرف میں تھا۔ بالکل اس لاش ہی کی طرح اکیلا جس کی ہم شکل روح اس کے جسم سےنکل کر کہیں دور تاریکی میں مل گئی تھی۔