سورج زمین پر اترا تھا

سائمہ رحیم الدین کی ڈھیر ساری ریہرسلز تھیں۔ یوں تو سائمہ ہر فیشن شو کو سنجیدگی سے لیتی تھی لیکن اس فیشن شو کی ایک خاص بات بھی تھی۔ ایک تو یہی ایک شو تھا جو سیزن پر ہو رہا تھا۔ لیکن بڑی بات وہ مغلیہ درباری کا رنگ ڈھنگ تھا جو پی سی کی سٹیج پر کمرشل آرٹس والوں نے عہد شاہجہاں یا عہد جہانگیر کے دربار خاص کی طرح سجایا تھا۔ بیک گراؤنڈ میں راگ درباری کا الاپ ہو رہا تھا۔ استاد حامد علی خان بڑی مہارت سے سُر چھیڑ رہے تھے۔ سفید سلک کے کپڑوں میں سیم باقاعدہ انارکلی یا دل آرام بنی ہوئی تھی۔ پتا نہیں اس لباس کا کیا نام تھا۔ ڈریس سرکل میں بیٹھی مینا نے عدم دلچسپی سے سوچا۔ آج یہاں آنے کا اس کا کوئی ارادہ نہیں تھا لیکن وہ اپنے ارادوں کے سلسلے میں اتنی خودمختار کبھی ثابت نہیں ہو سکی تھی۔ جانے کیوں وہ سائمہ کو کبھی ’’نہ‘‘ نہیں کر سکی۔ حالاں کہ سائمہ اسے اپنے ساتھ لاکر بھول بھی بیٹھی تھی۔ ساتویں دفعہ اس نے بیس گز کے سرسراتے دوپٹے کو چاروں طرف بکھیرا۔ میوزک شروع ہوا۔ سٹیج پر کیٹ واک کرتے وہ اس کی طرف آئی۔ لمحہ بھر کو رکی اور ’’چیز‘‘ جیسی پروفیشنل سی مسکراہٹ بکھیر کر واپس ہو گئی۔ کیسی مردہ سی مسکراہٹ ہوتی ہے یہ بھی کہ مسکرانے کے باوجود چہرہ روشن نہیں ہوتا۔ اس کے پیچھے اس کی ساتھی تھی، اسی انداز میں بال کس کس کر پیچھے باندھے۔ اتنی سختی سے کہ ماتھے کی رگیں ابھر آئی تھیں۔

صبح سے یہ وقت آ گیا تھا، نہ انہوں نے کھانا کھایا نہ بریک لی۔ سپانسر کمپنی مسلسل وعدہ کر رہی تھی بس یہ آخری ریہرسل ہے۔ بس اب ختم ہوتی ہے۔

سائمہ رحیم الدین کا خیرہ کر دینے والا حسن آہستہ آہستہ تھکتا جا رہا تھا۔ چہرے پر تکان کی سرخی اسے اور زیادہ حسین اور لوگوں کو مزید پاگل کر دیا کرتی تھی۔ لیکن جب بھی ایسے وقت میں وہ ہاتھ پر ہاتھ رکھے اس کے پیچھے اپنا وقت برباد کیا کرتی تو وہ اندر ہی اندر جھنجلانے لگتی تھی۔ پھر آخر ہر طرف سے فارغ ہو کر سائمہ کی نظر اس پر پڑہی گئی۔ اسی طرح ہنستی مسکراتی شفاف دانتوں کی ہموار قطار سے چاندی چھلکاتی وہ کبھی سوچتی اچھا ہی ہوا سیم نے یہ فیلڈ چن لی، پھر آخر وہ اس حسنِ بےپناہ کا کرتی بھی کیا۔

’’بہت تھک گئی۔‘‘ اس نے تھکان سے بھرپور سانس لیا، ’’تم نے کچھ کھایا مینا؟‘‘

’’نہیں۔‘‘ مینا نے اکتاہٹ سے کہا، ’’تم نے پھر مسلسل سات گھنٹے کام کیا ہے۔ حالاں کہ تم ممی سے وعدہ کرکے آئی تھیں۔‘‘

’’اف پلیز مینا، بور نہ کرو۔ چلو ڈائننگ ہال میں سب انتظار کر رہے ہیں۔‘‘

اپنی پلیٹ میں کھانا نکالتے ہوئے مینا نے ایک نظر اس کی طرف دیکھا۔ وہ پلیٹ میں خالی سلاد ڈالے کھیرا کترتی اپنی ڈریس ڈیزائنر سے نہایت سنجیدہ گفتگو میں مصروف تھی۔ ماڈلز کو لنچ دینے کا سارا مالی فائدہ سپانسر کرنے والی کمپنی کو پہنچتا ہے۔ دوڑ میں اول آنے والی کی جدوجہد ٹاپ ماڈلز کو مارے ڈال رہی تھی جن میں سے ایک سائمہ رحیم الدین بھی تھی۔ حالاں کہ نمبرون سائمہ ہی تھی لیکن اگر وہ کسی فیشن میگزین میں پڑھ ڈالتی کہ فلاں کمرشل آرٹسٹ بھی سائمہ کے مقابلے میں ہے توسائمہ کو مقابلے کی آگ جھلسا کر راکھ کر دیتی۔

سائمہ کے گروپ میں سب کے سب سائمہ ہی کے قبیل کے لوگ تھے۔ مینا کے لیے اس کے گروپ سے اچھے تعلقات رکھنا ذرا دشوار ہو جاتا تھا۔ لیکن چوں کہ وہ اس کے ساتھ ساتھ رہنے پر مجبور تھی لہٰذا وہ فاصلے سے بیٹھی خاموشی سے اس کے اٹھتے پلٹتے قدم گنتی رہتی۔ حالاں کہ اسے ہیروئن کی نانیوں کی طرح سائمہ پر اپنا مسلط کیا جانا بالکل بھی پسند نہیں تھا اور اس کے اپنے کام کو کس قدر حرج ہوتا تھا۔ لیکن اس کے پاس کوئی چوائس ہی نہیں تھی۔ سائمہ اور اس کے خاندان کے احسانات کے بوجھ تلے دبی وہ مجبور تھی کہ قدم قدم پر اس کا ساتھ دے۔

یوں بھی وہ ان کے گھر کے احسانات بھولنا چاہتی تو گھر والے بھولنے ہی کہاں دیتے ،ہر ایسے موقع پر جب انہیں مینا سے کوئی کام آ پڑتا تو گھر میں ایک رقت آمیز کہانی سنائی جاتی، خواہ سامع اس کہانی کو ہر روز سنے کہ جب اس کے امی ابا حادثے میں گزر گئے تھے اور بےچاری مینا تنہا رو رہی تھی تو مسز رحیم الدین اسے لے آئی تھیں۔ ان کی بیٹی نے اسے دوست بنا لیا، اس پر جان چھڑکتی تھی اور اس کے بنا ایک لمحہ بھی نہیں رہ سکتی تھی۔ انہوں نے خود بھی کبھی دونوں میں فرق نہیں کیا۔ جس قسم کی مہنگی سکولنگ سائمہ کی ہوئی بالکل ویسی مینا کی رہی اور اب بھی کیا ہے۔ ہم نے تو اب بھی کوئی فرق نہیں رکھا۔

وہ تو یہ ہمیشہ سے سنتی آئی تھی۔ اب توازبر ہو گیا تھا۔ اس کا مطلب کہ بار بار ان احسانات کی قیمت چکاؤ۔ خریدا ہوا آدمی بھی ایک مرتبہ خریدا اور بیچا جاتا ہے، یہاں تو روزانہ بازار لگتا تھا اور سود تھا کہ بڑھتا چلا جا رہا تھا۔ اسے بہرکیف چھٹی لے کر سائے کی طرح سائمہ کے ساتھ رہنا پڑا۔ وہ ڈائٹ سیون اَپ کا کین ہاتھ میں پکڑے اپنی بدترین رقیب روسیاہ سے ہنس ہنس کر باتیں کر رہی تھی۔

’’یہ میری بہن ہے ثمینہ۔ ہم اسے مینا کہتے ہیں۔‘‘ اس نے رقیب سے تعارف کرایا۔

’’اچھا؟‘‘

رقیب نے حیرت سے کہنا چاہا لیکن برداشت کر لیا۔ شاید یہ کہ اتنی حسین و جمیل سائمہ کی ایسی معمولی سی بہن۔ لیکن یہ فقرہ زیادہ مشکل تھا کیوں کہ اسے بلاواسطہ اعتراف تو کرنا ہی پڑ رہا تھا کہ وہ معمولی سہی لیکن جس کو مقابلے میں رکھا گیا وہ تو حسین ہے۔

’’کیا بدتمیزی ہے؟‘‘ اس نے قریب آکر تمیز سکھانے کی کوشش کی،’’ جب لوگ بات کرتے ہیں تو مسکراتے ہیں یا دم بخود ہو جاتے ہیں؟ کوئی کیا کہےگا شاید۔۔۔ ویک بیک گراؤنڈ کی لڑکی ہے۔ اپ اسٹارٹ ہے۔‘‘

’’پلیز سیم!‘‘ اس نے اکتاہٹ سے کہا، ’’میں تنگ آ گئی ہوں۔ دیر ہو رہی ہے۔ ممی بھی خفا ہو رہی ہوں گی۔ انہوں نے مجھے منع کیا تھا کہ تمہیں اتنی دیر نہ لگے۔‘‘

اس نے مایوسی سے مینا کی طرف دیکھا۔ اس سے کسی قسم کی توقع فضول تھی۔ مشین سے بنے روبوٹ کی طرح اس میں طاقت ور کمپیوٹر فٹ تھے اور وہ صرف وہی کچھ کر سکتی تھی جو اس میں فیڈ کیا جاتا تھا۔ نرم ونازک جذبات، احساسات، حتیٰ کہ محبت۔ اف خدایا مینامحبت کرتی کیسی مسخری لگے گی۔ اسے بےساختہ ہنسی آ گئی۔

’’اگر تمہیں ٹھہرنا ہے تو مجھے جانے دو سیم! مجھے ابھی صبح کے لیے ایک اسائمنٹ بھی تیار کرنا ہے۔‘‘ مذاق بناتی اس کی تمسخرانہ ہنسی اسے شدید چبھی تھی۔

اس نے تیزی سے جاتی مینا کو بھاگ کر پکڑا۔ اگر وہ اس کے بغیر چلی جاتی تو سمجھو ممی دونوں کا حشر کر دیتیں۔

’’ٹھہرو تو سہی۔ کیسی جلدباز ہو۔ میں میک اَپ اتار کر آ رہی ہوں۔‘‘

بس جیسے یہی تو ساری بات تھی۔ اِس ابھی آنے میں بھی اس نے آدھا گھنٹہ لیا۔ وہ لاؤنج میں صوفے پر ٹھوڑی کے نیچے ہاتھ رکھے حالاتِ حاضرہ کا جائزہ لیتی، خود کو وہاں ہمیشہ کی طرح اوپر اوپر محسوس کرتی رہی جیسے کسی نے جگساپزل کا کوئی غلط ٹکڑا کہیں اور ٹکا دیا تھا۔ ساری صورت ہی بدل کر رہ گئی تھی۔

وہ باہر آئی تو اس کا چاند چہرہ ہمیشہ کی طرح روشن تھا۔ وہ کتنی دیر سے اس کا انتظار کر رہی تھی اور وہ اپنے ساتھ ایاز کو لیے چلی آ رہی تھی۔ سائمہ کی کار کی چابی اس کے ہاتھ میں تھی اور جانے اس کے ارادے کیا تھے؟ وہ چابی سے سر تال کا کام لے رہا تھا۔ سیم کا حلقۂ احباب اسے یوں بھی سخت ناپسند تھا اور ایاز جیسے خود پرست لوگ، اس کے آگے پیچھے کئی گانے ہٹ ہو گئے تھے۔ حالاں کہ ایک دشمن ملک کا چربہ بھی تھا۔ لیکن اسے پروا ہی کیا تھی۔ وہ اب بھی پبلک میں اودھم مچاتا پھر رہا تھا۔ وہ جس قدر خوش خوش گاتا بجاتا باہر نکلا تھا، صوفے پر انتظار کرتی اس کی بہن نے جیسے اس کی ہنسی نوچ لی۔ وہ بڑی خاموشی سے بلکہ قدرے برہمی سے ان کی کار کی ڈرائیونگ سیٹ پر جا بیٹھا۔

’’آؤ مینا۔‘‘ سیم نے برابر میں جگہ بناتے ہوئے اسے پکارا۔

ایاز نے بھاگتی گاڑی کے بیک ویومرر سے شیشے سے باہر جھانکتی مینا کی طرف دیکھا۔ ایک کوفت سی اس کے چہرے پر اتر آئی۔ معلوم نہیں یہ بندوق والا چوکیدار اس کے ساتھ دن بھر کیوں رہتا ہے۔ اس نے بوریت دُور کرنے کے لیے ایک نظر سیم کی طرف دیکھا۔

’’کافی پئیں؟‘‘

’’میں نے میک اَپ اتار دیا ہے۔‘‘

’’گاڑی میں بیٹھے بیٹھے پی لیں گے۔‘‘

’’نہیں۔ ہرگز نہیں۔‘‘ پچھلی سیٹ سے مینا نے اسے نرم پڑتا دیکھ کر جھڑکا۔

’’ہرگز نہیں۔‘‘ سیم چائنا کے کھلونے والے طوطے کی طرح پر پھڑپھڑا کر آخری لفظ کا ٹیپ دہرا دیتی تھی۔ جس قدر ایاز کو وقت ساتھ گزارنے کی بےچینی تھی، اتنی ہی مینا کو اس سے پیچھا چھڑانے کی جلدی ہو رہی تھی۔ حالاں کہ سیم کو مینا کا زندگی سے لاتعلقی کا یہ انداز ذرا بھی نہیں بھاتا تھا۔ کیا حرج تھا وہ بےچارہ اتنی محبت سے کہہ رہا تھا۔ پھر وہ سارا راستہ نہیں بولا۔

البتہ اپنے گھر اترتے اس نے اصرار کرکے ان دونوں کو بھی اتار لیا۔ اس نے دیکھا سیم، ایاز کے گھر میں کس قدر مقبول تھی۔ وہ شاید سب جگہ ہی مقبول تھی۔ اس کی امی صدقے واری جا رہی تھیں۔ ایاز اپنی گائی ہوئی دھن ہلکے سروں میں اٹھا رہا تھا اور محبت پاش نظروں سے سیم کو دیکھتا نہال ہوا جا رہا تھا۔ اس کے بھائی کو ہی پہلی دفعہ احساس ہوا کہ کوئی اور بھی تھا ساتھ ،جو پیچھے رہ گیا ہے۔

’’آپ آیئے ناں سامنے، اس طرف بیٹھئے۔‘‘

’’بس شکریہ، اب ہم چلیں گے۔‘‘

اس نے ایسے شاہانہ غرور سے کہا جیسے اس کا حکم حرف آخر کا درجہ ہی تو رکھتا ہو۔ ایاز نے جھنجلا کر اپنا سر روک لیا۔ اسے پتا تھا اب سیم اس کے ارادے کے خلاف ایک لفظ نہیں کرےگی۔ اس کو اس کی بہن کا یہ مغرورانہ انداز شدید ناپسند تھا۔ کچھ نہ ہوتے بھی وہ اپنے آپ کو پتا نہیں کیا سمجھتی تھی۔

سارا راستہ اس نے مینا کی ڈانٹ تابعداری سے سنی تھی۔

’’ممی نے تمہیں تھکنے سے منع کیا تھا۔ تم لوگوں سے وعدے ہی اس لیے کرتی ہو کہ انہیں توڑ ڈالو اور اب جب وہ اتنی دیر کی وجہ پوچھیں گی؟ تمہیں کسی بات سے کوئی فرق ہی نہیں پڑتا۔‘‘

’’ہاں مینا! لیکن دیکھو، مزہ کتنا آیا۔‘‘

’’کسے؟‘‘ رات گئے اس نے تاروں کی چھاؤں میں نیچے برآمدے میں کھلنے والی سیڑھیوں میں بیٹھ کر سوچا، ’’کسے مزہ آیا۔ یہ تو دھوکا ہے کھلا۔ صریحاً۔ کیا ہے اس کی حیثیت اس گھر میں۔ وہ ممی کی حسین بیٹی کی حفاظت کے لیے اس کے ساتھ نتھی کر دی گئی ہے۔ پالنے والا تو رب ہے، وہ احسان نہیں جتاتا لیکن جن لوگوں کو ذمے داری سونپ دیتا ہے، وہ پالنے کا احسان مرتے دم تک جتاتے رہتے ہیں۔ بدلے میں آپ کی پوری زندگی گروی رکھ کر بھی تشویش میں مبتلا ر ہتے ہیں کہ کہیں گھاٹے کا سودا تو نہیں ہو گیا۔‘‘

اس نے سر اٹھا کر رنگ برنگے ستاروں کی طرف دیکھتے سوچا۔ آج پھر اس پر بقول فرح کے قنوطیت کا دورہ پڑا تھا اور اب تو یہ دورے اکثر پڑنے لگے تھے، زندگی اس کی تھی لیکن گزارنے کا اختیار کسی اور کو تھا۔

’’مجھے ذرا بک شاپ تک جانا تھا۔‘‘

’’چھوڑو فضول بات۔ آؤ باریزے میں کوئی نیا پرنٹ تلاش کریں۔‘‘ اس کا آئیڈیا کھڑے کھڑے رد کر دیا جاتا۔

پھر وہ کتابوں کی دکان چھوڑ کر باریزے کے تھان عدم دلچسپی سے جھانکتی رہتی۔ حتیٰ کہ وقت گزر جاتا۔ پھر کبھی وہ یونہی فرمائش کرتی، ’’آؤ فرح کی طرف چلیں۔‘‘

’’اونہہ فرح، بور۔‘‘ وہ ایک دم ہتھے سے اکھڑ جاتی۔ مجھے تو ویسے بھی پیڈی کیور کے لیے ’’ڈاکٹر شولز‘‘ جانا ہے۔

پھر وہ گرم پانی کے محلول میں پاؤں ڈبوکر بیٹھی رہتی اور وہ اس کے سجنے سنورنے کی آس میں غیر پسندیدہ رسالے کھولے اس کا انتظار کرتی رہتی۔ پھر کبھی تنگ آ جاتی۔

’’تم اس قدرت تو خوب صورت ہو سیم۔ آخر کہاں ہوگی حد!‘‘

کتنی دیر تک لوگ اسے پھٹی پھٹی آنکھوں سے پلٹ پلٹ کر دیکھتے تھے اور وہ گردوپیش سے بےنیاز اپنے چاہے جانے کو اپنا حق سمجھ کر استعمال کرتی جاتی۔ کبھی کبھی مینا کو لگتا وہ ہتک آمیز حد تک اس کے احکامات بجا لانے کی عادی ہو گئی ہے۔ عادت اور محبت میں فرق ہوتا ہے۔ شاید وہ یہ سب محبت میں کرتی تو اسے پتا بھی نہ چلتا۔

وہ خود ترسی میں مبتلا ہو رہی تھی۔

تیز دودھیا روشنی کے دو عدد دائرے کہیں سے اچانک پڑے اور اسے نور میں نہلا گئے۔ وہ کتنی دیر سے اندھیرے میں بیٹھی تھی۔ اس کی آنکھیں چندھیا گئیں۔ روشنیاں بند ہو گئیں۔ کار کا دروازہ کھول کر باہر نکلنے والا شخص قدم گن گن کر اس کی طرف آ رہا تھا۔

پاپا کا بزنس کونٹیکٹ، ممی کا ایڈمائرر، یا سیم کا فین۔

وہ عادی تو تھی ہی، منتظر بھی رہی۔

آنے والا پتلون کی جیبوں میں ہاتھ دیئے اس سے ذرا سا فاصلہ دےکر اس طرح کھڑا تھا کہ تاروں بھری روشنی میں اس کا دراز سایہ مینا کے وجود پر چھاتا، اس کے پیچھے برآمدے تک نکل گیا تھا۔

’’یہ عبدالرحیم صاحب کا گھر ہے؟‘‘ گمبھیر سنجیدہ لہجہ اور یہاں آنے والوں کے برعکس قطعی غیرخوشامدی انداز۔

’’جی ہاں۔‘‘

’’آپ ان کی بیٹی ہیں؟‘‘ اب کے اس نے اضطرابی انداز میں اپنے ایک پاؤں سے اپنا وزن دوسرے پاؤں پر ڈالتے ہوئے جھنجلا کر پوچھا تھا۔

’’جی!‘‘

’’مجھے فاروق کہتے ہیں۔‘‘ اس قدر یقین تھا اس کے لہجے میں گویا مجھے ماؤزے تنگ کہتے ہیں۔ نہ پہچاننے کا سوال ہی پیدا نہ ہوتا ہو۔ افسوس، چاندنووارد کے پیچھے کہیں طلوع ہو رہا تھا اور اس تاریکی میں زمین پر پڑتے لمبے سائے کے سوا اور کچھ دکھائی بھی نہیں دے رہا تھا۔ اس نے اس کا چہرہ کھوجنے کی کوشش کی۔ پتا نہیں کبھی دیکھا ہو تو یاد نہیں آ رہا تھا۔

’’آپ کے پاپا نے مجھے بلایا تھا۔‘‘ اس کی آواز میں ہلکا سا بے صبراپن تھا۔ وہ اپنے پہچان لیے جانے کے یقین سے گھر میں داخل ہوا تھا اور جس سے پالا پڑا تھا، وہ بےتوجہی سے اس کے راستے میں بیٹھی لاپروا بنی ہوئی تھی۔

’’آپ کے پاپا نے مجھے نو بجے کا وقت دیا تھا، آپ سے ملاقات کے لیے اور آپ نے کنفرم بھی کر دیا تھا اور میں تو ایک منٹ بھی لیٹ نہیں ہوا۔‘‘

اس نے کلائی اٹھا کر دور سے آتی روشنی میں وقت دیکھا۔اپنی بے وقعتی نے اسے اس گھرکی بیک گراؤنڈ میں مزید برہم کر ڈالا تھا۔ وہ حیرت زدہ سی بیٹھی سے کھڑی ہو گئی۔

’’میں نے؟ یہ کیسے ہو سکتا ہے۔ ‘‘چاند کی اجلی روشنی میں ڈوبا اس کا خفت آمیز چہرہ نووارد کے مقابل تھا۔ وہ دونوں ایک دوسرے کو قطعی جھوٹا سمجھ رہے تھے۔ تذبذب اور کشمکش میں مبتلا۔ پھر اس کشمکش سے پہلے نجات آنے والے نے ہی پائی۔

’’ٹھیک ہے سائمہ عبدالرحیم! آپ اپنے والد صاحب کو اطلاع دے دیجئےگا اور ان کو بتا دیجئےگا یہ اکلوتی لاڈلی بیٹیاں میرا دردِ سر نہیں ہوا کرتیں۔‘‘

اکلوتی۔ لاڈلی۔

وہ دور ہوتا جا رہا تھا اور اس کی آواز فاصلے کے تناسب سے کم ہوتی جا رہی تھی۔

’’اوہ!‘‘ وہ تیزی سے بے سوچے سمجھے اس کے پیچھے لپکی، ’’سائمہ۔ وہ دراصل میری، میں اس کی بہن ہوں۔ سائمہ نہیں۔‘‘

’’یہ کیسے ہو سکتا ہے۔ انہوں نے کہا تھا، میری ایک ہی بیٹی ہے۔‘‘

اس خفت کا سامنا اسے دن میں کئی مرتبہ کرنا پڑتا تھا۔ وہ سائمہ کے ماں باپ کو کیا کہتی تھی اور کس بات کی حق دار تھی۔ سائمہ عبدالرحیم اپنے والدین کی اکلوتی لخت جگر۔ یہ غلط نہیں تھا۔ وہ خیرات میں ساتھ پلی تھی اور ماں باپ کہنے کا حق بھی اسے اللہ کے نام پر دیا گیا تھا۔ یہ بھی درست تھا۔

اگر وہ ایک مرتبہ خفا ہوکر کار میں بیٹھ گیا تو ساری زندگی ممی، پاپا کو وضاحتیں دیتے گزر جائےگی۔ اس سے کہیں بہتر یہ نہیں کہ وہ اس شخص کے سامنے ہلکی پڑ جائے جسے وہ جانتی بھی نہیں اور جس کا سامنا ہونے کے آئندہ زندگی میں امکانات بھی نہیں۔ وہ گاڑی کا دروازہ کھول کر بیٹھنے کو ہی تھا۔ اس نے ساری خودداری تج کے دروازے پر اپنے ہاتھ رکھ دیئے۔

گاڑی کے کھلے دروازے کے ایک طرف وہ خفا ہوا اجنبی تھا اور دوسری طرف خفت زدہ سی وہ اور وہ کتنی بے ہودہ کہانی اسے سنا رہی تھی جیسے اس کے سر پر کڑھی ہوئی کروشیا کی سفید ٹوپی ہے۔ ٹخنوں سے اوپر کو اٹھے ہوئے پائنچے اور کندھے پر لال چوخانی رومال۔

بےگھر، بےماں باپ ہونے کا قصہ۔ اٹھا کر ان کے گھر لائے جانے کی کہانی اور بطور امداد ممی پاپا کہہ دینے کا حق۔

انہوں نے لمحے بھر کے لیے اس کی طرف دیکھا۔ وہ ہکلا رہی تھی، شاید اداس بھی تھی یا شاید ہمیشہ اداس ہی رہتی ہو۔ وہ کون سا اسے جانتے تھے، گاڑی کے کھلے دروازے پر اس کے ہاتھوں کی اضطرابی کیفیت، پیشانی پر بکھرا پسینہ اور بلاو جہ سچ بولنے کی ہکلاہٹ۔

’’کیا ضرورت تھی بھلا، ایک اجنبی شخص کے سامنے اس قدر تلخ اور طویل ترین سچ بولنے کی؟‘‘

’’معاف کیجئے۔‘‘ انہوں نے ایک لمبا سانس کھینچا، ’’مجھے ہی غلط فہمی ہوئی، پہلے مجھے معلوم کر لینا چاہیے تھا۔ میں سمجھا آپ سائمہ عبدالرحیم ہیں۔‘‘

’’آپ مجھے سائمہ سمجھے تھے۔‘‘ وہ بےساختہ ہنس پڑی اور ہنس پڑنے سے سابقہ ساری تلخی دُھل کر صاف ہو گئی تھی، ’’آپ اسے پہچانتے نہیں کیا؟‘‘

’’کیا مطلب؟ سب لوگ انہیں پہچانتے ہیں؟‘‘

’’ارے۔۔۔ وہ تو اتنی مشہور ماڈل ہے۔‘‘ ساری زندگی اس کو ٹوکنے کے باوجود اس کے لہجے میں اس کے لیے کس قدر افتخار تھا۔

’’اوہ۔ اچھا۔ میں ٹی وی نہیں دیکھتا۔‘‘

’’کیوں؟‘‘

’’کیوں کیا؟ کیا دیکھنا ضروری ہے۔ اچھا اب دیکھ لیا کروں گا۔‘‘ اسے لگا ان کے لہجے کی تابعداری میں بلاو جہ کی شرارت تھی۔

’’آہ۔ مائی سن!‘‘ ممی دفعتاً دائیں طرف سے نمودار ہو کر ان کی طرف لپکیں۔

’’فاروق، میرے بچے۔‘‘ ممی کے اندازِ محبت بوڑھی انگریز عورتوں سے مشابہ ہوتے تھے۔ گال سے گال ٹکرا کر ہوا کو بوسہ دیتے ہوئے، ’’سوپنکچوئل، ڈارلنگ۔‘‘

دفعتاً انہوں نے گاڑی سے بےحد نزدیک کھڑی ثمینہ کو پلٹ کر دیکھا، ’’ارے مجھے مینا نے بتایا بھی نہیں۔ آؤ اندر چلیں۔‘‘

وہ دونوں اس کے سامنے روشن اور گرم کمروں میں غائب ہو گئے۔ ’’معلوم نہیں۔‘‘ ثمینہ نے ازسرنو حالت حاضرہ کا جائزہ لینا شروع کر دیا، ’’محبت کا یہ مصنوعی انداز اور شفقت کی یہ سرد گرمی صرف مجھے نظر آتی ہے۔ لوگوں کو کیوں دکھائی نہیں دیتی۔ شاید لوگ اپنے ماحول میں اس لب ولہجے کے عادی ہوتے ہیں، صرف میں ہی عادی نہیں ہو پائی۔‘‘

اس ہر روز کے واقعے میں اس روز بھی کوئی خاص بات نہیں تھی۔ گھر والے گھر چلے گئے۔ ان کے پاس ایک منزل تھی۔ وہ واپس اپنی سیڑھیوں پر آ بیٹھی کہ ابھی تک راستے میں تھی۔ واقعہ غیر اہم ہی ہو کسی کسی بات پر آپ کو لگتا ہے آج کل نئی بات ہوئی ہے جو اس سے پہلے کبھی نہیں ہوئی تھی۔ ایک تو یہی کہ جس طرح مہمان اور میزبان اسے سیڑھیوں پر تنہا چھوڑ گئے تھے، اسے اپنے غیر اہم ہونے کا شدت سے احساس ہونے لگا تھا۔ یہ احساس بالکل اجنبی تھا۔

جب ممی پاپا مہمان کو رخصت کرنے باہر آئے تو وہ اسی حالت میں گھٹنوں پر ٹھوڑی رکھے ابھی تک انہی سیڑھیوں پر بیٹھی تھی۔ مہمانوں کو گزرنے کے لیے راستہ دینے کو اس نے خود کو اپنے اندر سمیٹا اور وہ گزر بھی گئے، بس۔ اس سیڑھیوں کے اس پار جانے والے اس کے ذاتی حلقۂ احباب سے قطعی مختلف ہوتے تھے۔ اس کی ان سے کوئی خاص بنتی بھی نہیں تھی، اس لیے اپنے رد کر دیئے جانے کا دکھ بے سبب ہی تھا۔

مہمان نے رخصت ہوتے سمے گاڑی کی روشنیاں نادانستہ اس کے چہرے پر پھینکیں اور مڑکر گیٹ سے باہر غائب ہو گیا۔

سائمہ نے سونے سے پہلے اسے بلایا۔ وہ ممی کا سارا غصہ ثمینہ کے سامنے ہی نکالتی تھی۔

’’وہ ہر جگہ بیٹھ کر میری بیماری کی باتیں کرتی رہتی ہیں۔ ان کو کہو تم، میری بیماری کا ڈراما نہ بنائیں۔ مجھے کوئی بیماری نہیں۔ بس میں تھک جاتی ہوں۔‘‘

اس کو عادت تھی عمر بھر کی، قاصد کبوتر کی طرح اِدھر کا پیغام ادھر اور ادھر کا ادھر لڑھکانے کی۔ وہ کہہ دےگی اسی طرح اور ممی کی جھاڑ جواباً اس تک پہنچا دےگی۔

اس رات کی صبح اسے پتا چلا کہ سیم کی طبیعت رات بھر خراب رہی ہے۔ رات بھر اس کا سینہ جلتا رہا اور الٹیاں آتی رہیں۔ اس کے باوجود وہ کام پر چلی گئی۔ اب جواب دہ مینا تھی۔

سیم خوف زدہ رہتی تھی ،اگر اس کی بیماری کا معمولی سا شہرہ بھی ہو جاتا تو ایڈ اس کے ہاتھ سے نکل جاتی اور اخبار میں خبر لگ جاتی کہ اس کی جگہ اب کوئی اور ہے۔ اپنی شہرت کے مقابلے میں اسے معدہ کا السر بھی قبول تھا۔ وہ منہ زور ہو گئی تھی۔ یہ گستاخی اور حکم عدولی کا انداز اس نے ممی کی شہ پر ہی سیکھا تھا اور اب یہ ممی کے لیے ہی قابلِ قبول نہیں تھا۔ لیکن ان کی زندگی میں مصروفیت بھی اس قدر تھی۔ ہر روز وہ گوٹے کے ہاروں اور پھولوں کے مہنگے مہنگے گلدستوں کے ساتھ گھر میں داخل ہوتیں تو ان کو اپنا آپ ہوا میں اڑتا محسوس ہوتا تھا۔ کہاں سے لاتیں وہ اتنی فرصت کہ زمین پر اترکر اپنی اولاد کی اصلاح کر سکتیں۔

اور پھر سیم کی شہرت کی داد بھی تو سب سے زیادہ وہی سمیٹتی پھرتی تھیں۔ جب ممی کی سہیلیاں چیخیں مار مارکر سیم کے حسن کے چرچے کرتیں اور اپنے بدھو اور بےراہرو بیٹوں کا ذکر ممی کو للچانے کے لیے بڑھا چڑھا کر کرتیں تو ممی سیم کی ساری خطائیں بھول جاتیں۔ پھر ممی کو دعوتیں اٹینڈ کرنے اور منعقد کرنے کا بھی بہت شوق تھا۔

اس دن بھی جب گھر میں پارٹی تھی تو سیم کا رنگ ہمیشہ سے زیادہ زرد تھا۔ لیکن ممی کو یہ تمغہ عوام تک پہنچانا ہی تھا۔ وہ صرف پون گھنٹہ میک اَپ مین کے پاس گزار کر واپس آئی تو اس نے اسے پوری محفل پر چھا جانے کے قابل بنا ڈالا تھا۔

فرح چپ چاپ ثمینہ کے پاس آ بیٹھی۔ وہ طبقہ امراء کے ان چونچلوں سے ناواقف ہونے کی بنا پر خوب متاثر ہو جاتی تھی۔ سب مشہور مشہور لوگ تھے، وہ لوگوں کو آ کے لوگوں سے ملتے اور اپنی اپنی جگہیں سنبھال کر بیٹھتے، دم بخود دیکھتی رہتی تھی۔ یہ وہ لوگ تھے جن کی شکلیں اخباروں میں نظر آتی ہیں یا خبرنامے میں۔ سب سے زیادہ باعزت وہ ہے جس کے پاس سب سے زیادہ دولت ہے۔ یہ دولت آتی کہاں سے ہے، اب کسی کو اس کی پروا نہیں رہی تھی۔ خود لوگ بھی نہیں شرماتے۔ یہ ٹھگوں کی منڈی ہے، یہاں ایک دوسرے کے مفادات کا تحفظ کیا جاتا ہے۔ بس دولت ہونی چاہیے۔

سیم، ایاز کے ساتھ تھی اور ممی اس کو بلا بلاکر لوگوں سے ملوا رہی تھیں۔ ایاز اپنے آپ میں نہیں تھا۔ فرح اس پر دور بیٹھی چٹکلے چھوڑ رہی تھی۔ ’’یہ ایاز کی اماں ہیں اور یہ ان کی گردن کی جھریوں میں کس چیز کا بھراؤ کیا گیا ہے۔ اف خدایا ،یہ ٹیلکم پاؤڈر ہے۔ دیکھو دیکھو تمہاری ممی کی سہیلی اپنے سے آدھی عمر کے لڑکے سے کس قدر گھناؤنے طریقے سے فلرٹ کر رہی ہیں اور یہ مسٹر کون ہیں۔جب بھی فلاں آنٹی سے بات کرتے ہیں تو لگتا ہے رال ٹپک رہی ہے۔ اف بدنیت اور دیکھو وہ والی آنٹی۔‘‘

’’تم دیکھو، میں تو روز دیکھتی ہوں۔‘‘ مینا نے اکتاہٹ سے کہا، ’’اور پلیز صرف آنکھوں سے دیکھو، انگلیاں مت اٹھاؤ۔‘‘

ممی نے اس کی طرف دیکھا۔ وہ بھی صرف آنکھوں سے دیکھتی تھیں اور آنکھوں سے بولتی تھیں۔ مینا کو یہ زبان پڑھنے میں بھی مہارت ہو گئی تھی۔ اس کو اِس بات کا دھیان رکھنا تھا کہ سیم اپنے آپ کو بہت زیادہ تھکا نہ ڈالے اور وہ اپنی کرسی پر بیٹھی اپنے آپ میں گم کام چور افسروں کی طرح بیٹھے بیٹھے احکامات جاری کر رہی تھی۔

’’بس کرو سیم۔ یہ کرو سیم۔ وہ مت کرو سیم۔‘‘

فرح وہاں سے اٹھ کر کسی دلچسپ کونے کی تلاش میں چلی گئی۔ وہ کونے میں رکھی کرسی پر تنہا بیٹھی اس محفل میں ہونے کے باوجود محفل کا حصہ نہیں لگ رہی تھی۔ بہت زیادہ لوگ اس کی طرف متوجہ نہیں تھے بلکہ روشنیوں کے اس سیلاب اور رنگ برنگی یلغار میں وہ سیدھے بالوں اور سادہ کپڑوں والی لڑکی دکھائی بھی نہیں دیتی تھی۔

وہ اس نیم تاریک کونے میں یوں آ بیٹھی تھی جیسے ذمے داریاں نبھانا اور روزگار حلال کرنا اسی کا فرض رہ گیا ہو۔ اس قسم کے لوگ کوئی خاص پسند نہیں کیے جاتے، جن میں نخرہ نہ ہو، جو اچھل اچھل کر آپ کے کندھوں پر نہ آتے ہوں اور جنہوں نے اترا اتراکر میدان نہ مار لیے ہوں۔ ابھی ابھی اس پر یہ سارے اعتراضات فرح نے کیے تھے۔

فرح نے بتایا تھا، ’’تم میں گلیمر نہیں ہے۔ اس لیے گلیمرس پسند لوگوں کو کلک نہیں کرتیں۔‘‘

ایاز، سیم کو سنبھالے سنبھالے پھر رہا تھا۔ جیسے وہ کانچ کی بنی نازک سی چیز ہو۔ وہ خود کو بھی Fragile سمجھتی تھی۔ جیسے اس پر لکھا ہو، ’’برائے کرم مجھے احتیاط سے ہاتھ لگایئے۔‘‘ اگر وہ بار بار ناک نہ چڑھاتی تو لوگوں کو کیسے پتا چلتا، وہ ہے سائمہ عبدالرحیم، نمبرون ٹاپ ماڈل۔ یہ آخری حروف اس کے ساتھ ڈگریوں کی طرح چسپاں ہو کر رہ گئے تھے۔ اسے خود بھی اپنا نام ان لفظوں کے بغیر ادھورا لگتا اور وہ خوف زدہ ہو جاتی تھی کہ کہیں یہ اعزازی تمغات اس سے چھین نہ لیے جائیں۔ ان ہی کی حفاظت کے لیے اس نے اٹھائیس کورس کے ڈنر سے کھیرے کے سوا کچھ بھی نہیں اٹھایا تھا۔ روغنیات سے پرہیز کیے اس کو اس قدر طویل مدت گزر چکی تھی کہ وہ جب بھی نوالہ شوربے میں ڈبوکر کھا لیتی تو ساری رات درد سے تڑپتی رہتی۔

پھر بھی یہ ہوا کہ اتنے سخت پرہیز اور طویل فاقوں کے باوجود پارٹی کی رات اس کے پیٹ میں بے حال کرنے والا درد اٹھا اور اپنی تمام تر آزاد خیالی کے باوجود ممی کو یقین رہا کہ کسی بدخواہ کی نظر نے اسے بیمار کر ڈالا تھا۔ سائمہ ساری رات مینا کے کمرے میں گرم پانی کی بوتل سے ٹکور کراتی، کراہتی رہی۔ ان وعدوں اور قسموں کے ساتھ کہ وہ صبح ممی کو درد کی اتنی شدت کے بارے میں کچھ نہیں بتائےگی۔

اور یہ تو اس کو تین دن بعد پتا چلا کہ اس صبح وہ مری چلی گئی تھی۔ اس کے ٹیسٹ تھے اور وہ ان دنوں فرح کی طرف ٹھہری ہوئی تھی۔ وہ ٹیسٹ دے کر باہر نکلی تو سررضی نے اسے بتایا کہ کلرک نے انہیں بتایا تھا کہ اس کے گھر سے فون آیا ہے، وہ فوراً گھر پہنچے۔ وہ بھاگم بھاگ گھر پہنچی۔

گھبرائی بوکھلائی وہ اندر آئی تو ممی پہلے ہی کہیں جانے کے لیے تیار کھڑی تھیں۔ مع اپنی بوسیدہ تقریر کے، وقت کے ساتھ جس کا ایک لفظ بھی تبدیل نہیں ہوا تھا۔

’’فکر سے میرا برا حال ہے، مگر وہ کسی کی سنتی ہی کب ہے۔ تم سے اس لیے کہتی ہوں، تمہاری بات مان لیتی ہے۔ میں تو کبھی اسلام آباد نہ جاتی۔ ارے بھاڑ میں گئی این جی اوز کی میٹنگ، کہیں اولاد سے زیادہ پیاری کوئی چیز ہوتی ہے۔ پر اب کیا کروں، وعدہ کر بیٹھی ہوں۔ میری تو سیمینار کے لیے تقریر بھی لکھ کر آ چکی ہے اور یوں بھی اس کا کون سا میرے ساتھ دل لگتا ہے، وہ تو تمہارے ساتھ ہی خوش رہتی ہے اور تم تو خود گواہ ہو۔ ہم نے کبھی فرق نہیں کیا اس میں اور تم میں، اتنی سی تھیں تم جب تمہاری امی۔۔۔‘‘

اس کے بعد کا سارا واقعہ اسے ازبر تھا اور یہ بھی یاد تھا کہ جب وہ وہاں پہنچے گی تو وہ اسے بھول کر روشنیوں ،کیمروں اور بیوٹیشن کی دنیا میں مصروف رہےگی۔

جب وہ شدید کہرے اور بارش میں مری پہنچی تو شام ڈوب رہی تھی۔ سردی کی لہر نے اس کی ناک سرخ کر ڈالی تھی۔ کشمیر پوائنٹ تک ان کے ولا پر پہنچتے پہنچتے لمبی پیدل واک نے اسے اکتا ڈالا تھا اور وہ یہ سمجھنے سے عاجز ہی رہی تھی کہ وہ ساری دنیا بھول کر پھر کیوں اس کی خدمت پر کمربستہ ہو جاتی تھی۔ وہ کیوں آخر ہمیشہ ہمیشہ کے لیے اس کے ساتھ نتھی کر دی گئی تھی۔ کتنی مرتبہ ہی ہر موڑ پر اس کا جی چاہا، وہ یہاں سے پلٹ جائے، ہمیشہ ہمیشہ کے لیے کہیں گم ہو جائے یا بھاگ جائے، لیکن اب اس میں بھاگنے کا حوصلہ تو کیا مزید چلنے کی بھی ہمت نہیں رہی تھی۔ اس شدید سردی میں دکاندار اپنی دکانیں بند کرکے گھروں کی گرمی کی طرف روانہ ہو رہے تھے، کہیں کہیں چائے والے اپنے کھو کے کھولے آخری گاہکوں کے منتظر تھے۔

باہر کا بلب روشن تھا۔ اندر کمروں سے چھن چھن کر آتی نیلی دھندلی روشنی میں حرارت اور گرمی کا احساس ہو رہا تھا۔ اتنی دیر تک برفیلی ہواؤں سے لڑتے اور ناک میں لگنے والی ہوا کے خلاف جدوجہد کرتے جب اس نے کمرے کا دروازہ کھولا تو وہ دھک سے رہ گئی۔ وہ کس قدر بیمار، زرد اور برسوں کی مریض لگ رہی تھی۔ اچھا ہی کیا وہ آ گئی، اسے ہمیشہ بگڑے بچوں کی طرح کسی کی انگلی پکڑ کر چلانے والے کا انتظار رہتا ہے۔

’’ممی نہیں آئیں؟‘‘ لحاف میں دبکے پتا نہیں اس نے کس بے ساختگی میں پوچھا تھا۔ وہ خاموش رہ گئی۔ آج تک ساری زندگی وہی اپنے ماں باپ کے نہ ہونے کا رونا روتی آئی تھی۔ یہ تو اس نے پہلی دفعہ دیکھا کہ ماں باپ تو اس کے بھی نہیں تھے، وہ بھی اسی کی طرح تنہا اور مظلوم سی تھی۔ ماں کی شکل میں اس کو اس کی کامیابیوں پر فخر کرنے والی ایک تحریر ہی ملی تھی۔ واقعی وہ سلولائیڈ پر اتنی کامیاب ثابت نہ ہوتی تو اس کی ماں اس کی کس چیز کو سراہتی۔ شاید اسی لیے وہ اپنے اس واحد اعزاز کو برقرار رکھنے کے لیے دن رات کوشاں تھی۔

اس وقت جب وہ سیم کا دروازہ کھول کر اس کے کمرے میں داخل ہو رہی تھی، عین اسی وقت اس کے ماں باپ کا جہاز ترکمانستان کی سرحدوں میں داخل ہو رہا ہوگا۔ ہر شخص اپنے ہونے کو ثابت کرنے کے لیے جیے جا رہا ہے اور یہ بھی عجیب وبا پھوٹی تھی ان دنوں لوگ روس کی مسلمان ریاستوں کے چکر لگاکر اپنا اور ان کا ایمان اسی طرح تازہ رکھے ہوئے تھے۔

وہ خلاف عادت اپنے بستر پر لیٹی تھی، اس قدر لمبے چوڑے بستر پر اس کا چھوٹا سا وجود کس قدر بےمعنی اور بےکار لگ رہا تھا۔ اس نے مینا کی آنکھوں میں اپنے لیے ترس اور رحم امنڈتے دیکھا۔ اپنا آپ اسے کس قدر حقیر لگا۔ وہ مہمان مہمان کھیلنے لگی۔

’’زینب سے کہو، تمہارے لیے کافی بنا لے۔ جو کچھ کھانا چاہو اسے بتا دو۔ وہ بہت جلدی بنا لیتی ہے، مجھے نہیں معلوم تھا کہ تم آج پہنچو گی ورنہ میں کچھ پکوا ہی لیتی۔ آؤ میرے بستر میں آ جاؤ۔‘‘

وہ بہت سمجھ دار لڑکی تھی۔ اس نے ایسے بہت سے سوال نہیں کیے، جن کا جواب شرمندگی کے سوا کچھ نہیں ہوتا۔

وہ حسنِ جہاں سوز بجھا بجھا ضرور تھا لیکن گھائل کر دینے والی صلاحیتوں سے عاری نہیں ہوا تھا۔ آتش دان میں آگ کے شعلے دھڑ دھڑ بھڑک رہے تھے، جس میں اس کی بیمار رنگت اور بھی سفید لگ رہی تھی۔ وہ تنہا تھی اور اکیلی، تکیوں کے سہارے کندھوں تک لحاف ڈالے وہ کسی کی منتظر تھی۔ شعلوں کی طرف نظریں جمائے وہ ان تمام چیزوں سے نظریں چرا رہی تھی۔

یہ کہ تم اتنی دُور اکیلی میرے پیچھے کس رشتے کس ناتے کے تحت بھاگی آتی ہو، کون لایا ہے تمہیں یہاں؟ کیا تم اتنی ہی غیر ضروری ہو کہ کسی کو تمہاری ضرورت نہیں ہوتی؟ تمہیں کسی دوسرے کی تلاش نہیں؟ اور وہ لوگ خود کہاں ہیں جن کو تمہاری بجائے میرے بارے میں فکرمند ہونا چاہیے، قاعدے کے مطابق؟

جواباً مینا نے بھی احمقانہ سوالات کرکے اسے تنگ نہیں کیا تھا۔ احسان نہیں لادا تھا۔ اکتاہٹ کا مظاہرہ نہیں کیا تھا اور سب سے بڑی بات یہ کہ اس کی صحت کے بارے میں لایعنی سوال کرکے اسے کسی جھنجلاہٹ میں مبتلا نہیں کیا کہ یہ واحد موضوع تھا جس سے وہ بے حد نظریں چراتی تھی۔

اس ٹھنڈے یخ بستہ گھر میں زینب اور اس کے چاچا کی وجہ سے حرارت اور زندگی کا احساس ہوتا تھا، وہ سردی سے بے نیاز متحرک انداز میں ادھر ادھر پھرتے نظر آتے تھے۔

’’تم کافی لوگی؟‘‘مینا نے ٹرالی اپنے سامنے گھسیٹتے اس سے پوچھا۔

’’نہیں۔ ایک بسکٹ دے دو۔‘‘

’’کھاؤ سیم! اپنے معدے کو اس مشقت کی عادت ڈالوگی تو ٹھیک ہو جاؤگی۔‘‘

مینا کو پتا بھی نہ چلتا، وہ بکتے جھکتے کب ایمان داری سے اس کی گورنس کا کردار ادا کرنا شروع کر دیتی تھی۔

’’تمہیں پتا ہے۔ میرا وزن قابو میں نہیں آتا پھر۔ ‘‘

’’مجھے تو نہیں پتا، خیر میں نے تو کبھی تمہارا وزن بےقابو نہیں دیکھا۔‘‘

’’ارے واہ! ابھی پچھلے ماہ میری کمر کے گرد ٹائر آنا شروع ہو گیا تھا۔‘‘

مینا جانتی تھی، یہ بکواس ہے بالکل، اس کی کمر پر کبھی ایک تولہ چربی بھی فالتو نہیں آئی تھی۔ وہ صرف وہم کی مریض تھی۔

مری کے اس گھر میں صبح کا اپنا جوبن تھا۔ وہ رات کو سو کر صبح اٹھی تو ہشاش بشاش اور تازہ دم تھی۔ ابھی برف پڑنا شروع نہیں ہوئی تھی لیکن ساری وادی پر کہرے کا ایک گہرا بادل چھایا ہوا تھا اور کہیں کہیں دور کشمیر کی خوب صورت چوٹیوں پر جھلملاتی سنہری دھوپ۔ گھروں کی چمنیوں سے نکلتا ہوا گاڑھا کثیف دھواں کہ ایک نیا دن شروع ہو گیا ہے اور لوگ ابھی زندگی سے مایوس نہیں ہوئے۔ وہ کبھی مایوس نہیں ہوتے۔ وہ جو گرز چڑھا کر پروں والی گرم جیکٹ کے کالر سے ناک ڈھانکے پیڈڈدستانوں سے باہر نکلی تو اسے اندازہ ہوا زندگی برتنے کا یہ مصنوعی انداز ہے۔ آس پاس کے دیہاتوں سے کام کاج پر آنے والے لوگ، زردی سے کھنڈا چہرہ لیے، بغلوں میں ہاتھ دبائے ٹھٹھرے ہوئے آنا شروع ہو گئے تھے۔

ابھی اس نے منہ سے بھاپ اڑاتے سڑک کے گرد دو تین چکر ہی لگائے تھے کہ سارا مری محنت کرنے کے لیے آنے والوں سے بھر گیا۔ وہ رات والی ویرانی کا کہیں شائبہ بھی نہیں تھا، ہر طرف محنت کے بوجھ سے جھکی کمروں والے اور سردی کی شدت سے پھیپھڑوں کے امراض میں مبتلا لوگ، اپنے گھر والوں کے لیے روٹی کمانے نکل آئے تھے۔وہ زیادہ دور نہیں گئی تھی کہ واپس آ گئی۔ سائمہ راتوں کو جاگتی تھی، اس لیے نیند کی گولی لے کر دھت ہوکر دن چڑھتے تک سوتی رہتی۔ وہ واپس آئی تو سڑک کی چڑھائی کی مشقت سے اس کا سانس پھول رہا تھا اور رنگت پر بھی سردی کی شدت سے سرخی غالب آ گئی تھی۔ البتہ سائمہ کے کمرے کا دروازہ ہنوز بند تھا۔

وہ کھانے کی میز پر تنہا بیٹھی اپنے ابلے انڈے کو دیر تک الٹتی پلٹتی رہی۔ زینب نے سورج کے رخ کھلنے والی کھڑکیوں کے پردے ہٹا دیئے تھے، دھوپ کی شعاعوں میں نظر آنے والے متحرک ذرات اور چائے میں سے اٹھتی بھاپ مل کر ساری فضا کو فعال بنائے ہوئے تھے۔ ہر ذرّہ حرکت میں تھا اور شاید وہ ذرّے سے بھی غیر اہم تھی کہ ساکن بیٹھی محض آنے والے وقت کا انتظار کر رہی تھی۔ وہ اپنی بیوٹی سلیپ لے کر دن چڑھے سوکر اٹھی۔ زینب اپنے کوارٹر میں دوپہر کی ہانڈی کی خوشبو ئیں اڑا رہی تھی۔ وہ مینا کو ڈھونڈتی لیونگ روم میں آئی تو وہ اپنی کرسی میں غرق کچھ پڑھ رہی تھی۔ سائمہ ابھی تک نیند کی مدہوشی میں تھی۔ وہ اسی کے پاس پڑے صوفے پر اس کے سامنے پھر سے ڈھیر ہو گئی۔

’’میں تمہیں سارے گھر میں ڈھونڈ رہی تھی۔ میں نے سوچا، پتا نہیں کہاں چلی گئی ہو۔‘‘

مینا نے کتاب بند کرکے اس کے فقرے کی ساخت پر غور کیا۔ خوف زدہ سہمے ہوئے اکیلے بچے کی طرح وہ گھٹنے پیٹ کی طرف موڑے اس کے قریب آکر پھر سو گئی تھی۔

’’بور ہو گئی ہو مینا! اف ڈیڑھ بج گیا۔‘‘ وہ نیند پوری کرکے اٹھی تو مینا اسی حالت میں اسی جگہ بیٹھی تھی۔

’’مجھے تو پہنچنا تھا ساڑھے تین بجے۔‘‘ وہ تیزی سے بھاگتی ہوئی گئی اور غسل خانے کے دروازے پر رک گئی۔

’’ہاں مینا! ایاز آئےگا شاید۔ اس سے کہنا تم اکیلی ہو۔ میں یہاں نہیں آئی۔‘‘

’’ایاز کو بھی۔۔۔‘‘ اسے دھکا لگا۔ کس قدر برق رفتاری سے وہ اپنی دوستیاں تبدیل کر رہی تھی۔ یہ دھکا تو وہ پاپا کو بھی پہنچائےگی، جب سے انہیں پتا چلا تھا، وہ گلوکار ہونے کے علاوہ امیر باپ کا بھی بیٹا ہے تو انہوں نے اس کی گلوکاری سے بھی سمجھوتہ کر لیا تھا۔

’’پلیز مینا! میں اس کے لسوڑھے پن سے تنگ آ گئی ہوں۔ چاپلوس سا۔ تم میری خاطر اتنا جھوٹ بھی نہیں بول سکتیں؟ کہہ دینا میں لاہور سے نہیں آئی بلکہ اور بھی دور چلی گئی ہوں۔ سنگاپور، ملائیشیا، جاپان، جہاں مرضی بھیج دینا۔‘‘

وہ بہت فرصت سے نہا کر اور بھاپ میں بھیگے تولیے سے بال لپیٹے باہر آئی تو مینا ابھی بھی اسی حالت میں بیٹھی تھی۔

’’بغیر کھانا کھائے مت جانا۔‘‘

’’بائی گاڈ مینا بالکل دل نہیں چاہ رہا۔‘‘

’’اچھا چلو سیب چھیلوں؟‘‘ مینا نے رسان سے پوچھا۔

’’اور ہاں ممی کا فون آیا تھا۔ انہوں نے پیغام دیا ہے کہ کسی ڈاکٹر کو انہوں نے کہا ہے، وہ تمہیں دیکھنے آئےگا۔ اس کو دکھا دینا۔ وہ ان کا دوست ہے لہٰذا۔‘‘

’’تم دکھا دینا پلیز مینا۔ ممی کو کیا پتا چلےگا۔‘‘

اب اسے کوفت ہونے لگی تھی۔ حماقتیں سائمہ پر ختم تھیں اور کیسے اچھوتے خیالات اس کے ذہن میں آتے تھے۔

ایک کے بعد ایک، جھوٹ کی تعداد بڑھتی جا رہی تھی۔ سائمہ کوئی بھی بات بلاو جہ یونہی مذاق میں یا بے مقصد کہتی بھی نہیں تھی۔ اس نے سانس روک لیا۔ اس کے دونوں جھوٹ اسے نبھانے ہوں گے۔

وہ جتنی دیر تیار ہوتی رہی، اتنی دیر مینا سیم کے ٹائٹل سے سجا فیشن میگزین دیکھتی رہی۔ وہ عموماً مینا ہی کے اردگرد منڈلاتی تھی۔ تیار ہونے کے لیے بھی وہ اپنا بیوٹی بکس اس کے شیشے کے سامنے اٹھا لاتی تھی۔

’’تم کتنی خوش قسمت ہو مینا!‘‘ اس نے شیشے میں اس کا سراپا غور سے دیکھتے ہوئے کہا۔

’’واقعی؟‘‘ مینا نے میگزین بند کر دیا تھا، ’’کس طرح بھئی؟‘‘

’’کوئی تمہیں روکنے ٹوکنے والا نہیں۔ اپنی مرضی سے جیتی ہو۔ میرا تو کوئی لمحہ بھی میرا اپنا نہیں۔‘‘

اس نے حلق سے تھوک نگل لیا۔ اس طرح انسان خود کو بہت سی ان چاہی باتیں کہنے سے بچا لیتا ہے۔ اپنی بدقسمتی اور بے کسی کی داستان سنانا اسے اچھا بھی نہیں لگتا تھا۔ وہ اگر ان واقعات سے اب تک آگاہ نہیں ہوئی تھی تو اب بھی کیا جان پائےگی۔ بہرکیف وہ زندگی میں اس سے خوش قسمت تو تھی ہی۔

اس کو کسی سے مقابلے کی آگ جلاتی نہیں تھی۔ اول آنے یا پیچھے رہ جانے کا ملال اسے ڈستا نہیں تھا۔ علاوہ ازیں وہ معدے کے زخم کی تکلیف میں بھی مبتلا نہیں تھی۔

وہ چلی گئی اور مینا سرخ سورج کو پہاڑوں کے پیچھے غروب ہوتے اور ساری وادی کو آگ سے رنگے دیکھتی رہی۔ آسمان پر بادلوں کے اس قدر اداس کر دینے والے رنگ تھے۔ نارنجی، زرد، پیلا ،سرخ، سیاہی مائل تاریک پڑتے رنگ،جیسے کسی قنوطی نے کوئی پینٹنگ کی ہو۔ اتنی سی دیر میں وہ ایاز کو دو مرتبہ مایوس کر چکی تھی۔ فون پر بھی اور براہ راست آ جانے پر بھی۔ ابھی بھی اس کی مارگلہ باہر کھڑی تھی اور وہ یقین کرنے سے انکاری تھا کہ لال سوزوکی میں لاہور سے سیم کی بجائے وہ خود آئی تھی۔ اس نے لاہور فون کرکے کنفرم بھی کر لیا تھا کہ وہ یہیں ہے لیکن سریش کی طرح ہر وقت اس کے ساتھ چپکی رہنے والی بہن، اسے بھگا دینے کے درپے تھی۔

وہ مایوسی سے گردن جھکائے جب واپس جا رہا تھا تو مینا کو بہت دکھ ہوا۔ سیم بڑی سہولت سے دل توڑتی اور نئے خریدتی رہتی تھی۔ ابھی ایک شخص اس کے حواس پر سوار ہوتا، وہ دن بھر اس کے قصیدے پڑھتی اور تعریفیں کرتے کرتے اسے بھی بور کر ڈالتی تھی۔ پھر دیکھتے ہی دیکھتے وہ اکتا جاتی اور پھینک کر ایسے بھولتی کہ بھولے سے بھی اس کا ذکر درمیان میں نہ آتا۔ اسے اپنے بے پناہ حسن کی آزمائش مقصود ہوتی تھی۔ ہر نیا شخص ایک طرح کا ریفریشر کورس ہوتا تھا۔ وہ عموماً پچھلے شخص کو کسی نئے شخص کی آمد پر ہی ڈسٹ بِن میں ڈالتی تھی۔

یہ نیا شخص کون تھا؟

وہ نیا شخص رات کا کھانا لگنے سے پہلے آ بھی گیا۔وہ پی سی بھوربن میں ٹھہرا ہوا تھا۔ بےچارہ تازہ تازہ یتیم ہوا تھا اور اس یتیمی میں اس کے ہاتھ لمبی چوڑی جاگیر، ٹیکس سے بچایا کالا پیسہ اور بہت کچھ آیا تھا۔ زندگی میں اس کے باپ نے بچوں کو ایک پیسہ خرچ نہیں کرنے دیا۔ اب اس کے بچے پیسہ اچھالتے کھیلتے پھر رہے تھے۔

پتا نہیں ایسا کیوں ہوتا تھا۔ وہ سابقہ دو تین دن سے یہی سوچ رہی تھی کہ سیم لالچی لڑکی نہیں ہے،وہ خود غرض بھی نہیں، لیکن ہر دولت مند آدمی کی طرف وہ اس شدت سے کیوں لپکتی تھی۔ وہ کس قسم کا انتقام لے رہی تھی آخر؟

آج بھی کل کی طرح اس نے ایاز کو مایوس کیا تھا۔

ڈریسنگ ٹیبل کے سامنے نہایت دھیان سے تیار ہوتے، کانوں میں ایئررنگ پہنتے ہوئے، اس شخص کے بارے میں تازہ ترین اطلاعات سیم ہی اسے پہنچا رہی تھی کہ اس کی جاگیر کہاں سے کہاں تک پھیلی ہے۔ ان کے پاس کون کون سی جیپیں ہیں۔ وہ جب بھی مری آئیں تو کہاں ٹھہرتے ہیں۔ وہ لمحہ بھر کو بھی چپ ہوتی تو مینا پوچھتی کہ اسے کیا کرنا تھا ان سب کا؟

اس نے تیاری میں بےحساب وقت لگایا۔حالاں کہ ان دنوں وہ اتنی بیمار تھی کہ دعوے کے مطابق اسے سب کے سب دن بستر پر ہی گزارنے تھے لیکن وہ ڈریسنگ ٹیبل سے اٹھی تو بیماری کے رنگ کہیں دور دب گئے تھے، مناسب رنگوں کے حسن سے خیرہ کرتا چہرہ، جھلملاتے چمک دیتے دانت، بال بال سنوارا ہوا سیاہ سر۔

وہ اٹھی ،پلٹی اور روانہ ہوئی۔ یتیم اس کے پیچھے پیچھے تھا، دونوں ہاتھوں سے دل تھامے۔

وہ ابھی تک بیٹھی ڈر رہی تھی کہ کہیں پی سی میں اس کی ملاقات ایاز سے نہ ہو جائے۔ اس کی سازشوں کی مخالفت کرنے کے باوجود وہ خود بھی ان سازشوں کے گرداب میں پھنس جاتی تھی۔

’’کوئی ڈاکٹر صاحب کھڑے ہیں نیچے۔‘‘ زینب کے چاچا نے اطلاع دی تھی، ’’اپنی بی بی سائمہ سے ملنا ہے۔ آپ کی ممی نے بھیجا ہے۔‘‘

ممی کو بھی سائمہ کی میڈیکل رپورٹ سے بہت گہری دلچسپی نہیں تھی۔ چھوٹی موٹی بیماریاں تو رہتی ہیں۔ اسی سے لندن جایا جاتا ہے۔ پھر لوگوں کو بتانا بھی تو ہوتا ہے۔ وہ بہت مصروف رہتی تھیں۔ لیکن یہ سب بتانے کے لیے تو وقت نکالنا ہی ہوتا ہے۔

’’ہاں۔‘‘ اس نے بیٹھے بیٹھے کسی مشین کی طرح کہا، ’’ہاں لے آؤ اوپر ڈاکٹر صاحب کو اور ہاں چاچا! یاد رکھنا سائمہ میں ہوں۔ میرا نام سائمہ ہے۔‘‘

چاچا کی سمجھ میں آسان بات بھی بہت مشکل سے آتی تھی اور یہ بات تو تھی بھی کچھ عجیب۔ وہ بچپن سے دونوں کو پال پوس رہے تھے، اب اتنے احمق بھی نہیں کہ ان کو بتایا جائے کہ سائمہ کون ہے اور ثمینہ کون؟ خیر ہمیں تو مالکوں کا حکم بجا لانے سے مطلب ہے۔

’’یہیں لے آؤں کیا؟‘‘ انہوں نے سستی سے پاؤں پسارے بیٹھی مینا کو حیرت سے دیکھا۔ عمر گزارنے کے باوجود وہ اس لڑکی کو سمجھ نہیں پائے تھے۔ وہ اپنی بہن سے اس قدر مختلف کیوں تھی آخر؟

’’ہاں چاچا! یہیں اسی جگہ۔‘‘

اس نے مزید پاؤں پھیلاتے ہوئے سوچااب اسے کیا کرنا ہے۔ بستر پر پڑ کر ہائے ہائے کرے، کراہے، روئے۔ لیکن پھر یہ ڈرامہ اسے بھونڈا لگا۔ ایکٹنگ اس کا شعبہ نہیں تھا۔ اس میں راز فاش ہونے کا خدشہ بھی زیادہ تھا۔

چاچا کے قدموں کی چاپ لکڑی کے فرش پر ٹھک ٹھک کرتی گونجی۔ ذاتی طور پر وہ مردوں کا داخلہ لڑکیوں کے کمرے میں پسند نہیں کرتے تھے لیکن وہ دو قدم رک کر کھڑے ہو گئے۔ چپ چاپ۔