آغاز_بہار

(۱)

میں بیٹھ گیا سبزۂ گل زار پر اک روز

مرغان خوش الحاں کی ہر اک تان تھی دلدوز

کیفیت دل ایسے میں ہوتی ہے جنوں خیز

بن جاتے ہیں جذبات خوشی کے بھی غم انگیز

(۲)

قدرت کی ہر اک چیز میں تھا حسن دل آرا

دل شاد ہوا دیکھ کے یہ جلوۂ زیبا

لیکن یہ ذرا سوچ کے پھر ہو گیا ناشاد

کر رکھا ہے انسان نے انسان کو برباد

(۳)

تھا جال بچھا سنبل پر پیچ کا ہر سو

تھے گردن نرگس میں گل زرد کے بازو

ہوتا ہے گزر باغ سے جب موج صبا کا

ہر پھول پہ ہوتا ہے اثر اس کی ادا کا

(۴)

مرغان چمن گرد مرے کھیل رہے تھے

کیا جانیے کیا خاص خیالات تھے ان کے

ہاں دل پہ مرے نقش ہوئی جاتی تھی یہ بات

سرشار ہیں سرمست ہیں مرغان خوش اوقات

(۵)

خواہاں تھی کروں باد بہاری کہ گرفتار

پنکھا سا بنی جاتی تھی ہر شاخ چمن زار

رہ رہ کے تصور یہ مرے ذہن میں آیا

کیا لطف ہے قدرت کے مناظر میں خدایا

(۶)

ہے میرے عقیدے میں اگر کوئی صداقت

ایسا ہی اگر ہے یہ طرب خانۂ قدرت

پھر کیوں نہ ہو یہ سوچ کے دل مضطر و ناشاد

انسان نے کر رکھا ہے انسان کو برباد