pahaa.Dii par ek makaan

vo sab jā chuke haiñ

ye ghar band hai aur chup hai

ki ab aur kahne ko kuchh bhī nahīñ hai

vo sab jā chuke haiñ

ye dīvāreñ ḳhasta haiñ kohna haiñ

jin se havā saa.eñ saa.eñ guzartī hai ruktī hai

yahāñ ab to koī nahīñ hai jo

burā yā bhalā kuchh kahe

ki ab aur kahne ko kuchh bhī nahīñ hai

to phir ham bhalā kyoñ

bhaTakte haiñ aise ḳharābe meñ āḳhir

yahāñ to koī bhī nahīñ hai

jo the sab ke sab jā chuke haiñ

hamāre ḳhayāloñ kī ḳhvāboñ kī parchhā.iyāñ

sab kī sab be-amāñ haiñ

ye sab rā.egāñ haiñ

ki ab aur kahne ko kuchh bhī nahīñ hai

pahāḌī pe ujḌā huā ye makāñ

ik khañDar hai yahāñ jo bhī the

sab ke sab jā chuke haiñ

ki ab aur kahne ko kuchh bhī nahīñ hai

wo sab ja chuke hain

ye ghar band hai aur chup hai

ki ab aur kahne ko kuchh bhi nahin hai

wo sab ja chuke hain

ye diwaren KHasta hain kohna hain

jin se hawa saen saen guzarti hai rukti hai

yahan ab to koi nahin hai jo

bura ya bhala kuchh kahe

ki ab aur kahne ko kuchh bhi nahin hai

to phir hum bhala kyon

bhaTakte hain aise KHarabe mein aaKHir

yahan to koi bhi nahin hai

jo the sab ke sab ja chuke hain

hamare KHayalon ki KHwabon ki parchhaiyan

sab ki sab be-aman hain

ye sab raegan hain

ki ab aur kahne ko kuchh bhi nahin hai

pahaDi pe ujDa hua ye makan

ek khanDar hai yahan jo bhi the

sab ke sab ja chuke hain

ki ab aur kahne ko kuchh bhi nahin hai