richard cory

ye cory bhī kyā shaḳhs thā

jab kabhī shahr ke in mazāfāt meñ aa nikaltā

hamārī tarah ye saḌak ke kināroñ pe baiThe

hue log

us kī taraf dekhte the

vo sar-tā-pā kaisā sharīf nek-sīrat thā

kaisā chharerā badan thā

hamesha sharīfāna kapḌe pahantā

vo jab bāteñ kartā baḌī dard-mandī se kartā

vo jab bhī salām-o-du’ā kartā lagtā

ki hāthoñ meñ nabz us kī ab phaḌphaḌāne

lagī hai

vo jab sāmne se guzartā

to jaise koī ik chamak sī guzartī

bahut paas daulat thī us ke

shahanshāhoñ se bhī kahīñ ziyāda

daulat kā mālik thā vo

vo har taur kyā ḳhush-salīqa thā

hameñ aisā lagtā ki us meñ vo sab hai

jo ham jaise logoñ meñ

us jaisā banñe kī ḳhvāhish jagā de

hamāre shab-o-roz yuuñ hī guzarte rahe

ki ham raushnī ke liye yuuñ hī marte rahe

hāthoñ meñ aa.ī huī roTiyoñ pe

malāmat hī karte rahe

kabhī saath sālan bhī hotā

magar apnā cory bhī kyā shaḳhs thā

garmiyoñ kī suhānī sī ik raat ko

ghar gayā aur chupke se pistaul kī ek golī

sar ke us paar kar lī

ye cory bhi kya shaKHs tha

jab kabhi shahr ke in mazafat mein aa nikalta

hamari tarah ye saDak ke kinaron pe baiThe

hue log

us ki taraf dekhte the

wo sar-ta-pa kaisa sharif nek-sirat tha

kaisa chharera badan tha

hamesha sharifana kapDe pahanta

wo jab baaten karta baDi dard-mandi se karta

wo jab bhi salam-o-du’a karta lagta

ki hathon mein nabz us ki ab phaDphaDane

lagi hai

wo jab samne se guzarta

to jaise koi ek chamak si guzarti

bahut pas daulat thi us ke

shahanshahon se bhi kahin ziyaada

daulat ka malik tha wo

wo har taur kya KHush-saliqa tha

hamein aisa lagta ki us mein wo sab hai

jo hum jaise logon mein

us jaisa banne ki KHwahish jaga de

hamare shab-o-roz yun hi guzarte rahe

ki hum raushni ke liye yun hi marte rahe

hathon mein aai hui roTiyon pe

malamat hi karte rahe

kabhi sath salan bhi hota

magar apna cory bhi kya shaKHs tha

garmiyon ki suhani si ek raat ko

ghar gaya aur chupke se pistaul ki ek goli

sar ke us par kar li