budhdh purnimaa alvidaa'ii kahaanii

gautam ke paañv meñ zanjīr to nahīñ Daalī ga.ī

sirf nāzuk bel us kī gardan ke gird laTkā.ī ga.ī

phūloñ ko dekh kar jo udaas ho jaatā thā

us beTe ke liye

pesh na chalī shudodhan kī nahīñ to

rok detā vo sūraj ko Dūbne se

mausamoñ ko badalne se

apnī azānoñ ke dar par

hukm likh kar Taañg detā

pat-jhaḌ kā yahāñ aanā man' hai

zahr hotā saañp kā to chuus letā

apne beTe ke siine se udāsī

phuul jaise laal mere

jang ke sho'loñ meñ

phuul bun kar jiinā mumkin nahīñ hai

jab nāzuk bel par ek phuul khil uThā

shudodhan ne kahā

ab koī ḳhatra nahīñ

añtaḌiyoñ ke phuul ko chhoḌ kar ye ab nahīñ jā.egā lekin

vo jo murjhāte phūloñ ko dekh kar udaas ho jaatā thā

chalā gayā vo

sote āñsuoñ kī zanjīr toḌ kar

jab saverā hogā

yashodhrā ke nain bujh se jā.eñge

lekin kyā kaheñge

un kā kahnā bhī ek updesh hai

jo kisī patthar par kanda hue baġhair hī jāvedāñ hai

lekin nahīñ abhī nahīñ

abhī mere siine meñ maut kā ghoñsla hai

abhī merī āñkhoñ meñ jahannam ke alaav jal rahe haiñ

maiñ jo bhī dekhtā huuñ

dekhte hī raakh ho jaatā hai

maiñ jo bhī chhū letā huuñ

vo chhūte hī ho jaatā hai pinjar

mire hāthoñ par rakhe

chāñd sūraj chitāoñ kī tarah jal rahe haiñ

āñsuoñ kī bahtī rau

kis tarah bujhā saktī hai itnī saarī aag

gautam ke panw mein zanjir to nahin Dali gai

sirf nazuk bel us ki gardan ke gird laTkai gai

phulon ko dekh kar jo udas ho jata tha

us beTe ke liye

pesh na chali shudodhan ki nahin to

rok deta wo suraj ko Dubne se

mausamon ko badalne se

apni azanon ke dar par

hukm likh kar Tang deta

pat-jhaD ka yahan aana man' hai

zahr hota sanp ka to chus leta

apne beTe ke sine se udasi

phul jaise lal mere

jang ke sho'lon mein

phul bun kar jina mumkin nahin hai

jab nazuk bel par ek phul khil uTha

shudodhan ne kaha

ab koi KHatra nahin

antaDiyon ke phul ko chhoD kar ye ab nahin jaega lekin

wo jo murjhate phulon ko dekh kar udas ho jata tha

chala gaya wo

sote aansuon ki zanjir toD kar

jab sawera hoga

yashodhra ke nain bujh se jaenge

lekin kya kahenge

un ka kahna bhi ek updesh hai

jo kisi patthar par kanda hue baghair hi jawedan hai

lekin nahin abhi nahin

abhi mere sine mein maut ka ghonsla hai

abhi meri aankhon mein jahannam ke alaw jal rahe hain

main jo bhi dekhta hun

dekhte hi rakh ho jata hai

main jo bhi chhu leta hun

wo chhute hi ho jata hai pinjar

mere hathon par rakhe

chand suraj chitaon ki tarah jal rahe hain

aansuon ki bahti rau

kis tarah bujha sakti hai itni sari aag