آئے ہیں پارہ ہائے جگر درمیان اشک

آئے ہیں پارہ ہائے جگر درمیان اشک

لایا ہے لعل بیش بہا کاروان اشک

ظاہر کرے ہے جنبش مژگاں سے مدعا

طفلانہ ہاتھ کا ہے اشارہ زبان اشک

میں وادی طلب میں ہوا جملہ تن غرق

از بس کہ صرف قطرہ زنی تھا بسان اشک

رونے نے طاقت اتنی نہ چھوڑی کہ ایک بار

مژگاں کو دوں فشار پئے امتحان اشک

دل خستگاں کو ہے طرب صد چمن بہار

باغ بخوں تپیدن و آب روان اشک

سیل بنائے مستی شبنم ہے آفتاب

چھوڑے نہ چشم میں تپش دل نشان اشک

ہنگام انتظار قدوم بتاں اسدؔ

ہے بر سر مژہ نگراں دیدبان اشک