آنسو کہوں کہ آہ سوار ہوا کہوں

آنسو کہوں کہ آہ سوار ہوا کہوں

ایسا عناں گسیختہ آیا کہ کیا کہوں

اقبال کلفت دل بے مدعا رسا

اختر کو داغ سایہ بال ہما کہوں

مضمون وصل ہاتھ نہ آیا مگر اسے

اب طائر پریدہ رنگ حنا کہوں

عہدے سے مدح ناز کے باہر نہ آسکا

گر ایک ادا ہو تو اسے اپنی قضا کہوں

حلقے ہیں چشم ہائے کشادہ بسوئے دل

ہر تار زلف کو نگہ سرمہ سا کہوں

ظالم مرے گماں سے مجھے منفعل نہ چاہ

ہے ہے خدا نہ کردہ تجھے بے وفا کہوں

دز دیدن دل ستم آمادہ ہے محال

مژگاں کہوں کہ جوہر تیغ قضا کہوں

طرز آفرین نکتہ سرائی طبع ہے

آئینہ خیال کو طوطی نما کہوں

میں اور صد ہزار نوائے جگر خراش

تو اور ایک وہ نشنیدن کہ کیا کہوں

غالبؔ ہے رتبہ فہم تصور سے کچھ پرے

ہے عجز بندگی کہ علی کو خدا کہوں