بقدر لفظ و معنی فکرت احرام گریباں ہیں

بقدر لفظ و معنی فکرت احرام گریباں ہیں

وگر نہ کیجیے جو ذرہ عریاں ہم نمایاں ہیں

عروج نشہ واماندگی پیمانہ محمل تر

برنگ ریشہ تاک آبلے جاوے میں پنہاں ہیں

بہ وحشت گاہ امکاں اتفاق چشم مشکل ہے

مہ و خرشید باہم ساز یک خواب پریشاں ہیں

طلسم آفرینش حلقہ یک بزم ماتم ہے

زمانے کے شب یلداسے موے سر پریشاں ہیں

یہ کس بے مہر کی تمثال کا ہے جلوہ سیمابی

کہ مثل ذرہ ہاے خاک آئینے پر افشاں ہیں

نہ انشا معنی مضموں نہ املا صورت موزوں

عنایت نامہ ہاے اہل دنیا ہر زہ عنواں ہیں

مگر آتش ہمارا کوکب اقبال چمکاوے

وگر نہ مثل خار خشک مردود گلستاں ہیں

اسدؔ بزم تماشا میں تغافل پردہ داری ہے

اگر ڈھانپے تو آنکھیں ڈھانپ ہم تصویر عریاں ہیں