بس کہ ہے مے خانہ ویراں جوں بیابان خراب

بس کہ ہے میخانہ ویراں جوں بیابان خراب

عکس چشم آہوے رم خوردہ ہے داغ شراب

تیرگئ ظاہری ہے طبع آگہ کا نشاں

غافلاں عکس سواد صفحہ ہے گرد کتاب

یک نگاہ صاف صد آئینہ تاثیر ہے

ہے رگ یاقوت عکس خط جام آفتاب

ہے عرق افشاں مشی سے ادہم مشکین یار

وقت شب اختر گنے ہے چشم بیدار رکاب

ہے شفق سوز جگر کی آگ کی بالیدگی

ہر ایک اختر ہے فلک پر قطرۂ اشک کباب

بس کہ شرم عارض رنگیں سے حیرت جلوہ ہے

ہے شکست رنگ گل آئینہ پرواز نقاب

شب کہ تھا نظارگی روے بتاں کا اے اسدؔ

گر گیا بام فلک سے صبح طشت ماہتاب